اذا تقرا (2)

[أنامل قلب]

^ احليلج ..
ووو بخصوص كتاب شيكاجو ، فما سبق وقريت لهالكاتب بصراحه ، بس حمستيني له أكيد =]

اختي شمعه ، لول // امبلا كنت اقصد الكتاب ^^

خيتو بنت الدلع ، آخر مره رحت فيها المكتبه كنت باخذ كتاب شبيه باللي معاج عن لغة الجسد والخ
بس هونت لأني فكرت مثلكم ، خفت يأثر عـ طريقة تعاملي بالناس سلبيا واقعد الاحظ شغلات مالها داعي
وقد تترجم بشكل خاطئ =$ // مع ان لازال فيني فضول بخصوص هالنوع من العلم !"

[بنت الدلع]

^ هو شي حلو ان تكون عندج خلفيه عن بعض الحركات
مثل الي يتكلم ويلعب بشعره او اللي ييلس ويحط ريله عالمكتب
يوضح لج هم هالناس شو الي يبون يوصلونه من طريقة حركاتهم وشو معناة الي يشوونه
بس بعد ماتقرينه بتتعقدين وبتتعبين نفسيا
واااايد بتمين تلاحظين وتفكرين
حتى يمكن تفكرين بالإيمائات اكثر من الكلام الي تسمعينه من الشخص نفسه

---

العجيبه
من خلال شرحج للقصه احس اني حبيتها !
يمكن انتي تشوفينها منحطه
بس فكري من ناحية ثانيه
اكيد في عبره تبا توصلها الكاتبه من خلال سرد هذي الروايه

[العجيبة]

مب سالفة منحطة بس ... يعني حتى الاسلـوب احسه جدا عادي ، تقدرين تقولين ما عيبني ...
المعلومات تنعطى لج بأسلوب مباشر .. انا فلانه وابوي فلان وحالة بيتنا تعيسة فيه غرفتين وعندي صديقتي اطلع معها مرة كل اسبوع ....

يعني اتحسين انه روتين ... وانا مالي اذا عرفت ان لون عيون ابوج عسليات مثلا !!! وانا شو يخصني يحلق لحيته ولا يطولها ؟!!! هالاشياء او التفاصيل مب مهمة، وان كانت مهمة بالنسبة لي ما احب اقراها بهالطريقة ..


طبعا هاا اللي ذكرته مثال مب نفسه في القصة ...



يعني فـــوق ما ان الاسلوب مب عايبنـي ، القصة تافهـة أو يعني ما فيها شـي وااو ، فيها حشــو بزيادة ... ما ادري اذا فهمتي علي ...
يمكن اذا قريتيها بتحسين باحساسي وخاصة اذا الاسلوب اللي ذكرته ما يعيبج انتي بعد ...

[لمّــاح]

السـلام عليكم ..

عيناك ياحمدة ..

هممم ،،، القصة حلوه، اسلوب الكاتبة ايضا حلو و مشوق ..

تخلي الواحد يعيش تفاصيل و مشاعر و احاسيس القصة كأنها واقع أو مواقف تحصل امام الشخص، القصة تدور احداثها في الماضي القريب ..

انصح بقرائتها خصوصا ان الكاتبة إماراتية و لها خبرة في كتابة القصص القصيرة (شاركت في فريج) ..
و الحلو ايضا انها استخدمت مقطتفات من قصائد لبعض الشعرا الكبار، مع ذكر المصدر للفائدة ..

انصح بها ..

-----



الاسم: يوميات خادمة في الخليج
الكاتب: محمد التونجي
مكان الشراء: المجرودي

القصة تتكلم عن خادمة اشتغلت في الكويت ايام الحرب ... الكتاب يتكلم عن حياتها في الفلبين و التغيرات الي حدثت اول ماوصلت الكويت ... عن طريقة عيش الجالية الفلبينية وتواصلهم مع بعض ... و الاحداث الي صارت وقت الغزو العراقي للكويت ..

القصة اسلوبها عادي جداً، مايُقارن بإسلوب عيناك ياحمده مثلا، الاحداث تصير فيها بسرعة ..
ما انصح بها الا اذا كنتو ملانين و ماعندكم شي ثاني تقرونه ( يعني للتسلية ) .... خلصتها في جلسة وحده..

