.
.
بسم الله الرحمن الرحيم
عندي قضية وايد مهمة أو بـ الأحرى شيء من الحقد او الضغينة عـ الملتزمين او المبتدئين بـ الألتزام
فما ادري اذا كان كلام صواب او صوابي خطآ فلكم الحكم وما تقرأون
:: :: ::
مطوع طالع من البيت مستعيل وشفط بـ السياره بدون قصد أثر اتصال مفاده بأن والدته في المستشفى بسبب هبوط بـ السكر
وهو طالع من البيت طبعآ مستعيل وجيرانه عند باب بيتهم يوم اسمعوا التشفيط فقالوا
:: مطاوعة أخر زمن ::
مطوع كان يتمشى ويتعشى طبعآ بـ السيارة وبعد ماخلص عشاه
عق الغرطاس من الجامة فشافوه شباب متيلسين عـ الرصيف وهم يلعبون اورقه فقالوا
:: مطاوعة أخر زمن ::
مطوع ارقاده ثجيل كان مضبط المنبه عـ صلاة الفجر لكن النوم سلطان ومع هذا نش وسار المسيد
لكن مالحق عـ الصلاة وهو داخل كانت مجموعة من الشياب طالعين فقالوا
:: مطاوعة أخر زمن ::
مطوع عليه ضغوط شديده في الدوام بأن يتخلى عن لحيته أثر مرسوم جديد فـ الدولة يمنع تربية اللحيه
عفوآ قصدي ان يربيها لكن انها تكون قبظة يد فشافوه شباب فـ الفريج وكانوا متعودين عليه وعـ لحيتة الكبيرة فقالوا
:: مطاوعة أخر زمن ::
مطوع ياي من ابوظبي لـ دبي الساعه 2 فليل عشان اييب اخوه من المطار فقاله اخوه شو رايك يا سالم
انبيت فـ دبي وباجر الظهر إن شاء الله نرد ابوظبي فقال عـ شورتك يا مبارك وهم داخلين الفندق شافوا شباب خليجيين سكارى فقالوا
:: مطاوعة أخر زمن ::
مطوع مدمن عـ الدوري الإيطالي وهو يالس يتابع المباراه اتصلوبه سامي وصهيب من ربعه اللي في الميلس فقالوله مر علينا الكراج لئن الموتر خربان
فقالهم المطوع دقايق وبطلع من البيت عشان باجي عـ الشوط الثاني 15 دقيقه فقالوا صدق ماعندك حشيمه وصدق اللي قال
:: مطاوعة أخر زمن ::
مطوع كل اربعاء وخميس وجمعة يلعب ويانا كره في الفريج وهو متحمس والشباب ماعندهم غير امطوع العب باص
امطوع شوت امطوع لا تلعب اناني مطوع ومطوع ويوم يرد عليهم ويقول لهم انا لي اسم فقالوا
:: مطاوعة أخر زمن ::
مطوع صارله فـ الأتزام 7 سنوات وهو عزوبي وله شهوه شرات الأنسان والحيوان ولكن مصبر نفسه والأيام والشهور والسنين تمر
لعب عليه الشيطان وانتكس او بالأحرى شل لحيته ولكن يصلي ويأدي اللي عليه لكن شل اللي يميزه عن غيره فشافوه عيال عمه فقالوا
:: مطاوعة أخر زمن ::
:: :: ::
فما ادري شو القصد من كلمة مطاوعة أخر زمن
هل هم ملائكه منزلين ؟ او هم بشر معصومين ؟

هذا اللي اشوفه وهذا اللي يمر عليه فما ادري فهل هاي المواقف مرت عليكم او لا
واذا مرت عليكم هـ المواقف اسردونها فـ هالموضوع وياريت يكون هناك نقاش بهذا الخصوص
عشان نفيد ونستفيد ونترك هذا اللي يسمونهم
مطاوعة أخر زمن
صدق اللي قال :
نحن في زمن اصبح فيه القابض عـ دينة كـ القابض عـ الجمر
اللهم صبر الملتزمين وثبتهم عـ الحق واهدي اللهم من يتتبع زلاتهم واخطائهم
:: :: ::
.
.