بدون عنوان " الجزء الأول"

[بيور]

نتريااااااااااا التكمله ,,

تسلميييين حبوووبه ’’

المتفيجة ,,

[شمه]

والله نحن مستمتعين بالقصـــه..

يوم ما بتقراها لا اترد..

شو هالنــــاس..

[روح ظبيانية]

الجزء الخامس

عبدالرحمن (حس انه ويهه مشتعل و خاف ان سارة تلاحظ ارتباكه) : ..اذا حد ضايج بج او قال لج شي ما عيبج ..خبريني..و اعتبريني شرات اخوج او قريبج

سارة (طالعته لحظات و ابتسمت) :..تسلم والله...مشكور

عبدالرحمن (صد ويهه من الخجل): ...لا....عادي..ما سويت شي

سارة ما حبت انها تحرجه اكثر و حست بارتباكه فحبت تغير الموضوع...

سارة: اقول...ترا نادوا علينا... يا الله نسير

عبدالرحمن (يطالع ساعته): هيه والله ما حسيت بالوقت ( قال في خاطره..: حد يروم يحس بالوقت و هو وياج يا الغالية)


سارة تجدمته و هو وراها..ما شل عينه عنها..كانت دقات قلبه تتسارع اكثر كل ما قرب منها اكثر.. ركبوا الطيارة..عبد الرحمن تنمنى لو كرسيه يكون حذالها..بس خاب ظنه..سارة كانت في اول درجة رجال الاعمال و هو كان آخرها. الطيارة كانت مزحومة بشكل فظيع..الكل ساير لبنان


أما في دبي..و بالأخص في بيت حلو و ملموم في البرشا كان خالد يرمس اخته فطيم


خالد: يا الله عاده فطيم قولي والله انها ما تطريني

فطيم ( نشت من مكانها بعد ما خالد لزق فيها) : اووووووووه شو اقص عليك انا؟
والله ما تسأل عنك...ترا مب كل ربيعاتي معجبات فيك و في جمالك

خالد: افا فطيم...بلاي انا ما استاهل؟

فطيم( ردت يلست حذاله و حطت الدبدوب في حضنها) : لا تستاهل بس مب وايد..مب كل ما شفت وحدة من ربيعاتي قلت تباها.. ما يستوي جي..انت ليش متقلب؟

خالد: مادري فطيم مادري..خاطري اعرس..و بسرعة

فطيم: يا خالد يا حبيبي لا تستعيل..انت توك مطلّق و ما استوى لك سنة و حرمتك كانت حلوة و ذكية و مب ناقصنها شي...

خالد ( تضايج من رمسة فطيم و نش من مكانه ) : اووووووووه فطيم..كم مرة برد بقول...من ناحية جمال هي جملية و من ناحية ذكاء ما عليها قصور..بس هي باردة وياي و لا تبادر باي اهتمام

فطيم ( غمضها اخوها) : بس بعد يا خالد انت ما عطيتها فرصة..ما كملت شهرين عندك

خالد: اطلقها و ننهي الي من بينا على خير و لا نكمل دربنا و يكون بيننا عيال و نحن ما نحس شي باتجاه بعض..هذي هي.. طلقتها و خذت ولد خالها على طول.... ما وحا لها

فطيم: ما عليه يا خالد هد اعصابك

خالد: محد يفهمني شو تبوني اسوي؟ مب كل زواج ينجح..و الطلاق حلال ترا لو انه ابغض الحلال


فطيم ( تحاول تفرح اخوها) : فديت الغالي انا...يا الله عاد اضحك عسب اييب لك احلى و اطيب بنت

خالد: انا مابا الحلاة بس...انا ابا آخذ وحدة داشة خاطري..اعرف و اسمع عنها و عن سوالفها..

فطيم ( مستغربة) : جنك حاط وحدة في بالك؟؟

خالد : تقريبا...

فطيم: ...منووو؟ وحدة انا اعرفها؟

خالد: وايد

فطيم: خالددد يا الله عاد قووول

خالد : ما بقول لين وقته

فطيم ( فرت الدبدوب عليه) : ما عليه يا الدب...

خالد: هههه ترمسيني ولا ترمسين اللعبة؟

فطيم: سخيف ( سوت عمرها زعلانه ة صدت ويهها عنه)

خالد: فطامي يا الله عشان خاطري لا اتمين جيه مابا اشوفج متضايجة

فطيم: انت السبب

خالد: شو تبيني اسوي عشان اراضيج؟ آمري؟ تبيني اوديج ماكدونالدز؟

فطيم: مب ياهل...

خالد: لا ياهل..

فطيم: قول الي بتقوله ما اهتم

خالد: تبين تعرفين منو الي في خاطري؟

فطيم ( شقت ابتسامة عريضة) : هيه

خالد: مممممممممممم ما بتخبرين حد؟

فطيم : والله ما بقول وعد خلّودد بلييز بلييز قول لي منو

خالد: اوكي بخبرج بس على شرط

فطيم: شو هووو؟

خالد: موافقة ولا

فطيم: هيه هيه ..بس قول لي منووو

خالد: الشرط اني اقولج يوم وقته يكون مناسب ( ونقز من مكانه و ركض برا شرات الياهل)

فطيم ( و هي تركض وراه و تفر عليه قوطي الكلينكس) : ما عليييييييييييييه خلّود والله بتشوف هذا ويهي ان رمستك





اما في عاصمتنا الحبيبة..فكان اليوم هادي و الكل مسافر و شوارع بوظبي خالية و محد بها. سعيد كان يحوم بموتره ما يعرف وين يسير..الربع و نصهم مسافرين وا لباجي في القهاوي و سعيد ما يداني يتيلس هناك..
سعيد حاط اغنية راشد الماجد "متكبر علينا" .. و كان مندمج في الاغنية يوم رن موبايله..طلع في شاشة الموبايل بو حميد يتصل بك.

سعيد : هلا والله هلا ببو حميد

البنت: سعيد ليش ما ترد علي؟

سعيد: اسمحي لي الغلا كنت راقد مساعة ..رديت اتصلت بج كان جهازج مغلق

البنت : هيه ...قوم امي كانو وياية و ما كنت ابا الموبايل يرن جدامهم

سعيد: خايفة علي ان يعرفون عني ولا على عمرج؟؟؟

البنت(بدلع) : سعودددي.....بس ...اكيد خايفة عليك ..

سعيد : الله الله على هالكلممة يوم تطلع من شفايفج..اذوووب انا

البنت : سعيد....استحي ...لأا تقول جي

سعيد: ريم ..ميمي حبيبي من متى و انا ارمسج بعدج تستحين مني؟

ريم : هيه سعيد و مرات احس ان يمكن يكون احسن لو ما ارمسك

سعيد: ...ريم شو هالرمسة؟ ..من صدقج؟

ريم:...شو بتقول سارة؟؟؟؟

سعيد : انتي تهمج رمسة الناس؟

ريم: انا عايشة بين الناس يا سعيد و كلامهم بيأثر فية سواء زين ولا شين..

سعيد: ميمي..انا من متى وياج مب من سنتين..و احبج من سنين..والله يا ريم و حياتج و حياة المروحومة امي اني لا يمكن ولا حتى افكر اني اودرج في يوم...ريم هالعلاقة الي من بيننا بنتوجها بالزواج..انتي تعرفين اني انا مب مال مسخرة ولا السوالف البطالية.. و سارة هي الي سوتني آد وياكم في المسن على اساس يوم نلعب هاييج اللعبة.. و انتي تدرين اني انا من قبل احبج.. و بتم احبج.. ولا يمكن اودرج في يوم

ريم: ...بس...