----

الحين عندي كتابين ببتدي فيهم ...

الكتاب الأول



الاسم: Outliers
الكاتب: Malcolm Gladwell
مكان الشراء: المجرودي

بقراه و بخبركم عنه

الكتاب الثاني



الاسم: تراجيديا اعدام رئيس عربي
الكاتب: د عبدالكريم العلوجي
مكان الشراء: المجرودي

[ألم ترى]

بسم الله الرحمن الرحيم ..

هلا لماح ..

بخصوص الكتاب الثاني تراه قيم ! ..

بحفظ الله ..

[ألم ترى]

بسم الله الرحمن الرحيم
هاي مجموعة جدآ بسيطه كنت اعكف ع قرايتها
والحمدلله خلصنا وبدينا ف المجموعة الثانيه !




,,,




,,




,,




طبعآ هالكتب غاويه وخاصه اللي يحبون السياسة او الشخصية المذكوره
ولكن اللي باط جبدي هذا الكاتب المصري انيس الدغيدي
احسبه يألف من عنده ومعلوماته غريبة وماتدخل العقل !
وكاعمة المصريين ما ادري ليش ما احب طبعهم ف الكتابة

[طير الحب]

لسلام عليكم

حاليا أقرأ استمتع بحياتك...عبدالرحمن العريفي...كتاب حلو

[العجيبة]

ألم ترى


على طاري انيس الدغيدي ... منزل جزء ثاني لكتابه صدام لم يعدم ...

[طفلة من هذا الزمان]

للمهتمين بالقراءة عن قانون الجذب ..

كنت حاضرة دورة من جريب وكانت عن التغيير بالايحاء .. آخر المحاضرة سألت المحاضر عن علاقة دورته بقانون الجذب .. قالي ان قانون الجذب كلام commercial يعني خرابيط تجارية عشان يبيعون كتب .. انقهرت منه بصراااحة ..

انا وااايد أؤمن بقانون الجذب و أؤمن جدا باللي قاله رسولنا عليه الصلاة والسلام "تفـــاءلوا خيرا تجدوه " هذا قانون الجذب باختصــار

بس الكتاب حلو و بسيط .. بعدني ما خلصته مع اني ماخذتنه من معرض كتاب الشارجه الأخير يعني شووفوا من كم شهر


العجيبــــــة ،،
يوم حبيت اغير نوعية الروايات اللي اقراها قريت للأخت لاااا و تهورت و خذيت كل رواياتها بعد .. انقهرت من ملامح .. شو هالنهايـــة !! انا اشوف ان الانسان لااازم بيرد لفطرته مهما أذنب وغلط .. بس هذي لااااا ؟!!!!
حسيت اني اقرا روايات عبير مع اني في حياتي ما قريت روايات عبير بس سمعت انهم جي

باختصار كاتبة ما احترمت أسلوبهــا و فكرهــا لأنها تعتمد تمــاما على المحظورات عشان تتميز و تنقرى كتبهــا


لي عودة بإذنه تعالى ...

[العجيبة]

طفلة من هذا الزمان ....

الســر هههه طلعتي الا مثلي تراج !!!! هالكتاااااب من اول ما استوت ضجة عليه اتخبلت ودورته فالنت وعرفت انه له فلم ودورته وشفته .... قريت نصه يمكن .... ووايـــــــد عيبتني الفكـرة ... ومحد وما خبرته عن هالشي الـ " وااو " !
احيد مرة زخيت ابوي الفيــر ، اقرا له هالكتاب !!! خخخخ

اليـن آخر شي طاح حظي قبل فترة قريبة على نسخة كتاب الكتروني اسمه " خرافة السر" تأليف : عبدالله العجيري ، مفصفصيين كل معلومة من الكتاب الاصلي، ومطلعين كل شي كل شي غللللط... صار عندي انفصام في المعلومات والاعتقادات !!!


عالعمـوم بعدني أفكـر في قانـون الجذب .. ما غاب عن بالي ...




