قاموا الوافدين يتكبرون علينا!!!

[شمعة أمل]

اسمحيلي اختي شمعة أمل بس كلامج غلط!!!
لو يرفعون معاش العامل جان المواطن اشتغل.. و وايد من الوافدين وبالأخص الهنود ما عندهم شغل.. ماخذين ويز زيارة ويتمون علّة عقلوبنا عقب!! كلامج غلط اختي.. نسبة قليلة من المواطنين إللي فيهم خقّة!!! مش نسبة كبيرة.. ولا الأغلبية يبغون يشتغلون!!

يبون يشتغلون بس مب أي شغله *مب كلهم بس اكثرهم*
والدليل قبل لابفتحون الفرع الثاني لمطعم أبويه تمو سنتــــــــــين يدورون مواطنين يشتغلون في المطعم من ناحية طباخ ل waiter ومحد طاع يشتغل عندهم وردهم للمدير كان "ماأتانزل أشتغل في مطعم"

[ذنـيـنـي]

خلهم يتمون مكانهم محد قال لهم شي

لكن على الاقل,, الواحد لازم يحترم القوانين في الدولة الي هو عايش فيها,,

هاك اليوم كنت ويا واحد من الشباب الوافدين الي كانوا وياي في المدرسة و كنا في سيارتي
المهم الاخ استخدم الكلينكس و فتح الدريشة و عقه في الشارع,,
قلتله ليش توصخ الشارع ياخي,, قال عادي الا هي عيمان, ما يخالفون على الوصخ الي في الشارع
قمت و رديت من أول لفه, و رديت عند الوصخ و قلتله انزل و شله, قال لا ما بنزل و ما ادري شو,,

قلتله والله ما بتحرك الا يوم بتشله ولا انك تنزل من سيارتي الحين,, قام الريال و نزل و شله و عقب تحركنا,, طبعا سوا عمره زعلان بس انا تغديته قبل ما يتعشاني و بوزت في ويهه قبل ما هو يسوي عمره زعلان و فهمته انه مهما يكون انته بتم غريب و لازم تحترم البلاد الي عايش فيها عشان يحترمونك و انا صدق كنت بنزله من سيارتي لو ما طاع يشله

بعطيكم مثال اخر,, لاحظت في الاونه الاخيرة ظاهرة استخدام كتف الطريق للخروج من الزحمة, أكيد بتقولون انه الشباب المواطنين , المتهورين, الي ما يعرفون اخلاق السواقة هم الي يطلعون, لكن اقولكم (( لا ))
اكثر من نصهم من الدول العربية, و بعض الدول الخليجية الي يشتهر شعبها بالفوضى و عدم الالتزام بالقواعد المرورية..

يعني مثلا يوم الاربعاء, الي هو أول امس كنت واقف عند الـلفة U-turn و واقف حالي حال كل الي يبغون يلفون, تفاجأت بشاب من جنسية عربية يحاول يدز عمره جدامي بالقوه ( بما معناه اني بطوف غصبا عنك )
انا ما سويتله سالفة لأنه هالاشكال ادعمهم و اكسر سيارتي و لا انه يسوي الي في باله و يطوف بدون رضاي
المهم الريال سوا عمره معصب و نزل الدريشة انه يبغي يضارب,, و يقولي ليش ما بتخليني أمشي

قلتله و انته بأي حق تدخل جدامي,, قال اونه انا مستعيل و عندي اشغال مهمة, قلتله و الـ**** الي واقفين في السيد, ما عندهم اشغال, قال عندهم قلتله اوقف حالك حالهم,, طبعا سكت و ما قدر يرد لأنه لو رد علي والله لغير خريطه ويهه, خاصة انه اخويه و ولد خالي وياي و ما شاء الله عليهم كل واحد اكبر من الثاني في الحجم

طبعا في النهاية طفت انا و الي وراي ما طوفه و ولا الي وراه

الي يبغي يشوف الزلمات شو يسوون يسير كورنيش البحيرة في الشارجه و بيشوف العجب صوب سينما الماسة

أحيد مرة ربيعي كان يتمشى بين البنايات و الظاهر انه طاف في احد الشوارع اكثر من مرة فتفاجأ بشباب زلمات يوقفونه و يقولون له شو عندك ليش تتمشى في فريجنا و اونهم يبغون يضربونه,, ربيعي ركب سيارته و سار عنهم و هم اونهم يبغون يلحقونه و تخيلوا لحقوه الين قبل الذيد بشوي عسب يضاربونه ربيعي سجل ارقام سياييرهم و بلغ عليهم و في المركز اتهموا ربيعي بأنه متحرش بخواتهم و ربيعي أصلا مطوع و لحيته طويله و كندورته قصيرة

