المدخنين ,,, الى متى ؟؟

[الجنيه]

[glint]

السلام عليكم ورحمة الله وبركاته ...

[/glint]

يا جماعة الخير الصراحه هاي مب حاله ويا المدخنين يعني كفايه أنهم يسمون عمارهم ويسببون الأذى للي حواليهم بسبه استنشاق الأدخنه ما كفاهم كل هذا وبعد يفرفرون بقايا أعقاب السجاير من المواتر على الشارع ؟؟

يعني ريال طول بعرض شحط يوقف على زنده الي ما يتسمى يسوي هاي الفعله ؟ عيب الصراحه ستين مليون عيب ... أولاً تصرفك الشائن هذا ما بيضر البيئه وبس بل يضر الي حولك ..

تخيلوا ويايه ..
أستيشن يلمع من نظافته وفجأه ما أتشوف غير طلب سجاره شبه منتهيه ينرمي برع وعلى طول على السياره الي وراه وسبحان الله السياره صالون يعني لو دريشتهم مبطله من دون استئذان بيدخل صلب السجاره في السياره ولكم أن تتخيلون شو ممكن يصير بسبة أستهتار انسان ...


يعني اذا أنت أتدخن ياخي أحترم غيرك وعيب الي أتسويه يوم أتخلص من السجاره حط طفايه عندك في الموتر ولا ترميها على خلق الله يمكن سياره أتخر آيل أو بترول وراك شو بيستوي بحالها ؟؟
خلو السياره يمكن شخص يمر وتعلق بثيابه مب حرام ؟؟؟

هذا سلوك غير أخلاقي قبل لا يكون غير حضاري وعييييييييييييييييييييييي ب والله عييييييييب اذا الياهل رمى شي من السياره نعطيه محاضره طول بعرض لكن يوم شحط يدخن ويسوي هالحركه منو بيرده ؟؟؟

الله يهديهم ويصلحهم مب مفتكين من شر السجاير حتى في المواتر ..

الله المستعان ...
أختكم الجناويه ،،،

[شمه]

صح كلامج يا الجنيـــــه..

اصلا التدخين اسلوب مب اخلاقي ولا حضـــاري.. يعني الحين العقول اتفتحـــت و الناس يعرفون شو المخاطر من التدخيـــــــن .. بس ما ادري ليش او شو مستوي بعقولهم.. المراهقين يدخنون عشان يثبتون انهم ريايل.. و الكبار يدخنون لانهم ادمنوا ..

بس الباجي شو ذنبهم ..
انا و انتي اتكلمنــا عن نفس الفكره بس انا قبلج ب ثانيتين في التصاميم.. :)



شمــه

[تحفه]

التدخين شرات المخدرات .. او اي شي سبحان الله .. الله حرماه .. تبتدي فيه وبصعوبه * تقلع عنه *
وما يداركون عمارهم الا يوم يفوت الفوت .. وجد خذت الجقاير صحته و سلامته

الله يـهـديهم

[حلم الطفوله]

وعليكم السلام ورحمة الله وبركاته

فعلا عزيزتي هالتصرف غير حضاري ...وهالانسان المدمن سجاير يضر نفسه وغيره بهالتصرف

يعني بتضر نفسك كيفك ...بس هالأمه إلي وراك شو ذنبها ترد حرة سجايرك فيهم

تدرين خاطري مره بحياتي أفتح دريشة السياره وأهزبهم .... وأعطيهم درس بس بالأحلام

الله لا يبلينا والله يهديهم يا الجنيه ...

[عمة العيم]

يرجى إنتقاء مفردات لبقة عند الإدلاء بأي رأي

[الجنيه]

شمه

صدقتي ،، لا وطالعين لج الشباب بطلعه ثانيه أونه يدوخون مدواخ
وين تبون تراه أخس من السجاره لو أنه أرخص ،،
الله يهديهم أي رجوله هاي الي أتطير مع الهوا..


ام خدود

المشكله أنهم عارفين مضارها ومساؤها مع ذالك متمسكين بها ..
شو بنقول غير الله يهديهم ,,,


حلم الطفوله
تدرين صدق يبالهم هزبه اليوم والله كان ودي أبلغ عنه هالسخيف راعي الستيشن عنبو ما أتخاف ربك
لو طايحه السجاره في سيارة الناس منو المسؤل بعدها ؟؟
وبعدين ليش أتكون وسخ وقذر وأتخيس البلاد عيب والله عيب اذا أنت ولد البلاد هاي سواياك شو خليت حق الغرب !!!


