بييييب بيييييب

[ذنـيـنـي]

بييييب بيييييب

ايه تعال,

حووووووه

ارمسك لعنة الله عليك :crosseyed

جيب واحد همربرغر لحم و واحد كوكتيل بسرعة

يالله "جلدي"

الله لا يبارك فيك

هالمشهد صار يتكرر يوميا عند الكفيتريات



و نفس المشهد لكن بأسلوب اخر يتكرر عند الدكان


ليش الناس عندنا يكلمون العامل و كأنه عبد

يعني جملة (يالله بسرعه) عند الكفتيريا, ابدا مالها داعي

لأنه الشخص بياخذ نفس الوقت في تحضير الطلب سواء قلت (يالله بسرعة) او ما قلتها

بالعكس هالشيء بيخلي العامل يشعر بالذل و المهانة بسبب هذه الكلمة الي مالها اي داعي



و عندي ظاهرة ثانية لفتت انتباهي من شهر تقريبا

و هي انه يوجد بعض الناس يستعملون منبه السيارة عند محطات البترول

يعني بشوف عيني البارحة شفت شباب راكبين BMW و عند محطة البترول دقو هرن حق الي يشتغلون داخل , و يقولون حق الفلبيني bring 3 ...hotdog and 3 redbull

يعني انته منو تكون يا راعي البي ام عشان ما تنزل المحطة و تعطل الناس الي داخل المحطة عشان الهوتدوغ مالك



و الموقف الي صدق رفعلي الضغط
و خلاني اكتب هالموضوع

هو اني كنت في الحلاق و على كرسي الحلاقة

ويا واحد من الشباب و دق هرن حق الحلاق

تخيلوا وياي , شخص يدق هرن حق الحلاق و يساله متى بيخلص الريّال الي عندك

او شكثر باقي على دوري

ياخي ايلس في المحل حالك حال غيرك
ليش كل شوي تزقر الحلاق و تسأله
الناس الي عنده يبغون يخلصون و مب فاضين لك



و السموحة منكم على الموضوع المخربط , لأنه الموضوع اشبه بفضفضة من القهر الي فيني على هالفئة من الناس الي يتحرون اعمارهم فوق البشر

في انتظار تعليقاتكم على هالظاهرة الغريبة في مجتمعنا

[عنود الريف]

مرحبا اخويه نصور
هاي مب الظاهره الوحيده اللي منتشرة عندنا في البلاد ولو اني ما اعرف لسوالف الكافتيريا مجرد اني اتصل به وايي حليله لين باب البيت .. ولا اعرف للشيشه .. لان ما عندي سيارة ولا اصب بترول .. ولا اسير لها .. اذا بغيت شي طرشت اخويه الصغير او الدريول
المهم من هذا كله .. ان الاحترام هو معيار .. يقيس اخلاق الشخص .. سواء كان ويا ربيعه ولا كان ويا عامل بسيط.. لا فرق بين عربي واعجمي الا بالتقوى
اذا الرسول صلى الله عليه وسلم قال هذا الحديث من اكثر من 1400 سنه .. فمنو انت تي واتفرق بين الناس الحين..
حليله .. العامل تراه يسوي لك الشغله ويخلصها لك .. بس شو بيستوي بك اذا نزلت الشيشه واشتريت اللي تباه ورديت سيارتك .. لو منو كنت .. التواضع من الصفات الحسنه اللي المسلم المفروض يتصف بها ...
ودام انك مسلم المفروض تبين محاسن اخلاقك للمسلم ولغيره ..
يا اخويه... في شباب البطرة مخربتنهم .. تعودوا على ان كل شي يوصل لين عندهم من دون تعب .. ولو ان نزلت الشيشه ما ادري شو من تعب فيها .. تراها الا عشان بطنك ..
واللي يشتغلون في الكافتريا .. مساكين يتعبون .. في هالحر .. يلبون طلباتكم .. لو انت طالب عشا في البيت ما بتحتشر وبتقول لهم يالله بسرعه ..فما بيستوي بك شي لو تصبر شوي عليهم .. جي والا جي ترا العشا بيوصلك ..
الله يهديهم يا رب
على العموم اخويه .. اسمحلي عالاطالة ..
وتسلم لانك فتحت لي المجال اني ابدي رايي ..
والسمووحه

[ورديّـه]

تخيلوا وياي , شخص يدق هرن حق الحلاق و يساله متى بيخلص الريّال الي عندك

او شكثر باقي على دوري

!!!!!
عافانا الله لو انا منك جان دخلت في سيارته . م الغيظ

من فترة عند مدخل الباركينغ فـ بوظبي مول شفت واحد من الشباب فالعشرينات شكله يساعد هندي < راعي الباصات الصغيرونه هاذيج . صدق الواحد يحترمهم
.
.

