اذا تقرا (2)

[همس الوجود]

شمعة أمل



ممم وين هذا المجرودي .. اناا حدي مكتبة دبي خخ

هيييييييه اعرفهاا احيد عطونا اياهاا على ايام الفاونديشن فالكليه .. وامتحنا فيها بعد يبت 100 خخخ ^^

بس ان شاءالله باخذ على نصيحتج وبروح مكتبة الكليه وبشوف لو عندهم قسم TEENS

تسلمين غناتي ..

[مزن هتان]

المجرودي
موجود في فستيفال ستي و ديرة ستي سنتر

[همس الوجود]

اهاا يعني ف دبي .. بس اناا من الشارجه .. ماضني حد يتفيج يوديني دبي .. :(

مشكووووره حبيبتي ^^

[أنامل قلب]

أمس كنا بالفستفال ، وكنت حاطه ابـ بالي ما أخطف صوب المجرودي ، من نقاط ضعفي !
بس اختي كانت ناوية تاخذلها كتاب ، وانا ما حبيت أقولها لا P=

آخر مره الوالده شافت كتاب [ رواية شيكاغو ] مفرور بـ غير مكانه ، عطتني محاضره =#
كل مره تشوفني أمر المجرودي آخذلي كمن كتاب ، ليمن وصلت لمرحلة إني أملك كتب للحين ما قريتهم !"

بس مــــــــاااقدر شوفو الاغراء .... ~ !




استانسنا صدق ، لولا إن اليوم انقلب لـ فاجعة ، قبل لا ندخل المكتبة كان المركز ابـ شكل ، ولمن ظهرنا لقينا شكل ثاني !"
صدق صدق فجأة المركز انقلب زحممممــــــــــه ، والله لا يبلينا ولا يبلي أحد !"

,

اووووووو من الآخر ، خذتلي كتب فنية لا غير ، وان شاء الله بستفيد منهم كثر ما أتأمل =]

~







وايد مستانسة عليهم ~

[شمعة أمل]

سككووون
اذا سرتي المكتبه اليابانيه في دبي مول شو بتقوليييين؟! رووووووووووووووعه 3> بس ناقصنهم كوفي شوب لول



انا آخر مره قريت روايه من فتره وايد مشغوله بالدراسه :( بس كانت لـ دانيل ستييل ونسيت اسمه بعد! لكن بس خلصت اول جابتر =s

[لمّــاح]

من أحلى المواضيع و دايماً اقرا الردود بس ولا مــرة شاركت
عموماً ان شاءالله يكون تفاعلي فالموضوع فعّال و نفيد و نستفيد ..
(1)

الاسم: رواية شيكاغو
الكاتب: علاء الاسواني
مكان الشراء: دارالشروق - القاهرة - ستي ستارز مول.. موجودة ايضا في دبي (المجرودي و مكتبة دار الحكمة)
الرواية حلوه، تتكلم عن يوميات و قصص شباب من مصر سافرو لأمريكا بغرض الدراسة والمواقف الي صارت ... الرواية تتكلم عن المصريين و هموم المصريين لكن اسلوب الكاتب جدا مشوق يخليك تندمج في القصة .. خذت مني حوالي 4 ايام عشان اخلصها ..
انصح بها ..
(2)

الاسم: رواية سهيل
الكاتب: الدكتور عبدالله الطابور (باحث في التاريخ الإماراتي)
مكان الشراء: مكتبة دار الحكمة - شارع الضيافة
الرواية حلوه، تتكلم عن أول شهيد إماراتي (قصة حقيقية) استشهد في أول يوم لإحتلال جزيرة طنب الكبرى .. اسلوب الكاتب حلو لكنه مايقارن بإسلوب علاء الأسواني، بس الفرق ان الرواية تحسبها ثرية بالمعلومات والمفردات المحلية و تفاسير لبعض التصرفات الإماراتية و عادات أهل الإمارات ..
خلصت الرواية في جلسة وحده ... حلوه و ايضا انصح بها ..
(3)

الاسم: Richard Branson, The Autobiography (هذا مختصر للإسم)
الكاتب: Richard Branson
مكان الشراء: المجرودي
هممم،، الكتاب قديم وحلو.. يتكلم فيه عن حياته و مغامراته .. اسلوبه حلو و خباله يعيبني عشان جيه قريت عنه و عن قصته .. حلو الكتاب
(4)

