بهذه اللحظه..

[الغاليه]

ماشفت البرنامج لكن سمعت طلاطيش منه وانا راقده ...

القنطه اللي ماعيبت الحساس انا بعد ماتعيبني .. اللي هو الخلط بين اللغتين .. شويتين عربي وشوية انجليزي .. لكن شووووووووو ؟؟؟

في اختلاف بين نية المتكلمين..

في ناس يعتبرونه تطور يوم يدخلون انجليزي فرمستهم ( وها عين التخلف واكثر شريحه تسيئني فيهم ) يقهروون وماعندهم سالفه..

وشي منهم المسأله عندهم مسألة تعود كون كل تعليمهم من يوم اصغار كان من خلال مناهج غير عربية وفي مدارس خاصة .. وفي البيت ماكانوا يمارسون العربية ( اهمال في التربية ) ... فنتيجه طبيعيه انهم بيخلطون بين اللغتين ..
( وهالنوع انا وايد اشفق عليه واحسهم ضحية.. احس هويتهم مستنسخه لاهم جي ولا جي )

عندنا عينات في العايلة جي .. كلمة عربي وثلاثين انجليزي .. وان حسوا ان اللي يرمس وياهم يعرف انجليزي خلاص يحولون انجليش .. لانه يحسونه اسهل عليهم للاسف الشديد..


وفي ناس حليلهم الشي الي يخليهم يدمجون بين اللغتين هو مثل ماقالت المتفيجه .. انهم يمرون بحالة دراسة مكثفة للغة معينة ويمارسونها بعد بشكل مكثف .. وهم ماوصلوا بعدهم لمرحلة الاتقان هالشي افرايي انه يسببلهم خربطة .. وهاشي منتشر وااااااااااااااايد عند البنات .. بس المشكله يوم يتعمدن يخربطن ويزيدن عليه شوية دلع مع اظهار الوناسه انهن يعرفن انجليزي مب امصدقات عمارهن .. هالتصرف يخلي الناس تستاء من سلوكهن و حركاتهن الهبله

فبعد هاي السالفه الطويله كلها قصدي لاتحكمون عالبنت بشكل سريع .. مع انه اللي سوته غلط وشي مب حلوو ابدن فنظري.. لكن الحلووو انكم تنقدوون هالتصرف وماتشجعونه..

نعم للغة عربية صافية .. لا للغة مخلووطه من كل مكان !

[تحفه]

عليكم السـلام والرحمه

انا اوافقك في مبدا انها مش حلوه *اذا كان قصدها تتفسلف و تخق بانجليزيتها* على الموجودين

لكن في المقابل حرام تحط على هالبنت لانّـا ما نعرف شو ضروفها بالظبط

الموهيم

تدري ,, عندنا وايد بنات في الجامعه في البيت غييييييييررر وجدام اهاليهم غير وفي الجامعه شي ثااااااانييييييييي

والمسؤوليه هاي ,, المفروض يرضون فيها (اشيوخنا) لأنهم هم السبب في هالشي

يقولون لك

الشيخ انهيان كان يبي ايدرس البنات ( islamic studies = دراسات اسلاميه) بالانجليزي في جامعة زايد !!
والاساتذه العرب عندنا كم تمو يرسلون رسايل و يشتكون على هالقراروتعبو وطلعت روحهم لين ما قررو يخلونه بالعربي !!

تخيل ليش صدر هالقرار (تحويل الدراسات الاسلاميه من بالعربي الى انجليزي ! .. كانو يقولون لهم بنعلمهم علشان ايعرفون يتناقشون بهالامور مع الاجانب !! ونخليهم مستعدين لخوض نقاشات مثل هاي !!

نقدر نشبهّـا بـ طلاب اجانب يتعلمون انجليزي بالعربي !!

وبعدين لا تلوم البنات اذا جي استوو
دوامات الجامعه تجبر الواحد يخلط بعض المصطلحات في رمسته

والسموحه

[المقاتل]

:: وعليكـ السـلام ::

فـ الحقيقــه .. كل إنسان له مبـادئ .. وكل إنسـان له نظره يشوفها .. لكـن ما العيـب في دمج كلمـه إنجليزيه فـ وسـط الحديـث ؟؟

أحيانا نلفـظ الكلمـه إختصارا لمفهوم .. أو .. أحيانا كونها خفيفه .. وكل شخـص ونيتـــه .

من وجهــة نظري أنا لا أرى إي إشكـاليه في تصرف البنـــت .. للعلم أنا ما شفت البرنامج .

:: المعذره .. والإختلاف في الرأي لا يفسد من الود قضيه ::

المقاتل

[الجنيه]

السلام عليكم ورحمة الله وبركاته ...

أنا شخصيا ما شفت البرنامج بس من الي فهمته أعتقد ما نقدر أنعاتب وأنلوم البنت ,,
أولاً يمكن هي بسبب ممارستها اللغه وأستخدامها للمفردات الأجنبيه تعودت أنها تدمج اللغتين غصبا عنها .. يعني الصراحه أنا عن نفسي ما أحبذ هالأسلوب بس يوم أظطريت أتعامل باللغه بشكل يومي وللأكثر من ثمن ساعات صرت لا إراديا أتكلم بنفس الطريقه مش القصد أنه أنبين للناس أنا احسن منهم أو أفهم منهم لا أبد الموضوع ومافيه أنه صار مسأله تعود لا أكثر ,,
صح بما أنها في برنامج المفروض أتحاول قدر الامكان تتفادى الدمج بين اللغتين بس الي صار صار ,,,

عموما هذا رأي وأختلاف الرأي لا يفسد للود قضيه ...

أختكم الجناويه