مممم والله ناس ترفع الضغط . شكرا اخوي ع الموضوع
لا تعليق

[الجنيه]

السلام عليكم ورحمة الله وبركاته

صدقت يا أخوي بكل كلمه قلتها الصراحه وياد من الشباب ويمكن حتى البنات تلقاهم كشاخين ومتعديلن وأحلى منهم ماشي بس من دون أخلاق تعودوا يشوفون الناس بنظره دونيه وما يحسبون لهم حساب ...
هالهندي اللي يصرخون عليه ويستريلون عليه ،،، مسكين ما له حيله وكل ظالم بييه الأقوى وبيظلمه ...فليش أنا أحط نفسي في مثل هالموقف يعني ما قهرني شي كثر هالشباب اللي في الـــ BMW يعني بيطيح نصهم لو واحد منهم نزل وخذلهم اللي يبونه ... يعني أنا يالبنيه ان بغيت شي من الشيشه عمري ما فكرت أسوي هالحركه ...
أنا من فتره شفت موقف والصراحه كبر الشخص بعيني بدرجه ما تتصورونها .... عند الدوام كان شيبه هندي شال في إيده كيس عود وشكله ثقيل ومن زود الثق كان أيره جان يخطف واحد راعي مرسيدس ووقف وشله وياه وبعد مسافه بعيده أشوي شفته ظارب أربع أشاير ومنزلنه عند موقف الباصات الصراحه أحترمته ودعيت له ... الله يكثر من أمثاله ...
خلاصة الكلام مافي حد أحسن من حد ومن يكلم الناس بطرف خشمه بييه اليوم اللي بيحس أنه مذلول محتقر ومقهور حاله حال الهندي اللي يسبه كل يوم والثاني ... لأنه يشتغل أي شغله ويكد على أهله تتحرونه مب أنسان حاله حالكم ...


الله يهديهم ....

[الغاليه]

السلام عليكم ..

المواقف الي ذكرتهن اخويه نصوور واايد تقهر .. واللي يعاملون الخدم او اللي يشتغلون برع

بطريقة الزجر والسب واخس شي بعد اللعن ,, هاييلا ايطيحون من عيني صدق وماروم اتحملهم ولا احب اتعامل معاهم ..

لانه ابتصرفاتهم هاي يعكسون معدنهم واصلهم واخلاقهم وطريقة التربيه اللي متربينها ..

وحضارة الناس دايما تنقاس بالإخلاق .. يعني يوم حد يسالك عن بلاد .. لو انت مرتاح لها .. اول شي اتقول اهلها ناس طيبين .. ناسها اخلاق ...واذا ماحبيت بلاد بالعكس اتقول اخيه اهلها همج مايعرفون الذوق.. الخ .. يعني هالمواقف اللي تعرضتلها يمكن انها اتصادف سايح او اجنبي وشوف كيف بياخذ نظره سيئه عنا وعن الاسلام والمسلمين .. ونحن دينا من اهم الاشياء الي يدعولها حسن الأخلاق والتعامل مع الناس ..

وبعدين حليلهم هاييلا اللي يشتغلون شو ذنبهم يتعاملون بهالقسوة !! بس لانه مستواهم المعيشي فرض عليهم يشتغلون باشغال بسيطه! ,, ناس شرفاء واعمالهم شريفه لو عاملناهم ابطيبه وابتواضع وبانهم اخوانا بيخدمونا ابعيونهم وبمحبه وهم مستانسين ومن قبل لانطلب منهم بييلبون <<<< تجربة شخصيه .. وهالشي اريحلنا واريحلهم ,,, والحكمه اتقول (عامل الناس كما تحب ان يعاملوك)..

