ولد الهندية

[عنود الريف]

لا مستحيل ... أنا آخذ ولد هندية .. هذا اللي قاصر .. انا بنت فلان بن فلان .. اصوم واصوم واخر شي افطر على ولد هندية .. ليش خلصوا الرياييل العرب عشان آخذ هذا .. لو أعنس ما خذته ..





السلام عليكم ورحمة الله وبركاته ..

كثير من البنات من يردد هذه الجملة .. وكأنهن ملكات لا يقبلن إلا بالأمراء .. فسبحان الله .. هذا الولد ليس ابن فلان بن فلان .. سواكِ أنتي ابنة الحسب والنسب ..

وضع هذا الابن كوضع ابن العربية فلا فرق بينهما .. ولهما نفس الحقوق في البلد .. فالهندية تربي كما تربي العربية .. فإن كلمة أم تكفي لكي نتقاضى عن كونها أجنبية .. وما ذنب الولد في ذلك .. لماذا يتحمل نتائج والديه ومعتقدات مجتمعه ..

ولعل ابن الهندية كان افضل من ابن العربية في كثير من الأشياء .. منهم من رفع اسمه وشانه ... فالذي اصبح مهندسا وطيارا وطبيبا وغيرها الكثير من الوظائف المشرفة ..

اخواني واخواتي ..

هم اخواننا ولو اختلفت جنسيات امهاتهم ... فأتمنى لو الكثير يبتعد عن هذه المعتقدات الخاطئة.



والسمووحة

[قلب الوصال]

وعليكم السلام والرحمه
مسااااءااات جميلة كجمال نتاج قلمك يالعزيزة
كلام لا يثنى عليه
تسلم الانامل عنود وصح لسانج

[مجرد إحساس]

صح ...



هذا اللي صاير هالأيام


البنات ما يرضون


إلى اللي عنده فلوس


وبيت


وسيارة آخر موديل


ويكون ولد ناس وعرب


ما يحمدون الله على النعمة اللي هم فيها ...

:::: ... بس مو كل البنات بعضهم ... ::::



والسموحة ...

[ولد الشحوح]

اشكرج اختي والبنت بتاااخذ الولد ولا امه
وصاارت لحد اعرفه الريال يشتغل بأحسن شغله وطموح ويكمل الدراسات العليا ... بس ردوه لانه ولد هندية

[الملهم]

السلام عليكم

.. عنود الريف ..

أوافقكِ الرأي ..
ولكن هل تربية الهندية تساوي تربية العربية ؟؟؟! لا أظن
لان العادات تختلف وطريقة المعيشة تختلف .. " طبعا لا أعمم على الكل "

شكرا على الموضوع ..
جزيتِ خيرا ..

[الدلووووعة]

تسلمين اختيه عنود الريف على ها الموضوع

وصدقج والله في وايد بنات جي يقولن

لا اونه شو ماينزلون مستواهم حق واحد امه هندية

وتلاقين ها اللي امه هندية احسن عن وايد شباب امهم عربية

والسموحة

[فركوشه]

برايي انه اي ريال سواءا كانت امه عربيه او هنديه او اجنبيه ما ينرد الا اذا كانت اخلاقه ميح
واهم شي جيبه (هب يعني يكون راعي بيزات واايد )اللمهم انه يقدر يصرف على اسره ويعيلها

مجرد راي..

[العجيبة]

السـلام عليكم ورحمة الله وبـركـاته

قال رسول الله صلى الله عليه وسلم "تخيروا لنطفكم فإن العرق دساس"

اممم ما أدري شـو أقـول أكثـر ..

النقطـه اللـي ذكـرهـا الملهـم مهمــه ..

وبـس ..

شكــرا لج عنــود الريــف على المــوضــوع
بانتظــار يـديــدج دوووم ..

[عنود الريف]

قلب الوصال
تسلمين اختي على المرور ..

أمير القلب
صدقت يا اخويه .. البنت ما اتدور الا الريال اللي عنده بيزات .. يقدر يعميها بها ..
وفي بنات ما يهمهن غير الستر وهن اللي بيرضن به ..
تسلم شيخي على مرورك

ولد الشحوح ..
صح يا اخويه ..
انا واايد اعرف بنات واخوانهم رياييل والنعم فيهم ومكملين دراساتهم العليا وعندهم مناصب كبيرة ...
مشكور على مرورك ..

الملهم ..
انا اقوولك ان الام الهندية تقدر تربي احسن عن الام العربية ..
مثل ما قلت ان الامهات الهنديات مب شرات بعض حتى الامهات العربيات مب كلهن شرات بعض ..
يا اخويه خصوصا الامهات الهنديات والمصريات او العربيات والمسلمات .. لو اختلفت بيئتهن و اسلوب معيشتهن ..
اشكر لك مرورك واختلاف الراي لا يفسد للود قضية ..

