:: .. الشبـاب في الخـارج .. ::

[المقاتل]

.. ربمـا قـد تصلكـم الاخبـار أو من بين الحديث " السـوالف " أخبار الشباب الذيـن يدرسون في الخـارج وقد تصـادفكم قصص مفرحه وقصص محزنـه في نفس الوقـت وبعضها صحيح والأخرى إشاعه .

ولكـن تعالوا معـا نستمـــع الحديث الذي يجرى في " ميلس " الشباب !!

" : يا ريـــال اقـولكـ هاي سالفه طايحين فيها 2 مواطنين ؟؟

"" : جيـــه .. شو بلاهم ؟؟

" : الله يحفظكـ يقولكـ كانوا سايرين واستراليا ( وبرضاهم ) وعزك الله سكروا وياهن ووقع المحظور .. عسب اشتكن الاستراليات من المواطنين بأنهم مغتصبينهم ؟؟

"" : لا حول ولا قوة إلا باللــــه .. دواهم .. محد قالهم ياخي سيروا خربطوا .. !!

" : بس تعرف شو المشكله ؟؟

"" : شو المشكله ؟؟

" : يقولكـ في القانون الاسترالي .. اذا واحد مغتصب وحــده يحكمون عليه سنتين .. بس هاييل حكموا عليهم مؤبــــد .

"" : ول .. !!

" : الواحد ما يقول غير الله الحافظ ..

""" : عيــل سمعت عن سالفــة الحرمه ؟؟

" : إي حرمه ؟؟

"" : اللهم المستعان ؟؟

""" : الله يسلمكم هاي مسلمه كانت تبا تدخل الباص .. بس ما طاعوا يبطلولها الباص .. وبعدين .. بطلوا الباب وعقب ضربوها ضرب اللذين كفروا .. لمـا طاحــت على الارض ولا حـــد طاع يسويلها إي شي !!

" : وشو صار فيها ؟؟

""" : عقب يت الاسعاف وودوها المستشفى .. و بس كتبولها إعتذار خطي ..

" : صدق انهم اولاد حرام ..

"" : عيل بخبركم سالفة المغربي .. يالحبايب .. هذا مغربي كان ماشي في حالـه عند النهر .. وعقب يوا استراليين .. وضربوهم ضرب .. وتموا يضربونه .. وعقب فروه النهر .. ولأنه مضروب وتعبان ما قدر يسبح .. وتم يصارخ ..Help Help .. لما غرق .. بدون إي اعتبار !!

..

مغـزى هذا الحديث وهـدف كتابة هذا الموضوع ؟؟ إني لا أتعجـب من اللذين يحبون الغـرب .. و يقتدون بهم وبينمــا اخوانهم يقتّـلون ويعذّبون ويسجنون .. إلا إن المقابل من حبايبنا بعض المسلمين وربما اغلبيتهم .. البهجه والضحكه والاكرام البالغ .

لو علمتم وعشتوا واقع الحـال فالخارج .. للـ :: لعنتوا والدي الاجانب في البلاد ::و رأي عنهم أنهم أقذر مخلوقات الله .. !!

ولكــن لأســف الشديد .. و الحزن يملئ قلبي .. فإن من بين حديثنـا .. تحدثنـا عن احوال المواطنات وبكـل أسف .. من الخطأ الشنيع تركهم لحالهم في الخارج .. فقد قال الرسول صلى الله عليهم وسلم .. ( كلكم راع وكلكم مسؤول عن رعيتـــه ) فإين سيذهب الأب من مسؤولية هذه الفتاة التي تركها وتخلى عنها في الخارج ؟؟
وسلمتم وحفظ الله شبابنا وفتياتنا من كل حاقد وظالم

.. المقاتل ..