الاسم: Princess
الكاتب: Jean Sasson
مكان الشراء: المجرودي
هممم، الكتاب ماعيبني وايد احس فيه اشيا غلط عن المجتمع السعودي ... الكتاب حلو للقراة فقط
---
حالياً أقرا

الاسم: عيناك ياحمدة
الكاتب: الغدير العذب (آمنة المنصوري)
مكان الشراء: دار الحكمة (شارع الضيافة)
الرواية إماراتية والكاتبة إماراتية .. القصة حلوه لين الحين تقريبا وصلت النص .. ان شاءالله يوم بخلصها بعطيكم رايي النهائي
و هذا كل شي للحين .... لي عودة ان شاءالله عشان اكمل
عيناك ياحمدة

[أنامل قلب]

^ حياك الله أخوي ، وزين انك ذكرت رايك ابـ كتاب شيكاجو !
بعدني ما بديت فيه ، مريت بس عـ كذا صفحه وشكلي بكمله قريب ^^

وووو استفدنا من اضافتك ..

,

خيتو شمعه ، الحمـــــــدلله عيل إني للحين ما خطفت صوبهم ،
مع انج حمستيني لهم وايد ، بس مافيني لازم أقطع روحة المكاتب لفتره =#

~

[شمعة أمل]

يوم تقووولين شيكاغوو تقصدين الكتاب الى لماح حاطنه؟!
وانا تفكيري رااح بعييييييد! لانه شي مسرحيه اسمها شيكاغو موجوده عالميـاً ويابوها دبي من اظني ممم اربع سنين! والقصه عن سجينات الا ذابحه ريلها والى مادري شو مسويه p; عشان جي استغربتتت

[بنت الدلع]

من قتره كنت ماخذه هالكتابين
من دبي للتوزيع



الكتاب الاول اسمه: المريخ والزهرة معا إلى الأبد
للكاتب: جون جراي

الكتاب يتكلم عن الرجل وامرأه
وكيف يتفنون في التعامل فيما بينهم
الكاتب يعرض مشاكل حقيقيه او بنقول سوء تفاهم حصلت بين الزوجين
وبعدين يتطرق الى حل هذا الخلاف
جدا مفيد للي مقدم على الزواج

بس انا حسيته ان اكثر شي للمعرسين او الي قريب بيعرسون
بس قرايته وايد ممتعه

--

الكتاب الثاني: لغة الجسد
"كيف تقرأ أفكار الآخرين من خلال ايمائاتهم"

اول مابديت اقراه واايد شدني
يتكلم عن كل حركه يسويها الشخص وشو معناتها
واكثر شي لفت انتباهي انه ذكر عن الفقاعه الي نحن نعيش داخلها
وهذي الفقاعه تعتمد على المكان الي نحن نشأنا فيه
ان كنا في الريف او في المدينه
يعني مانسمح لأي حد انه يتعدى هذي الفقاعه ويتقرب منا وايد
واذا تقربوا وايد نحن بنحاول نرجع على ورا وهالشي بيسبب التوتر في الحديث

بس بصراحه !
وايد كرهته

لاني واايد قمت الاحظ الشخص الي جدامي وشو يسوي وقمت افسر واطبق الي اقراه
احس انه يخلي الانسان في حالة وسواس وشك !!

عسب جيه ودرته وماقمت اقراه

====

حاليا اقرا كتاب اسمه Best of Enemies
لثلاث كاتبات



شدني العنوان والملخص
بس في صفحاته الاولى كله يتكلم عن البزنس !
لانه ريل هالحرمتين رجل اعمال معروف
ويتكلمون عن شركته في البدايه
بدايته ممله جدا لان ماعندي ميول في البزنس

بس اتوقع الاكشن بيي قريب
دام ان فيه حرمه اولى وثانيه

[العجيبة]

ما قـرأته بعد حفلة الموت ...

