!× من المسؤول ×! الجزء الثاني

[ملك]

امس قبل اذان العشا رحت ازور يدتيه .. و قالت ليه سالفه ..

قلبي عورني يوم سمعتها

يدتيه رياضيه ما شاء الله عليها .. كل يوم الصبح تمشي في الفريج .. حولين مدرسة الكارمه

و فلسطين

و هي تمشي شافت بنات نازلات من التكسي ... قالت في خاطرها متأخرات حليلهن عالامتحان ..

شويه الا تشوف وحده منهن قربت صوبها قالت لها : خالتي ممكن تعطيني 5 دراهم لانه راعي التكسي

غير علينا العداد ..

يدتيه قالت لها : تريي شويه بروح بيتنا لجل ايب لج فلوس ..

راحت و عطتها .. و يوم روحن البنات .. وقفت راعي التكسي و تهندقت عليه ( فديتها )

قالت له : مب حرام عليك تغير عليهن العداد ..

قال لها : ماما انتي مافي معلوم هذا بنات شو يسوي .. انتي ما يعرف هذا بنات ليش يعطي فلوس !

قالت : لييش تقول كذا ..

قالها : هذا بنت ياخذ تكسي بعدين يروح عند صديق هوا .. بعدين يقول وديني كورنيش .. يرووه يشووف
شباب .. ياخذ رقم رقم ..

يدتيه منصدمه : احين اصدقك و الا اصدقهن !! لو صدق اللي تقوله ليش ما نزلتهن في الشارع و انته تعرف انه هالشي غلط و عيب ..

انا تفاجأة .. قلت لها : ديده .. السواق مب المسؤول .. حليله يلقط رزقه ..

و خطر في بالي السؤال مرة ثانيه

!× من المسؤول ×!

البنت .. اللي ارخصت من عمرها لجل رقم و الا نظره او ابتسامه و الا كلمة احبج المزيفه

الاهل .. اللي هم في سبات عميق لاهيين و لا يدرون وش يحصل من وراهم

و الا راعي التكسي ؟؟!

[الثعلب الرمادي]

موضوع مهم ...

الغلطة غلطة الأهل تربيتهم الغلط للبنت وصلتها لمرحلة الإنحراف و تصادف إن هذي البنت المنحرفة صادفت بنت ثانية عندها نية في الإنحراف لكن مترددة فأخذتها معاها على الخط أو بنت ماعندها أي نية في الإنحراف لكنها مع الوقت و بسبب مصادقتها لمنحرفة تعودت على هذا الشي فصارت منحرفة ... البنت المنحرفة مجرد حيوان غير مروض نتيجة التربية الخاطئة و حتى تروضه لازم تعطيه كل يوم جرعة مناسبة من العنف حتى تكسر إرادته على الإنحراف و حتى يرجع إنسان طبيعي مرة ثانية.

[طرفشانه]

تسلم اخوي الملك على طرح مثل هذا الموضوع
في ابدايه احب اقول انه
الغلط ممكن من الطرفين (الاهل والبنت )
وممكن من طرف واحد (اما البنت او الاهل )

يعني ممكن الاهل غافلين عن بنتهم ومخلينها على راحتها فتقوم البنت وتمشي في الغلط
وممكن يكونون الاهل شداد والخراب اللي فيه البنت يكون من ربيعاتها مع ان البنت معدنها زين
يعني في الف طريقه وطريقه ممكن تاثر في البنت
وبعدين البنت اللي تعرف الاصول لازم ما تسير في مثل هذا الغلط
سواء اهلها مخلينها على راحتها ولا مشددين عليها
المهم
اذا الاهل عرفوا شي عن البنت المفروض يحاسبونها ويادبونها
ويروضونها على قولت اخوي الثعلب الرمادي

[كـلـكـلـووش]

الكــــل

كــلـكم راع و كــلكم مســؤول عن رعيــــتــه ..

البنت مسؤوله عن عمـــرها .. و الاهل مســؤولين عن عيــالهم .. و التــكسي لازم يكون مسؤول بالرزق الحــلال اللي يدخــله ..

مب يدخــل رزق من ورى المنــكر !

مجــرد رأي

ســـلام
كـلـكـلـووش

[الجنيه]

الله يحفظ يدتج ويعطيها الصحه والعافيه ,,,بس خليها تتحمل على عمرها الجو متغير والبروده زايده ,,,

الله يسلمج كلكم راع وكلكم مسؤل عن رعيته ,,,

الأهل مسؤلين بالمساواه مع البنت نفسها ...

الأهل عليهم التربيه والتوجيه والمتابعه والبنت عليها تحفظ أهلها في غيابهم وسمعتها وما تنجر ورا ربيعاتها المنحرفات ...

