شو أنفع أكـون ؟

[حلم الطفوله]

رجعت مره ثانيه وانا أحس إنج بتنجحين بهالتخصصين

المحاماة ....لأنج صدق بتعقدين بالقاضي من أول جلسه

الإعلام ... وايد لايق عليج هالتخصص وفيه بعد كشف شخصيات ضيوفج يعني علم نفس

يالله قرري اليوم....تعبنا ونحن ندور لج تخصص

[الدمعة الحزينه]

مارووم افيدج بشي لاني يديده وما اعرفج عدل السمووحه
بس انتي شو تخصصج علمي ولا ادبي ؟؟

[تحفه]

اعتقد بدخل اعلام .. خاطري استوي مخرجة برامج اذاعيه .. احط اغاني فليل لووووووووووووووول

بس ابويه يقولي استوي مذيعه اخبار .. عاد مادري يطنز ولا منصدقه لول

[تحفه]

انا ويه علمي ؟

لا حبيبت ألبي .. انا ادبي .. إحم

[بلوة حلوة]

أم خـدووود

تـدرين ان السؤال الي ماعرف أجاوبه
وأكـره المسّات يوم يسـألونه هـو
( شو تبـون تشتغلون يوم تخلصـون دراسه ؟ ) ..

موول مادانيه من يوم صغيـره ..!

مـب عارفـه شو أتخـصص .. هاي آخر سنة إلي .. الله يعين وتعدي على خير ..

يوم كنـت صغيـره .. كنـت أبى استوي مذيعه ..

يوم كنت فـ 3 اعدادي .. كنـت أبى استوي ( طيـّاره ) أدري طموحي وايد كبير هههه
عقـب نقاشات عميقه ويا الأهـل .. شليت هالفكرة من بالي ..

أمـي .. كانت تباني دكتوره .. بس حسيت ان الطب يباله بارض وانا مليت من الدراسه
وماحطيتهـا فـ بالي أبــد ..

مس الانجليزي والرياضيات .. هالسنة .. والعام .. يقولولي نحـس يصلح لج
تكونين مذيعه .. أو دكتوره .. بس ماخذت عـ كلامهم مادري ليش !


يوم استلمت هالاستبيان مال napo ..
قبل لا افكر شو اتخصص مب عارفه وين أدرس حتى !!

كنـت أبى شي غريـب .. مب الكـل عافد عليه .. بس ماعرفت شـو

آخــر شي .. اختـرت هندسـه .. يمكن لان الوظايف عقب مش صعبه لهالتخصص
ويمكن لان لها مستقبل .. ويمكن لاني كنت احب الهندسه .. ويمكن لان اهلي رشحوها عقب الطب
ويمكن لان ولان ولان ..
المهم اني فـ النهايه حطيت هندســه ..!

بس مش عارفه وين أدرس .. جامعة زايد مافيهـا هالتخصص
بقالي الـ AU أو جامعة الشـارجه .. واذا دارت بي الدنيا .. جامعة الامارات ..
والله مش عارفه

وللحيـن ماغيرت رايي .. لين عقب عادي تلقين فـ بالي شي غير ..!

مثلج أنـا .. ما أثبـت عـ راي واحـد بسرعه

باختصـار .. حالتي جريبه من حالتــج .. !

واللي عليـج انج تشوفين ذاتج بـ نفسج .. شوفي شو تحبين
من يوم صغيره لو تذكرين لـ شو كنتي تميلين .. شو الحلو بالنسبه لج
شو التخصصات اللي لهـا شواغر عقـب وشو منها يناسبج وشو الي لازم تدرسينه
عسب يكون هذا شغلج .. وجـــييي .!!

والسموحه جان مافدتج بـ شي ..

[تحفه]

اهلين بلوه
سهراااااااااااااااااانااا ااااااااه اشوووووووف .. شو ماشي دوام باجر

انا مستغربه ..

انتوا كلكم تسهروووون .. معقوله كل يوم كنتوا تضربون خيانه فيني

انا اليوم سهرانه و حاسه اني اتري السحور و باجر ارمضان لول


على فكره .. انا من كنت صغيره وانا احب الارت .. اموووووووووت ولاحد ياخذ قلامتي و الواني
حتا اني ما ارضى حد يغير خرايطهم *حتا لو مطرطرين و متخيسين الوان*
وكنت من كثر ماحب الون .. ارقد الالوان حذالي
البنات يرقدون باربياتهم و العابهم و انا ارقد الواني حذالي شفتو كيف هههههه

بس الحين طبعا ..

التصوير و الرسم و النحت بيتمون هوايه عندي .. بس مش لدرجة اني اعتمدها شغله في حياتي

مرات افكر ادرس بزنس علشان افتح استيديو تصوير ولا غالري ..