[رحيل]

صدقك والله ...الله يهدي ويصلـــــــــــــح حال أمتنا ..وإذا ع المواطنات أنا أظن ان مب حلوة في حق اي وحدة انها اتغرب عن اهلها بس عشان دراسة ..لأن اخر شي مصيرها محدد(بيت ريلها لا محالة)..أما الشباب برايه خلهم يسافرون بس أكيييييييييييد بحدود ولا ينسون عمارهم وااايد أحسن لهم ..
تسلم أخوي المقاتل على هالموضوووع ..

[أمواج]

الســـلام عليكم . . .
الشبــاب يستــاهلون اللي يستوي فيــهم . .
هم سايرين يدرســون ولا شو . . .
. . .
الله يحفظهم بــس . .

[العنكبوته]

السلام عليكم والرحمه عليكم


بالاول احب اشكرك اخوي المقاتل على طرحك هالموضوع

لاني انا شخصيا واجهت هالمضايقات من الغرب لما كنت ادرس بالخارج وكنت انضرب في بعض الاحيان بس لاني محتشمه والوقايه على راسي بس للصبر اخر والحمدلله رديت بلادي بكرامتي اكمل دراستي فيها

ومااقول غير حسبي الله عليهم

والله يحفظ اخوانا واخواتنا من كل شر امين يارب


العنكبوته

[حبوبه دبي]

كلااامك فـي محلــه ياخــويه

وللأســف الشديــد ،،

شــرات مــاقلت !!

أين سيذهب الأب من مسؤولية هذه الفتاة التي تركها وتخلى عنها في الخارج ؟؟


شـو بنقــول بــس !!

الســوالف اللي قلتهــا صدق اتضــايج الوااحد ،،

والسمــوحه

[الثعلب الرمادي]

شي ماكان على الحسبان أبدا أخوي المقاتل و هو الملل الرهيب في أوروبا أنا مادري هذيلا االناس كيف عايشين يعني مافي مراكز للترفيه و لا أي شي في يمكن ثلاث أشياء بس هي الشقة الجامعة و السوبرماركت أما التلفزيون فهو كارثة حقيقية من الملل الرهيب يوم بعد يوم أحس إني بديت أفقد أعصابي.

أستراليا أعتقد إنها مكان حلو للدراسة في مراكز للترفيه و الدراسة حلوة و ظريفة أكثر من ألمانيا ... بخصوص القصص اللي سردتها أخوي فأعتقد إن أغلبها صحيح مب أشاعات و تقدر تتخيل كل شي بعدها و أكثر يعني الشباب يمكن من الملل سووا هالأشياء :)

ماعندي ربيع و لا ربيعة أنا بروحي هناك و أحس بملل رهيب و و لهذا السبب صرت أدخل المنتدى كل يوم و أدخن طول الوقت و أكثر الشباب اللي معاي فلتت أعصابهم حتى واحد منهم وصلت معاه لآخر مدى رمى الكتب و سار الملعب و تم يعلب خمس ساعات و رجع اليوم الثاني للكلاس معصب و صارت مشاكل ... شو أقولك يا المقاتل أنا الحين صرت أفكر أخربها بالكامل و أسوي شي ما سويته من قبل يحرق لي أعصابي بالكامل مثل ما سوا ربيعنا في الملعب و لا شورايك :)

[الثعلب الرمادي]

قلتي يضربونكم في أستراليا و ساكتين؟!

آخ لو أنا عندكم بس ... إللي في أبوه خير خله يسويها هنيه في ألمانيا يعني أنا أعصابي على الحافة و بعد أنضرب هذا كبيرة من الكبائر :)

بمسح في الأرض هو و ربعه حتى يتذكر حليب أمه شتيفاني بنت شنايدر

الريال الحقيقي ما ينضرب و إذا انضرب يرد بشكل قاسي و عنيف على هذي الإهانة هذي هي القاعدة رقم واحد اللي تعلمتها من مدينتي العين :) (خلك ريال)

[المقاتل]

:: .. رحيــل .. ::

صدقتي اختي الكريمــه .. البنت هب حلوه انها اتسافر للخـارج .. << نصيحه من مجرب .

