نعم .. خيـــر .. ليش ياي جدامي ؟

[ورديّـه]

نعم ..

خيــر

ليش واقف اطالع ؟؟

انت الثاني .. خير بعد !! ليش كل ما سير سيد في الشارع اتيي وياي وعيونك معلقه ع المنظرة ..

أوكي انت بعد .. يالس تصوّر .. نشوفك .. واضحة ! .. مافي داعي تسوي عمرك تشيّك .. تتحرانا ما نفهم !!!

اها .. افر زبالة .. بلاك عيونك بتنط من مكانها وشوي بـ تييلس حذالنا .. تبا الزبالة يعني ؟ ولا شو الموضوع ..

حلوة هاي نزلت من السيارة عسب تخزني .. وين الحيا .. تفلخنا يعني ولا شو يعني ؟
.
.

المرأة هب أداة . صورة اطالعونها .. أوكي , ما نحط ميك أب ولا شياته .. لبسنا وااايد حشيم .. العباة وسيعه ومستورة وكعب ماشي كعب .. والمشية مثل أي مشية والاصوات بـ المساسر والضحك بينّا والسوالف هب بمياعه ..

بعد اتطالعـون !! ولا غض نظر ولا هم يحزنـووون .. ؟

مرة قلت : أوفففف لو يطيح واحد في يديني .. ما بزاعج لأنه عيب البنية تصرخ على ريّال .. ولا بضارب طبعا! بس براويه شو يعني بنية في زمن نانسي .. واستخدام المرأة كـ سلعة .. واعتبار المرأة أداة وشكل ومكياج .. لا مشاعر لا فكر لا أخلاق في نظر البعض, بل الكثيرين منكم.

و نعم .. خيــر ؟

[أحلى منصوري]

صــح كنــت موجــود هنـــاك .. بس والله ما كنــت أطالـع حـــد

امممممم لكــل فعــل ردة فعــل .. والله يعيــنــج يا شيــطونــه ..

بس ما يمدحون مشيــة البينــة من دون ( ريــال ) يصــونهــا من نظــرات الغيــر ..
وأحســن شــي إن البنيــة تروح المولات ( لو تبــى ) في أوقـــات غيــر الإجــازاات وفي الليــل

السموحه منــج

خويـّـج
المنصــوري

[خنفروش]

امممممممممممم لا ماشي بس زغت تقرين اسمي في الحضور و اتقولين لي نعم خير والا اتقولين شو مشكلتك \ الصراحه عيبني الموضوع و ان شاء الله برجع له

[ورديّـه]

أحلى المنصوري

نظهر عز الظهر وحيـاتك لول ..
ونسير ايام الاسبوع .. هب فاضيين في الويك إند .. أهل . زيارات وعزايم
وصح اوقات الويك اند وفي الليل سواء مع محرم ودونه هب مناسبة ابداً .. أوافقك الرإي

"لكل فعل ردة فعل" .. which is ؟ ..
ماشي سبب أو فعل , سوا قلة أدب وحيا ودين من صوبهم ..
وما ظن تصرفهم يباله سبب .. ولا بند *غض النظر* تغيّـر؟!

مرة شيـبة ! انا ما شفته والله .. يعني ما لفيت بس ربيعتي قالت لي .. وشال لحيته وشنبه بعد .. يطالع ويرقم !!
أوكيـه . عيب عليك . استح على *عمرك* ..

وشكرا على مرورك الطيب

[ورديّـه]

خنفروش

لا انتوا ع العين والراس وآرائكم مقبولة سواء صح ولا غلط

وبنتظار ردك

[أحلى منصوري]

يعنــي لو فلعتيــه بالجوتــي ( الله يعزج ) بيعذرونج النــاس ..

ودوم اودي أهليه الظهــر بس ما اشوف اللي يطــالــع ( شفتــي فايــدة الريــال )

خنفروش .. ما شبعت من ضرب المحاق ويا هنيه بعد

والسموحه

..

[سفير الخيال]

صـــدقك يا خنفـــروش.. والله بلشه

إختي شيطونه ورديه...

والله عيبتيني في كلامج لما قلتي إنج ما بتردين عليه لأنه عيب البنت اتصارخ على الريال :)

هناك الكثير من البنات من يعتقد إن مراددت الشاب في حال التحرش بها هو أمـــر يجب منه لإثبات الإحترام منها وإظهاره وهذا الأمر خطــــأ...

لأن أغلب الشباب يحاولون استغلال الموقف ليعبروا عن مدى رجولتهم المتهكمه واستعراض لباقة كلامهم الساقط وبالتالي يصبح الأمر مجـــــــــــــرد استعـــــــراض أو مســـرحية لبقية الحضـــــور والضحيـــة إمــــرأه سقطــــت فـــي حــــوض الإدعاءات الكاذبه والقــــذف المـــريب ليتحرر الرجل من قبضـــة المـــوقف ويلملم أنفاسه هاربا...