سعيد : لا تقولين بس ولا شي..انا ادري انج زايغة من ردة فعل سارة بس مالا داعي تعرف اذا هالشي بيضايج بج

ريم: ...كلامك عدل

سعيد : يا الله عاد عشان خاطري..لا ترمسين في هالموضوع مرة ثانية اوكي؟

ريم: انشا الله ...عشان خاطرك بس

سعيد: فديت روحج يعلني ما اخلى منج




رغم انه ما كان ييلس في البيت وايد و معظم وقته كان مقسوم بين الدوام و الميلس لكنه كان يفتقد سارة و للجو الي ضافته للبيت. كان متعود انه كل يوم يرد و يشوفها مسوية حشرة في حجرتها سواء حاطة أغاني او تطالع فيلم.. هالمرة يوم دخل البيت حس بشي ناقص..و هالاحساس ضايج به... حاول يطرده ما قدر. اخيرا استسلم لهالاحساس و دخل حجرة سارة. كان كل شي موجود يدل على شخصيتها المرحة...يلس على مكتبها و شل برواز في صورتها... شبه فظيع بينها و بين حمده في الملامح و الاطباع..بس يا ترى سارة كانت عنيدة مثل امها؟ هذا شي ما كان يعرفه لان ما احتك وياها وايد. تألم للحظات يوم شاف صورة سارة وهي ياهل على المشاية. كانت هاي في الفترة الي حمدة طلبت الطلاق منه. حرمته من جزء منه و لا كانت تخليه يشوفها دايما. السنين مرت في لمح البصر و سارة كبرت و الله كتب انها تيي عنده و تعيش وياه .. بس ليش ما يقدر يرمسها و يفتح قلبه لها و يعاملها مثل ما كل ابو يعامل بنته؟ سبب من الاسباب كان الشبه الكبير الي بينها وبين حرمته. سلطان كان يتقطع الف قطعة في الثانية الوحدة يوم يشوفها جدامه. سبحان الله الشبه فظيع. بس لازم يتغلب على هذا الضعف بنته ما بتم وايد. بيي يوم و بتعرس و بتسير في دربها و هو منو بيتم وياه عقب ما يشيّب. طلع الموبايل من جيبه. كتب اول 3 ارقام من رقم سارة. تردد...بس قرر يكمل.. اشتاق لها..وده يسمع حسها ... اتصل...الخط يالس يشبك.. "ان الهاتف المتحرك الذي طلبته مغلق..أو..." بنده. تم لحظات يتمعن في أغراض سارة. "الله يحفظها" قالها بصوت خافت.
نش من مكانه..بند الليت..بند الباب...الافكار الي راودته و الندم الي ندمه ..شلهن وياه برا الحجرة هالمرة...هالمرة كان يبا يتغير ..يبا يمارس احساس الأبوة... من زمان و احاسيسه مكبوته.بس لين متى؟ لا بد ايي يوم و ينسى حمدة... حمدة حبه الأول و الأخير...حمده الي لين الحين تطارد خياله و فكره و حبها آسره و بيتم آسره..



مطار بيروت الدولي...زحمة و الواحد يضيع فيه...عبد الرحمن طلب من سارة انها تعطيه جوازها و خلص لها امورها من الجمارك. في لحظة من اللحظات حس انها حرمته..حبيبته...خطيبته..كانت تمشي خطوتين بعيد عنه. حس بارتياح غريب و ما كان يبا هالاحساس يخلص. وده لو يتم في المطار للابد. كان يمشي و ساير صوب استلام الامتعة يوم انتبه ان سارة هب وياه. للحظة تخبل..صد ورا شافها واقفة و تدور في شنطتها على شي..شكله شي مهم لانها كانت وايد متوترة. رد لها عبد الرحمن

عبدالرحمن: خير سارة .. تدورين شي؟

سارة (مرتبكة) : ....هيه...كاميرتي..وين ....

عبدالرحمن: الله يهديج هدي اعصابح و دوري عدل اكيد بين الاغراض

سارة(صوتها مبحوح و جنها بتصيح) : دورت دورت ...ما شي...اخاف نسيتها في الطيارة...

عبدالرحمن تقطع يوم شافها في هالحالة كان وده يحضنها و يقول لها انه بيفداه بروحها بس هي لا تسوي في عمرها جي

عبدالرحمن: ما يصير نرد احينه و اذا في الطيارة اكيد حد شلها..

سارة ( دمعة نزلت من عينها) : هاي احسن كاميرا عندي و كنت ابا اصور فيها بيروت اول ما نطلع من هنيه

عبدالرحمن : سارة....بس خلاص...جان تبين برمس مكتب الطيران و بتخبرهم جان حد حصلها...أمسحي دمعتج .... دخيلج (قالها بكل رجا)

سارة (حست بعمرها و استحت خدها صار وردي) : ...صدق بترمسهم ؟؟؟ ( قالتها و جنها ياهل تسال ابوها)

عبدالرحمن : هيه اترييني بسير اسال.... ايلسي هناك ( و أشر لها على الكراسي)


سارة كانت حاسة بخجل فظيع...شو بيقول عنها عبد الرحمن . اول مرة ترمسه و تمت تدمع نفس الياهل.. كانت تقول في خاطرها: اكيد بيقول اني ياهل ...صدق اني خبلة..متى بستوي حرمة؟

الي ما كانت تعرفه هو ان عبدالرحمن تخبل باسلوبها الطفولي ...حس ان حبها الف مرة اكثر.... وده يحضنها بقوة و ما يخليها تسير عنه... تم ربع ساعة و عقب رد . طالعته سارة و نظراتها كانت كلها أمل ... و هو حس بهالشي و ما كان وده يخيب بظنها...

عبدالرحمن : هي كيف شكلها الكاميرا؟

سارة: سوني سايبر شوت..بس ما احيد رقم الموديل

عبد الرحمن: ..ماحد من المضيفات حصل شي.... ( ما طالعها في عينها يوم قال هالشي لان ما كان يبا يشوفها تتكدر)


سارة: .......ما عليه.. مشكور عبد الرحمن و آسفة وايد أذيتك وياي
عبدالرحمن : لا تقولين جي..تعبج راحة ( و كان يقصدها)


ابتسمت له و نشت

سارة : ياالله نييب الشنط


عبدالرحمن يدري انها وايد متكدرة و ما يبا يشوفها بهالحال...بس ما عرف شو يسوي...تم يفكر و يفكر و هو يمشي وراها....



*
*
*
*
*
*


خلفان : الله يهديك يا سلطان...رد البيت واللله الشغل عمره ما يخلص بس العمر يخلص...رد البيت اطلع سوو اي شي...سير ميلس بن حميد بس لا تسوي في عمرك شذا حرام..

سلطان: بلاك عليه يا بو عبدالرحمن ..والله ما فية الا العافية و انا روحي بنش بسير البيت اذا حسيت بتعب

خلفان ( تنهد) : على هواك.... انت ادري بمصلحتك....

سلطان: خلاص عيل... عطني ساعة و بييكم الميلس

خلفان: اذا جي عيل بتم وياك لين ما تتفرغ

سلطان: لا لا يا اخوية..ما بروم اخلص الشغل جه و انت ميلس..لا انت سير و رد البيت و ارتاح لين ما انا ايي

خلفان: تشوف جيه؟

سلطان: هيه والله يا بو عبدالرحمن انا اتلوم اذا انت ميلس جه و انا منشغل

خلفان: ولو ان ما فيها شي..بس برايك ..انا بتجدمك و ان شا الله نتلاقي في الميلس عقب ساعة...

سلطان: على خير

خلفان (نش من عالكرسي) : في امان الله

سلطان:في امان الكريم

يلس سلطان على كرسيه..كان حاس بالدنيا ضايقة عليه... فتح عقم كندورته بس بعد ما كان يقدر يتنفس عدل..حس انه بيختنق و الدنيا تلف فيه... فتح سدة المكتب بايد مرتجفة..شل علبة دوا..من زود رجفة ايده حس و جنه هالعلبة الصغيرة وزنها 20 كيلو..فتح العلبة...الحبوب تناثرن عالمكتب..خذ حبة...بلعها... ماقدر ييتحمل اكثر..قلبه كان بيطلع من صدره.. استسلم .ما قدر يقاوم..طاح على المكتب..الدنيا ظلمت في عيونه... و الدقايق وقفت


خلفان تخبل من الصبح و هو يتصل على موبايل سلطان بس محد كان يرد..صار له فوق ساعتين يترياه."معقولة عنده اجتماع؟ لا لا ماظن ..محد بداوم احينة" ما تم سؤال ما دار في راس خلفان. دخلت حرمته روضة عليه المكتب و شافته و حالته فوق تحت

روضة: بلاك يا خلفان؟ خير شو صاير

خلفان( متوتر) : مادري يا روضة مادري...سلطان ما يرد علي ..قال لي بيلحقني الميلس و محد يرد على تليفونه..قلبي قارصني يا روضة..احس شي استولى به

روضة: لا اله الا الله...تعوذ من ابليس يا الغالي..ما فيه الا العافية..و الغايب عذره معاه

خلفان يلس على طرف الشبرية و عق العقال من راسه ..و كان متوتر و ريله تتحرك من زود ما هو مب على بعضه

روضة: يمكن حاط جهازه على الصامت او اي شي..

خلفان: لا يا روضة هب من عوايد سلطان ان ما يرد على موبايله..اخوية و ادري بي..

روضة: انزين جرب اتصل على السكرتير يمكن يعرف وين هو

روضة: جربت يا روضة ..قال ان سار المكتب و كان مقفول ..اكيد سلطان طلع و بند المكتب

روضة: اعوذ بالله من ابليس..يا الله استر علينا...

خلفان ( كان يعض اصابعه من التوتر) : اللهم اجعلها خير

**
**
**

سمير: يا اخ سلطان ما بيصير هيك.. انت مش محمل الموضوع اي اهمية..

