جامعه زايد والا التقنيه؟؟؟

[شيخة البنات]

سلام عليكم ورحمه الله وبركاته
بغيت منكم مساعده؟؟ممكن اتساعدوني؟؟
اللي في جامعه زايد تعطيني معلومات عنها وشو الايجابيات والسلبيات فيها
واللي في التقنيه نفس الشي ابغي معلومات عنها
وبعد فرايكم دراسه منو أحسن جامعه زايد والا التقنيه؟؟؟
الصراحه انا محتاره بين هالاثنينه بس حاطه اختياري الأول جامعه زايد ما أدري أحسها أحسن
ممكن تعطوني رايكم ؟؟؟
أكون شاكره لكم مشاركتكم في موضوعي ومساعدتكم لي في اختيار الأفضل

//شيخة البنات//

[حفله]

if you wanna have fun in studding go to dmc
if you are really do care about your education .. go to zu

[حفله]

(dmc= hct) =D/=S

[فركوشه]

انصحج التقنيه لانه اللغه عندهم توب..

بس لازم تكرفين كراف وطبعا الكراااااف ما بييج فاول سنه..

ويوم تتخرجين التقنيه بتساعدج عسب تحصلين شغل يعني ما تنساج ..

وبل مره سجلي عسب نتلاقى اهناك ...

[بنت الدلع]

انا انصحج بالجامعه
صح ان التقنيه واايد يهتمون باللغه

بس تظل شهادة الجامعه غير

يعني في الجامعه اربع سنين وبتحصلين بكالوريوس انشالله

اما في التقنيه عندج دبلوم + دبلوم عالي + بكالوريوس

بس الشي الأوكي في التقنيه ان دراستها اسهل
والتخصصات متوفره بشكل اكبر

وفي الاخير يبقى الراي لج

[ذنـيـنـي]

انا انصحج بالجامعه
صح ان التقنيه واايد يهتمون باللغه

بس تظل شهادة الجامعه غير

يعني في الجامعه اربع سنين وبتحصلين بكالوريوس انشالله

اما في التقنيه عندج دبلوم + دبلوم عالي + بكالوريوس

بس الشي الأوكي في التقنيه ان دراستها اسهل
والتخصصات متوفره بشكل اكبر

وفي الاخير يبقى الراي لج

للتوضيح فقط

حتى في التقنية, اربع سنين و بنحصل باكالوريوس,
اذا عدينا التأسيسي (foundation)

نفس الكلام ينطبق على الجامعة اذا ما دخلتتي تأسيسي
----------
ثانيا
شهادة الجامعة في شو غير,
يعني لأنه شهادة الجامعة معتمدين فيها على الجانب النظري اكثر من الجانب العملي ؟؟؟

اذا كان هذا هو السبب, فهذا هو الي يخلي خريجين التقنية افضل من خريجين باقي الجامعات في المجال الوظيفي
----------
التقنية دراستها اسهل !!!

ما ادري كيف استنتجتي هالكلام و على اي اساس

التقنية دراستها ابدا مش سهلة, لكن في نفس الوقت مب صعبه



الفرق بين التقنية و الجامعة هو انه التقنية تتبع النظام البريطاني في التدريس و الجامعه تستخدم النظام الامريكي

في الجامعة يستخدمون نظام الساعات المعتمدة الي يسمحلج انج ترتبين المواد في جدولج على حسب حاجتج, لكن في التقنية الكلية هي تحدد المواد و الجدول الدراسي

انا ما اقول انه التقنية احسن من جامعة زايد
لكن قصدي انه التقنية مش اقل من جامعة زايد, و غلطان الي يستهين بكليات التقنية

و السموحة

[شيخة البنات]

مشكورين كلكم عالردود
بس منو قالكم ان الجامعه ما تهتم وايد باللغة
بالعكس انا سامعه انهم وايد يهتمون فاللغة
اتصدقون ياني احباط كلكم تنصحوني بالتقنيه الا بنت الدلع اتقول ان الجامعه احسن
وانا حاطه فبالي اسير الجامعه
عالعموم مشكورين على ابداء رايكم واعطائي هالمعلومات الجيدة

//شيخة البنات//

[ذنـيـنـي]

ليش ياج احباط !؟
الي نصحوج بالتقنية هم طلاب التقنية و محد يقول "دبسي حامض"

انتي شوفي شو التخصص الي تبغينه, و عقب اختاري الجامعة بناء على التخصص المطلوب

بالنسبة لي شخصيا, انا افضّـل الجامعة بالنسبة للبنات و لو كان عندي اخت جان نصحتها انها تدخل جامعة زايد

[صدى جوفي]

من خلال تجربتي في التقنية..
لو مستواج الانجليزي مرتفع(يعني لا باس فيه) بتمشين عدل..
واللي اعرفه عن تقنية الشارجة النظام فيها مستويات. والمعلمين التوب يحطونهم للمستويات العالية واللي هم صفوف ال a,b,and c
والصفوف الادنى مستويات يحطون المدرسين الميح ..
وبصراحة "لاني كديت بها التقنية" قاموا يرقعون المدرسين .. يعني المدرس يدرس المادة اللي مو من اختصاصه ؟؟ والمهم انه أجنبي مب الاختصاص نفسه ..
ونظام الكلية شرى المدارس .. الجداول والصفوف وحتى الشهادة ..
اما الانجليزي .. التقنية تساعدج فيه وايد ..
و مضمون التخصصات وايد مفيد .. ويحتوي على مواضيع شاملة ..
والكلية ساعدتي بتكوين شخصية مستقلة و حرية الراي ..
هذا من وجهة نظري ..

[شيخة البنات]

نصور / صدى جوفي مشكورين على الرد وابداء رايكم
انا الحين قررت ان شاء الله بدخل جامعه زايد
لان التقنية عشان اخذ البكالوريوس لازم ادرس زياده على الدبلوم العالي 3 سنين
الصراحه وايد انا لو بدرس طب جان خلصت
أما جامعه زايد دراستهم من 4 لين 6 سنين وهذا يعتمد على الطالبة
والتخصص اللي اخترته نظم معلومات شو رايكم في هالتخصص اوكي والا؟؟؟؟

//شيخة البنات//

[عفاريتووو]

السلام عليكم

جامعة زايد > سمعة
الكلية > الدراسة فيها احسن بس عيبها مثل ما قلتي
.
امم
التخصص اللي اخترتيه واييد اوكي
من احسن التخصصات اللي موجودة في جامعة زايد
كنت قبل محتارة بين هالتخصص و تخصصي
.
الله يوفقج

[ورديّـه]

تبين دبلوم ودبلوم عالي سيري الكلية . .

اذا تبين بكالريوس *وطبعا هب بالسهل تعلو المراتب O.o* سيري جامعة زايد

وصلاة الاستخارة انصحج فيها

[ذنـيـنـي]

البكلوريوس يتطلب سنه وحدة زياده فوق الدبلوم العالي,

غلطان الي قالج 3 سنين, يمكن 3سنين اذا كان عندج دبلوم !!

[ورديّـه]

البكارليوس 4 اسنين بالضبط لو مـااا دخلتي تأسيسي :)

[شيخة البنات]

أنا اختي فالتقنيه لازم تدرس فوق الدبلوم العالي 3 سنين عشان تحصل البكالوريوس
الصراحه وايد
وانا اكيد مفكره عالاقل اخذ البكالوريوس
وان شاء الله اختياري لجامعه زايد يكون موفق

//شيخة البنات//