وانكارك لهالمواقف اخويه منصوور تكشف عن طيب معدنك وحسن اخلاقك ,,

شكرا لك ..

[أمواج]

الموضووع اللي طرحته يا اخويه نصووور نشووفه في حياتنا اليووميه بس السبب ورا هالظاهره مادري شو



ولي رجعه.............

[ذنـيـنـي]

عنود الريف

تسلمين اختيه على ردج
صدقج اختيه الشخص الي ما ينزل الشيشة منو يكون عسب ما ينزل

بشوف عيني شفت سمو حاكم عيمان الشيخ حميد بن راشد و هو في شيشة البترول

نازل ياخذ بارد و وياه حد من ربعه

اذا هذا حاكم الامارة و ولي امرنا, نزل بنفسه الشيشة
و ما قال انا الحاكم و لازم يوصلني الغرض الين السيارة



انا مستغرب الى هاللحظة و اقول في خاطري شو يتحرون اعمارهم
لو منو يكونون مالهم حق يسوون هالشيء

طبعا في استثناء واحد لهذا الموقف و هو هو اذا كان الشخص مصاب او معاق
يعني مرة مر علي موقف و هو انه شخص كانت رجله مكسورة و مب قادر ينزل المحطة
و المسكين كان يتريا حد يسويله سالفه
المهم يوم طفت حذاله سمعت حد يقولي لو سمحت ممكن تاخذلي ديو من داخل
ريلي مكسورة و ما اقدر انزل
في هالحالة ممكن انه الواحد ما ينزل و يشوفله حد يساعده

========
شيطونه ورديه
شفتي كيف وصل الاستهتار و قلة الاحترام فيهم

كأنه يقول حق الحلاق, مب مهم ترتب شعر الشخص الي عندك قص شعره اي كلام عسب اخلص بسرعة لأني مستعيل

و عن سالفة الشاب الي شفتيه

ترا عندنا كثير من الشباب شراته, فيهم خير للناس
===========
الجنية
الله يعينا على هالاشكال الي بكل صراحة مشوهين سمعة المواطنين
شو بيكون موقف الشخص الاجنبي يوم بيشوف عيال البلاد و هم يتعاملون مع غيرهم بتكبر و بدون مراعاة لشعور الاخرين

و الله يجزي راعي المرسيدس كل خير
و يجعل هالفعل في ميزان حسناته
===========
الغاليه

تسلمين اختيه على الإطراء
هذا الي نقدر نسويه و هو اضعف الايمان

قال تعالى
"كنتم خير أمة أخرجت للناس تأمرون بالمعروف وتنهون عن المنكر".

و قال رسول الله صلى الله عليه و سلم
(من رأى منكم منكرا فليغيره بيده .. فإن لم يستطع فبلسانه .. فإن لم يستطع فبقلبه .. وذلك أضعف الإيمان )


الله يهدي شبابنا و شباب المسلمين
==========
المتفيزره عالعرقوب
تسلمين على مرورج الاول و في انتظار رجعتج

[أليمه]

تسجيل حظور لي عوده

[الرحيل]

السلام عليكم والرحمه..

موضوعك شد انتباهي الصراحه..

انا بخبرك سالفه امس استوى هالموقف شوف شو رايك فيه وخبرني..

كنت واقف عند الكافتريا انا وواحد يعني من زمان ماشفته وكنت ااسولف وياه..المهم

يا وااحد عنده كرولا وايجار بعد المهم دق هرن..

ظهر الهندي وحليله ويابله منيو الطلبات..

المهم انا سمعه يقول حق الهندي..

في نفانق؟الهندي يقوله فيه..

يقوله انزين سوي وااحد همبرغر..

بعدين قاله فيه شوارما؟قاله فيه!قاله في لحم ولا دياي؟قاله في لحم وفي دياي..جان يقوله

عيل سوي اثنين جبن..وهم 3 كانوا في السياره وميتين من الظحك..والهندي مستعيل

والهندي يسجل الطلبات المهم

جان يقوله خلاص كنسل وييب وااحد ماي..