سلطان: شو تباني اسوي يا دكتور..الادوية و التزمت بها.. و كل شي آخذه في وقته..بس هالالم جاتلني احس اني بموت ... والله كل مرة اشوف الموت جدامي

سمير: انا قلت لك اذا بدك هالحالة تخف عنك لازم تعمل العملية..و باسرع وقت ممكن لان كل ما بتتاخر راح تزيد هالحالة و تصير اسوأ

سلطان: يا دكتور انت مب متفهم الوضع..الاهل ما يعرفون هالموضوع وما اقدر اقطع عن الشغل..كل شي على راسي

سمير: الشغل ما راح يفيدك لما حتمرض.. صدقني اعمل العملية و راح تحس بالفرق..ارجوك يا اخ سلطان ما بقدر اخليك تعمل بنفسك هيك..لازم تتخذ الاجراءات اللازمة

سلطان: ان شا الله خير دكتور..

سمير ( و هو يكتب وصفة الدوا) : طيب.. لحد هالكم من يوم انت خذ هالدوا و راح يخفف عليك من حدة الألم و النوبات الي بتجي لك..بس لازم ضروري كتير اني اشوفك بعد اسبوع..و ان شا الله تكون جاي و محدد متى بدك تعمل العملية

سلطان : على خير يا دكتور...تسلم

سمير: لا ولو... مع السلامة استاز سلطان

سلطان: الله يحفظك


ركب سلطان موتره بعد ما خذ وصفة الدوا ..شغل السيارة.. و انتبه للموبايل الي من اول ما طاح ما شافه..لقى فيه فوق ال 55 مكالمة لم يرد عليها. معظمها كان من ربيع عمره خلفان. و كم من مكالمة من عملاء الشركة. اتصل سلطان على خلفان على شان يطمنه و يقول له لا يحاتيه

تليفون يرن....فز خلفان من مكانه و سار صوب التلفون

روضة : يمكن سلطان

خلفان (يرد على التلفون ) : الوو...سلطان....خوفتنا عليك الله يهديك

سلطان ( يضحك) :ههههههه ليش عاد ياخلفان؟ والله ذكرتني بالوالدة الله يرحمها

خلفان: رحمة الله عليها...وينك انت والله من متى و انا اتصل؟ بارك الله فيك جان طمنتني

سلطان: اسمح لي الغالي.. وانا طالع من الشركة..اتصل بي واحد من العملاء..بو احمد جان تعرفه..و كان يبا يرمسني في موضوع ضروري..و انا الله يسلمك نسيت الموبايل في السيارة

خلفان: الحمد لله..طمنتني الله يطمنك..والله خوفتني عليك

سلطان: عسى قلبك دوم مطمن

خلفان : ههه الي عنده ربيع و اخو شراتك و عليه هالحركات ماظني بطمن

سلطان: افا يا بوعبدالرحمن.. تقول عني جه و انا اخوك

خلفان: اسولف يا بو سارة...

تحرك شي في قلب سلطان يوم خلفان ذكر ولده..ذكر بنته سارة..حن لها..صار لها كم من يوم و هي في لبنان..و مكانها يبين اكثر كل ما الايام تتجدم.


اما في بيروت

سارة كانت في جناحها في الفندق و توها رادة من الدورة. كانت مستمتعة وايد بوقتها و مستانسة لانها يالسة تتعلم اشيا يديدة بتفيدها في هوايتها. طاحت على الشبرية..صدت على الساعة. توها الساعة 2. قالت في خاطرها..اكيد الانترنت محد يالس عليه تحت في خاطري ارمس عددوول.. من البارحة ما رمسته.. اكيد هو في الفندق احينه لان ليل في بانكوك. غصبت عمرها انها تنش و تنزل لو انها كانت تعبانه. نزلت تحت و كان قسم رجال الاعمال الي فيه الانترنت فاضي مثل ما توقعت بس كان في واحد يالس على كمبيوتر. ما انتبهت لملامحه..يلست في الكبيوتر الي حذاله.. صد الريال و تم يطالعها و ابتسم.حست بنظراته بس ما كان ودها انها تطالعه او تفتح مجال. طنشت الموضوع و فتحت المسنجر

عبدالرحمن: اشحالج سارة ؟

سارة فزت من مكانها..تفاجأت كيف هالريال رمسها..لا و يعرف اسمها بعد... عبد الرحمن ضحك شوي ما قدر يتحمل الموقف..و سارة ويها صار احمر مثل الطماط من القفطة. من دون ما تطالعه ردت عليه

سارة: انا بخير..انت شخبارك؟

الخجل حلاها اكثر. و عبد الرحمن ما قدر يشل عينه عنها

عبد الرحمن : انا بخير دامج بخير...

بدت سارة تكتب عالمسنجر و ما كان وده يقاطعها و رد هو على شغله


اما عالمسنجر ف سارة شافت عادل اونلاين و رمسته:
المحادثة_


سواري: اشحالك عادل والله تولهت عليك وايد وايد وايد

بو عديل: انا بعد والله احس شي ناقص..ثره انتي يا الدبة

سواري: دبة حرمتك هههه..اشحال عموو؟

بو عديل: والله بخير ...اليوم سرنا المستشفى و سووا فحوصات عادية

سواري: و عمي اشحاله؟

بو عديل: اوووه عمج يحاوط و يا الوالدة..الجو فظيع هنيه

سواري: حليلهم..و انت ليش ما سرت وياهم؟

بوعديل: شو رايج؟

سواري: مادري

بوعديل: اكيد عسب ارمسج يا الدبة....

سواري:ههههههههههه

بو عديل: انتي مستانسة هناك؟

سواري: وايد عدول والله وايد احس اني في عالم ثاني يوم ادش المحاضرة

بو عديل: مب صاحية والله

سواري: جب

بو عديل: و هذا عبد الرحمن مأذنج ولا؟

سواري: لا وحليله في حاله.والله وايد محترم

بوعديل: مادري بس ما ارتاح له

سواري: يا الله عاد ما سوا لك شي

بوعديل: ادري..بس بعد..مجرد احساس... ما عليج مني

سواري: مم اوكيك..اقول عدول بسير احينة والله تعبانة وايد

بوعديل : انا بعد شكلي بسير بخمد

سواري: اوكيك تحمل بعمرك و سلم على عمووو و عمي وايد

بوعديل: واصل

سواري: باي..نتلاقى باجر اوكي؟

بوعديل: في الانتظار ههههه..بتوله عليج لين باجر

سواري: و انا اكثر يا الشقيق...باي

بو عديل: باي


طول الوقت و عبد الرحمن كان مخلص شغله بس كان يدخل مواقع و يتسلى بس عسب يتم ويا سارة و يحس بقربها. نشت سارة و كانت الابتسامة شاقة حلجها. تستانس وايد يوم ترمس عادل. ما كانت تعرف شو العلاقة بالضبط الي بينها و بينه.. بالنسبة لها كانو اكثر عن اخوان. كانوا اثنين و جنهم يعرفون بعض من زمان. عبد الرحمن حس بالغيرة شوي. ليش سارة مبتسمة؟ منو رمست؟ يا ليت انا الي كنت مرمسنها و مخلنها تبتسم. كان يكره نفسه يوم يغار. ما يداني هالشعور لانه ياكل قلبه. آخ يا سارة حسي فيني
عبدالرحمن ( نش ورا سارة) : اقول سارة

سارة (التفتت) : هلا

عبدالرحمن: مب قاصرنج شي؟

سارة: لا والله مشكور تسلم

عبدالرحمن : صدق والله؟ تدرين الوالد موصني عليج

سارة : هيه والله

عبدالرحمن : مب في خاطرج تطلعين تشوفين بيروت؟

سارة (استحت كان خاطرها في هالشي بس هب ويا عبدالرحمن كانت تستحي منه) : مم هيه..بس..

عبدالرحمن: ادري..مب حلوة اذا انا وياج رواحنا..بس كنت افكر جان تبين بنحجز في التور مال الفندق و بنسير نطالع المناظر

سارة: ....مادري...بسأل ابوية

عبدالرحمن: متى بتردين علي خبر..؟

سارة: مادري... ماعرف كيف برد لك الخبر

عبدالرحمن تخبل عالى البراءة الي كانت في صوتها... ابتسم ابتسامة خفيفة

عبدالرحمن :ما عليه اذا اتصلت على رقم الحجرة في الليل و خذت ردج؟؟

سارة..احتارت..بس آخر شي وافقت

سارة: مم...أوكي


عبدالرحمن :خلاص عيل برايج..انا بسير برقد شوي

سارة: اوكي..نوم العوافي

عبدالرحمن :الله يعافيج

و طلع عبد الرحمن و تجدمها لين اللفت عسب يخليها تاخذ راحتها و ما تحس بانزعاج. سارة حست بطيبة عبد الرحمن و كيف كان مهتم اذا هي قاصرنها شي او لا. ما لامت ابوها لان يثق به. ردت حجرتها و اتصلت بأبوها. في البداية محد رد بس بعدين في المرة الثانية رد عليها:

سلطان: هلا والله

سارة: هلا ابوية..اشحالك

سلطان: الحمد الله الغلا! انتي علومج؟ عساها طيبة

سارة: طيبة..مب قاصرنا الا شوفتكم

سلطان :الله يخليج فديتج...و اشحال الدورة وياج ؟ انشا الله مستناسة

سارة: مشكور ابوية وايد وايد صدق مستانسة.

