تقليد اعمى

[عمة العيم]

السلام عليكم ورحمة الله وبركاته


الصراحه

و الصراحه راحه

و الحق حق

كلنا سرنا لمعرض السيارات في دبي
لكن هل كلكم لاحظتوا اللي انا لاحظته؟؟؟

عارضات موقفينهن حذال كل سياره و لابسه لبس ما ينلبس الصراحه
و لاويات عالمواتر و حالتهن حاله و ثيابهم تكشف المستور !!!!!!

ليش؟؟؟

هل هذا تقليد اعمى للغرب؟
يعني نحن مسوين معرض سيارات شو دخل الحريم في السالفه؟
ليش يروجون السيارات عن طريق المرأه؟
هذا تقليل من شأن المرأه..
و تقليد اعمى للغرب....نحن لازم ناخذ من الغرب الايجابيات هب السلبيات

لكن شو نقول

ماباليد حيله

و للأسف في بلادنا يحصل هالشي؟

وين الحشمه؟

الريال يوم ايشوف هالمناظر عقب يلومونه

الصراحه ماينلام

شو بقول اكثر من جي؟

بخليكم تكملون عني...

لو رمست مابخلص


خدافس

[لمّــاح]

لـــو الــرمسه منها فـــايده جـــان رمســت و رديت رد طوييييييييييييييييييييييي ييييييييييييييييييييـــــ ل، لكن ادري انه الرمسه عندنا ماتفوّر دله حتى، يعـــني الواحد مايرمس و يحفظ كرامته أحسن له، و الي نقدر نسويه هو انه ندعي بقلوبنا

"من رأي منكم منكرا فليغيره بيده فان لم يستطع فبلسانه فان لم يستطع فبقلبه وذلك أضعف الإيمان\".

لآنه لا الايد بتنفع وياهن، يعني مستحيل اسحبها من ايديها و اروغها، و لا اللسان ينفع، يعني مستحيل انصحها أو اني اسير عند مدير المعرض و اقول له هذا غلط، ف احسن شي ادعي بقلبي . .

هــذا شويـــه !!!

ماشفتي زينة كرسماس، في وافي يايبين شيره طوييله و مزينينها و جدامها فرقه خاصة بس حق اغاني كرسماس، هذا غير باجي الشير لكن الي على اصغر شويه موزعه في كل المركز، و غير قرية بابا نويل الي مسوينها . .
لعنبوه، نحن حق الاعياد يالله يالله يلصقون اعلان صغيييير على بوابة المحل أونه ( كل عام و انتو بخير ) . .
هذا غير الي في الستي، و سبينس، و باجي المحلات و السناتر . .
الله المستعان .. !

[حبوبه دبي]

مــا باليد حيــله ،،

كــــــم بنــرمس وكــــــــــم بنكتب بــس مــاشي فــــايده

تطــور وتطــور !!!

بنشـــوف ليــن متــى !!!

،،،

[عافك الخاطر]

وعليكم السلام ورحمة الله وبركاته..

شو بنقول..
الله يخلي اللي نظموا هاي السوالف كل انسان وضميره ..
انا ما انقهرت الا من سالفة شيرة الكرسمس اللي حاطينها في السناتر .. سيري ميغا مول ..الستي..مول الامارات ..الخ والقائمة تطول بتحصلين عند كل محل شيرة كرسمس لا و مسوين شيرة عوودة والحبايب متيمعين حولها .. ماشي شغلة
قلنا الواحد يحترم دياناتهم بس مب جي .. !
اليوم الوطني ما سووله سالفة كثر ما سوو سالفة للكرسمس ..
الله يحفظ بلادنا بس ..
..
.

[ذنـيـنـي]

اكثر موقف ضحكني هو انه كان شي ثلاث شباب يمشون جدامي

و واحد منهم يرمس بالتيلفون و يقول حق ربيعه " اي قسم الي فيه وايد بنات, نبغي نسير ( نجحل ) عيونا"
و انا اقول في خاطري "اييه الاخو,, وين تبى,, اذا تبغي بنات سر المول و "جحل" عيونك من اليوم الين باجر"

انا سرت هناك و اكتشفت انه البنات الي هناك "طمم" ولا وحدة منهن فاهمة شي

وحدة يتني و قالت لي do u need some info قلت لها yes please قامت و زقرت الريال عسب يشرحلي عن السيارة

يعني فوق كل الي ذكرتيه فوق, البنات الي في المعرض غير مؤهلات لمعارض السيارات

بس بيني و بينكم
جمال السيارات في المعرض هذا غطّى على البنات

[حبوبه دبي]

جيــه الحبيب ســاير يشــوف المــواتر ولا البنااات

جـــان كفختــــــــه ع رااااسه ،،

الله يهديهم بــــــــــس

[دموع العاشقين]

الله يسامح اللي كان السبب

[الرايد]

عـلى قـولـتـهم " تـطّـور"

امحق تـطور ,, دام التـطور جـي مـا نــباه

[فركوشه]

اصلا يدخلون البنات فكل شي..