الحينه انته لو مكان هالهندي شو راح تسوي..؟

يعني هو شو ذنبه يوم انك تتمصخر عليه..يعني ناس والله ماادري كيف عايشين..

وعن طاري الحلاق ترى واللله واايد تستوي وانا كل ماحلق اشوف هالشي..

ماناقص بعد يحلقله وهو في السياره..

وبغيت اخبرك بعد واكيد انت شفت هالشي عن اللي يشيشون بالسياره تحصل منزل الجامه وماد البيب داخل

والكرسي حذال السياره..عفانا الله

مشكور نصوور على هالموضووع..

والسموحه

الرحيل

[ذنـيـنـي]

الي في الكورولا عزك الله سبلان مب اوادم

حركات عيال شوارع

يا يحيهم الي يقولون حق راعي الكفتيريا "يالله بسرعة", طلعوا ناس محترمين و عندهم ذووق
هم حليلهم بس شوي مستعيلين خخخخخخخخخ

عافانا الله شو هالاشكال الغريبة

ربيعي يسميهم "حترشية" بما معناه لوووث

[عنود الريف]

عدت من جديد ..
يا اخويه اللي ريله مكسورة والا معاق تراه معذور .. ويحق له ان يطلب لين السياره
والشيوخ الله يطول بعمارهم .. ناس متواضعه .. بس اللي تحتهم شايفين عمارهم ..
الله يهديهم يا رب ..
وسالفه شباب الكورولا .. تراهم والله ما فيهم مذهب .. لو فيهم مذهب جان ما يسووا هالشي ..
ارحموا من في الارض يرحمكم من في السماء
وصدق انهم حترشيه .. حلوه الكلمه
والسمووحه

[أليمه]

السلام عليكم...

هذا هو حالنا مشكلتنا دايما ننظر إلى

الإنسان الوفد بنظرة سخريه ونحاول إنذله

بأي طريقه..

أنا أفضل إنه قبل كل تصرف نحن نسويه

نحسب له ألف حساب وأتخيل نفسي مكان هالشخص

هل بقبلها على عمري ...

السالفه من أساسها سالفة إن هذا الإنسان

عنده أدب ولا..

بس ماقول غير الله يهدي شبابنا ويصلحهم..

والسموحه ع القصور.

[خيال الحب]

موضوع حلوووو..

لي عووده....

[ذنـيـنـي]

أليمه

تسلمين على مرورج اختيه
الله يعينا على الي بيينا اذا كان هذا تفكيرنا
--------
على طاري هالموضوع تذكرت سالفة كان يقولنا اياها واحد من الشواب الله يحفظه

كان يقولنا عن اهل عيمان و الشارجة و دبي
على كلامه انه من كثر ما كانوا بطرانين

كانوا ياكلون لقمتين من الحلوى و يفرونها على الجدار هي و الصحن

و طبعا على هذيج الايام ما كان اي حد يقدر ياكل حلوى

و عقب فترة يتهم فترة الحرب العالمية الاولى و الثانية

طبعا من كثر اليوع الناس قاموا يموتون في السكيك

و طبعا اغلب الي ماتوا من اليوع هم نفسهم الي كانوا يفرون الاكل

نفس الشي ينطبق على الي نشوفه

الناس الي متكبرين و شايفين اعممارهم فوق هالمساكين الي يطلبون رزقهم

بييهم يوم بيندمون على هالشي

يوم لك و يوم عليك

[الدلووووعة]

تسلم اخويه عالموضوع

انا ماقد شفت شرات هاي المواقف وبما انكم شباب
فاكيد بتشوفون اكثر عن جي لكم تظهرون وتشوفون اللي يسونه الشباب
حتى يوم اطلب من الكفتيريا ماطلب انا اخلي حد من اخوانيه يطلب لي
لنه ممنوع عدنا البنات تطلب بس مرات اقول لخويه يقوله بسرعة يب الاكل يوم اكون يوعانه
وماقصدي شي يعني هب قصدي استهزا منه بس يقولك اليوع كافر شو نسوي
لا تعرف ليش هيل الشباب يسون جي بس عسب يقولون انه ها له شخصيه مايدري انه الناس ماتحبهم يوم يسون ها الاشياء
والسموحة