المــــرأة المحترمه تبقــــى مظللــــة بأشجار الصمــــت حتى لا يحـــرقهـــا لهيــــب الــــرجل إلى أن تـــزول شمســــه بين جبـــأل القهـــــــــــر.........

مجــــرد رأي..

المعذره!!

[ورديّـه]

المنصوري

بارك الله فيك ريال من ظهر رياييل
والجوتي امشي فيه .. !

..

سفير الخيال

أكيـد :) مهمن كان البنية لازم تكون محترمة شكلا و *مضمونا* وصوت الحرمة عورة !
ثانيا الصوت العالي يحرق صاحبه . والتطنيــش يحرق اللي جدامك ..
يكفي اسجل رقم الموتر بيني وبينك لو حصل شي كبير . وبـس

يا سلام أول مرة ترد على مواضيعي وانشالله هب آخر مرة
احترامي

[خنفروش]

شيطونه صدقج والله

يعني في شباب بالضبط مثل ما وصفتيهم و زياده يعني يتحرون قلة الحيا بطوله و يتحرون الصفاقه قوة شخصيه و يظنون ان الدنائه شجاعه

(( و هاي نسبه مو قليله و لها اماكن معينه تعتبر اوكارهم او مجمعاتهم " مع احترامي لبعض المتحرمين الي يصادف وجودهم في نفس مكان هالفئه السخيفه " او ما يحلو لهم الجلوس الا بنفس الاماكن ))

فالبنت سواء كانت مع اهلها و الا ابروحها ولبست عباه واسعه و لبست كعبه والا مشت حافيه حتى اتحجبت اتنقبت والا كانت حاسره و الا امظهره قصتها صغيرع كانت والا كبيره بيشوفها و بيتمقل فيها من فوق لتحت و السبب بسيط هو اصلا مستوطن المكان او كانه يداوم هناك فيعامل الجميع معامه الدكتور الي يفحص الناس يبحث عن علامه عن سبب يخليه (( يتجرأ زياده – تشخيص – حالة البنت )) و اكيد ان في شواذ عن القاعده

بين قوسين \ كيف تقدر البنت انها تجبر الشاب التافهه على احترامها بدون ما تنطق ابحرف ؟

[سفير الخيال]

أخوي خنفروش..

المشكله إن أغلب الشباب لزقه من النوع اللي بعدها البشريه ما اتوصلت إليه

[ورديّـه]

خنفروووش

حلو تعليقك ما فكرت في سالفة *الوكر* ! صح اللي في بيته ياخذ راحته ويعلي صوته بعد ..

بين قوسين \ كيف تقدر البنت انها تجبر الشاب التافهه على احترامها بدون ما تنطق ابحرف ؟
*إسْفًه السّفيه* ها حكمتي .. وانا ما بجبر واحد أو عشرة يحترموني .. كل واحد عليه بنفسه .. مع ذلك شي احترام وشي تربية نطبقها .. يعني مستحيل واحد بيسوي جيه وأقول ها مرباي ولا بارك الله في هلك ربوك .. لازم نحترم هالنقطة

شكرا بو خنفش

[الـيـاه]

:: شيطونه ورديـه ::

عيبني موضوعج !

وشرات ما قال *خنفروش* في من الشباب - عفان الله - مايهمهم الشكل
ان كانت البنت حاطه Make up والا لا < ان شاء الله تكون خسفه> المهم انها بنت


ان كانوا فـ الشارع مثل ما قلتي اسهل شي تسوينه انج تسجلين رقم الموتر
لكن \ فـ مكان مسكر شرات السناتر ماتقدرين ؟

ليش مايحطون "شرطـه" فـ السناتر ابرك من هالسكيورتي اللي مامنهم *فايـده*
يا هندي او اجنبي ومالهم خانـه .. احس لو في شرطـه حق هالسوالف احسن ..


واحيد ان شي قرار حق ( لمغازلجيه) ان يفضحونهم ويحطون صورهم فـ الجريده
اذا بلغوا حـد <<<< ماجوف هالقرار يطـبـّق لين الحينه ..
والا انا اللي *ماجوف ؟*

بيأدبهم والله ..

ع العموم
مشكوره حبوبــه ع الموضوع الحلو

.
.
.