ما نقدر نقول انه كلهم مب زينين,, لأنه يوجد الكثيييييييير منهم زينين و نذكر لكم المدرسين الي درسونا في المدارس و المهندسين و العاملين

لكن يوجد فئة جاحده منهم و ما يسوون اي اعتبار للقانون و النظام و يتحرون اعمارهم في بلادهم

[اخت اختي]

بس مب كلهم!!! وايد ناس يبون يشتغلون.. عالعموم مشكورة عالمرور

[اخت اختي]

هيه والله اخويه.. لوعوا بجبدنا!!! عالعموم مشكور اخويه ذنيني عالمرور

[لمّــاح]

الـــسلام عــليكم ..

مــوضوعج حــــساس جـــدا، و فــي نفــس الوقت مايدل على انه كلامج صح او كلامي صــح لكن الواحد يكون حقــاني و يحكم على النـــاس بالــعقــل ..

أولا، المـــواطنين و الوافدين في النهـــاية هم بــشر، و مب الجــنسية هــي الي تحكم هل هالإنســـان هذا نذل أو خقاق أو غـــيره، شخصــية الإنســان و تركيبته و البيئة الي هو عـــايش فيها هي الي تحكم ..

يـــاما صـــادفنا وافــدين، محــترمين جــدا و خــدومــين، و العكس صحــيح، و نفس الكلام ينطبق على المواطنين ياما صــادفنا مواطنين محترمين و خدوميــن و يـــــاما و ياكثــرهم المـــواطنــين الـــي مــــافـــيهم خــــير حــتى لعـــيال بـــلادهم و هلهم !!

و انــــا عــــن عمري، الغــلط مـــا اسكت عنه لو كان وافد ولا مـــواطن و ياما بهدلت أجـــانب و انجلـــيز في المراكز، أذكر مره واحد سكران كان يــسوق و بــغا يدعمني و يدعم كمن مــوتر و شرد، لحقته و وقفته و زقرتله الشـــرطه و سحــبوه و على هذا كله بهدلته زيـــاده في المركز و غــرموه بيزات و سجـــنوه، عقب يومين في الجريدة اشــوف اعلان من الســفارة البريطانية تحذر رعـــاياها من قــيادة المركبات و هم تحت تـــأثــير الكـــحول
و مـــره امـــريكي، ســوالي حركة وصخه بإيــــده و شـــرد، بلغت عنه و يـــابوه المركز عندي شرشحته لـــين ما كــســر خـــاطري و عقب ودرته

مـــب شــطاره انه الواحد يذل غــيره، لكن الي مايحترمني في بلادي مابحترمه، بالمقـــابل، وافدين و انجليز حتى اعرفهم محترمين بشـــكل ماتتخيلونه و مرابعنهم عــــادي، أكــبر مثـــال اربيعنا الالماني ( حتى اني عرفته على ذنيني و كلكوووش )

و المــواطنين بعد، ساعات اييج مــواطن يدور راحته على حسـاب راحة النـــاس حتــى الشــــواب يطلــعون من عنده و دموع القهـــر على خدهم من الي يستويبهم !!


بالمختصر المفيــد، مب الجنــسية او البــلد الي ينتمى اليها الانسان هي الي تحدد هويته و شخصيته، إنــما كــل انسان له شخصيته المستقلة عن باجي النــاس، حتى الاخوان مستحيل يتشابهون، يمكن تحصلين اخو ملتزم و الثـــاني صـــايع ضــايع !!

و على فكرة، نحن الحمدلله شعب طــيب جــدا، و وايد أجـــانب يوم يعاشرونا فتره تتغير نضرتهم للعرب و لنا بشكل خـــاص و يحبونا بشكل غــريب، كـــأنها نعمه انعمها الله علينا .. الحمدلله :)

---

رد على تعــقيب الاخت شمعة أمــل، بالعكس هناك مواطنين يشتغلون في الوضايف الصــغيره هاذي لكن العدد قـــليل و الوضايف كثــيره، هــاذي اول نقــطه ..