سلطان : عسى دوم

سارة: ابوية بغيت اسالك شي

سلطان: آمري

سارة: ابوية اليوم عبدالرحمن تم يتخبرني اذا قاصرني شي.. و سألني جان ابا اسير تور ويا الفندق و هو بيكون وياية عسب نطالع بيروت و نطالع المناظر

سلطان: عادي سارة ما فيها شي حتى لو ما سألتيني و سرتي عادي

سارة ( استغربت) :لأا...بس حبيت استاّذنك

سلطان: بارك الله فيج..عادي فديتج سيري و استانسي...

سارة كانت تبا تقول له عن كاميرتها الي ضاعت و كيف كانت تباها عسب تصور بيرو ت و مناظرها بس استحت.لين الحين و هي تحس ان في حدود بينها و بين ابوها و ان علاقتهم رسمية. ودها لو تكسر الحاجز الي من بينهم بس ابوها ما يساعد و جموده هو الي مصعب المسألة اكثر

سارة: خلاص عيل الوالد...تحمل بعمرك

سلطان: و انتي اكثر..

سارة: ان شا الله

سلطان: في امان الله

سارة:في امان الكريم..

و بندت... ما حست بعمرها يوم رقدت..رقدت بثيابها من التعب.




في الناحية الثانية من العالم و تحديدا في بانكوك. كان سهيل و حرمته يتمشون في سوق الليل و كان هذا واحد من اسواق تايلاند العديدة و الي يميزه ان ما يفتح الا في الليل و فيه مختلف البضايع من ملابس لين الاثاث

سهيل ( و هو ياكل الايس كريم) : الله يا سلامة..من متى ما تمشينا رواحنا

سلامة : والله يا سهيل الود ودي لو دايما نسافر و نغير جو ..بس انت الله يهديك ذابح عمرك ويا هالشغل..والله الي يشوفك يقول وزير

سهيل::هههههه تنكتين سلاميي هاا؟؟

سلامة : سلامي؟؟ من متى ما زقرتني جي؟

سهيل: افا سلامي..شو قصدج ما ادلعج؟

سلامة : تبا الصراحة ...لأا

سهيل: والله يا سلامة على مر هالسنين و الظروف الي مرينا بها لكن حبي لج عمره ما قل و كل ما له و يزيد..

سلامة ( استحت ) : ...الله يخليك يا بو عادل

سهيل: لا تزقريني جي و تكبريني ..قولي لي سهيل و بس ..هالكلمة تخرب الجو الرومانسي

سلامة : هههههههههههههه

يلسوا على كراسي حذال مطعم عسب يرتاحون شوي... و الجو كان عذاب...كان الهوا حلو و بارد ..

سلامة : هالجو الحلو يذكرني بالبلاد ايام الشتا

سهيل: هيه والله فديت بلادنا ما لها مثيل

سلامة : صدقت يا سهيل

سهيل: اقول سلامة ..بغيت ارمسج في موضوع

سلامة : خير..

سهيل: انا هالشي افكر فيه من زمان و من عقب ما بفاتحج به ابا افاتح عادل به

سلامة: خير سهيل شو مستوي؟

سهيل: ابا اخطب سارة لعادل.. والله ماظني بنحصل شراتها.. و احينة خلصت مدرسة.. خله يتقدم لها و و الزواج عقب الجامعة اذا هي في خاطرها تكمل دراستها

سلامة (فرحت) : والله انا افكر في هالموضوع من فترة

سهيل يلس يحيس خاشوقة الآيس كريم في علبتها..

سهيل: ..تقولين بيوافق؟

سلامة: اكيد..انت ما تشوف شقة هم متعلقين ببعض؟؟؟..والله شرات الاخوان

سهيل: هذا انا الي خايف منه

سلامة : لا لا تحاتي.. و والله سارة بتكون البنت الي الله ما عطاني اياها

سهيل تم يطالع حرمته بعد ما قالت هالكلام. سلامة استئصلوا لها رحمها بعد ما يابت عادل و اكتشفت ان فيها سرطان فيه. حاولت تقنع سهيل ان يعرس و ياخذ وحدة تييب عيال بس هو عاند و اصر ان يتم وياها و يرضى بقدر ربه. كان ماخذنها عن حب و يحبها من يوم هو ياهل. كانو عيال ييران و كل يوم كانت تلعب وياه. و لين ما كبر و تخرج و قلبه ما عرف غيرها. و طول هالسنين و حبه لها يزيد و يموت في شي اسمه سلامة و يحاول يفرحها باي طريقة و ما اييب لها طاري العيال عسب ما تتضايق و تحس بالنقص. كان دايما يسولف وياها و يفرحها و يسوي لها اي شي بس ما تحس بالنقص والكدر . يمكن في الخمس سنوات الماضية قصر في حقها شوي بسبة الشغل بس كان ناوي يعوضها خلال هالسفرة و الايام الي ياية. تم يطالعها سهيل و يتأمل ويهها. سلامة كانت حلوة . طولها حلو و رشيقة و كل شي فيها حلو. شعرها اسود و طويل و عينها سودة شرات شعرها. على مر هالسنين و المرض الي ياها بس بعد كانت محتفظة بجمالها


سهيل: سلامة....

سلامة: لبيه..عيونها

سهيل: فديت عيونها... حلليني يا سلامة

سلامة ( مستغربة) : من شو احللك يا سهيل... ؟

سهيل ( صوته فيه نبرة حزن ) :وايد مقصر في حقج ..وايد يا سلامة ..احس اني بعدت عنج في الفترة الاخيرة

سلامة ( ابتسمت) : الغالي..انت تتعب و تشقى لراحتنا و عشان تأمن مستقبلنا..و تقول انك مقصر بعد..

سهيل: سلامة انتي تدرين شو اقصد

سلامة : ادري يا الغالي ادري..بس الله يعلم اني هب شالة في خاطرية عليك..

سهيل: دومج كبيرة في عيني يا سلامة.. احمد الله ان ربي وهبني اياج

سلامة ( خدها احمر) : .....عسى الله لا يحرمني منك يا الغالي...




نشت سارة..و كانت حجرتها ظلام. اكيد وايد رقدت. تكره عمرها يوم ترقد وايد لانها ما بتروم ترقد عدل في الليل. نشت و هي متضايجة من الرقدة. كانت تعرف ان رقدة العصر منهية عنها في الدين بس هي كانت وايد تعبانة و جسمها مرهق. نشت و تغسلت و صلت ما فاتها. فتحت التلفزيون و يلست تغير في القنوات. ما كان في شي مسلي انها تطالعه... نشت و تمشت في الحجرة.. سارت صوب البلكونة. فتحتها و وقفت برا.. الجو كان يخبل و الهوا بارد و حلو و كان يطير خصلات شعرها الاسود. حست ببرودة و يلست تفرك جتوفها. دشت داخل بس خلت باب البلكونة مبطل. تمت طايحة على الشبرية من الملل. تولهت على البلاد وايد و على اهلها وبيتها , بس هب كثر ما تولهت على بيت عمها سهيل و على مرت عمها سلامة وعادل.


في آخر الممر من نفس الطابق في الفندق ,كان عبدالرحمن بعد ملان و طايح على الفراش و يغير في قنوات التلفزيون. ما كان في اي شي في العالم يقدر يشل سارة عن باله. من الظهر و هو يحسب الدقايق و الثواني عسب يتصل بها و ياخذ ردها. كان حاسب الف حساب و حساب لهالمكالمة. كيف بيرمس؟ شو بيقول؟ يقول الو ولا هلا سارة ولا مسا الخير؟ كان محتار يبا كل شي يكون اوكي. جنه اول مرة في حياته بيرمس فيها على التلفون. قبض السماعة و قرر يتصل لان ما عاد فيه صبر. اول شي اتصل في الاستقبال و طلب منهم انهم يحولونه على حجرتها.
التلفون يرن..رنة...رنتين..ثلاث..

حد رفع السماعة..

و احلى صوت قال..

سارة: الوو...

عبدالرحمن ( دقات قلبه تتسارع و ايده بدت تعرق..و شفايفة حس انها يالسة تنشف) : مسا الخير

سارة: هلا عبد الرحمن

عبدالرحمن: اشحالج؟

سارة: بخير يسرك حالي... انت شو احوالك؟

عبدالرحمن : بخير و سهالة ربي يسلمج......شو قلتي عن التور؟

سارة: ان شا الله بيي... بس متى هوو؟

عبد الرحمن: باجر معطلين هني في بيروت..ما قالوا لج

سارة: شو المانسبة؟

عبدالرحمن : والله علمي علمج ..بس جان تبين بنسير باجر..