مرات اقول اعلام وايد حلو .. وخاصه لي انا احب اشوف الناس و جي

توني مصليه استخاره للمره الثالثه .. وبشوف النتيجه باجر
* على فكره المرات الاولانيات ما ظهر لي ولا شي .. غريبه !!*

يالله عيل تيك كير و هاف فن ..

ومشكوره لعى الرد يا اموره وتصمحين على خير

[حبوبه دبي]

ان شالله تتيســر امــورج

ونتــرياج شــو قررتــي !!!

والسمــوحه

[تحفه]

ما قررت شي !!

[بلوة حلوة]

وحياااتج .. شي دوااام بس لايعه جبـدي لاني كنت اذاااكر حق امتحنانين ..
من عقب اجازه طويله .. لاني أبسنت يوم الاثنين بعد .. لول لاني راده من
السفر اليوم الي قبله فـ وقت متاخر فـ ماتفيجت انش الصبح لول ..
تخيلي عاد المخ كيف يستوي يوم اتين تذاكرين حق امتحانين عقب هالراحه كلها
فـ قلت اقعد عـ النت اغير مودي ..

المهم ..
فـ النهايه الاختيـار بيدج .. وأدري انه تحـديد مستقبل وايد صعـب
اسأليني انا .. محطيه هندسه ومب مقتنعه فيهـا وايد .. بشوف لين عقب النتايج ..

قلتـي تحبين الارت والبزنس .. اربطـي بينهم مثل ماقلتي .. ادرسي بزنس
وافتحـي غاليري أو اسيتديو ..



.
.
مادري بج والله .. والله يوفـقج ..
وانتي من هله ديروطي ^.^

[الثعلب الرمادي]

مسألة أختيار التخصص هي مسألة صعبة و أحيانا تكون أسهل من أي شي ثاني ...

ام خدود إذا شفتي كل شي متساوي بالنسبة لج في نفس الوقت بتحسين أن مثلا في شي أصعب من شي و لو بدرجة بسيطة انصحج تختارين الصعب اما عن السبب فهو ان الشي الصعب يحرك الحياة و بالتالي الشخص ما يحس بالوقت أو الملل.

طبعا إذا كان في تخصص يعطيج امتيازات اكثر من غيرها مثل عندج صديقات في نفس التخصص او يكون التخصص مهم اكثر من غيره فهذا شي اعتقد انه مهم.

اختي نحن مجرد مبتدئين مقارنة بالمستشارة النفسية اللي راجعتيها فنصايحها اكثر فايدة من كل اللي قلناه لكن في النهاية اتمنى يكون ردودنا صدى بالنسبة لج.

أنا فعلا ما اعرف شو ممكن تكونين ... ليش ما تكونين مستشارة نفسية و بعدين اراجع عندج :)

[حبوبه دبي]

بعدج مــاقررتــي !!

[تحفه]

اتصقدون سرت عنده الدكتوره علشان اسوي الامتحانات وجي *اسمها ناديه بوهناد* جان تعرفونها ..
اني ويز ..

اخر شي اخترت كومنيكيشن و انترناشنال استديز .. والبارحه اخترت اعلام و آرت لول .. كله صعب الله يستر بس

[تحفه]

الرد اشحقه ما يالس يتغير **

قصدي عندها رسينا على كمنكيشن و انترناشنل استديز .. وحزت الحزه غيرت واخترت الي مكتوب فوق

----------------

واشكر كل الي رد .. بس ياريت لو كل عضو تخصص يكتب لنا كيف اختار تخصصه **

[ملك]

ام خدود

عزيزتي وش رايج بالسلك الدبلماسي



يمكن تصيرين سفيرة .. و الا تشتغلين في الخارجيه

طيب وش رايج بالقانون و تصيرين محاميه

احس شخصيتج تناسب هالمجالات ..

لانها تبا وحده قويه و عندها لسان ( لا تفهمين غلط )

اقصد يعني تحب تناقش .. و تثبت رايها .. و شجاعه و منطلقه ..

و بعدين مافيها روتين .. كل مرة قضيه و كل مرة ناس يدد



مجرد اقتراحات .. و اللي يناسبج سويه

و صلي استخارة .. و ان شاء الله امورج تتيسر

اختج

ملك

[ملك]

سووري ما شفت ردج الاخير

يالله بالتوفيق

اللي اخترتيه وايد حلو .. الاثنين فيهم متعه و ابداع

و مافيها روتين ..

انا عن نفسي محتارة بين اثنين ..

اكاونتينج .. و الفايننس ..

شكلي باخذ دبل ميجر

بس عندي وقت طويل لين ما اقرر ..

اخلص جينيرال اول ..