ثانيــا المواطنين ابدا مافيهم خــقه، يمكن قبل هيه لكن الحــين الوعي زاد و الادراك و الحس الوطني و الغيره على الوطن هالاشيا كلها موجوده و شبابنا في الوقت الحـــالي ماسكين أهم المناصب في الدولة ..
مثــال بســيط، القـــائمـــين على ســوق دبــي المــالي (( الموظفين يعني في المقاصة و الإدارة مثل الموارد البشرية و ال IT و باجي الاقســام )) 90% منهم شــــباب من عــمرنـــا :)

السموحه عالمداخلة ^_^

[المقاتل]

مرحبـــا :: .. انا ييــــــت .. ::

دايركت بدش في الموضوع

:: .. - بالنسبــه للوافـدين الموجوديــن لدينـا في الدولـه ، توجـد اقليـات فقـط بالفعل نحترمهم ونقـدّرهم وهم من يحترموننـا كمواطنين وكعرب .
ولكـن في نسبـه ملحوظـه من الوافـدين ، إلي ما نسكت عنهم وإلـي يستغلون طيبـة هل الامارات لمصلحتهم الشخصيـه قامت اتزيــــد بالفعـل وعن نفسي لو شفت زلمـه ماخذ حقي لي اسلوبي الخاص .

بس بصراحه من بين الردود إلّي تثير أستغرابي حبيت أشير إلى نقـاط اناقشكم بهـا ، اذا كنّـا نحن المواطنين من أهل هذا الوطـن الغالي ونرا شيئـا ضد قانون هذا البلد والذي كما يطبـق علينا يجب أن يطبّـق عليهم ، فلمـا الصمـت في المقابـل ينهبون من خيرات وطننــا .. !!

:crosseyed مثل ما قالوا ( لفلوس تعمي النفوس ) والزلمـات يشوفون بيزاتكـم ( عندكم أحلى ضحكـه ) ما عندكم أحلى ضـ *** ( الله يعزكم ) .

أمّـا النقطـة الاخرى .. يمكـن لأن الوافدين مصالحهم الشخصيــه ما تتعارض مع مصالحكم انتوا ، فعسب جذه اتشوفون منهم الحب والحنان ، بس لما بتشتغــلون وبكون مديركم وافـد ، ويوم بعاملكم هاييـــج المعاملــه ساعتها بتقولون شو هايييل الوافدين ماكلين خير لبلاد !!

والنقطـة الأخيرة ، وإلي حبيت اوضحها لكـم ، إذا ما قللتوا من نسبة الوافدين ، عقب الامارات بتغدي مثل استراليا ، سكانها الاصلين فقـط نراهم في التلفاز وكيف كانوا يعيشون في الماضي ، وفي نفس الوقت بتشوفون مواطن ( 1 ) في السنه ( هيهيهيهي ) .

كلمــتي .. إلى من يشجعون من زيادة نسبة الوافديـن ، ويسكـتون عنهم ، ترا الدنيـا دوّاره ( إذا هب لكـ إنت ترا عيالك بينضرون ) وكلـن يالس على كرسيـه اليوم باجر عيال عياله بيتمنون هذا الكرسي إلى يدهم العود الساذج يلس عليه .

أخت أختي .. أنتي كــده ولا تسكتين عن الغلـــط .. اتمنى لج التوفيق والفلاح .

[الملهم]

الحينه الزلمات والهنود يتكبرون علينا ..
امنو باقي ....

صار دولتنا دولة متعددة الجنسيات .. وليست الامارات ^__^

اللهم احفظنا من المستقبل .. واعن شيوخنا عليهم

[تحفه]

تعقيبا على كلامج على شمعة امل : بالعكس اشوف الشباب مستحيل يشتغلون شغلات الهنود ويحصلون نفس معاشهم ؟!!!؟

واصلا ما يباله كلام

الكلام كله يناقش ويحل عمره في العنوان ..

التكبر مرض ناتج عن احساس بالنقص .. ف الواحد يتكبر و يتصرف بشكل مب زين لانه يالس ينافق عمره عشان يرضي نفسيته ..

هي السالفه مب سالفة وافدين و مواطنين .. سالفة ( نفسياتهم )

شي مواطنين بعد جي و شي وافدين ..

بس الوافدين لهم عذرهم أقوى .. و المواطن ماله عذر

انتي روحج قلتي وافد ( يعني اساسا - بغض النضر عن اصالته وتربيته - ياي يستفيد ويروح ) مب مواطن ( يبني بلاده ) !!