[خيال الحب]

السلام عليكم

موضوع حلووو,,,

مره كنت في السيتي وشفت ريال شيبه يلاحق بنات صغار يعني كبر بناته,,, 18 - 17 سنه

ويلاحقهم من مكان لين مكان

عقب رحت الكارفور وحصلت نفس البنات والشيبه وراهم,, وفجاه عصبت البنت قالت نصوم ونصوم واخر شي نفطر على بصله مالت عليك وعلى شكلك خخخخ والله انا مت من الضحك ع الشيبه مسكين ماعرف شو يسوي

يووووووووووووووم شوابنا قامو يسوون هالسوايااااااااا فما بالكم بالشباب الي بكامل صحتهم يرابعون في المراكز من الصبح لين فليل وما يتعبون (( مركبتين مكينة تو جي لووول ))

وفي ناس ما يستحوووووون مره,,, يعني عندهم جرأه قوية انهم يدخلون ورى البنت اي محل حتى لو كان خاص بالنساء فقط,, همه الوحيد انه يرقم,,,

الله يهدي شبابنا ان شاء الله -----((ترا بيستويلنااااا مثل ماستوى للكويت يوم اهملو دينهم وزاد عندهم الفساد))

لاحول ولا قوة الا بالله

[الجنيه]

شيطونه ورديه

ههههههه والله ضحكتيني سبحان الله هالاشكال مره ما يتغيرون
البارحه الله يسلمج دهنا سير المدير وقرر يطلعنا قبل الدوام بساعه قلنا بنتغدى وبتنوكل كل وحده عبيتها يقولج سرنا مطعم Apple Beans وهالحزه أبد ماشي زحمه أول ما وصلنا الطابق الثاني ماشفنا غير شيبه يالس ويا ربيعه
يلسنا عطاوله بعيده عنهم أوه نسيت أقولكم أنه اللي وياي كلهن زلمات بس محترمات يعني من حيث اللبس .. ما أدري كيف رادار الصياعه لقطنا وكل دقيقه ساير راد صوبنا وآخر شي مر من حذالي وحط الرقم صوبي والله مب من عادتي أرد على هالناس بس هذا ما قدرت أمسك عمري قلت له شو تبيني أطلب لك سيارة من دار المسنين عشان يشلونك ؟؟؟
قفط وتم مبهت ..طبعا أنا بعد اللي قلته كنت بموت من الضحك جان أودر الأكل وأرجع البيت .

الله المستعان ...

[بنت ابدوي]

شيطونه ورديه

.

طرح متميـز لـ موضوع منـتشر في كافة أرجاء الدوله داخلها وخارجهـا
ترانيه ارمس صدق يوم اقول داخلها وخارجهــا

بخبركمـ شو صارليـه وانا في صلالة

سايرين المهرجان مالهـمـ وهناك قوم امايه تعبوا وقالوا بيلسون .. ونحن سرنا نحوط .. للأسف انه ما كان عندنا ريال .. ونحن 3 بنـات .. انا اسولف واقول لختيه صوري هذا المكان وهذاك بدون ازعاج لين هذاك الوقت .. وعقب ..

وفجأة

القى لج شلة شباب ورايه .. ما كنت اعرف شو اسوي .. كنا هب متغشين بس والله متحجبين عدل .. ويرمسون ويمدحون البلاد وبناتها .. ونحن عاطينهم اذن صمخــااا تموا ورانا (( على فكره هم من البلاد )) ..

اقول في خاطريه هب سالمين منكمـ لا في البلاد ولا خاري .. الله يهديكمـ يا ربيـه

.

مره من المرات .. من كـمـ اسبوع .. كنـا سايرين بقعه (( والله مب مول ولا سنتر)) وخلصنا حايتنا ويايين بنروح .. جان تعزر عليه امايه اسير اشتري بارد .. وانا كنت خايفه اسير لنه هناك شي شباب .. بس امايه قالت وقلتلها بنشتري من جدام قالت لا من هالدكان .. (( احلف الكم انه كنت ابين من قمة راسيه لآخر ريوليه --> كله اسود )) جان اسير للدكان .. واقوله حايتيه .. جان ايي ويلصق فيه من ورا كنت بموت وقتها على حركته الجريئـة .. يوم ييت بروح ما اقدر لا اصد جيه ولا جيه .. جان اقوله لوسمحت ممكن .. ما تووايب ليه .. جان اقوله مره ثانيه لو سمحت .. واونه لز ليه عشان اخطف بس بصراحه حركته تافهه وسخيفه ..

الله يهديه يا رب

.

وبعد مره في مكان مشهور في العين لازم من الصبح لـ تالي العين الشباب بسيايرهم ساير راد .. ما اعرف ليش ؟ مع انه هب مول ..
وين يبيعون الرقع والقطــع .. انا ما اعرف اسم الشارع ..

ودايما دايما زحمـــــــــــــــــــه

اقول في خاطريه .. والله ما بتلقون حايتكمـ اهنه اشله السيره والرده وتخلص بترول سيارتك

.

الله يهديهمـ يا رب

.

خويتج // بنت ابدوي