السلام عليكم

::

معاناه يوميه يعيشها ابناء شعب الإمارات،، وبالأخص أهالي الإمارات الشماليه

شو السبب؟؟ هل حكوماتهم ما تعطي؟؟ ولا ما عندها؟؟

حتى لو ما عندها،، فالدولة ما تقصر من ناحية المساعدات،، لكن مع ذلك ما نشوف اي تطور

بيوت شعبية تنبنا،، منو يحصلها؟؟ ( فلان الفلاني وعياله ) اما الفقير ياكلون حقه !

اهالي المناطق النائية،، يومياً نشوف معاناتهم فالجرايد،، ما تنحل الا بعد ما تنتشر صورهم فالجرايد،، وهذا اذا انحلت!

::

هذا تقصير من الجهات المسؤوله،، أحياناً الحكومة تعطي،، لكن اللي تحت الحكومة يسرقون

المشكلة ما عندنا محاربة فساد،، مسؤول يسرق يسكتون عنه،، واذا فكروا يشلونه،، ينشل بدون أي معاقبه،، واللي سرقه حلال عليه!

::

الوظايف تحتاج لواسطة،، بس الحمد لله بدت هالظاهره تخف،، خصوصاً يوم قاموا يشلون اللي ما يدخلون الا اهاليهم،، بدينا نتطور ونشوف الشهادات بغض النظر عن الإسم

لكن مع ذلك فيه واسطه،، وهالآفه استحاله تختفي،، لكن فيه امل انها تتقلص!

::

بس في نفس الوقت،، اذا المواطن ردوه في مكان وما شغلوه،، يقدر يقدم في مكان ثاني،، مستحيل ما يلاقي شغل،، لكن بيلاقيه براتب أقل وفي قطاع خاص

انزين،، ليش ما ندخل قطاع خاص؟؟،، نقول رواتب ضعيفه وعندنا عيل،، انزين ليش ما ندرس وانيب اعلى الشهايد؟؟،، واذا بدا راتبنا بشوية فلوس،، فاعتقد نقدر نرفع قيمة هالراتب من خلال اثبات انفسنا فأماكن العمل،، اما اداوم يوم واغيب 10،، او اداوم وما اشتغل عدل،، ومع ذلك اطالب بزيادة الراتب؟؟،، فا هالشي مستحيل

::

تنمية بدت تدرب المواطنين اللي يتقدمون لوظايف،، عالأقل يدخلون دورات تدريبية ويحصلون خبرة لين ما يحصلون شغل،، بس شو المشكلة؟؟؟

المشكلة انه فيه ناس يتصلون فيهم،، فلان عندك دورة فالمكان الفلاني،، يقول اوكي وما يروح!!،، ليش نسوي جيه؟؟،، وكل ما يتصلون فينا قالوا فيه شغل،، نقول لا هالمكان ما نحبه !!،، عطوا المجال لغيركم،، فيه وايدين يرضون حتى لو 2000 درهم !

فيه ناس يقولون هاي حريه شخصيه والواحد يداوم وين يرتاح،، انا معاكم فهالشي،، واذا انتوا تبون ترتاحون لا تقولون ماشي وظايف،، الوظايف موجوده لكن انتوا ما تبونها

::

أخالفج الراي يوم تقولين "دشو البلاد بطراد وصارو شيوخ علينا ظهرولهم
جوازات وعطوهم اعلى المناصب فالدوله"

ماشفت حد من اللي تطرينهم صار شيخ علينا،، بالعكس!،، اشتغلوا وكدوا و سوو شي للبلاد،، حتى قاموا يشلون بعض من اهالي البلاد واللي هم قوم فلان وفلان،، بس لأنهم ما يشتغلون عدل وما سووا شي

مب لازم نشوف للرجل من ناحية أصله،، أهم شي يكون شغول ويشتغل بضمير،، والدليل تشكيل الحكومة اليديد

اذا احنا ما بنعطي مناصب الا لربعنا وجماعتنا ما بنتطور،، لازم نعطيه للي هوه قد هالمنصب

::

وما اعتقد فيه حد يقدر يتطنز علينا،، احنا احسن دولة خليجية ويمكن عربية،، المواطنين في بلادنا عايشين عيشه يتمنونها غيرهم،، قوليلي منو يحصل فلوس عشان يتزوج؟؟ منو يحصل قروض او منح سكنية غيرنا؟؟،، الحمد لله على هالنعمة واللي يتطنز تراه يغار

::

آسف طولت وايد،، اللي ذكرتيه صحيح وحاصل،، وبنقول الحمد لله،، لأنه حتى لو ما عندنا شي،، واجب علينا الحمد،، والله يعين ويصبر كل اللي يعاني من مواطنينا،، وان شالله الله يفرجها عليهم

// الله يحفظكم