رحلة قنص من شباب الواحات .. تعالوا شوفوا شو سووا..

[عنود الريف]

برعاية شركة جميرا للرحلات البرية .. وعلى شرف المدير العام بن دبي ... وفي إجازة اليوم الوطني ... تم التجهيز لرحلة قنص من قبل أعضاء الواحات الشباب .. (( يعني البنات ما شي .. يالله عيب.. زين مني بخليكن تقرن الأحداث اللي استوت )) .. وطبعا الرحلة كانت للمنافسة.. مب بس للاستمتاع.. (( عيل يخسرون عليكم .. ويأكلونكم ويشربونكم ببلاش؟؟)) تقرر عمل فريقين ..

الأول مكون من الرئيس .. عايش وهم ووياه 8 أعضاء ثانيين .. والثاني كان مترأسنهم قلوب دبي وبعد وياه 8 أعضاء .. عشان يكونون منصفين .. والاعضاء بتتعرفون عليهم من خلال أحداث الرحلة ...



طبعا دام انها على شرف ابونا بن دبي .. فهو سلم رؤساء الفريقين شيك بجيمه معينه عشان يستعدون ..

كل فريق تزهب على طريقته ..

فريق عايش وهم .. زهب الأكل والشرب والبترول وطبعا الصقوور والخيام .. بس نسوا شي واحد .. بيتذكره الفريق الثاني..

فريق قلوب دبي .. زهبوا نفسهم بس تذكروا انه لازم يشلون حطب وياهم ... عيل شقايل بيطبخون ؟؟

واللي ذكرهم به هو ... ذنيني.. راعي الرحلات ...



يوم الرحلة .....



المدير بن دبي.. واقف عند محطه الانطلاق واللي هي دبي.... بما ان الشركه الراعيه اسمها جميرا ...

المهم كلهم تلاقوا في منطقة الانطلاق الفريق الاول مكون من سيارتين ... نيسان واستيشن .. والفريق الثاني من استيشنين ...

في الفريق الاول كان اللي يسوق بهم .. كلكلووووش .. و أمير القلب .. مستانسين ..كل واحد بعصامته متزقرت ..

وفي الفريق الثاني .. مسافر للجفا ومنصوري الدولة .. وكان امبين عليهم هاديين شوي .. بس متحمسين للرحلة ..

بس نقص واحد منهم .. بن دبي كل ما يعدهم .. يقول في واحد ناقص .. بس مب عارفين منو .. واخر شي جان يقول قلوب دبي .. اووووووه تعال هذا الفارس 2000 ... متأخر خلني أتصل به..

ويتصل قلوب بالفارس : هلا بو مها .. وين انت يا ريال .. نحن نترياك ..

الفارس: اوه اسمحلي اخويه هاي مهايه يوم ظهرت تعلقت بي .. تبا تسير ويايه .. تتحراني بوديها الدكان .. وانا الحين واصل ..

قلوب: خلاص نحن نترياك .. ويرد قلوب ويقوولهم .. الفارس في الدرب.. مهايه مأخرتنه ..

وهم يتريون الفارس... بدا عايش وهو يرمس فريقه عن خطتهم .. جان يرفع حسه ولد الحكومة : لا شو هاي الخطه .. مب شي .. بننغلب.. جان يشتط أحلى منصوري: ما عليك يا ريال الخطه زينه.. ترا الفريق الثاني ما يعرف شي .. وان شاء الله نحن بنغلبهم .. ( ما شاء الله الأخو مصدق عمره )

وبين هاي المحادثات وصل اخونا بو مها وسيده انطلقوا الفريقين..

خلال الرحلة ..الفريق الأول

في النيسان .. عايش وهم ووياه كلكلوووش واحلى منصوري ولماح .. في الاستيشن أمير القلب وولد الحكومة وخوي الواحات والاسطوري ونساي

والفريق الثاني في الاستيشن الأول .. مسافر للجفا وقلوب دبي والفارس 2000 وطيب القلب .. والاستيشن الثاني فيه غرشوب وصاحب مبدأ وذنيني و ا ل ز ع ي م و منصوري الدولة.

استمرت الرحلة تقريبا ساعتين لين ما يوصلون المنطقة اللي يبونها..

ويوم وصلوا نزلوا القشار وبدوا يرتبون ويطبخون الغدا ..

توزعت مهام الطبخ على الكل كالآتي.. الاسطوري يوري الضو (( يلبق الضو)) .. وذنيني عليه يشوي الدياي واللحم . . وطيب القلب يغسل العيش واحلى منصوري يطبخه(( عاد ما يخصني اذا حرقه )) ... والباقين حد منهم يقص بصل وحد يقص طماط كل حد له دوور في الرحلة .. ما شاء الله عليهم متعاونين ..

عاد عقب ما جهز الغدا كانوا ميتين من اليوع (( واليوع كافر)) قالوا بنتغدى وبنبدأ عقب القنص..

والحمدلله كلهم تغدوا وشبعوا (( صح؟؟؟ والا بعدكم يواعه )) المهم

بدأ كل فريق يجهز عمره للمنافسة ..

ترقبوووني ان شاء الله وترقبوا الجزء الثاني من الرحلة بعد تاريخ 2/1 ..
اسمحوولي لانه وقت امتحانات ...
وخلوني اشوف تفاعلكم معايه عشان اتحمس واكتب الجزء الثاني وانزله ..
والسموووحة منكم