وعليك السلام والرحمه ..

اول شي في رايي انه الحياء من الصفات المهمة لكلا الجنسين سواء الشباب او البنات ,, وماعرف ليش دووم الناس يربطوون الحياء كصفة مرتبطه ومحلَية للبنات فقط ..

ومن خلال كلامك فهمت انه في اعتقادك انه الرجل الحيي ضعيف او انسان يستهين به الناس ويقللون من احترامه..

لكن في رايي انه الناس احيانا يصير عندهم خلط بين صفتين قراب من بعض لكن مختلفات اختلاف كبير في المعنى .. اللي هم .. الحيـــــــــاء والخجل .. فاحيانا اشوفهم ينعتون الحيي بالخجول أوالخجول بالحيي ..!! وهالشي مب صحيح ..

علماء النفس مصنفين صفة الحياء ضمن الصفات الايجابية وصفة الخجل من الصفات السلبية للإنسان .. وقبل كلام العلماء .. عندنا الرسول- صلى الله عليه وسلم- اللي الله تعالى وضع فيه كل صفات الكمال الانساني .. يتصف بالحياء.. وكان اكثر حياء من العذراء في خدرها مثل ماورد في الاحاديث .. لكن مع هالشي كان اكثر الناس له هيبة ومكانة واحترام بين أصحابه والناس على مر العصور.. بالإضافة إلى انه أشجع الشجعان .. يعني هالصفة في الريال مب عائق ابدا أو مبرر عشان يكون انسان ضعيف شخصيا..ومثل مالحياء حلو في البنات بعد حلو في الرياييل .. بس الحياء ضمن مفهومه الحقيقي .. مب بمعنى الخجل..

و الريال الغير حيي واللي تصرفاته وافعاله وسلوكه غير مضبوطه بضابط الحياء .. ايكون متصف بالوقاحه .. وبصراحه اكثر اكثر الصفات المشينه فنظري بالنسبة للريال انه ايكون وقح .. وبالنسبة لي ماتوصل قيمته وشخصيته في نظري وزن الريشه !!

لكن الخجل في الرجل غير مستحب ابدا ويمكن هاللي انت تطريه من خلال موضووعك ..

الخجل هو اللي يخلي الريال- والبنت بعد - ضعيف الشخصية وانطوائي وماله قيمه او تفاعل مفيد في المحيط اللي يتواجد فيه .. وقليل الثقة ابنفسه بحيث مايقدر ايدافع عن حقوقه.. وهاللي ايخلي الناس تسهينبه .. ويغلب عليه طابع السذاجه مب الطيبة .. لان مافي مانع ايكون الانسان طيب وله هيبة ومكانه .. فالغلط منه هو ولازم ايخلص عمره من هالصفة اللي فيه ويثبت وجوده بافعاله ونجاحاته وحسن معانيه .. وماعتقد حد يقدر ايقوله شي او يغلط عليه ..

اسمحولي لاني غير مقتنعه ابدا بالمقوله اللي دووم اسمعها من كل حد .. الطيب في هالزمن مايعيش

وتسلم اخويه الملهم والله يوفقك ..