ملامـح ، لـ زينب حفني - سعودية

احس اني ضيعت وقتي في هذه الرواية، واللي كان يخليني اكمل، النهاية ... انتظر نهايتها ... التي جاءت مملة وروتينيه بوفاة بطلة القصة ثريا بسبب المرض والشيخوخة

وثريا هذه عاشت طفولة بائسة كما تعتقد لانها تنتمي لعائلة فقيرة نوعا ما! فكانت تتطلع لحياة الغنى والثراء
تزوجت زواجا تقليديا فكان زوجها يحمل نفس الطموح ، فحققوا مبتغاهم بطريقة أبخس من البخس نفسه .. باعوا شرفهم وكرامتهم

في النهاية خسروا الحياة الآمنة المستقرة، بعد طلاقهم ، و ولدهم الوحيد تركهم ( برغبة منهم في البداية ) وبعدها برغبة منه هو ...

بالمختصر ... حياتهم كانت تافهة ... وطريقة سردها المملة والروتينية المصحوبة بأوصـاف مقززة في بعض المقاطع تحسسك كأنك تشوف فلم اباحي

باختصــــار : روايـــــة تستحق كل الانتقادات اللي وجهت لهـا ، وانا لين يومكم مستغربة من قواة عين الكاتبة
اللي شفت لها مقطع في اليـوتيـوب تقول عادي ما فيها انحطاط او انحلال خلقي :/

بنظـري ...... الرواية ممكن تفتح اعين الناس لأشياء ما كانت على بالهم ، وحب الدنيا والمال والبعد عن الدين
أمور ممكن توصلهم للتفكيـر بنفس طريقة ثريا وزوجها للوصول للثراء والمـال والرفاهية

الروايــة الثانيــة

كنت ادور لها صورة وما لقيت... اذا لقيت برجع احطها

كتابج بنت الدلع : لغة الجسد ، خذته السنة اللي طافت كهدية ، بس قبل ما اوديه تميـت اتصفحه يمكن ليومين ..... حلو ويشـدج في البداية مثل ما قلتي .... لكن بعدها لاحظت اني بديت اراقب الناس فـحمدت ربي ما قريته ولا تمعنت فيه !!

كتـاب شيكـاجو اللي طرته سكون وبعدها لمـاح ، ما قـريته ، بس علاء الاسواني ... كاتب يستاهـل نقـرا له ...

[طفلة من هذا الزمان]

للمهتمين بالقراءة عن قانون الجذب ..

كنت حاضرة دورة من جريب وكانت عن التغيير بالايحاء .. آخر المحاضرة سألت المحاضر عن علاقة دورته بقانون الجذب .. قالي ان قانون الجذب كلام commercial يعني خرابيط تجارية عشان يبيعون كتب .. انقهرت منه بصراااحة ..

انا وااايد أؤمن بقانون الجذب و أؤمن جدا باللي قاله رسولنا عليه الصلاة والسلام "تفـــاءلوا خيرا تجدوه " هذا قانون الجذب باختصــار

بس الكتاب حلو و بسيط .. بعدني ما خلصته مع اني ماخذتنه من معرض كتاب الشارجه الأخير يعني شووفوا من كم شهر


العجيبــــــة ،،
يوم حبيت اغير نوعية الروايات اللي اقراها قريت للأخت لاااا و تهورت و خذيت كل رواياتها بعد .. انقهرت من ملامح .. شو هالنهايـــة !! انا اشوف ان الانسان لااازم بيرد لفطرته مهما أذنب وغلط .. بس هذي لااااا ؟!!!!
حسيت اني اقرا روايات عبير مع اني في حياتي ما قريت روايات عبير بس سمعت انهم جي

باختصار كاتبة ما احترمت أسلوبهــا و فكرهــا لأنها تعتمد تمــاما على المحظورات عشان تتميز و تنقرى كتبهــا


لي عودة بإذنه تعالى ...

[أنامل قلب]

^ احليلج ..
ووو بخصوص كتاب شيكاجو ، فما سبق وقريت لهالكاتب بصراحه ، بس حمستيني له أكيد =]

اختي شمعه ، لول // امبلا كنت اقصد الكتاب ^^

خيتو بنت الدلع ، آخر مره رحت فيها المكتبه كنت باخذ كتاب شبيه باللي معاج عن لغة الجسد والخ
بس هونت لأني فكرت مثلكم ، خفت يأثر عـ طريقة تعاملي بالناس سلبيا واقعد الاحظ شغلات مالها داعي
وقد تترجم بشكل خاطئ =$ // مع ان لازال فيني فضول بخصوص هالنوع من العلم !"

