أخ

[حلم الطفوله]

السلام عليكم ورحمة الله وبركاته

أول ما ينضرب الشخص منا على راسه ؟؟ هيه على راسه تحديدا؟؟

شوه يقول؟؟

طبعا ما تحتاج لتفكير ولا حذف إجابتين ولا تبديل السؤال ؟؟

يقول وبصوت عالي أخ ...أأخخخخخخخ

شفتوا معزتكم لوين وصلت بقلوبنا ؟؟ حتى يوم ننفلع نذكركم

دائما تعتز البنت بأخيها ...تفتخر به أمام الملأ ...تذكره بين صديقاتها ... تحبه بلا حدود

هو حب من نوع خاص توطن بقلبي لإخوتي الذكور تحديدا

أحبهم حبا قد لا أستطيع أن أعبر عنه بالكلمات فما في قلبي أبلغ من حروف ناطقه

هذا أخي ... ياه كم أشعر بالفخر وأنا أرددها ...

وكم يطغى هذا الاحساس مع كل لحظه أرى فيها موقفا

تجسدت فيها هذه المعاني مجتمعه لتصرخ بحب الأخ

الوالده مع أخوها والوالد مع أخته...يبالهم لماح ياخذلهم لقطه حزتها

أخي أخوي أخويه ولد أمي وأبويه ...فديته والله ..لو تدرون بمعزتكم بس

يا خويه يا عضيدي لا ترقد بالسيوح ...ارقد بظل بارد بين الحشا واليوف ...لو غلط خبروني

:ghostface

بس هالحلم الوردي يتلاشى وهالمشاعر تتبدد بلحظه عند البعض ...........تدرون متى ؟؟

لما تقولين لاخوج حبيبج ولد أمج وأبوج وأقرب واحد لقلبج ...طلعني ؟؟

كأنج ارتكبتي معصيه لا قدر الله ؟؟ أو كفرتي يوم قلتي هالكلمه تحديدا ؟؟

بصراااااااااااااااااااااا اااااااااااحه وباختصار ليش كلمة طلعني تقهركم؟؟

ودمتم سالمين

[بيور]

والله ودي أعيش هالتجربه ,, ودي يكون لي أخو أكبر عني يفهمني وأفهمه ,,

يمكن لو عرفت الشعور هذا ,, وحسيت به ,, بعرف احساسج ,,

بس موضووع حلو ,, واتمنى خوانا اللي في الواااحاات يسعفووونا بردوووودهم


والسموووحة ,,
المتفيجة

,,

[العجيبة]

أنا أعتقـد انهم ما ينقهـرون ..
بس نحن نحس بقهرهم لانهم بيتمون يفكرون بـ "المسؤوليه " اللي بيتحملونها !!
أو أقصـد " المصاريف " اللي بيصرفونها هيهييه !!

اممم بيني وبينكـم ، ما فيها أي قهـر .. بس هي مجـرد شطارة البنت في كيفية طرح طلبها المستعصي
يعني من الغبااء المستفحل انه تروح تقول انها تبا تطلع قبل ما تنزل المعاشات بثلاث أيام مثلا !
ومن الغبــااااء المستورد انها تطلب الطلعه والأخ توّه راد من دوامه مصدع !!

يعنـي وهييـك تقـريبــاااا ..

الفقـره اللي في النص (اللي فيها المديح ) يا حلم الطفـوله ، يستحسن ويمدحونه استخدامهـا قبل كل كلمه " طلعوني " !!

هههه عيبني الموضوع .. كل فقـرة تخليج تتوقعين المغزى شي ثاني .. وآخر شي عن كلمة " طلعوني " بسسس !!

[نبراس الليل]

السلام عليكم ورحمة الله وبركاته

اول شي احيي الواحات على عضوة مثلك ماشاءالله عليك مواضيعك كلها حلوة بس مروعة نفس الوقت

وثاني شي احب اقول

لكل انسان طبع ومجتمع اختاره يعيش فيه ويمشي على نهجهم يمكن بعض الشباب مايحبون يطلعون خواتهم تفاديا لأي تحرشات والابتعاد عن وقوع اي مشكلة

والبعض قد أسميه بمريض نفسي..أي عندما يرى رجل ومعه إمرأة يظن انهما مجرد اصدقاء
فيطبق هذا الشي على نفسه أي يقول في نفسه عندما اخرج مع أختي سيظن اصدقائي أو الرجال أن التي معي هي صديقتي وهذا مايمنعه ومثل هذا الصنف كثيرون ..