[المزوحي]

اسم الموضوع قاموا الوافدين يتكبرون علينا !!!
لكن اخونا الملهم تكلم عن نقطة وهي المسوؤل الوافد ..
بضيف نقطة وهي إنه مسوؤلي وااافد دووم يقول المواطنين ( كسالى ) ومايحبون يشتلغون
ولا يلتزمووون مع إنه الشي ينطبق عليه لكن الفرق بيني وبينه إنه هو يداوم بالخميس
( عسب أوفر تايم ) فالغير يشوفه إنه فعلا هو شغووول ...
ودايما يحط على المواطنين ورديت عليه مب كلهم نفس الشي

وحبيت أضيف ام خدود .. إنه مب قضية الوافد يحس إنه ياي من بلاده في بلادنا يحس بنقص ..
حتى نحن يوم نسافر عندهم يعالمونا بجفوة عسب نحن من الخليج ...

[المقاتل]

:: .. ام خدود .. :: .. المعذره على المداخلــــه .. ::

بس الوافدين لهم عذرهم أقوى .. و المواطن ماله عذر ( لوافد شو عذره ؟؟ )

انتي روحج قلتي وافد ( يعني اساسا - بغض النضر عن اصالته وتربيته - ياي يستفيد ويروح ) مب مواطن ( يبني بلاده ) !!

يعني إيي الوافـد لبلاد و ياخذ خيرها ويعطيها ما يعطيها ( بدل ما يستفيد وينفع ) يقطع أرزاق ناس .. و يبهدل الدنيـــا .. أصلا يا ناس .. المواطنين لهم عقول .. الوافدين ما يمتلكونها ( الوافدين يايين عسب يحطون سلـّم لكيفية الصعود والتطور فقـط < وهذا كان كلام زمان > ) .. وهم دامرينها دامرينها ورمستوا ولو ما رمستوا .

[قرموشة]

اممممممم ,, من رايي ,, انه الوافدين مب كلهم جييه ,, بس في منهم تصرفاتهم تقهر الصراحة ,,
وبعدين لا تسيرون بعيد ,, ياما شفت ناس ومن عيال البلاد بعد ,, يسوون هالحركات وما يهتمون ,,
ومثال ,,

كنت واقفه عند ستار مارت ايام الامتحانات ,, وحصلت واحد في سيارته.. فتح الباب ,, وحط جيس وفيه غرشه بيبسي.. وغلاف شفاف مال الساندويش ,, والصراحة استعيبت من الموقف ,,
يعني هذا واحد من البلاد وجييه ,, عيل الوافد شوو بيسوي ,
المهم ,,
المفروض الواحد ينقهر من هاي التصرفات بغض النظر اذا كانوا وافدين أو من عيال البلاد ,,

كل الود ,,
قرمــــــــ ـ ـ ــــــــوشة

[تحفه]

:: .. ام خدود .. :: .. المعذره على المداخلــــه .. ::

بس الوافدين لهم عذرهم أقوى .. و المواطن ماله عذر ( لوافد شو عذره ؟؟ )

انتي روحج قلتي وافد ( يعني اساسا - بغض النضر عن اصالته وتربيته - ياي يستفيد ويروح ) مب مواطن ( يبني بلاده ) !!

يعني إيي الوافـد لبلاد و ياخذ خيرها ويعطيها ما يعطيها ( بدل ما يستفيد وينفع ) يقطع أرزاق ناس .. و يبهدل الدنيـــا .. أصلا يا ناس .. المواطنين لهم عقول .. الوافدين ما يمتلكونها ( الوافدين يايين عسب يحطون سلـّم لكيفية الصعود والتطور فقـط < وهذا كان كلام زمان > ) .. وهم دامرينها دامرينها ورمستوا ولو ما رمستوا .