وخطر إذا كانت من غير محرم

والشباب .. الله يحفظهم المفروض يسوون مركز لرعاية الشباب بين فتره وفتره يتطمنون عليهم

تسلمين على مرورج .. اسعدني حضورج

:: .. المتفيزره عالعرقوووب .. ::

احيـانا.. واغلب الاحيان .. عفاني الله واياج .. يوصلون شباب عمارهم حول 17 .. يندمجون مع هذا المجتمع المدمر .. ويعيشون إلى ما يقارب الـ 4 سنين .. إلا من رحم ربي .. ناس ترجع كما كانت وناس ترجع متحطمه نفسيا ودينيا .

ثبتنا الله واياج على الدين

شكرا على تواجدج الجميـل


:: .. العنكبوته .. ::

الحمدالله على سلامتج يالشيخه من هاييل الاوغاد ابناء القردة والخنازير .. والله افتكيتي من بلوى عوده .. وهاي روحها نعمه يوم رديتي لبلاد بخير . اشكرج على تواجدج الجميل

:: .. حبوبه دبي .. ::

هاذي ابسطها من سوالف .. والسوالف ابد ما تخلص لو اليوم لما باجر

بالفعل سوالف اتضيق صدر الواحد

ما نقول غير الله يحفظ امة محمد
اشكرج على تواجدج وتعقبيج الجميل

لي عوده ما اخوي الثعلب الرمادي

[أمواج]

الثعــلب الرمـــادي :
أفهــم من كــلامك إنه الملل هو السبب اللي يخلي الشبــاب يتجهــون لهالطريــج ؟؟. .
......................
أخوي أنــا اعارضــك في هالشي . . عمره الملل ماكان السبب . .
ولكن من الشــاب نفســـه . . كان بإمكــان الشاب يسوي لنفســـه جدول يمشي عليـــه . .
وينظمـ وقتــه . . يعني مثلا وقت للدراسه . . وقت للريــاضه . . وقت للنــوم ووقت للحواطــه ...,etc
الشــاب بروحـــه يعيّــش نفسـه في ملل . . يعني مستحيل مافي مراكز ترفيه . . .
عيل غريبه النــاس من يجرب الصيف سافروا اوروبــا ؟؟. . لانه يعرفوون شو فيهــا من الونــاسه والترفيـــه . .
.........................
شتيــفاني بنت شنايــدر
لوووووول . . والله ضحكتنــي . .

[أمواج]

بعديـــن تعالوا نحن كنــا نتكلم عن الشبــاب . . أشــوفكم جلبتوا عالبنيــات
؟؟؟؟؟
وبعديـــن ماأشووف سفرة البنــت للخارج فيها شي . . بشرط يكــون وياهــا محرم . . .
ويامــا بنات ردن مثــل ماسارن محافظــات على عمــارهن . .
يعني الغلط بيستوي من الشخص نفســه . . واذا يبــا يغلط بيغلــط حتى في بــلاده
ومابيــرده شي عن الغلــط . .

خلونا اول شي نتكلم عن الشبــاب

[شمعة أمل]

غريبه كيف تنسون تذكرون الأشيا الزينه الى تستوي..

ولا مره في حياتي سافرت بلاد اجنبيه وعاملوني بطريقه بايخه .. دايماً يعاملونا بإحترام لانه في الاخير هم الى يمثلون دولتهم ومايبون يعطونا فكره بايخه عنهم .. حتى امريكا الى هي امريكا يوم نسيرلها راحه على الآخر..

بالنسبالي احس انه عادي البنت تسافر برع للدراسه .. البنات وايد يرتبكون ويهتمون في الدراسه 50 مره اكثر عن الشباب.. البنت مابيكون عندها وقت فراغ يخليها تفكر تسوي اشيا مب حلوه .. بتمضي وقت فراغها في اشيا احسن

الشباب همهم being cool بس البنات همهم درجاتهم وراحتهم اكثر..


