الدرس الأول في التصوير الضوئي (أنواع آلات التصوير)

[الحاضر الغايب]

السلام عليكم ورحمة الله وبركاته ...

اقدم لكم دروس مبسطة عن أساسيات التصوير الضوئي ... وإن شاء الله راح نتابع مع بعض لين ما نوصل لدرجة الاحتراف في التصوير.

راح نتطرق لوايد أشياء بداية بأنواع آلات التصوير ومروراً بالمفاهيم وبالتقنيات لين ما نتمكن من فن التصوير إن شاء الله

--------------------------

بسم الله الرحمن الرحيم ...

عنوان الدورة : أنواع آلات التصوير وكيف تختار آلة التصوير المناسبة

كلنا نحتار يوم نبا ناخذ لنا كيمرة ... شو نوع الكيمرة اللي باخذها وشو مواصفاتها وكم سعرها ووايد أشياء نفكر فيها قبل ما ناخذ كيمرة ... هذا الموضوع بيساعدك ان شاء الله انك تحدد اللي تباه واللي تحتاجه.

آلات التصوير مصنفه الى عدة أقسام في منها على حسب الحجم وفي منها على حسب الخصائص وفي منها على حسب طريقة العمل او التقنية الي تشتغل بها.

راح ناخذ تصنيف واحد يفيدنا في اختيار الكيمرة اللي بناخذها وهو التصنيف حسب الخصائص، تنقسم آلات التصوير الى 5 اقسام حسب الخصائص اللي تميزها :

1- APS أو كاميرا 35 ملم
2- مدمجة ( Compact ) أو بعدسة عاكسة أحادية ( SLR )
3- ذاتية الضبط البؤري ( Autu-Focus ) أو يدوية ( Manual )
4- عدسة ثابتة ( Fixed Lens ) أو عدسة متغيرة الطول البؤري ( Zoom Lens )
5- تقليدية أو رقمية

بنعرف كل واحد بتعريف بسيط عشان ما نطول عليكم ...

1- APS أو كاميرا 35 ملم

الـ APS معناه Advanced Photo System ... هذا نظام يديد من الكيمرات فكرته او هدفه تسهيل عملية التصوير "وزنها خفيف" وفيها خصائص يديده ... زينه حق اللي يدور على كيمرا سهلة وما تعور راسه.

كاميرات 35 ملم طبعاً هذه الكاميرات معروفة من زمان والفلم مالها ارخص من أفلام ال APS .
وهالنوع من الكاميرات يحبونه المصورين المحترفين.

2- مدمجة ( Compact ) أو بعدسة عاكسة أحادية ( SLR )

الفرق واضح طبعاً الكاميرات المدمجة حق الاشخاص اللي يبون يحصلون على صور زينه وبسهولة وما يعور راسه في الخصائص وايد وهي خفيفه طبعاً ... اما الكاميرات بعدسة عاكسه احادية فهذه الانواع يحبها اللي يبون يبدعون في التصوير والمحترفين وميزتها انك تقدر تتحكم بالعدسة وتغيرها بعدسات ثانية وتغير الفلاش وغيرها من الإضافات.

الحين اكثر الشركات تصنع كاميرات بعدسة عاكسة احادية مع امكانيات نظام APS


3- ذاتية الضبط البؤري ( Autu-Focus ) أو يدوية ( Manual )

ذاتية الضبط البؤري يعني روحها الكيمرة فيها خاصية التركيز وتوضيح الصورة اما اليدوية فالمصور روحه يضبط الفوكس او التركيز مالها ... واليدوية المحترفين يستخدمونها اكثر شي ويقدرون يتقنونها لانها يبالها وقت لين ما تضبط التركيز وتتعلم عليه

4- عدسة ثابتة ( Fixed Lens ) أو عدسة متغيرة الطول البؤري ( Zoom Lens )

الكاميرات المدمجة نوعين عدسة ثابتة وعدسة متغيرة الطول البؤري
النوع الاول عدسته واسعه والاشياء تبين صغيرة من المكان اللي تشوف فيه في الكاميرا
اما النوع الثاني طبعا تعطيك حرية اكبر في التصوير وتشوف المشهد بطريقة افضل.

5- تقليدية أو رقمية

هذه واضحه طبعاً ... التقليدية يعني بوفلم والرقمية يعني الديجيتال

راح نذكر الايجابيات والسلبيات لهذه الخصائص في الدرس الياي إن شاء الله

المصدر اللي اعتمدت عليه في هذه المعلومات هو كتاب التصوير الضوئي- التقليدي والرقمي من تأليف م. ابراهيم الفضيلات

اتمنى انكم ما ضعتوا في الشرح الأول ... واي ملاحظات او استفسارات اتمنى انكم تخبروني

ما ادري هل تبوني اكمل الشرح بهذه الطريقة يعني بالعامية او اني اتكلم بالفصحى احسن ..؟؟

والسموحه ...