.. فلان و فلانه من الناس ..

[ملك]

##


فلانه من الناس

عيالها في احسن المدارس .. و ارقى البيوت .. و يلبسون اغلى الملابس .. و عندهم الخدم و سائقين

وهي ..

كل يوم من بيت لبيت .. تزور هاذي .. و توجب هاذيك ..


هاذا غير النادي .. و الاعراس و الحفلات ..

تعتقد انها وفرت كل شي لعيالها ..

و نست

انهم في امس لحاجه لها ..و لحنانها و وجودها في البيت ..

##

فلان من الناس

بزنس مان .. رصيده في البنك 109415710957 $ .. مهتم بشغله زيادة عن اللزوم

وقته كله لأوراقه .. و شيكاته ... و لابوتوبه .. على حساب عياله و بيته و زوجته

و نسى


انه عياله بحاجه له و لوجوده في البيت . .

نسى انه عياله محتاجين للإحساس بالأمان ..و الطمأنينة ..

يتحرى كل اللي يحتاجونه فلوس و بس !!

##

علانه من الناس

كل ما رجع زوجها من برع ..


لقاها مكشرة .. و طاحت فيه اسئله

وين كنت و ليش و متى و مع منوه .. و ليش تأخرت ؟


انت مهمل و انت و انت و انت ...

و ما تخلي عيب الا و تطلعه


ابد ما يحس بالراحه في البيت ..

بعدين تيلس و تلطم ..

زوجي يهرب من البيت .. زوجي يكرهني .. و الا زوجي بيتزوج عليه .. النذل .. خاين العشرة

تستاهلين .. حرام عليج .. خافي ربج .. كل اللي تسويه فيه .. و ما تبينه يشرد منج !!

##

علان من الناس

مثل الخشخيشه بيد أمه و أخته

يحركونه على مزاجهم .. و يحرضونه على زوجته ؟؟!

ما يقدر يقولهن لا !!

حتى اسراهم الخاصه مفضوحه عند امه و اخته

كيف ما اقدر هاذي اميه ..؟؟!

انظلمت زوجته منه كثير ..

كل ما قالت له شي .. قالها لحظه بسأل اميه .. و الا ختيه ؟؟!

سمحلهن يتدخلن في كل شي ..


ما بقى غير يختارون لون ثيابها ( الزوجه)

ما قدرت تتحمل .. طلبة الطلاق

طبعا استشار امه و اخته

بعدين وافق !!

اااخ عليك

##

فلانه من الناس

انا و الله تبت و ما برجع لهايج السوالف ابد ..

و انا خايفه من ربي و من اخرتي ..


الله يخليج ساعديني .. اقوول عندج رقم فلان اللي رقمنا في اليوم الفلاني

امحق توبه ؟؟!

##

فلان من الناس

نعم نعم شو قلت ...؟

طبعا لااا انا ما ازوج بنتي لمثل هالاشكال

انته حافي منتف ..


و لك ويه تخطبها .. ؟؟

بنتي بنت عز .. و انت ماتقدر على مصاريفها ..

انته نسيت ولد منوه انته ؟؟؟!

و بعد عشر طعش سنه

الريال تزوج بنت ادب و اخلاق و عنده 3 عيال

و بنت فلان .. عانس .. طايحه في كبده .. و يا مرها هالكلمه !!


انت السبب .. تستاهل يا فلان

##

علان من الناس

يمه .. ابا وحده بيضه بياض الثلج

ويهها مدور مثل البدر

.. طويله .. و شعرها اسود سواد الليل

المهم تكون قمر

و يبدأ البحث ..

و لقت الام العروس .. و تزوج

لكن بعد شهر .. اكتشف انها انسانه تافهه

اهتماماتها دنيويه ..؟؟

قلبها اسود ..

يعني بالعربي

انغش فيها ..

يا علان .. ما سمعت قول الرسول صلى الله عليه و سلم


" اظفر بذات الدين تربت يداك "

يا اخي وش فايدة الحلا دام النفس خايسه ..؟


##

و اذا تعرفت على صنف ثاني برجع لكم

السموحه

[أمواج]

صدقج والله ياختيه
الناس اشكال و ارنااااق وهاي حال الدنيا

مشكووره اختيه على هالكلام

[عنود الريف]

الناس اجناس
للاسف هاي الايام الكل يفكر في البيزات
مشكوورة الغالية على الموضوع الطيب ..
والسمووحة

[خنفروش]

تسلم ايدج يا ملك هالموضوع ولا بلاش

[الجنيه]

ملك ...

سلمت يمناج غناتي

صدق الناس اجناس ،، وعشنا وياما حنشوف

[أمرين]

تسلمين ملك على ماكتبتي

والناس أجناس .. وكل يرى الناس بعين طبعه


أمــــــــــريــــــــــن

[ملك]

المتفيزرة عالعرقوب

عنود الريف

اشكركن عالمرور عزيزاتي ..

ربي يحفظكن

[حبوبه دبي]

صدقـــج والله
تسلميـــــــن اختيه ع الطــرح الحلــو


والسمــوحه

[ملك]

خنفرووش

الجنية

صباح الورد

اسعدني مروركما جداً ..

[ملك]

أمرين

حبوبة دبي

اشكركن عالمرور عزيزاتي

[ثمن عمري]

صدقــــــــج والله

لا غبــــــار عليه ....

[ملك]

ثمن عمري

اشكرج عزيزتي عالمرور