وبكل صدق وصراحه .. مافي أبو بيخلي بنته تسافر تدرس برع الا لو هو متأكده 100% انه بنته سايره عشان الدراسه

[تحفه]

ذكرتوني مره كنت سايره وي ابويه بوظبي وفي الدرب اتصل واحد ( ريّال ) يصيييييح ويترجا ابويه إن ما يخلي ولده ( الوحيد ) يتزوج استراليه ( الولد مطرشينه يدرس في استراليا وحب له استراليه وتزوجها ) وكان يترجا ابويه ان ما يخلونهم يعرسون .. وحليله اتخيلو ريال يصيح على ولده الوحيد .. قال طرشته يدرس عشان يستوي احسن الناس .. الحين بيرد لا من شهاده ولا من شي .. ظهر ولده ساحب اوراقه ويصرف على حبيبت الألب .. اربع خمس سنوات راحن في الهوا

يعني والله مرات تسمعون قصص اتعور القلب .. وعلى فكره العلاج مب بأنهم ما يسمحون للبنات بتكميل تعليمهم برع .. العلاج في تربية قوية .. لازم يعاملون اليهال من صغرهم على انهم يتحملون مسؤولية عمارهم ويفكرون صح .. عشان يعرفون كيف يتحملون مسؤولية عمارهم .. شرات ما المصاروه اتعلم يهالهم .. مبلتعين وفاهمين مستوعبين العالم .. مب يهالنا همهم بكومون ونتدندوو و اقبض ونت رايح !!

انا وايد مثلا مش عايبتني طريقة ماما وبابا في التعامل وياي .. كله يعتبروني ياهل لدرجة اني اكتشفت اني صرت اتكاليه وماعرف اتخذ قراري بنفسي

[إسهر معي ليله]

السلام عليكم

سالفة الشباب اللي سكروا،، اشوفهم يستاهلون اللي صار لهم،، بس انه ينحكم عليهم مؤبد وغيرهم سنتين! ،، فـ هالشي ما ينسكت عنه اذا كان صدق

مسلمة انضربت فالباص والمغربي،، تصير وايد،، كفار وحاقدين عالمسلمين،، مب الا من احين من زمااان هالشي موجود

اصلاً معروفه بلاد الغرب،، حتى لو فيها ناس يحترمون سياحهم بس في المقابل فيه ناس حاقدين،، وهالفرق اللي بينا وبينهم

في بلادنا يعيشون بأمان يحلمون يحسون به في بلادهم،، اما احنا ما بنحصل هالأمان في بلادهم الا في اوقات محدده واماكن معينه،، يعني فيه مناطق ماتقدر تطلع فيها المسا!! ،، اما عندنا تنام متطمن حتى لو باب بيتك مفتوح

عالعموم من ناحية الضرب فما اعتقد فيه واحد بيي بيضرب وبسكت عنه! بس اذا السالفه فيها سجاجين ومسدسات،، اكيد ما بقدر عليهم

البنت تدرس برع تروح ويا محرمها،، مافي ابو يرضى انها تكون روحها 100% ،، واحسن لها تدرس فالبلاد،، فيه جامعات وكليات الحمد لله،، ومب هااك الزود الفرق بينا وبينهم،، عدا ممارسة اللغة

اتعرفي على فلبينيه ولا رابعي البشكارة ورمسوا انجليزي خخخخ

واللي بيخترب،، بيخترب حتى لو هوه فالبلاد،، بس ما انكر انه الجو في بلاد برع يساعد عالملل وخصوصاً اذا مايعرف حد هناك او عايش ما عايله غريبه،، ومافي شخص ما يحن لـ بلاده،، والملل يسوي بلاوي خصوصاً بوجود الشيطان

هذا رايي// تسلم عالموضوع اخوي

[الثعلب الرمادي]

المتفيزره عالعرقووب ...