لكن من اللائق أن يقترب الأخ من أخته أكثر فأكثر

والحمدلله إني لم اصبح مثل اللذين ذكرتهم

فلو طلبت مني اختي ان اصطحبها الى القمر فوالله سافعل

شكرا اختي حلم الطفولة على مثل هذه المواضيع الجدا جميلة والرائعة

ننتظر جديدك ضربة بعد ضربة =تعود وتحمل الضربات

طارق
اخوكم

[ذنـيـنـي]

البارحه استوت ازمه بين الشباب في ميلسنا بسبب هالموضوع

لي عوده من بعد يلسة الميلس اليوم

[مزن هتان]

هلا

فديت اخواني اموت فيهم
البعض من الاخوان ينقهرون

اممممم اخوي العود يستحي يطلعنا مادري ليش

اما اخوي الثاني عادي عنده مايصدق بس عنده شرط اللي هو او بسيارة البيت او سيارتي خايف على بتروله يمكن

احيانا الخوال والعمام ينقهرون بعد

مثال مزن هتان مستحيييييييييييل تطلب من خوالها

بس نجي عند عمامي وخاصه بوحميد والله انه حبيب بس يقهر ماياخذنا إلا لـ مطاعم يبينا ننتفخ

مشكوره حلم ع الموضوع

[انامل]

فديت روح روحج

حلم
كنت مندمجه معاج حيل
فجأه قلبتي المواجع

هاي مشكله أزليه للاسف
في بيتنا ما تصير أبد قولــــــــــــي ليش
هاه قلتي ليش

يا الغلا

لأنهم ما يطلعونا أساسا

بس تبين الصدق مثل ما تفضلتي
الأخ سند ولو كان صغير يمشي معاج بأي مكان عام
تحسين بالأمان

كفايه ان الأخ مهما كان عمره فممكن يكون محرم يروح معاج
اعرف عايلة كلهن بنات الوالد متوفي يبوون يروحون العمره او الحج بس عدم وجود محرم
مأزم الأمــــــــــــر

يا جماعه الأخوان نعمه
وهمسه لجميع من له أخت

حن عليها
ايلس بحذاها لو مره
اهديها اي هديه لو مره
حتى لو جلكسي

قلها مهما كان عمرها
محتاجه شي؟
شي بخاطرج؟
تحبيني؟
شي ناقصج؟
انا وياج ولا تخافين دام راسي يشم الهوا لا تخافين



سامحيني وتحمليني اسمعي كلامي وفاااااااااالج طيب

ساعتها شوف بعيون اختك
تلقى السرور اللي ما ينشرى باموال الدنيا

الحمدلله على كل حال والله يهدينا جميع ويهدي اخوانا جميع

والبنات بعد هالله هالله باخوانكم
يد وحده ما تصفق


حلم
موضوع ممتع
عجبني اسلوب سردج
الله لا يحرمني ها الطفل اللي بحلمج الطفولي


مساء المحبه

[حلم الطفوله]

المتفيجه ...مشكوووووووره عزيزتي على المرور

ولو عندج إخوان أصغر عنج أحسن بيسمعون كلامج وبيطلعون إختهم لكبيره

العجيبه ... صدقيني السالفه مب سالفة كيف تقنعينهم يطلعونج

السالفه كيف تبعدينه عن رباعته قوم بو خمسه وعشرين ساعه... سياسة فرق تسد يمدحونها

وأكيد كل شيء بالكلام الحلو بيتحقق ...

بو زايد ....الحمد لله ما عندك إخت ..جان ذليتها عالطلعه اونه ما عدنا بنات يطلعون

شاكره لك مرورك أخوي بو زايد ...