وبخصوص الكاتبة وكتبها .... فيه شي ما ادري اذا تعلمته ولا هو عندي بالفطرة ... ما اشتري لكاتب واحد وجديد علي اكثر من كتاب في نفس الوقت ...!


وبانتظار عودتج ...

[لمّــاح]

الســلام عليكم ..
The secret
قريته، هو حلو تقريبا نص الكتاب عباره عن امثلة واقعية و ردود ناس .... تقدرون تلخصون الكتاب بهالجملة

باللي قاله رسولنا عليه الصلاة والسلام "تفـــاءلوا خيرا تجدوه " هذا قانون الجذب باختصــار

--
الكتب الي قلت بقراها ماقريتها لول قريت اشيا ثانية

الاسم: ذكريات سمين سابق
الكاتب: تركي الدخيل
مكان الشراء: المجرودي
كتاب حلو، يتكلم عن معاناة تركي الدخيل مع السمنة و اسبابه الي خلته يضعف ..

الاسم: رواية اختلاس
الكاتب: هاني نقشبندي
مكان الشراء: المجرودي
اختلاس، رواية جيدة تتكلم عن نماذج من فئة معينه من الشعب السعودي و حياتهم الخاصة .. حلو
الكاتب قريت له كتاب قبل، رواية سلّام

هذي الرواية هي الي شجعتني اني اقرا رواية اختلاس ... سلّام انصح بها، يمكن تملون في بعض اجزاء الرواية لكن أول ماتوصلون للنهاية بتوصل فكرة الكاتب .. الرواية حلوه و انصح بها ...

الاسم: صمت الفراشات
الكاتب: ليلى العثمان
مكان الشراء: المجرودي
همممم،،، ما انصح بها
الرواية ممله، الاحداث فيها تدور بسرعة بدون تفاصيل ... احس ان الكاتبة تحرك الشخصيات عشان تدور احداث القصة بالطريقة الي راسمتنها ( الي قرا مثلا رواية شيكاغو و بيقرا هالرواية بيفهم قصدي) ... و الرواية نصها خواطر و امثلة لدرجة ان افي بعض الاجزاء الكلام هذا اكثر عن الاحداث، احس لو ركزت على تفاصيل القصة احسن ..
وصلت للربع الاخير و وقفت. مابكملها
---
اليوم سرت المجرودي و لي عودة قريبا بكتب يديده و رد يديد ان شاءالله

[مــهــابه]

الأجنحـه المتـكسره
لـ جبـران خلـيل جبـران

مـلخصهــا :

قصـة حب بيـن أثـنين يجمعـهم حـب طـاهر ويفـرقهم الـموت

[همس الوجود]

انيس منصور ـ الذين هبطوا من السماء



في مواضيع حلوه .. وبعدني فالبدايه

[أنامل قلب]

^ للحين ما قريت له شي قراءه جديه ..
وقعت على مقتطفات له من النت ، بعضها أثار انتباهي جدا ،
والبعض الآخر جعل حماسي له يقل قليلا !

طرحيلنا عقب رايج فيه وابـ أفكاره ، أفيدينا يعني =]

[همس الوجود]

اذا كنت تقصديني ^^

شوفي اناا احب سوالف الخيال .. والكتاب يتكلم عن

يتحدث فيه الكاتب عن ظواهر غريبة مرتبطة بالكائنات الفضائية، حيث يرصد الكتاب مشاهدات وأحداث حقيقية منذ العصور القديمة وحتى العصر الحديث تثبت بأن هناك كائنات أخرى كانت تسكن هذه الأرض قبل الإنسان، ولازالت تزوره حتى الآن تاركة علامات وآثار في الأأماكن التي تزورها. أحدث هذا الكتاب صدى واسعا عند صدوره، وحقق نجاحا تجاريا كبيرا، ولازال يطبع في طبعات جديدة حتى اليوم.

بنسبه لي اول مره اقرا كتاب من هالنوع وماامل منه .. حسيت عمري اشوف الجزيره الوثائقيه ^^

وحالياا اقراه من النت

http://www.scribd.com/doc/7048555/-

بس شكلي بسأل عنه في مكتبة دبي ^^