سارة: خلاص صار..الساعة كم.؟

عبد الرحمن: بلاقيج باجر عالساعة 8 تحت لان الباص يمشي 8:30 ..

سارة: خلاص ان شا الله

عبدالرحمن: تامريني بشي..؟

سارة: مشكور..ما تقصر و السموحة اذا مثقلة عليك

عبدالرحمن :لا افا عليج شو هالكلام؟

سارة:....

عبدالرحمن: برايج اختية بخليج..

سارة: اوكي..نتلاقي باجر

عبدالرحمن: ان شا الله..تصبحين على خير

سارة: و انت من اهله

عبدالرحمن: مع السلامة

سارة: مع السلامة





يا ترى شو بيستوي باجر؟؟ عادل بيوافق ان يخطب سارة؟

احداث كثيرة.. ترقبوها في الجزء القادم

[شمه]

:)

تسلمين ..

[روح ظبيانية]

thx shama tslmen 3la ilrad

[روح ظبيانية]

الجزء السادس



ألم فظيع في راسها. ما ياها رقاد هاييج الليلة كانت وايد تفكر في عادل ما تدري ليش. كانت تحس باحاسيس غريبة يود تتذكر شكله. تمت تسترجع ذكريات سوالفهم ويا بعض و لمتهم على الغدا. ما حست بعمرها الا يوم شافت الشمس بدت تشرق برا. بندت عيونها و حاولت ترقد لو ساعة قبل ما تنزل تحت حق التور.ودها لو تخبر عبدالرحمن انه يكنسل طلعة اليوم بس استحت تتصل فيه و كانت في نفس الوقت تبا تطلع وتغير جو.


الساعة ثمان.. سارة ما نزلت ..عبدالرحمن كان على اعصابه.. وينها؟ يا الله .... كان مرتبك..يبا يتصل بها من الاستقبال بس استحى . كان يالس على الكراسي تحت و يترياها و يحس انه الوقت يمشي بسرعة و الناس بدت تتيمع تحت. شل الكيس الي كان جدامه على الطاولة. فتحه و تأكد ان الشي مرتب داخل . احتار يعطيها اياه ولا لا. اخاف تاخذ عني فكرة خايسة؟ "قالها في خاطره. طرد التفكير عن باله ..ليش ما نزلت..
الساعة 8:21.. يا الله وينج يا سارة ؟؟

حط ايدينه على ويهه و وخى راسه.. كانت دقات قلبه متسارعة و كان خايف انها تخوّن به و ما تنزل او يمكن راحت عليها نومة او يمكن كنسلت الروحة بس استحت تخبره.الف فكرة و فكرة دارت في باله.
ما حس الا وحد تحنحن جدامه. تحراه المسؤول مال التور. رد عليه من دون ما يرفع راسه

عبدالرحمن ( تنهد) : برايكم سيروا ما بيي.....

سارة ( متعجبة) : اووييه...ليش؟


رفع راسه و كانت سارة الي واقفة جدامه. ويهها كان شاحب و باين عليه التعب و جنها بتمرض

عبدالرحمن : اسمحي لي تحريتج الريال مال التور


سارة: ليش ؟ مب ناوي تسير؟

عبدالرحمن ( ارتبك) : لا ..مب جي...بس تحريتج ما بتيين

سارة: اسمح لي راحت علي نومة

عبدالرحمن : خير سارة..ِشي بلاج؟

سارة( عرفت انه يطري ويهها) : ...ها....لا..بس ما رقدت عدل البارحة

عبدالرحمن: اذا جي برايه التور بنسير يوم ثاني..اهم شي راحتج

سارة كبر في عينها عبدالرحمن و كانت تحس باهتمامه في كل كلمة تطلع من فمه. كانت حاسة انه هو يقول هالشي مب لانه ابوها موصنه عليها ..بس عشان شي ثاني. طردت هالفكرة من بالها و قالت في خاطرها "اكيد لانه هو طيب جي يسوي... مب معقولة لسبب ثاني"

سارة: لا ما عليه..انا روحي متشوقة و ابا اشوف بيروت .. من اول ما وصلت و ما سرت مكان غير المطاعم الي حذال الفندق

عبدالرحمن :خلاص عيل..خلينا نسير الباص قبل ما يمشي

سارة: يا الله


و مشوا و ساروو الباص... كانت 8:30 بالضبط



في بانكوك كان عصر و كانت سلامة توها طالعة من المستشفى

سهيل: برايه سلامة شو فيها لو تأخرنا شوي عن البلاد .؟ المهم تكملين العلاج هنيه

عادل: هيه والله اماية.. خلج..الا اسبوع زيادة.. و اهم شي صحتج

سلامة : والله اني تولهت عالبلاد

سهيل: كلنا تولهنا..بس انتي بديتي العلاج و ما يستوي توقفين احينة بارك الله فيج

سلامة ( تنهدت): ...سهيل.برايك جانك بترد البلاد ما يصير تتأخر على الشغل.. و انا بتم هني ويا عادل..فديته ما بيقصر عني

عادل: هيه والله الوالد لو تبا ترد البلاد برايك ..بتم هني ويا اماية

سهيل ( بخبث) : هيه عاد انت عايبنك الجو هنا..اشوفك كل يوم متيلس تحت في الفندق

عادل ( يتفلسف): افا يا ابوية.. انا تربيتك.. و يوم اني ميلس ترا عسب اغير جو لا اكثر

سهيل: ما يندرى عنك يا اللوتي

عادل: ههه الله يسامحك ابوية


سهيل رد و التفت للسلامة

سهيل: العمر يخلص و الشغل ما يخلص. ما عليج مني و لا من الشغل..انا بتم وياج لين ما تخلصين علاج .. و مثل ما يينا ويا بعض بنرد ويا بعض

سلامة: خير انشا الله..

عادل: اماية تصدقين وايد اشتقت لسارة

سلامة : انا بعد والله.. عطني الموبايل فديتك خلني ادق لها
عادل ضرب رقم سارة.. و عطى الموبايل حق امه

سلامة ( مستغربة) : ..جهازها مغلق.. غريبة.. اخاف شي استوى بها

سهيل: تعوذي من ابليس ما فيها الا العافية.. تلاقينها سايرة الدورة و غالقة التلفون

سلامة و شكلها صدق تحاتي

عادل: الله يهديج يا اماية.. اكيد لانها في الدورة...لا اتمين تحاتين

سهيل: والله ما في شي بيزيدج غير هالمحاتاة

سلامة: بلاكم علي؟ بنتي حبيبتي لازم اخاف عليها

عادل: ما عليج منها جنية هاي ما يستوي بها شي... ههههه ...تلاقينها مركزة احينة في المحاضرة و حالتها حالة و ...

سلامة ما خلته يكمل كلامة و مطت اذنه

عادل: آآآي آآآي

سلامة: يا اللوتي شقة جي تقول عن سارة؟ هااا؟

عادل: اماية استهبل بلاج جي؟ والله لو هي تطريني بهالطريقة والله ما مطيتيها من اذنها

سلامة : فديتها هي اصلا دوم تطريك بالخير و لسانها حلو..لكن انت. آخ من لسانك

عادل حط ايده على جتف امه و سوا عمره يتدلع

عادل: اماية تهون عليج اذني؟ تدرين بي قلبي ابيض و ما اقصد شي

سلامة باست خذ ولدها

سلامة: فديتك انت..انت الغالي ولد الغالي ما ازعل منك

عادل: اماية ..هب جي عاد جدام الناس تبوسيني... ريال انا هب ياهل

سلامة: مافيها شي... شو فيها؟ ام تبوس ولدها

عادل: لا اماية ما يستوي ..هب جدام الناس فضيحة ...

سلامة :سير سير انا ما عندي سالفة ياية و اوني ابا ادلعك

سهيل: هههه كبر الولد يا سلامة

سلامة : دومه بيتم في عيني ياهل.. هذا الغلا
عادل: هههه عن يكبر راسي اماية...