مشكلتي مشكله في العربي .. والله يوم اعبر يبالي يوم كامل لين ما اوضح انا بالضبط شو اقصد .. بنتحر

قصدي .. المواطن يوم يبني بلاده ويبني وطنه .. يحط في باله انه الاستثمار بيكون طويل الامد ( مب طويل الامد .. اقصد يوم يسوي شي يحط في باله ان هذا حق عياله وعيال عياله وعيال عيال عياله ) .. ويعرف انها بلاده فبتالي بيحافظ عليها اكثر من الوافدين ( لأنهم يايين بالاساس عشان يفيدون عمارهم قبل لا يفيدون البلاد الي يايين لها ) وبالتالي معذورين اكثر من المواطنين اذا غلطوا ( طبعا مب قصدي معذورين يعني نعذرهم اذا سوو شي غلط .. *بل* يعني لهم good reason بس المواطن ولد بلاده اذا غش و نشر الفساد فيها * * ماله عذر

وبعدين الوافد ما قطع ارزاق الناس !! .. منو الي يابه نحنا ولا هوه عشان تلومونهم؟ .. ترا الي يابوه منكم وفيكم شو بعد ؟!! ويابوهم عشان نستفيد .. بس كالعاده نحن طُلاب دلاليع .. يراكضون ورانا ونحن نتافف منهم ( هاذا الـ fact life ) لو لاحضتوا

والسموحه

هيه صح اذا ما فهمتو شي بعد قولولي عشان اوضح :ghostface

[تحفه]

ليش تحاسبونهم على هالـ actions ?
ترا عيالنا بعد يعقون الغراش و يكسرّون المدارس و ويتاخرون على دواماتهم و يسوون بلاوي؟ ليش ما تحاسبونهم ؟

والوافدين .. هم مب غلطانين يوم يتمادون لأن نحن الغلطانين وساكتين عنهم !!

فلو يتهم نشرات من قنصلياتهم وسفاراتهم بامر من حكومة الدوله بيلتزمون فيها ..

واذا عن طاري العمّال الي يسوون مشاكل و يسرقون ويسوون جرايم .. يالله يمعوا الشباب الي ترمسون عنهم * عشان يكونون مكانهم *


هاي حال الدنيا .. وخاصه مع العولمه الي صايره ..

صار اغلب الناس .. تعيش في بلاد مب بلادها .. وتحسونهم اذا ردو ما يحسون ان بلدهم الوطن بدلهم الحقيقي !!

ام خدود تدعوا الى السلام و المساواه ( المساواه بـ اعطاء المواطن والوافد حقهم ) .. وما تعاملون الناس على حسب الاعراق و الديانات و اللغات و الالوان والجنسيات


والسموحه

(هاي خطبتي ليوم الجمعه )

[ناصر الخالدي]

في البداية تحية حب واحترام لكل من شارك في هذا الموضوع الحساس الذي عرضته أخت أختي ولكن .......الى متى ونحن نتكبر على هؤلاء الوافدين وكأنهم ليسوا بشر فهناك من يستخدم كلمة زلمات وهنود بقصد الإحتقار .........والحقيقة انهم يملكون الكثير ونحن لا نملك إلا القليل وانا لا اقول أنه لا يجب محاسبتهم بل على العكس تمامـًا يجب أن نحاسب ولكن من يحاسب ابن البلد ............

الحل في هذا الموضوع يكمن من المواطن نفسه فالوافد لولا المواطن ما دخل الى البلاد وغير ذلك تجار الإقامات وهذه مشكلة صعبة وخطرة ويجب إبادتها ثم الأولى نشر الوعي ومراقبة الجميع فالمواطن المخلص هو الذي يغار على بلده واعجبني ردة فعل اخت اختي تجاه ذلك الوافد السوري فهذه ردة فعل سليمة@@@@

ملاحظة أتمنى مناقشة الموضوع بكل انسانية وعدم الإنحياز والتجرد من العاطفة ومحاسبة المواطن قبل الوافد .......

اكثر الذين يتسكعون في الأسواق هم المواطنين والوافد يجمع المال

اكثر الذين لا يحترمون قوانين المرور هم المواطنون

اكثر الذين يمشون بالواسطات هم المواطنون

الوافد عندما يجد ابن البلد غير حريص ماذا يفعل ؟؟؟

أخيرًا ( لو لا التعاسة ما خرجت من بلدي )

[المقاتل]

يعني إلي فهمته من بعض الردود .. إنّـا نسكت إذا غلطـوا الزلمـات لأن شبابنا غلطوا .. لأن هالشي من المساواة .
بس إذا اشتكوا علينـــا .. لازم انعرف إن هذا من حقهم !!
بس إذا سرنا بلادهم لازم نحترمهم وبالمقابل إييّون لبلاد ويوصخونها ونحترمهم !!
ولأن لمواطنين ياييبين الوافديـن .. لازم نعذرهم !!

نعم من المساواة معاملة الجميــع بالعدل .. !! عسب جذه 90 % من لمواطنين مديونين .. !!