الأهل دروهم ما يقتصر على تدريس عيالهم وتوفير سبل المعيشه والراحه لهن لا دورهم يلازمهم طول العمر يعني من ناحية الرقابه والمتابعه يعني المفروض يكون عندهم خبر عن بناتهم وين سايرات ومن وين يايات !!! أستغرب من أهل ما يدرون بناتهم وين ؟؟ لاهين عنهم ..
وأحيانا تلقون أهل مب غافلين عن بناتهم بالعكس متابعينهم ويعرفون كل تحركاتهم مع ذلك البنت تلعب من ورا أهلها بمساعدة الشيطان ..
أما البنت الغبيه (سوري على الكلمه ) بس فعلا هذا يعتبر غباء من البنت شو بتستفيد من كلمتين حلوين وبالحرام ؟؟ ليش مستعيله على رزقج ؟؟؟ في انسان من نصيبج عاجلا أم آجلا بيظهر ليش ترخصين بعمرج لفلان وعلتان ؟؟؟ تعتقدين بهالتصرف بتحصلين انسان يحبج وياخذج ؟؟؟

كل شخص مسؤل عن تصرفه بس هذا ما يمنع أنه ننصحه ونوجه ..

ماشاء الله عليها يدتج عطتهن عن طيب خاطر والا لو تدري بسواياهن جان شلختهن بخيزرانه محنايه مسودات الويه ...

ملك ,,, تسلمين حبوبه

[لمّــاح]

عـــادي والله ، شفت بعيني مثل هالشي و أكثــر . .

المـــسـؤول عن هالشــي البــنت أول شــي و عقب الاهل . .

اما التكــسي مسكين، فهو يحاول يكسب رزقه و مب بيده ينزلهن، بيتفنش !!

[شوق القلوب]

الســـلام عليــــكم..

.
.

بلاوي البنـــات واااااااااايد هالايام.. الا من رحم ربي..

والمســـؤولين..هم الاهم في المقام الاول.. البنت اذا اتربت على الاخلاق.. بتخاف على عمرها..ويمكن هالبنت اتطيح في شله تعبانه و اتحاول اتقلدهم.. و يجرها الفضول.. لكن مهما اتمادت.. تربيتها بتردها في يوم..

وفي منهم.. غلبهم الشيطان.. وخذاهم لابعد الحدود..!

الشباب نفســهم غلطانين ومســؤولين.. لو كان انسان متربي على الصح و على حفظ الاعراض جان ما بدا يغازل و يفتح المجال لاستدراك البنات.. !

و التكسي.. اشدراه شو نوايا اللي يركب وياه .. اللي عليه يوصل وبس !

[الدلووووعة]

اكيد اول شي الاهل هم المسؤلين وبعدين البنات
لو انه الاهل ماخولهن يسيرن المدرسة بروحن جان ماسون ها الشي
وهن بعد مايستحن ولا شو يبن يرقمن ( بنات اخر زمن سايرات يتعلمن ويرقمن ^_^)

بس راعي التكسي مايخصة وحليله رايل فقير يبا يترزق دام هن مايستهن هو شو بيسوي فيهن

وتسلمين عالموضوع

[عنود الريف]

انا الصراحة اوافق اخويه كلكلوووش
الكل مسؤول .. و حتى راع التكسي.. عاد هذا اذا كان مسلم .. اذا كافر بيفكر بالرزق بس ..
اما اذا مسلم فبيحاسب انه يكون حلال ..
والسمووحة

[الملهم]

السلام عليكم

سيكون رأيي كما في السابق " من المسؤول " الجزء الاول ..
النفس أي الفتاة نفسها .. لقد سمحت لنفسها بالاذلال امام الشباب .. لقد سمحت لنفسها بالاهانة ..
كيف تسمح لنفسها ان ينظر ويبتسم الشاب لها ؟!! ..

وايضا الاهل لهم دور في التربية ..
فهم المسؤولون عن تربية الفتاة وتنشأتها نشأة صحيحة ..

ولكن كما ذكرت ان المهم هنا والمسؤول هي الفتاة ..
لانها هي التي تستطيع ان تربي نفسها على الادب والاحترام ..
او ان تربي نفسها على الاذلال والمهانة امام الذئاب ..

" لكن راعي التاكسي حليله المهم يجيب فلوس حق عياله وبس " ^__^

أشكركِ على الموضوع الجميل والمهم ..
وفقكِ الله ..

[مــهــابه]

أختيـــــــــه ملكــ:
الرد ع ســؤالـج ومن وجهة نـظري أنــا..
المسؤوليـــه تكـون مشتركــه مب مقتــصره علـى فئــه معيـــنه فقط .. لا بالعكـس . .الأهــل المفروض يشــوفون تصرفــات بنــاتهم ويراقبــونهم بحيــث انهم مايحســـون فيهم وبالتــالي يطمنون عليـــهم..
والبنـــت لهـــا الدور الأســـاسي والكبير في هذي المشكلـــه ، لأنهــا هي مسؤولــه عن عمرهـا وروحهــا ومحاسبــه على كل شي تسويــه ، فإذا هـي كــانتــ تخاف على عمرهـــا ماراح تسوي كل هالأشيا .. أما اذا هي بــايعـه عمرهــا ومايهمهــا أحد فــهذي ســالفه ثــانيــه..
أمـا راعي التاكسـي .. اممم يمكـن يلعــب دور ..لكــن بالاخيــر هو شخص غريب.. مجرد سواق فقطـ لاغير...