[حلم الطفوله]

نبراس الليل

الله يحفظك لخواتك وأهلك يارب ...وكل يوم اطلعهم مكان

يا خوي انا أقصد إنه الولد دايما يتهرب من إنه يطلع أهله مكان ...
يتعلث بإنه مشغول ومتواعد ويا ربعه ونص شغل العالم عليه يوم حد بيقوله ود أهلك مكان
والبنت المسكينه تبدا الإجازه وتنتهي وهيه خاطرها تركب سيارة أخوها وتطلع وياه مكان

يعني الدريول ينفع يودي المدارس والأسواق ...
لكن طلعات وبر ورحلات مستحيل العايله تروح بدون محرم ...حلاتها مع الإخوان والتصعيد

ومشكور أخوي طارق على كلامك في حقي والله يحفظك وين ما تكون


ذنيني

نتريا الأزمه وأحداثها .... والحل النهائي لها

[حلم الطفوله]

مزن هتان

يعني لا إخوان ولا خوال ولا عمام ؟؟ وين بندق براسنا يعني بهالدنيا

الله يخليلج بو حميد ... وجان عالمطاعم تراها تعتبر أحلى طلعه الله يحفظج إختي


أغلى اناااااااااااامل بعالم حلم الطفوله

تدرين انا وااااااااايد منقهره

حد عنده إخت عسووووله مثل أنامل وما يطلعها ... سمعيه هالرمسه بس

زين يوم عطيتي شباب الواحات دروس التعامل مع خواتهم تعلموا عاااد

والله كلامج مثل البلسم على القلوب ... الله يحفظج لأهلج يا كل الغلا

[ناصر الخالدي]

أختي العزيزة طرح رائع ومتميز وربما لان الموضوع يختص بجنس الرجال وانا منهم فسوف اشارك بوجهة نظري الشخصية ......

الاخوه شعور جميل ونعم كل اخت تفخر بأخوانها كما انه من المفترض أن يفتخر الاخ بااخواته أما أنا فعندي أختان الاولى في الصف الثالث الثانوي علمي وهي فتاة ذكية متفوقة طلباتها المعتادة وحواري معها كالتالي

هي : ناصر شلونك
انا : بخير الله يسلمج شنو تبين عطيني من الآخر
هي : ابيك تحط شكر حق ابلتي في الجريدة
انا : انشألله من عيوني وشدي حيلج

وهذا الطلب يكون عادي والطلب الآخر في صيغة اخرى انظري ماذا تقول

هي : نصور انا عازمتك اليوم على طلعة
انا : لا حبيبتي والله ما ابي اكلف عليكِ
هي : لا عادي لا تخاف معي فلوس
انا : اوكي على خير يالله قبلت العزيمة
هي : وناسة وناسة وناسة وناسة

الخروج مع اختي شيء جميل لانه يفتح بيننا باب للحوار فأعرف مايدور بداخلها من افكار من تطورات ربما تفكر في شيء معين ربما تريد ان تتخذ قرار فمن خلال الخروج معها استطيع معرفة ما تريد وبالتالي تكون صديقتي واختي في الوقت نفسه

اختي الثانية هاجر في الصف الثاني الإبتدائي كثيرًا ما اخرج معها الى المطاعم والاسواق لانها الطفلة المدللة حوارها معي كالتالي

هاجر : أمانة الله يخليك ودني ابي لعبة
ناصر : اوكي بس اول شيء قولي احبك
هي : احبك احبك احبك
ناصر : اتفقنا

ولكن عندما اكون مشغول وعندي إلتزامات مهمة يتغير الوضع وتختلف الإجابات ولكن المهم انني شخصيــًا احرص على ان اخرج مع اهلي في كل يوم من جمعة من كل اسبوع فهو يوم خاصل للعائلة للوالدة واخواتي واخواني الصغار ..........

في الختام لكِ خالص الشكر والتقدير اختي العزيزة حلم الطفولة.........

[حلم الطفوله]

هاه يا شباب الواحات شفتوا ناصر الخالدي ماشاء عليه ..الله يحفظك لأهلك ويفرحهم بك

لا يا أخوي حتى عيالنا يطلعونا ويسولفون ويانا ....يعني لغة الحوار مب معدومه وياهم

هيه مشاغل الدنيا تلهي الانسان ... بس تظل علاقة الرحمه والود بين الإخوان عجيبه

الله يخليلك خواتك ويفرحك فيهم

[ذنـيـنـي]

الي كانوا في ضرابه البارحه 3 قروبات و الحكم هو انا بحكم اني من بيت ما فيه بنات


الي في القروب الأول
كانت وجهة نظرهم هي انه البنت لازم ما تتعود على الطلعه و انه هالشي "منقود" عندهم
قلنالهم شو السبب , قالوا ما نبغي ربعنا يشوفونا و و نحن مطلعين اهلنا

القروب الثاني
قالوا انه عادي عندهم بيطلعون اهلهم بس بشرط انهم ما يكونون مرتبطين ويا ربعهم و بشرط انه تكون الطلعه في السيارة فقط,, او في مكان ما يكون فيه وايد ناس.

