باصات الجـــــامعه

[دانة حتا]

السلام عليكم

اخباركم اخواني وخواتي اعضاء الواحات

بصراحه ادري مليتوا من كثر ما اتشكى بس شو اسوي من الحرة والله

الحين احنا ندرس في الجامعه ليــــــــــش؟؟؟؟
صح عشان ناخذ شهاده ونشتغل ونحصل رواتب بس بعد احنا نبني الوطن مثل ما يقولون
الحكومه مب مقصره بس شوفو المصخرة اللي صارت اليوم مثلا مع انها تصير دووم
احنا نبا نروح البيت وماشاء الله عددنا وايد ونشل معنا سكن ثاني وعددهم اكثر عنا
وتعرفون اغراض اسبوع انزل ويانا... انزيـــــــــــــن الحين الباص ما يكفينا
وبدال ما يشلونا مع السكن اللي عدده اقل لا يابولنا هذيل اللي ما شاء الله
ويوم ما كفانا المكان لجنط البنات هزبونا ووقفونا في الشمس نص ساعه
مصـــــــــــــــــــــــ ــــــــــــــــــــخره طوول وعرض ونوقف في الشموس ليش مذله يعني
اونه سكر عنا الباب (السواق) والبنات هذيلاك داخل في البراد واحننا في الحر ويوم سرنا نخبر المدام(المسؤوله هناك) قالت شو تستـــــــــــــــــــاهل ون .....
شو نستاهل احنا مب طرارات عندكم عشان اتسون فينا جيه
اونه اتعلموا المره اليايه ترتبون اموركم وتجهزون....منو قال انتو لازم اتوفرولنا باصات كبيره على الاقلل
غصه شو اسوي اتضارب معهم بيوقعوني تعهد هذا اذا ما طردوني الحين لاني كتبت عنهم...


السموووحه طــــــــــــــــــولت عليكم بس والله غصـــــــــــــه

[خيال الحب]

السلام عليكم

الله يعينكم

بس تقدرين ترفعين رساله للشيخ نهيان..

ولو ما قدرتي انا بخبــره :)

[ناصر الخالدي]

أختي العزيزة دانة حتا تحية طيبة لنفسكِ المتعبة من الروتين الممل وأما بعد أختي المحترمة تذكري أن التعب يحتاج الى مواجهة وان المواجهة تحتاج الى قليل من الهدوء والتفكير............

الحياة قاسية تحتاج الى اناس يتفهمون الأمور

الحمدالله على كل حال الحمدالله الذي أهدنا الصحة والعافية الحمدالله مسبب الأسباب ورب الأرباب وهازم الأحزاب ولا تخافي من البشر بل خافي من رب البشر .........

نحن على اتم الاستعداد لسماع ما تعانين منه فالأخوة تجمعنا على الخير

[طير الغرام]

بعدج ختيه ما جفتي شي
ياما اتبهدلنا وانذلينا والسبه هالسكن وباصاتهم

بس مانقول غير الله يعين
كله في سبيل العلم
.
.

أنا ما أبا أحبطج زياده بردي
والسمووحه منج ^_^

[بيور]

الله يعينج ,,

[سفير الخيال]

هـــدي نفسج إختي :)

حاولي اتقدمين شكوى لسلطة قادرة على التغيير.

والمدام اللي عندكم هيه مجرد مأموره وما تقدر اتسوي شي..

ربي يوفقكم.

[دانة حتا]

خوي خيال الحب انا ما اعرف اطرش لعمري رساله فمابالك بالشيخ واشكرك على مرورك الطيب
ناصر الخالدي اشكرك على تواجدك والدعم تراه يعنيلي الكثير
طير الغرام الغاليه اشكرج على رفع معنوياتي حبوبه
بيور ثااانكس على الدعم
سفير الخياال مشكور على تواجدك الطيب وتسلم لمحاولة تهدية الوضع

بعدنـــــــــــي بصيـــــح......

[طير الغرام]

العفوو ختيه
.
.
.
إنتي في أي جامعه !!
وشكلج سنه أولى ، صح ؟!

[دانة حتا]

هذي يا طويلة العمر جـــــــــامعة الامارات المصونه
وهيه فديتني اول سنه عشان جيه مسويينا مصخره