أختي إنتي تتكلمين من الإمارات و من بيت أهلج و تشوفين ربيعاتج و تكلمينهم كل يوم ما تحسين باللي يحس فيه شخص عايش لوحده 24 ساعة سجن إنفرادي لا شو سجن إنفرادي هذا مؤبد يدرس طول اليوم و يوم يفتح التلفزيون ينقهر أكثر كل يوم البرامج نفسها و الناس نفسهم و كل البرامج قديمة و صلاحيتها منتهية و إذا حظه كان حلو يشوف مباراة المحترفين في البلياردو و يفرح و اليوم الثاني يغسل ملابسه و ينشفها و يكويها و يمسح الأرضيات حتى تلمع و يكنس الشقة بالطول و العرض إنتي ما تسوين هذا الشي فبيتكم كل هذي الأشياء تسويها البشكارة بس أنا ماعندي بشكارة و هذا الشغل اللعين ياخذ وقت مب هين.

باكيت المارلبورو بــ 17 درهم هذا كلام و المصيبة الكبيرة مافيه عشرين زقارة فيه بس 17 إنزين ليش ... اللي قص عليكم و قال لكم في مراكز ترفيه في أوروبا أنا أقوله مافيه غير الخمارات و نوادي التعري و كازينو القمار و هذا الكوفي شوب إللي أكتبه منه لكم و سلامة تسلمكم الناس هنيه تشتغل طول الوقت و اللي يمل يسير للخمارة حتى ينسى همومه و يرجع اليوم الثاني بكل نشاط و حيوية لممارسة شغله و هكذا هي دورة الحياة في ألمانيا.

السوبر ماركت ما يبيع غير صابون نيفيا إنزين إللي يريد صابون ثاني شو الحل؟ ... كل سوبر ماركت عنده صابون غير و عدد أنواع الصابون في كل السوبرماركتات ما تتعدى الستة لا أكثر و لا أقل ... و اللي ما يعجبه ماله غير جل الاستحمام و هذا يقهرني صح و أكره استخدمه.

من الملل صرت أطلع الدرجات الكاملة في الامتحانات و أجاوب على الأسئلة الصعبة في الصف و صاروا الشباب يسؤلوني شو تسوي يوم تكون فاضي أقول لهم أذاكر لأني لو ما ذاكرت مافي أي شي ثاني فإيدي أسويه أنا أقتل الوقت بالدراسة و في نفس الوقت الملل يقتلني على الطرف الآخر.

الشباب يوم يكونون فاضيين و حتى يرفهون على أنفسهم يسيرون للديسكو و يتمون يرقصون هناك و يشوفون البنات الحلوين و طبعا هذيلا ناس أغبياء يمكن الديسكو يكون مسلي لكن توفير الفلوس لباكيت مارلبورو و المذاكرة طول اليوم هو أحسن حل من وجهة نظري طبعا.

بس أخلص شغلي في هذا المكان الحقير و أرجع للعين و باكيت المارلبورو بـ 6 دراهم و و تقدر تدخن من اليوم حتى آخر يوم في حياتك.

" في العين تبدأ الحياة الحقيقية"

و تقبلوا تحياتي :)

[زمان أول]

مرحبا باخوي المقاتل

اولا اوجه لك التحيه ع هذا الموضوع الي صدق يصادف الشباب الي فالخارج ... لاني سرت وجفت بعيني ...

بس الواحد لازم يتحذر لانه هب فبلاده والله يحفظكم من كل سوء وتيك كير عاد لا تسير تتمشى اروحك ...

المواطنات البنات لا تقولون الانفتاح والبنت لازم تكون شرات الريال .. انا ما ايدكم فهالشي البنت اروحها تسير شو هالان وين المحرم لايجوز لامره ان تسافر بدون محرم ومعروف هالشي ....... ولكن الحين نسير ونجوف بنات اروحن المهم اقول الله يهديهم واصلا الله يهدي اهاليهم كيف رضو ع هالشي البلاد فيها جامعات ع مستوى راقي جدا يعني ما يحتاي السفر ........

والله يحفظ الشباب من كل سوء........

وتحمل ع عمرك يا حسن .....

والسموحه

اخوك الكتبي