بعض الكلمات من<<رمستنا>>

[فدا خورفكان]

السـلام عليكم ورحمة الله وبركااااته

عندي بعض الكلمات الموروثه اللي من رمستنا الحلوه واللي البعض مايفهم معناها

شوفوها وان شالله بييبلكم اكثر ان شالله ========ترقبوا
عندي كم كلمه


الحرامي (عفد) من اليدار....يعني نقز.............

مبروك عليكم الحاسر... "الحاسر" هي البنت

و مبروك عليكم الطارش ... " الطارش" هو الولد


الكاشحه : مرض يصيب الانسان بين الخاصره والضلوع ويوسم الشخص للعلاج منه

حدر : نزل من مكان مرتفع

البعض يقول ماحيدك ( غتير) عن هذي الرمسه...
غتير : ماتعرف ..

ما عندنا حياده ..
يعني ما عندنا فكره او علم..

لايم الباب..
يعني لا يغلق الباب او يتركه مفتوح.. نص نص..

تحياتي
فدا الخور

[عنود الريف]

وعليكم السلام والرحمه
يا هلا الغاليه ..
فكرة حلوة يا اختي انج تعرفين الكثير اللي ما يعرف رسمتنا ..

وانا بدخل وياج شراكه .. شراكه في تكوين معجم تراثي الغاليه والسالفه ما فيها بيزات ..


حطي لي طشونة .. طشونه تعني : شويه ..

صه : اسكت

اشتر لي نمكي من الدكان :
نمكي: بفك (( يمدحونه ويا الداقوس))
الدكان : البقالة (( واايد اسمع ناس اتقول عن الدكان بقالة .. انا ما استخدم غير الدكان ))

فج الباب: تعني افتحه

في جعبتي الكثير.. بس ما اتذكر واايد منهن الحين ..
يوم بتذكر بيي وبزيد رصيدي ..
والسمووحه

[فدا خورفكان]

عنود الريــف
تسلمين حبيبتي ع المشاركه الطيبه..
واتمنى من الجميع يشارك ويانـــــا..

[فارسة الكلمه]

تسلمون على الموضوع القيم ..

ونشالله لي عوده في كتابة المعاني ...بس خلوني ايمع م كلمه .....

[عنود الريف]

افا عليج الغاليه .. حاضرين للطيبين ..
وانا بعد اتمنى هالشي ..
اليوم عندي كلمتين .
الكلمة الاولى :
جسموا اللحم على الفريج .
جسموا يعني: وزعوا

الكلمة الثانية :
غديتي يابسة يا فدا

غديتي يعني: استويتي او صرتي ..

والسموووحه

[فدا خورفكان]

هيه والله يقولون غديت يابسه خخخخخخخخ

تسلمـــــووون ع تواصلكم وياي في الموضوع
بـــــــــس وين باجي الأعضاااء؟؟!!
نتريااكم

[الفراشه]

حلو الصراحه ....
كملو كملو .. اتريا انا

[عذبة الكلام]

السلام عليكم ورحمة الله وبركاته


شكرا لكن أخواتي على هذه الكلمات الجميله من " رمستنا"

بارك الله فيكن

[الجنية الحلوة]

بسم الله الرحمن الرحيم

الصراحه موضوع حلو.. انا بشارك..

ماريته: ما شفته..
رقيت الدري: ركبت الدري..
النقا: الرمل..
الطوي: البير..
امغط كراعك: مد ريولك..
القف القبه: امسك الكره..
الزويه: مكان السبوح..
المهفه:المروحه اليدويه..
البنكه: المروحه..
المجبه: اللي يغطوبها الاكل..
الخرس: شي يحطون فيه ماي الشرب..
السعن: يحفظ الماي بارد..
الزوليه: السجاده اللي تستخدم داخل البيت..
الحصير: السجاده اللي تستخدم فالرحلات أو تنحط فالحوي..

هذا اللي في بالي الحينه.. ولي رجعه ثانيه انشا الله..

الجنيــــــــ الحلوة ـــــــة

[قمره]

لايم الباب..

يعني أغلق الباب مب افتح الباب

[فدا خورفكان]

يسلمووو ع المداخلات الكووول


ربي يحفظكم

[قلب انسانه]

فديت رمستنا "" الرمسة "" يعني اللهجه...............
الله يحفطكم ماقصرتواا نرتقب المزيد

[بايعنها بشرف]

مشكوره اختي على الكلمات ويعطيج العافيــــه :)

[الزرعوني]

بس انا احيد لايم معناتها لا تسكره بالكامل .. يعني خل فجه صغيره بحيث ان الواحد يقدر بفتح الباب بالدز ..

[يغار مني القمر]

بس انا احيد لايم معناتها لا تسكره بالكامل .. يعني خل فجه صغيره بحيث ان الواحد يقدر بفتح الباب بالدز ..

يعني لا يغلق الباب او يتركه مفتوح.. نص نص.. >>
نص نص تفسر نفس الكلام الي انت كاتبنه