سلامة : من زمان كبران..ما بيأثر فيه احينة

عادل +سهيل: هههههههههههههههههههههه


*
*
*
*



سعيد كان في الميلس ويا خالته موزة و يالسين يسولوفون

موزة: والله يا سعيد..الصراحة ما يستحي..عيل ريال طول و عرض و جيه يسوي؟ ما شي مذهب

سعيد: ههه خالتيه الشرع حلل اربع

موزة: لا لا ما يستوي هالجلام..حرمته في شو مقصرة عليه.. يالسة في البيت و مربية عياله احسن تربية و كل شي يباه و سوت له اياه

سعيد: هب مقصرة ..بس هو يقول انه يبا عيال

موزة: الله و اكبر على الظالم...حرمته يايبة له 8 و بعد هب سادنه..والله الرياييل ما لهم أمان

سعيد: افا خالتية.. مب كليهم هب زينين

موزة و هي تشرب القهوة

موزة: والله ان اكثرهم جي

سعيد :هههه ما علينا منه الله يهديه

موزة: الله يصبرج يا شيخة على بلواج

سعيد: اقول خالتية

موزة: قول يعلني افداك

سعيد: انا لو خذت على حرمتية بتزعلين؟

موزة: هيه بزعل ليش ما بزعل... ليش تسوي جيه في بنت الناس

سعيد: هههه عادي الشرع حلل اربع و انا ابا انوّع

موزة: يوم اقول انه الرياييل ما لهم امان

سعيد : أسولف وياج خالووو

موزة : ما يندرى عنك..انت عرّس قبل و بعدين بنرمس في هالشي

سعيد: قريب انشا الله

موزة: تباني ادور لك حرمة؟ والله انه بنات مريم بنت احمد ما شي احلا عنهن..اخلاق و جمال و مخلصات الجامعة بعد

سعيد: لا لا خالتية..ألعروس موجودة

موزة ضربته على ريله

موزة: عنلاتك تخطب من وراية

سعيد: والله لو اروم ما سويتها...بس انا حاط وحدة في بالي

موزة: بنت منو؟؟

سعيد : جانج تعرفين قوم بن سالم

موزة.. قوم بن سالم؟ هيه هيه عرفتهم...بس اي وحدة من بناتهن؟

سعيد: انا خاطرية في ريم .. ربيعة سارة هي..

موزة : هيه هيه عرفتها..والله انها مزيونة..بس هب جنها صغيرة

سعيدة: لا صغيرة ولا شي..قد سارة هي

موزة: بس بعد...

سعيد: والله يا خالتية من زمان و هي في خاطري..

موزة: افا لا تخلي شي في خاطرك.من باجر بسير عند الحرمات و برمس امها

سعيد : صدق والله خالتية؟

موزة: هيه والله...خل نفرح بك

سعيد: بس خلنا نتريا سارة لين ما ترد احسن

موزة: ليش هي متى بترد؟

سعيد: تقريبا عقب 10 ايام

موزة: والله هذا سلطان غير الناس بعد. احينة شي ريال يخلي بنته تسير جيه لا محرم لا ريال..

سعيد: والله ما ادري عنه خالو..برايه يسوي الي يباه

موزة: لا شو يسوي الي يباه؟ هاي بنتنا ما يصير جيه.. مب حلوة

سعيد: ادري خالتية بس انتي تعرفين سلطان ما يحب حد يتدخل في هالسوالف

موزة: ادري به راسه يابس..من يوم و هو شاب

سعيد: الله يهديه

موزة: آمين

*
*



ام خالد كانت في المطبخ و تحضر العشا يوم دش عليها خالد و زخها من بطنها

ام خالد : عوووذ بالله

خالد: هههه زغتي اماية؟

ام خالد : انا كم مرة قايلة لك لا تينيي من وراي و انا لاهية

خالد حب راس امه

خالد : فديت هالراس

ام خالد : خوز شوي.. خلني اسوي القهوة ابوك احين بيي

خالد: اماية فديتج ليش متعبة عمرج

ام خالد: ابوك ما يداني ياكل الا من ايديني

خالد: هههه مدلعتنه اماية

ام خالد: اذا ما دلعته منو بيدلعه

خالد : اماية...

ام خالد و تحط الصحون في الصينية

ام خالد: خير ؟

خالد: فكرتي في الموضوع الي قلت لج عليه

ام خالد و كانت لاهية و تفتح الثلاجة و تطلع العصير

ام خالد : ها وقته احينة؟

خالد : كل ما اسألج تقولين لي هب وقته

ام خالد : يا خالد ..يا عمري...العيلة من الشيطان ..استهدي بالله

خالد : اماية ما اروم اصبر اكثر... عاشة و عرست .. و انا جه ميلس لا حرمة ولا شي

ام خالد: افهم من كلامك انك انت بس تبا تعرس عسب تقهر عاشة و لا كيف؟

خالد و يلس عالكرسي الي حذال الطاولة في المطبخ .. و كانت في ايده تفاحة

خالد: مب مسألة اني ابا اقهرها..بس انا ابا استقر ..

ام خالد : تريا انزين ..بعدين هب اي وحدة بتطيع تاخذ طيار و نص الشهر هو هب موجود

خالد: هذا الشي اروم اعدله و اروم ارتب جدولي..بس دخليج اماية..رمسي اهلها

ام خالد : ان شا الله ان شا الله يوم يردون من السفر احينة كل حد مسافر هب وقته.. قوم خوز عن دربي خلني اودي الصينية فوق

خالد : عطيني اياها انا بوديها

ام خالد: يوم تبا شي..تزيد خدماتك يا خلّود ( و عطته الصينية)

خالد: ههههههههه حرام عليج

ام خالد: ولدي اعرفك

*
*



كان جريب المغرب في لبنان و الجو حلو. في البداية ساروا و شافو صخرة الموت و بعدها شافوا المعالم الاثرية في لبنان. سارة كانت وايد مستانسة بس نفس الوقت كانت وايد تعبانة و تحس انها بتطيح اي لحظة من التعب. على العصر زادت حالتها و بان عليها التعب اكثر. لبست نظارتها الشمسية عشان تخفي أثر التعب من عينها. وقف الباص عند الكورنييش. و نزلوا الناس و الي سار ويلس على الكراسي و الي طلب له شي من الكوفي شوب. الكل تفرّق. سارة يلست على كرسي. و كانت وايد مستانسة بالجو. عبد الرحمن كان ياي من بعيد و شال الجيس في ايده. طول اليوم و هو محتار يعطيها اياه ولا لا. شاف سارة و كيف هي متخبلة على المنظر الحلو و قال في خاطره " احينه وقته .. لين متى بتريا؟"

عبدالرحمن تحنحن.. صدت سارة و شافته و ابتسمت

عبدالرحمن : عيبج التور؟

سارة: وايد ... مشكور عبدالرحمن .. احس اني تعبتك وياي

عبدالرحمن :لا افا عليج مافيها تعب ( و يلس على كرسي حذالها) ... ممم..... ا...

سارة ( طالعته ) : ...شي في خاطرك؟

عبدالرحمن: ... هيه...

سارة: خير؟؟

عبدالرحمن: بعطيج شي بس لا ترديني..اعتبريه انج انتي تسوين لي شي لاني انا ماعرف حق التصوير..او اعتبريه شي من اخوج

عبدالرحمن قال هالجملة بسرعة و كان يبين عليه الارتباك. سارة ابتسمت لانه عبد الرحمن كان شكله شرات الياهل الي يبا يقول شي بس هب عارف كيف

سارة: ... ما فهمت


عبدالرحمن : ما بتريديني اذا عطيتج هالشي؟ دخيلج

سارة غمضها عبدالرحمن لو انها ما كانت تعرف شو السالفة ..

سارة: .. ما بردك...

عبدالرحمن: وعد؟

سارة: وعد..

عبدالرحمن عطاها الجيس. سارة خذته و هي مستغربة

سارة: شو فيه هالجيس؟

عبدالرحمن: ......أفتحيه..

سارة فتحته و لقت فيه علبة مغلفة. طرت الغلاف و فتحته. و كان في هالعلبة كاميرة سوني سايبر شوت و آخر موديل

سارة: عبد الرحمن............

عبدالرحمن: لا تقولين شي.. ما عرفت الموديل..و انا ادري انه هالشي في خاطرج

سارة: بس....

عبدالرحمن: ... انا بعد كان خاطري يكون لي صور من بيروت..بس ماعرف حق التصوير..فانتي صوري و طرشي لج نسخ من الصور

سارة كانت مستحية ما عرفت شو تقول انصدمت وايد بهدية عبدالرحمن . كانت تسأل عمرها: لين الحين و هو يذكر سالفة الكاميرا و ما شلها عن باله؟ لهالدرجة مهتم؟"

عبدالرحمن طول الوقت يوم رمسها ما كان يطالعها في عينه.كان يلعب بمفتاح حجرته و يطالع تحت. كان وايد مستحي و مرتبك و خايف انه سارة تاخذ عنه فكرة غلط

عبدالرحمن: جرجتها و البطارية فوول احينة..يعني ترومين تصورين...


سارة بعد نزلت عينها يوم رمست

سارة: ....مشكور وايد عبد الرحمن..والله انها احلى هدية...

عبدالرحمن رفع راسه و فرح وايد بالجملة الي قالتها سارة. كان وده يصارخ باعلى صوته و يقول انه سارة عيبتها هديته

عبدالرحمن: صدق؟

سارة: ...... هيه ...

عبدالرحمن مات من الوناسة

عبدالرحمن : انزين جربيها... يمكن فيها شي مب اوكي...

سارة: لا لا تحاتي..هي اوكي.. كنت مجربتنها في محل قبل...