القروب الثالث (( و هم الي عيبني تفكيرهم لأنه شوي تفكيرهم متفتح ))
قالوا مستعدين نطلع اهلنا اي مكان دام انه نحن وياهم,,
و المفروض انه نحن الي نطلعهم و نوديهم اي مكان في خاطرهم

و خروج الشاب مع اخته مافيه شي دام انه المكان مافيه مناكر
و شد انتباهي كلمه قالها واحد من ربعي و هي انه الواحد اذا ما طلع أهله و ما اهتم فيهم
بيدورون على شخص ثاني يهتم فيهم, حتى لو كان هالشخص من غير المحارم


انا رأيي من رأي المجموعه الثالثه و أؤيد انه البنات لهم حاجه في الترفيه عن النفس بالخروج مع الاخ, حتى لو مره او مرتين في الشهر,,
و هذا الشي بيقوي العلاقه بين الاخ و اخته,,
الى درجه انه ممكن انها ممكن تقوله اسرارها و ممكن انها تستعين فيه اذا صار لها اي موقف

على فكره,, عندي واحد من الاصدقاء عنده اخت وحيده بين 8 اشقاء,, و طبعا المسكينه ضايعه بينهم لأنه محد مسولها سالفه, الى درجة انها كادت ان تسلك طريق الخطأ لولا انه صديقي قدر يتدارك الموقف و ينتبه للغلط الي "هم" مسؤولين عنه,,
و من هاك اليوم و ربيعي يعتبر يوم الاربعاء Family day خاص بأخته و يوديها الى اي مكان تبغيه و هو يعتبر مخزن اسرار شقيقته و تقوله عن كل صغيره و كبيره في حياتها
اشوف انه يعتبر أخ مثالي, ولا شو رايكم

[الشوق]

حلم الطفوله انتي رائعه ..
للاسف انا الصغرى بين الاخوان والاخوات
لكن ... اجد نفسي كبيره استطيع الااعتناء بنفسي
لانني وبكل جداره اقولها
عندما وجدت نفسي اكبر شيئا فشيئا وجدت اخواني لديهم بيتا خاصا يضمهم ..
ويضم ابنائهم وبناتهم ..
لذا لم اتمتع بمتعة الاخوه الحقيقيه
..
حـــلم الطفـــــوله
ساعات وايده احن اخوي يعاتبني
ساعات وايده اتمنى انهم ينازعوني
ساعات وايده اتمنى انهم يغارون علي
احاسيس اعترتني فجاه ... وتعتريني في لحظات ..
قد احترم اخي الكبير .. واخاف من المتوسط ..واتحاور مع الصغير واضحك معه
لكن لا استطيع ان اطلب منه اي يخرجني لمكان ما فقط لمجرد التنزه ..

عزيزتي ..
شاكره لج .. هذا الموضوع الرائع
وتسلمين
خويتج/ الشوق

[حلم الطفوله]

ذنيني بما إنك الحكم ...جان وجهتهم للحل الثالث وشجعتهم عليه

صدقني الإخت على كثر حبها لأخوها تحتاج وجوده وحواره وياها وطلعتها وياه...

مشكور أخوي على رجوعك ومشاركتك بالموضوع
ورايك إلي يمكن يغير أراء البعض بالنسبه لهالموضوع

بصراحه لو كان عندك خوات كنت بتكون الأخ المثالي بالنسبه لهن


الشوق ...إلي كلج رقه وذوق ...

يمكن أنا ما أحس بهالشعور وااااااااايد مثلج لأني اعتبر قوم بو آخر العنقود

بس خواني الله يحفظهم كانوا دوم ويااااااااي ...ويا كثر الطلعات والرحلات والسفرات وياهم

صحيح كل واحد استقل ببيته وعايلته ...بس صدقيني بيتم ذاك الحب للإخت الصغيره

كافي إنج آخر العنقود ... الله يحفظج عزيزتي...بس تعالي ليش الإخو المتوسط دوم يخوف