والبنت استوت شرا البضاعة اللي تنعرض عـ الشاري..

الله يهدي اليميع..

[أنا فقط]

فعلا شي يقهر

صار وجود العنصر النسائي ضروري ف كل سلعة لجذب الإنتباه !!

مب مفتكين من الأغاني و الكليبات الهابطة .. يت المعارض و كملت الدور !!






لا حول و لا قوة إلا بالله




مشكوور أختي عمة الفن ع الموضوع

[مــهــابه]

تــدرون هم مســوين معرض سيارات وفتيات معـــا
2 في 1 ...

يعني مب بس السيارات للعرض حــــتى البنات..

الله يهديهم

[عمة العيم]

تسلمون على الردود والتفاعل

اللي قاهر جبد ابو ام يدي

الزينه في الشوارع (علامات صليب يا جماعه)

اليوم والله اليوم لاحظت

صليب يا ناس في الشوارع و على يدران النفق

انا بعرف

شو هالتفكير؟

هل كل هذا عسب اقتصادهم؟

ولا شو منطقهم هذيل؟

ولا جذب السياح؟

ليش؟

ابا حد يفهم و يرد عليه

لان نفسيتي الصراحه متعكره


خدافس

[شوق القلوب]

الســـلام عليـــكم..

.
.

عندي تعليق على كلام لمـــاح..

.
.
منو قال انه ما بيدكم شي.. ؟؟ انتو الشبـــاب لكم معارف.. ولكم علاقات بالمسؤوليـــن.. اذا شفت واحد فيه الخير.. وعنده بال يسمع.. قولولهم.. و انصحوهم.. بالكلام الطيب.. ، صدقني.. في ناس تتقبل بصدر رحب... صح الدنيا صايره دمار.. بس الخير موجود... و الناس الطيبه بعد موجوده..

واذا اتكلمت.. بتوضح للمسؤول شو اعتقادك وشو افكارك من هالناحيه - كونك شاب - تغار على بلدك من هالانفتاح الموجود.

وربي يــوفقك..

[الجنيه]

سبحان الله من نقدر أنلوم على الي يصير ؟؟؟
الشركات الأجنبيه الي هالشي عادي عندهم والا المسؤلين العرب المسلمين الي يخافون ربهم ؟؟
الدنيا اليوم صارت للفلوس وبس يعني عشان الفلوس كل شي مسموح ...
العيب هب في البنات ولا في اللي يشوفهم العيب في اللي يشوف الغلط وساكت عنه
العيب في الي بيده الخيط والمخيط وساكت
العيب على الشيطان الأخرس الي عمت عينه عن الحق والحشمه ..
ما أقول غير الله المستعان ..
الله يتولانا برحمته ويهدينا أجمعين ...

أختكم
الجناويه

[أمواج]

اسمحلي اخويه ذنيني خذت صووره من موضووعك من دوون ما استأذن


خلووونا انعقب على هالصووره

اوكي المعرض من الله معرض سياااير
يعني يعرضوون سياايير للناس
صح ؟؟
يعني مب بنااات

انزين هذيييل اللي مصطنييين حذال السيااره شو خانتهم ؟؟
وإلا بس جيييه ؟؟
ولا الحين صار كل شي ما يمشي من دووون عرض بناااات

.......

عنبووه حتى السيااير دخلووا في عرضهن بنااات

استغفر الله
قلنا اغااني ماعليه عشان تمشي الاغنيه

بس المواااتر شو دخل البناات في الموضووع
ولا بعد صارن الموااتر شراات الاغاني
حط كم بنيه ويااه و بيمشي الموضوووع

اخاف عقب النااس تشتري موااتر حتى لو مب لين هنااك بس عشاان البناات اللي واقفات عدال الموتر
انزين اوكي حطيتوا بناات .. ماشي لبااس احسن عن جيه
قلن الخلقاان ولا ماشي خلصن القطع ؟؟
لبسووهن شي يستر عليهم

الله يستر عليهم بس
ويستر علينا


وتسلميين اختي على هالموضووع