والسموووحه

[عنود الريف]

الدلووووعة
صدقتي .. الله يهديهن
تسلمين الغاليه على مرورج

يحليلي ياهل
كلامج صحيح اختي .. الانسان ما ينرد الا اذا اخلاقه مب زينه ..
مشكورة حبيبتي على المرور ..

العجيبة
وعليكم السلام والرحمه
اختي العجيبة والرسول صلى الله عليه وسلم قال : " "إذا أتاكم من ترضون دينه وخلقه فزوجوه إلا تفعلوا تكن فتنة في الأرض وفساد عريض".
اما النقطة اللي ذكرها الملهم انا رديت عليه بها ..
وثانيا .. الغلط مب من الولد .. الغلط يكون من الام والابو ..
وتسلمين الغاليه على المرور ..

والسمووووحه منكم

[قلوب دبي]

عليكم السلام و رحمه الله

موضوع سبق و ان طرح في هذه الواحه و كانت عليه ردود و لا اذكر اسم
صاحب الموضوع و لكن سأعقب هنا ..

ولد الهنديه وولد العربيه وولد الفلبينيه وولد المغربيه وولد السوريه وولد المصريه ..

كلهم اولاد اجنبيات ..

جاءت فتره من الزمن وانتشار ظاهره الزواج من الاجنبيات و هاي ظاهره طبيعيه وان كانت
بعض الاحيان تخلق انواع كبيره من الخلافات الاجتماعيه و غيرها من الامور في الاسره الواحده
و بمرور الزمن المجتمع اتقبل هذه الظاهره و اصبحن الهنديات و المصريات و المغربيات و
الفلبينيات و السوريات مواطنات سواء اكتسبن الجنسيه بحكم القانن او بالتبعيه للزوج ..

عائلات كثيره تهتم في امور مثل هذه و اكثر البنات يقولن هالكلام ، نرجع للحديث ليش ما ايقول
الولد انا ما باخذ هاي البنت لانه امها هنديه او مصريه او .... الخ ، العيب مب في الولد ولا العيب
في البنت العيب في التفكير اللي راد يشوفونه ، و التربيه اللي ترمسون عنها ، المواطنه يمكن ان
ام مثاليه تربي و اتصون عيالها و بالعكس صحيح ربما اتكون ام مجرد تسميه و يتبرأ منها ابنائها
و في الطرف الاخر قد تكون الاجنبيه بشكل عام افضل من مثيلاتها و ربما قد تكون الاخس ، في كل
مجتمعنا الاماراتي بالتحديد بتشوفون وايدين امهاتهم اجنبيات ، و طالعوا ماسكين مناصب و هذا مب
معناته انه عيب انه الولد ياخذ بنت امها اجنبيه ..

موضوع الكلام ينقال فيه وايد و سبحان الله قبل يومين يالسين انسولف في هالموضوع ، و بخبركم
سالفه واقعيه مستويه في جميرا عندنا ، عايله قبيليه ما اتزوج حد من بناتها الا لمثيلاتها من القبايل
و العرب و ان كانت ام الولد هنديه ما يقبلون ، شو رايكم انه هالعايله يوزوا بنتهم لواحد امه هنديه
و سبحان الله الريال من خيره الشباب اللي نعرفهم أدب و اخلاق و دين ، و صح امه هنديه و لكن
ابوه قبيلي و للعلم انه الريال ينسب لابوه مب لامه ..

و اختلف بوجه نظري مع اللي تكلم عن العادات و التقاليد ، ليش وين راح دور الاب و اهله في
التربيه ليش كله ع الام و ان كانت هي اللي دايمن معاه و لكن مش مقتنع بفكره التربيه و العادات
اللي بيكتسبها ..

في الختام ابين الكم انه الريال دام بيقدم ع الزواج من وجه نظري انه لا يشوف البنت امها منوه
و الا اسميه بيتعب و العكس صحيح للبنت لا تيلس ادقق و اتقول لا اريده جي و جي وجي ، نسبه
العنوسه زايده في البلاد والاسباب ...... كثيره ..

السموحه

قلوب دبي

[الملهم]

مرحبا ..

احب اوضح كلامي ..

انا قصدي ان تربية الام الاجنبية تختلف عن تربية الام العربية
بغض النظر عن التربية الصحيحة والخاطئة .. وانا اقول ان في اولاد
اتربوا على يد امهاتهم الاجنبية يعني اكيد بيكون طريقة معيشتهم تختلف عن
معيشة العربية .. وطبعا الولد اذا بيتقدم للزواج ما بيشوف عن ام البنت ..
ولكن رأيي ان اختيار الام مهم جدا لتربية الجيل القادم .. وبعدين بالتاكيد
ماشي توافق بين اللي تربى على ايد اجنبية واللي تربى على ايد عربية .. ومثل ما قال قلوب دبي ان دور الاب واهله عامل رئيسي في تربية الولد .. وانا اتكلم عن تربية الولد من قبل الام الاجنبية فقط
واكرر جملتي " أنا لا أعمم على الكل "

ارجو ان كلامي اصبح واضح المقصود

[عنود الريف]

قلوب دبي
يــا أخويه كلامك صحيح ولا عندي زيادة عليه .. وانا اعرف ان هذا الموضوع انطرح قبل .. بس انا رديت احطه لان سمعت بسالفة وحبيت اكتبها ..
تسلم يا اخويه على المرور ..