[بنت الدلع]

^ هو شي حلو ان تكون عندج خلفيه عن بعض الحركات
مثل الي يتكلم ويلعب بشعره او اللي ييلس ويحط ريله عالمكتب
يوضح لج هم هالناس شو الي يبون يوصلونه من طريقة حركاتهم وشو معناة الي يشوونه
بس بعد ماتقرينه بتتعقدين وبتتعبين نفسيا
واااايد بتمين تلاحظين وتفكرين
حتى يمكن تفكرين بالإيمائات اكثر من الكلام الي تسمعينه من الشخص نفسه

---

العجيبه
من خلال شرحج للقصه احس اني حبيتها !
يمكن انتي تشوفينها منحطه
بس فكري من ناحية ثانيه
اكيد في عبره تبا توصلها الكاتبه من خلال سرد هذي الروايه

[العجيبة]

مب سالفة منحطة بس ... يعني حتى الاسلـوب احسه جدا عادي ، تقدرين تقولين ما عيبني ...
المعلومات تنعطى لج بأسلوب مباشر .. انا فلانه وابوي فلان وحالة بيتنا تعيسة فيه غرفتين وعندي صديقتي اطلع معها مرة كل اسبوع ....

يعني اتحسين انه روتين ... وانا مالي اذا عرفت ان لون عيون ابوج عسليات مثلا !!! وانا شو يخصني يحلق لحيته ولا يطولها ؟!!! هالاشياء او التفاصيل مب مهمة، وان كانت مهمة بالنسبة لي ما احب اقراها بهالطريقة ..


طبعا هاا اللي ذكرته مثال مب نفسه في القصة ...



يعني فـــوق ما ان الاسلوب مب عايبنـي ، القصة تافهـة أو يعني ما فيها شـي وااو ، فيها حشــو بزيادة ... ما ادري اذا فهمتي علي ...
يمكن اذا قريتيها بتحسين باحساسي وخاصة اذا الاسلوب اللي ذكرته ما يعيبج انتي بعد ...

[لمّــاح]

السـلام عليكم ..

عيناك ياحمدة ..

هممم ،،، القصة حلوه، اسلوب الكاتبة ايضا حلو و مشوق ..

تخلي الواحد يعيش تفاصيل و مشاعر و احاسيس القصة كأنها واقع أو مواقف تحصل امام الشخص، القصة تدور احداثها في الماضي القريب ..

انصح بقرائتها خصوصا ان الكاتبة إماراتية و لها خبرة في كتابة القصص القصيرة (شاركت في فريج) ..
و الحلو ايضا انها استخدمت مقطتفات من قصائد لبعض الشعرا الكبار، مع ذكر المصدر للفائدة ..

انصح بها ..

-----



الاسم: يوميات خادمة في الخليج
الكاتب: محمد التونجي
مكان الشراء: المجرودي

القصة تتكلم عن خادمة اشتغلت في الكويت ايام الحرب ... الكتاب يتكلم عن حياتها في الفلبين و التغيرات الي حدثت اول ماوصلت الكويت ... عن طريقة عيش الجالية الفلبينية وتواصلهم مع بعض ... و الاحداث الي صارت وقت الغزو العراقي للكويت ..

القصة اسلوبها عادي جداً، مايُقارن بإسلوب عيناك ياحمده مثلا، الاحداث تصير فيها بسرعة ..
ما انصح بها الا اذا كنتو ملانين و ماعندكم شي ثاني تقرونه ( يعني للتسلية ) .... خلصتها في جلسة وحده..

----

الحين عندي كتابين ببتدي فيهم ...

الكتاب الأول



الاسم: Outliers
الكاتب: Malcolm Gladwell
مكان الشراء: المجرودي

بقراه و بخبركم عنه

الكتاب الثاني



الاسم: تراجيديا اعدام رئيس عربي
الكاتب: د عبدالكريم العلوجي
مكان الشراء: المجرودي