الله يهديــهن ...

تحياتي لج..

هــموم

[بوسلطان]

السلام عليكم ورحمة الله وبركاتهاالمقدمةً: الحاله أو القضيه التي تحدث عنها زميلتنا (ملك) واحدة من مئـــــــــــات الحالات التي تحدث في مجتمعنا الإسلامي حالات يصعب التعامل معها والحكم لمن تكون عليه المسؤليه لذا سأحاول أن أختبر وتحديد كيف كان عليه أن يفعل إتجاه هؤلاء البنات المحتاجات النصيحة واالإرشاد.

أولاً:الأهل-يلعب الأهل الدور الأساسي و الرئيسي في تحمل المســــــــــــؤليه الكبرى إتجاه هؤلاء البنات لأن كل إنسان معرض للخطأ ولكــــــــــــــــــــن قبل حدوث هذا الخطأ و وقوعه قد يمنع من حدوثه الأهل وقد يتيــــــح لهم إرتكابه , فكيف ذللك؟
الأم لها واجبها إتجاه بناتها واولادها والأب أيضاً, ولكن من المسِؤول التي تحط عليه المسؤوليه الأكبر؟ لنجاوب على السؤال يجب ان نحدد نوع الجنس(ذكر أم أنثى) وفي هذه الحاله التي طرحتها زميلتنا (ملك) أنثـــــــــــــــــى فنقول أن الأم هي المسؤله الأكبر لأنها مرت بتجارب تخص النساء فبتأكيــــــد ستكون متفهمه لبناتها و متيقنه لما يمرووون بتجارب قد مرت بها ففي هذه الحاله كان يجب على الأمهات إرشاد بناتها و تفهمها بشكل كبير لبناتها والإهتمام بهن.

ثانياً: فـــي القسم الأول تحدثنا عن الأم ودورها إتجاه بناتها - لذا في هذه الحاله سنتحدث عن اصحاب السوء إذا كان دور الأم غير موجـــود أو الأب لأن مرحلة أصحـــــاب السوء تأتي إذا لم يكون هناك إرشاد. ففــــي هذه الحاله غير معذوره إذا قامت بمصاحبة بنات السوء لأن ليــــــس هناك من يقــــــــــــــوم بعمليه إرشادهم و إهداء النصيحه بطريقة تساعدهم على إجتناب الأشياء التي ليست بمصلحتهم و الإبتعاد عنــــــــــــــــها.

ثالثاً: وأخيراً سنتحدث عـــن الوسيــــــــــــله المساعده والتي ذكرتها زميلتنا (ملك) سائق التاكسي الذي ذكرت عنه انه مسكيــــــــــــــن ومحتـــــــــاج للمال ولكـــــــــــــــــــن هل المال كل شيء في الدنيا؟

طبعاً لا, المال ليس كل شيء في الدنيا هناك العطف والموده والمحبه بين النــاس وإنما ما هو إلا وسخ الدنيا وأنه زائل لا محاله لأن المسلــــــم يحاسب بأعماله وليس بماله - فالسائق في هذه الحاله إدعى انه محتاج للمال ولكنـــــــــــــــــه في الحقيقه باع ضميره بهذا المال الذي لا يساوي شيء, فكــــــــان الواجب عليه بالعكس إرشـادهن و نصيحتهن فإذا إمتنعا عن ذللك ولم يصغيا اليه وجب عليه تركهما وإذا كان بالإستطاعه إخبار الأهل فبــــــذللك أدى ما عليه. فأما إذا وافق وسكت وتعاون معهن فسيكون في هذه الحاله شيطان أخرس (الساكت عن الحق شيطان أخرس) __________________________________________________ _______

وسامحونا على الإطالهإ انما كنت أريد أن أوضح لكل واحد جزء من المسؤليـــــــــــه

ويعـــــــــــــود الشكر الكبير لزميلتنا ملــــــــــــــــــــــك لطرحها علينا و مناقشتها

مع تحيات: بوسلطان

[ملك]

ما شاء الله

كفيتوا و وفيتوا

اشكركم وايد عالردود و التفاعل

ربي يحفظكم

[دانة حتا]

حليـــــله راعي التاكسي


والله انا اعتقد الغلط من الاثنين
ذالاهل لو مراقبين بناتهم ومب هادينهن يتمشن في الشوارع وبتكاسي
ماسون شي وبعد مب مربايات
والبنااات لو فيهن ذرة عقل والا خوف على مستقبلهن ما سون هالحركات
هذا رايي والسموحه

ملووووكه
موضوعج مهم مثل كل موضيعج الغاليه
تسلمـــــــــين

[بنوته صغيرونه]

المسؤوله هي البنت اللي رخصت ابعمرها للي يسوى و اللي مايسوى
بتقولون لي يمكن الاهل امقصرين و انهم لاهين عن البنت و هي حست ابفراغ و .... الخ من الاعذار اللي يطلعونها حق هالفئة من الناس

مافكــــرت برب العالمين ؟! عالاقل لو اهلها مب هامينها خل اتفكر ف ربـــها