عبدالرحمن..ممم انزين...شو رايج تصورين الغروب.. وايد حلو

سارة ابتسمت له.. و نشت من مكانها.. و بدت تصور. كان مبين عليها انها فرحانة و هدية عبدالرحمن نستها التعب حاليا. عبدالرحمن كان يالس في مكانه و يطالع سارة. يحبها وايد يحبها و احينه اقتنع انه يباها و يبا يخطبها بس يبا يتريا لين ما يرد البلاد قبل. كان وده يعرف شو مشاعرها اتجاهه. تباه و لا ما تباه؟ بس طبعا هذا الشي ما يقدر يسألها اياه. تم يتأملها و يطالعها و هي تصور. شوفتها كانت تكفيه وما يبا اي شي ثاني من الدنيا غير انه يكون بقربها

*
*
*

سعيد: والله يا ريم ما اروم اتريا اكثر ابا اخطبج

ريم: سعيد..اخاف اهلية ما يوافقون

سعيد: و ليش ما يوافقون؟

ريم: عسب اكمل دراستي قبل

سعيد: دراستج و بتكملينها و انا بوقفج عن هالشي.. على الاقل ملجة.. و العرس عقب ثاني سنة من الجامعة

ريم: سعيد...

سعيد: لبيه..

ريم: اشوفك مخطط و خالص

سعيد: يا ريم.. انا مافي شي شاغلني في هالدنيا غير بعدج عني. ما اروم استحمل اكثر عن جي والله كل يوم ايلس احلم و اقول متى باخذج..


حمدان : منووو ريم هاي بعد؟

سعيد فز من مكانه على صوت اخوه. المفروض يكون برا البلاد و ما يرد قبل شهر.

سعيد: اقول..برمسكم خلاف باي.

ريم ( مستغربة) :...باي


سعيد نش من مكانه و سلّم على اخوه

سعيد: جان خبرتني انك بترد عسب اييك المطار

حمدان يلس على الخنفة و طالع سعيد و مرسومة على ويهه ضحكة شيطانية

حمدان: لا...كنت ابا افاجئك و اشوفك شو تسوي من وراي؟ ثرك طلعت هب هين يا ولد احمد

سعيد ارتبك و حس ويهه محترق ما عرف كيف يرد على اخوه و سعيد هب من عوايده الجذب بعكس حمدان الي كان لوتي و يعرف يجذب ويراوغ و محد احسن عنه. الي يشوف حمدان يقول انه مراهق ولا جنه واحد مخلص في ال30

سعيد: ها..لا هذا واحد من الربع استهبل عليه


حمدان: لو انا مسوي هالحركات ما عليه... بس انت.. (أشر بايده و سوا "لا" )

سعيد ( غيّر السالفة): ...هههه.. الله يقطع ابليسك... شو احوالك هناك؟ و ليش رديت من وقت؟

حمدان : ما شي..زهقت... قلت بيي بغير جو و عقب برد

سعيد: لين متى بتم جي يا حمدان ..ألي يشوفك يقول واحد مراهق..هب ريال طول و عرض


حمدان ما عيبته رمسة سعيد الي اصغر منه و يعاتبه. نش من مكانه

حمدان: اوووووه...انا اكبر عنك و مالك حق تحاسبني..انا ادرى بمصلحتي

سعيد نش و وقف ورا اخوه و حط ايده على جتفه

سعيد: بس انا اخوك ياحمدان ..و ودي اشوفك متخرج و مداوم شرات باجي الشباب الي اصغر عنك

حمدان: انا ما احتاي اني اداوم. ورث الوالد الله يرحمه يسدني و يسد عيالي بعد

سعيد :..بس ..بع..

حمدان :لا بس ولا شي.. انا اصلا ياي و ابا ارمسك بهالخصوص.. ما وصلني شي من الاجارات هالشهر.. خير؟

سعيد: انا حطيت لك اياهم في حساب خاص

حمدان : نعم؟

سعيد: حمدان الله يهديك ..انت في الشهر الواحد تصرف فوق ال 35 الف ..ودي اعرف شو تسوي في البيزات

حمدان: والله آخذهم..احرقهم هذا الشي راد لي انا...

سعيد: صح كلامك ..بيزاتك و انت حر فيها...يس الله ما يحب الاسراف

حمدان: انت آخر واحد ترمس عن الدين.. عيل انت ترمس بنت الناس بعد..ريم مادري منو..ولا ها شوو هب حرام

سعيد حرّج يوم حمدان ياب طاري ريم. هوو ما كان يلعب عليها و لا يرمسها بغرض التسلية مثل ما حمدان كان يقصد. ما قدر يزخ اعصابه اكثر و ارتفع صوته

سعيد: هاي البنت انا باخذها يا حمدان والله يعلم اني ما غلطت وياها ولا سويت شي يضر بسمعتها

حمدان :هاههااي يا شجاع انت... ما غلطت وياها.. انزين ليش ما تاخذها؟

سعيد: مسألة وقت لا اكثر

حمدان : بنشووف

سعيد هذه اعصابه و تعوّذ من ابليس

سعيد: ما نبا نتضارب.. و خلاص مثل ما تبا يا حمدان .. من باجر بكنسل الحساب الاضافي الي سويت لك اياه و بحوّل البيزات في رصيدك.. و انت حر و سو الي تباه

حمدان: ...زين تسوي..

حمدان مشى و كان بيسير صوب حجرته

سعيد : حمدان...

حمدان رد عليه من دون ما يلتفت له

حمدان: خير؟؟

سعيد : سير حجرتي و ارتاح لين ما اخلي البشكار ينظف حجرتك و يرتب لك اياها

حمدان مشى و كمل دربه فوق من دون ما يلتفت لسعيد


حمدان نفسه كانت خايسه و كان يغار من اخوه سعيد الي كمل دراسته و بدا يشتغل و حصل مركز زين والكل يحبه . بعكسه هو الي الناس تحاول ما تحتك في وايد. حمدان كان لعاب و دومه يقص على البنات. ما كان يتحمل اي مسؤولية. كل شهر سعيد هو الي كان ايمع الأجارات و يحط له رصيد في البنك و يتابع عمارات ابوه و صيانتها و الخ. الي يسمع عنهم يتحرا انه سعيد هو الي اكبر . حمدان كان طايش و ماخذتنه الدنيا و لا يفكر في اي شي غير لمصلحته. اناني لآخر درجة و عنده حب انتقام.

*
*
*
راسها كان يدور و دقات قلبها متسارعة. كانوا بيركبون الباص يوم فجأة حست الدنيا بدت تظلم و غشاء اسود غطى عينها. طاحت على الأرض. عبد الرحمن تخبل. كان يمشي وراها. و يوم شافها طاحت سار صوبها. الكل تيمع عليها. عبدالرحمن عيونه بدت تدمع من دون ما يحس

عبدالرحمن: ماي ماي اللله يخليكم بسرعة

مسؤوال التور عطاه غرشة بسرعة.. و حط في ايدينه شوية ماي و حطه على ويه سارة. كفخها على الخفيف و حاول يوعيها. نشت سارة.. و كانت تشوف اشكال الناس الي حواليها و جنه عليهم ضباب. حست بعبد الرحمن الي كان زاخ ايدينها ويحاول يوعيها..شلت ايدينها.و هو استحى من الموقف لانه ما كان يقصد شي. ما كانت تطالع عدل بس جنها لمحت عينيه و هي تدمع. عدلت عمرها و نشت و كانت زاخه راسها الي كان جاتلنها من الألم.

سارة: ...آخ راسي يعورني

عبدالرحمن صد و شاف الريال مال التور و خبرهم ان عادي خلهم يتجدمون و هم بيردون رواحهم

سارة: عبدالرحمن..عادي..مافيية شي مجرد ارهاق

عبدالرحمن : لا ما شي..انتي تعبانة..بوديج المستشفى.. ترومين توقفنين؟

سارة: هيه ..

و شلت عمرها و نشت ..بس كانت حركاتها هب متوازنة.عبدالرحمن قادها و قال لها تيلس على كرسي. ما كانت منتبهة وايد للاشيا الي تستوي حوالينها بس نبرة صوت عبدالرحمن كانت كلها حزن و خوف و عينه مرتوية

عبدالرحمن: اتريي اوكي... دقيقة بس بطلب تاكسي

عبدالرحمن ركض و سار صوب الشارع و وقف تاكسي.. و عقب يااه ركض صوب سارة و ساعدها انها تيي و تركب السيارة. في البداية كان يبا ييلس ورا وياها , بس قال في خاطره " لا اهب حلوة احسن لو..ايلس جدام "

وصلوا المستشفى و الدكتور قال انه سارة فيها ارهاق و تحتاي انها ترتاح و عطاها حبوب تخفف من الم راسها.

عبدالرحمن : تحملي بعمرج ...خوفتيني عليج...

سارة: عبدالرحمن آسفة والله احس اني وايد متعبتنك وياية

عبدالرحمن :لا تقولين جي الله يخليج و الله تعبج راحة..