الملهم ..
اخويه كلامك واااااااااااااااااضح وضوح الشمس .
وانا فهمت عليك ..
عوامل كثيرة لها دور في تربية الابناء ..
والريال يختار حرمة له على اساس انها هي حرمة اخلاقها زينه ..
ونفس الشي بالنسبة للريال ... يعني اكيد اهل البنت بيسالون عنه وبيتخبرون حتى عن امه .. وما يخفى شي ..
واقولك شي يالملهم .. ان نحن في جميرا .. ما يتم شي سري .. الله يهدي حريمنا ,.. ما اتم سالفة الا وتناقلنها .. يعني اكيد المعلومات منتشرة ومعروفة ..
واهل البنت يقدرون اييبون معلومات عن الريال في اقل من ساعة .. مب مشكلة عليهم ..
مب ام الولد او ام البنت مهمين كثر ما الريال او البنت طبعهم زين ..
اللي انا ابغي اوصله يا اخويه .. ان البنت المفروض ما تشوف منو ام الولد .. لان مب مهم واايد .. كثر ما تعرفين الريال...
تسلم طويل العمر على مرورك ..
والسمووحه

[الجنيه]

السلام عليكم ورحمة الله وبركاته

عنود الريف الصراحه تطرقتي لموضوع بالغ الأهميه وايد بنات يسون هالسوايا ويترفعن عن الزواج من عيال الأجنبيات سواء هنديه أو غيره .... بس العيب مب فيهن العيب في تربيه أهاليهن ترا هاي هي نفسها بنت العربيه اللي اتعاير الخلق بأعراقهم وجنسياتهم لو أهلها ربوها التربيه الصحيحه والسليمه ما كانت عابت على الريال جنسية أمه وهي تدري أنه رسولنا عليه أفصل الصلاة والسلام وصانا بقوله: (بما معناه الصراحه مب حافظه الحديث )
(اذا أتاكم من ترضون دينه وخلقه زوجوه) ,,,,

هذا شي والشي الثاني عندي توضيح للأخ الملهم ....

ولكن هل تربية الهندية تساوي تربية العربية ؟؟؟! لا أظن
لان العادات تختلف وطريقة المعيشة تختلف ..

ليش تربية الهنديه ما تساوي تربية العربيه؟؟؟؟ فكر فيها بالعقل هل الهنديه مش مسلمه ؟؟؟!!! يعني تعتقد الاسلام بعقائده وتعاليمه يختلف من بلاد لبلاد مثلاً!!!!!
واذا على العادات والتقاليد لا تنسى أنه هالهنديه يوم خذها العربي يابها وياه بلاده تغربت عن بلادها وعاشت وسط ناس ما تعرفهم وأضطرت تتطبع بطبايعهم وعاداتهم وتقاليدهم وها طبعا تأثير المحيط اللي ساكنه فيه ...
صح انت قلت أنا ما أعمم على هالشي بس أنت لو تلاحظ كل الأمهات الأجنبيات على ذاك الزمن من دول عربيه او مسلمه على الأقل وبالأخص الهنديات يعني أبهاتنا ما خذوهن كفار واذا كنت تقصد في هالزمن فنادر جداً انشوف شاب مواطن ماخذ هنديه الحين اللي ياخذ أجنبيه يا ياخذ روسيه ،، فلبينيه ،،، أو مغربيه وان كثروا رومانيات يعني فكر بكلامك مره ثانيه...

وخلاصة الكلام الحمدلله التربيه اللي لقيناها من الأم الهنديه في كثير من الأحيان تكون أفضل بواااااااااااايد عن الأم العربيه وأنا ما أعمم هالشي بس الحمدلله ما أستحي من كون أمي هنديه وأفتخر أنها أمي فديتها ....


اختلاف الرأي لا يفسد للود قضيه ....
عنود الريف تقبلي ,,,

تحياتي الجناويه ...

[الملهم]

مرحبا ..

أكرر كلامي ..
"" انا قصدي ان تربية الام الاجنبية تختلف عن تربية الام العربية
بغض النظر عن التربية الصحيحة والخاطئة ""

انا ما تكلمت عن التربية الصحيحة والتربية الخاطئة ..
ولكني تطرقت وتكلمت عن طريقة التربية ليس كمثل تربية الام العربية في الصحيحة والخاطئة
ولم اتكلم عن تربية الاجنبية خاطئة وتربية العربية صحيحة فاحيانا تكون الام الاجنبية
افضل بكثير من الام العربية .. ارجو ان كلامي واضح

واسمحوولي لاني ما وضحت مقصودي من البداية ..