عمة العيم
صدقج والله عنبو ما أتلوع جبودهم وهم متسنترين عند الزباله ؟؟؟

[نبراس الليل]

السلام عليكم ورحمة الله وبركاته

ماشاءالله عليكم

تدرون اسلوب نقاشكم حضاري مرّة

سؤال موجه لجميع من تواجدوا وردوا على الموضوع

شو لب الموضوع او بطريقة ثانية

شو الفايدة من طرح هالموضوع والمشاركة به

نصيحة ام طنازة ؟؟

ابي رد على سؤالي

بعدها الزباله على قولتكم بيرد عليكم

(لاينعت الناس الا من كان به نقص)
طارق

[عمة العيم]

شكله يدخن يا ناس

خخخخخ


************
*********

ترا التدخين و الخمر و المخدرات و المنكرات هاي متساوييييييييين (كلهم يضرون النفس...والنفس ملك خالقها و ليست ملكك)

تراهم ملعوزينا و مضايقينا تبونا نسكت؟

لا و ألف لا مابنسكت

بالله عليك هذا شكل آآآدمي واقف يدخن؟

حق شوووووو؟ يحرق بيزاته؟


وناس ميته ماعندها بيزه تاكل فيها


خدافس

[ألم ترى]

بسم الله الرحمن الرحيم

كان ودي اشارك لكن انا من المبتلين بهذا الخبيث

اخواني اللي حاب ينصح نحن قابلين هالنصيحة وانتو مأجورين عليها إن شاء الله

لكن ليش الطنازه

اللي يحب يسوي خير يكمله مب يتنقص من اخوه ولو كان عـ خطآ

ربي يحفظكم

[رحيل]

صح كلامكم والكل عارف التدخين ومضاره بس بعد اللي ينصح ينصح بطريقه لبقه وبأسلوب إتحبب الشخص وإتخليه يسمع النصيحة وفي نفس الوقت يحس بغلطته...واللي يدخنون عارفين ان هالشي يضرهم بس بعدهم مستمرين فيييه وهم بروحهم أدرى بمصلحتهم والله يهديهم اطلبوا الهداية لهم بس ..الله يهديهم انشاء الله ..

[شوق القلوب]

الســـــــــــــــــلام عليـــــــــــــــكم..

..


طــــــارق . . . محب الشيخيـــــن

في البدايه أعتذر لكم بالنيابه عن كل كلمه ضايقتكم في هالموضوع...

واتمنى تقبلوني اعتذار أختكم.. :)
..

و عندي ســـؤال صغير..

عندكم قابليه للتحاور في هالموضوع اذا نـــزلت موضوع مستقل عن التدخين..؟؟

.
.

[نبراس الليل]

أكيد بكل رحابة صدر

[عمة العيم]

اختي شوق القلوب

اصلا الموضوع غير قابل للنقاش

كيف تتناقشين في شي اصلا هو غلط

و المشكله هم يعرفون انه غلط و يعرفون اكثر عني و عنج

و مابتستفيدين من هالمناقشه

شي غلـــــــــــط و الكل يعرف انه غـــــــــــــــلط

مايباله مناقشه

و مايحتاي انه الناس تسوي لهم سالفه

غلط وانتهى الموضوع اللي عليهم يوقفون التدخين وخلاص

مايباله اكثر من جي

كفايه انهم مأذينا و مأذين عيالنا



خدافس

[شوق القلوب]

هلا بالعمه..

..

أسمحيلي... هالموضوع بالذات.. من أكثر المواضيع اللي تحتاج نقاش..!!

لو ييتج في يوم .. وقتلج.. يالعمه الكاكاو اللي تاكلينه مضر لصحتج.. و عادة الاكل هذي غلط.. وما عندي كلام زايد وياج..

هل انت بتسمعين كلامي.. و ع طول بتمتنعين عن الكاكاو..؟؟؟

.
.

ولكن اذا انا حاورتج.. و عطيتج الاضرار.. و شو تأثيره على صحتج..

وحاولت اقنعج بالكلام الطيب.. و النقاش الهادي..

أكيد بتفهمين وجهة نظري.. وبتحاولين اتغيرين هالعاده.. وانت مقتنعه تماماً..

.
.

صح ولا لا..؟

[الجنيه]

نبراس الليل ،،

محشوم يا أخوي والسموحه ...

وأتمنى ترجع تقرى ردي عدل لأني ما شبهت حد بـ زباله ،، أنا أنتقدت الوضع الي يظطرهم يوقفون عند الزباله للتدخين ...

محب الشيخين

الله يقدرك على ترك هالعاده المضره لصحتك قبل الناس ،،

واذا عندك الاراده صدقني مافي شي يمنعك عن الابتعاد عنها ،،

رحيل

الله يهديهم ان شاء الله ويعينهم على الابتعاد عن هاي العاده السيئه ..

شوق القلوب

ونعم الفكره وأتمنى الموضوع يساعد أخوانا المدخنين على التخلص من هاي العاده لو بالتدريج ،،

الله يعطيج العافيه ،،

عمة العيم ،،

لا حبوبه في مثل أجنبي يقول It's never too late

سبحان الله يمكن حد منهم يقتنع ويترك التدخين ...

ملك ،،

محشومين الغاليه من هالتشبيه وأعتذر عن سوء الفهم الي صار ...

أدعي لهم أنه الله يهديهم ويصلحهم ويتركون التدخين ,,

وبس حبيت أوضح أنكم خذتوا كلمه على خاطركم وتركتوا باقي الموضوع ومضمونه ،،

الله يسلمكم نحن ما ننتقد الي يدخن أو نتقص من شأنه لا أبد أنا موضوعي يتكلم عن الأشخاص المدخنين و التصرفات اللامباليه الي يتعاملون بها بالسجاير أحياناً مثل التصرف الي ذكرته في الموضوع ,,

أعيد وأكرر أعتذاري من الأخوه الزعلانين

والسموحه