ركبوا تاكسي و ردوا الفندق و سارة من التعب طاحت ورا و رقدت . عبد الرحمن كان كل شوي يصد و يطالع ورا يتطمن عليها

راعي التاكسي: خطيبتك؟

عبدالرحمن قال في خاطره يا ريت

عبدالرحمن : لا..... وحدة من الاهل

راعي التاكسي : اييه... بتلبق لك

ما رد عليه.

وصلوا الفندق. عبد الرحمن فج باب الموتر ورا

عبدالرحمن: سارة...

ما ردت عليه

عبدالرحمن: سارة...سارة...نشي وصلنا

نشت سارة.. و كانت وايد تعبانه ..

سارة: كيف جي وصلنا بسرعة؟

عبدالرحمن (ابتسم) : انتي رقدتي و ما حسيتي بعمرج..يا الله نشي..


ركبوا اللفت و عبد الرحمن أصر انه يوصلها لين باب غرفتها عسب يتطمن انها توصل و هب تطيح من التعب

عبدالرحمن :تصبحين على خير

سارة: و انت من اهله ..مشكور وايد...

عبدالرحمن: طلبتج

سارة: آمر..

عبدالرحمن: اذا احتيتي اي شي.. او حسيتي بتعب لو كان الوقت متأخر ..خبريني

سارة: ان شا الله. .. ما تقصر عبدالرحمن..ما عرف كيف بطلع من يزاك

عبدالرحمن: افا يا سارة..

سارة: ...

عبدالرحمن حس انها مستحية

عبدالرحمن:خلاص طمنيني عليج

سارة: ان شا الله

عبدالرحمن : الله يحفظج..مع السلامة

سارة: الله يسلمك

و بندت الباب.. طاحت على الفراش على طول. كانت وايد تعبانة و راسها ذابحنها. خذت الحبة و بلعتها من دون ما تشرب ماي. و رقدت.

*
*
*
*
*
سلطان كان يالس على مكتبه بعد ما رد البيت. كان عنده وايد معاملات و راسه يعوره.

سلطان: لا حول ولا قوة الا بالله... متى بخلص هذا كله؟ شكلي بنش عقب الصلاة و بكمل قبل ما اداوم.


وحشته سارة. كان وايد متعلق بها وايد وايد بس دايما يطرد هالاحساس. احساس الأبوه بدا يتملكه و حس بحاجته لها. خذ التلفون و اتصل لها.. ما ترد. خاف.. اتصل على الفندق و طلب حجرتها. بعد ما ترد. كان صدق خايف . قلبه قارصنه. قرر يتصل في عبد الرحمن لانه المفروض يكون وياها طول اليوم

عبدالرحمن كان توه داخل حجرته و كان وايد يحاتي سارة و خايف عن يستوي بها شي في الليل و محد عندها.
رن موبايله و كان رقم سلطان. استغرب بس رد

عبدالرحمن : مرحبا.. بو سارة

سلطان: هلا والله هلا ببو عوف..أشحالك؟

عبدالرحمن : بخير ربي يسلمك..اشحال الشغل؟

سلطان: ههه قلبك عند الشغل..طالع علي

عبدالرحمن : هههههه فخر لنا نطلع شراتك

سلطان: الله يخليك... بغيت اتخبرك

عبدالرحمن: خير عمي آمر

سلطان: سارة راحت التور اليوم؟

عبدالرحمن :هيه عمي سارت .. و استانست

سلطان: و متى رديتوا؟

عبدالرحمن: توه قبل شوي...خير عمي في شي؟

سلطان: سلامة راسك..بس اتصلت بها و محد يرد

عبدالرحمن: يمكن رقدت عمي لانها كانت ميهودة

سلطان: ايوا...

عبدالرحمن: .. هب ناوي تيي عندنا عمي؟

سلطان: وين ايي هههه و حرمتي؟

عبدالرحمن ( استغرب): اي حرمة عمي؟ ماحيدك معرّس

سلطان: ههه اطري الدوام

عبدالرحمن : هههههههه هيه الدوام... الله يعينك عمي

سلطان: يعين الجميع..خلاص ابوية بس حبيت اسلم عليك و اطمن على سارة

عبدالرحمن: الله يسلمك عمي..ولا تحاتي مافيها الا العافية

سلطان: الله يعافيك.. ما اوصيك عليها

عبدالرحمن: في الحفظ و الصون .لا تحاتي..

سلطان: يا الله نشوفكم على خير..

عبدالرحمن :في امان الله

سلطان:في امان الكرريم.

ما خبر ابوها ان سارة تعبانة لان ما كان يباه يحاتي و كفاية الشغل الي عليه

نش عبدالرحمن و صلى العشا. و كان طول الوقت يدعي حق سارة و عسى الله يشفيها و يحفظها ..و يخليها له.
و من عقبها قام و هو و حاول يرقد . بس ما رام. كان يحاتي سارة. ليكون استوى بها شي؟ تم يدعي لها و يدعي لها لين ما غلبه النوم و رقد. بس ما ارتاح. سارة ما خلته في حالة و لا حتى في حلمه. آسرتنه من كل ناحية


*
*
*
*
كان شال في ايده غرشة بيبسي. توه ناش من الرقاد بعد ما رقد العصر و المغرب. كان رقاده دايما فوق و تحت . يرقد النهار و ينش طول الليل. يسهر و يرمس على التلفون . دخل الصالة بس ما كان شي حد.
يلس على الخنفة و كان يدندن. التفت و شاف موبايل اخوه على الطاولة.

حمدان: غريبة.. ها وين سار و فر موبايله؟

فتح الموبايل و يلس يدور فيه. فتح المسجات و قراهن . كلهن من بو حميد.

حمدان: بو حميد ... ههه علينا؟ والله هب هين يا ولد امي و ابوية

شاف المكالمات و اكثرها من بو حميد. كان يبا يسوي حركة في اخوه. سجل رقم بو حميد عنده


حمدان : يا الله يا ريم... خلينا نتسلى شوي

قالها و هو يالس يحفظ رقمها في موبايله

دخل سعيد و شافه يتعبث في التلفون

سعيد : حمدان ........... شوووو تسووووووووووووووي؟؟؟؟؟؟؟؟ ؟

التفت حمدان و شاف اخوه ..

حمدان: كنت...




يا ترى شو بيرد عليه حمدان؟ و شو بيكون موقف سارة من عبدالرحمن بعد هاييج الليلة؟

خالد منوو في خاطره ؟ و امه بتخطب له اياها؟

احداث كثيرة...ترقبوها في الجزء السابع

[شمه]

:)

حلوو هالجزء...
الله يعطيج العافيــــه..
و اكيد نحن في انتظار الجزء السابع..

[دموع العاشقين]

مشكوره وننتظر الجزء السابع

[بيور]

مشكوورة ونتريااا الجزء الساابع ,,

[ناصر الخالدي]

في البداية نسج رائع وحبك يدل على أن الإبداع يتنقل ما بين سطور هذه القصة المضمون جيد لأنه واقعي يعكس ثقافة جزء من الناس كما ان الجزء تعكسه العفوية ........

على الرغم من أنها قصة جميلة إلا أنني كنت اتمنى ان تكون القصة في اللغة العربية الفصحى ولكن هذا لا يمنع ان نقول بأننا كنا في جولة مع الإثارة أثناء قراءتنا لهذه القصة ......

ملاحظة : النقد من باب الأخوة والإحترام وليس شيء آخر ولكِ خالص تحياتي وتمنياتي بمزيد من التقدم والإزدهار .............

[شمه]

ممممم..

مب جنج طولتــــــــــــي..!!

[بيور]

هيييييه واااااااايد

[الشوق]

قصه حلوه ومشوقه ..
احداث مترابطه ومتسلسه بالرغم من اني شفت فقزه كبيره بين الجزء الثالث والرابع
لكن ما نستغني ان القصه الين الحينه ماشي بسلاسه ..
اممم اللي اتغربت منه هو بو ساره .. يوم انه ترك بنته اتسافر مع انسان غريب ,وهالشي غريب ونادر في مجتمعنا ...
بالنسبه لحمدان الله يعين الريم على سوالفه شكله بيفركش موضوع الزواج وبيسوي سالفه حق اخوه
ومشاكل حق الريم ..
الله يستر من الياي
ونترقب الجديد منج
ويزاج الله خير على هالقصه الغاويه ..
.
.
.
نتريا الجزء لا اتخلينا نتريا وايد
وبالتوفيج
خويتج/ الشوق

[حلم الطفوله]

روح ظبيانيه

قصتج مررررررررررررره حلوه

لو تسمحين كمليها .... تراج وايد طولتي ...ونزلي كل الأجزاء هالأسبوعا تحديدا لو سمحتي

[عيوز بن دبي]

شوفي العصبيه مب زينه حق العياييز الي شراتي ...
فنزلي القصه عشان ما اطيح عليكم ولا اتقولين ما قلت