محتاية لنصيحتكم..

[مصرقعة]

سلاااااااام على اللي لبى ودخل

انا يديدة وبقراطيسي ....ارحبوا وتوصوا خير فيني عاد
ابصراحة الموضوع ومافيه اني دخلت عالوحات بعد ما ضاقت عليه الدنيا
انا توني مخلصة امتحاناتي وفضيت وما ورايه شي الا اني اتريا النسبه وافكر باليامعه اللي بدخلها
انا عندي 2 جويس
جامعه الامارات جامعه الشارجة
كل حد يقولي رمسه وكل حد يشور عليه بشور وانا مب عارفه وين احط راسيه
انتو اشرايكم؟؟
ياريت اتردون عليه وتهتمون بموضوعي لني تعبت من التفكير ف هالموضوع
وانتو اتعرفون هذا مستقبل..
وبس كده وخلاااص

[روح القمر]

وعــليكم الســلام ورحمه الله وبركاته..
مــــبروك الخلاص من الامتحانات...وعقبال النتايج عزيزتي..
بصراحه انا ماااعرف شي عن الجامعات..مرج كلام من الغير..
بس يمدحونها وايد جامعه الشارجـــه..وافكر ادخلها عقب ما خلص الثانويه..
لين الحينه ماسمعت اي شي شين عنـــها..
بس نصــيحه اذا بدشين اي جامعه..لازم وحده من ربيعاتج تكون وياج.. (( هذا كلام الكل))..
لان صعب تكونــين بروحج..
واسمحـــيلنا الغاليه اذا ما فدناج..هذا اللي عندنا وقلناه... :)
ربي يوفقج..

[فركوشه]

نصيحه جامعة الشارجه

لانه جامعة الامارات فيها بلاوي
و سمعت انه اذا استوى شي في هالجامعه بيسكرونها

(ما اصدق)

بس اذا كنتي علمي لج مستقبل فجامعه الامارات
والسموحه..

[أليمه]

نصيحه جامعة الشارجه

والسموحه..

[كليوبترا]

أختي:::

هذا شي راجع لارادتج انتي..ولنوع التخصص اللي تبينه...اسألي عن التخصصات...واذا هي متوفره في الجامعتين..ولا لا؟؟؟
أول شي لازم تكونين واثقة من ارتياحج النفسي للمكان اللي بتكونين فيه...فيه بنات..يدرسون بالجامعه عندنا لكن ما بيستمرون كورس واحد...ليش لانهم ما يحسون انهم متأقلمين على الوضع...
فلازم تشوفين قدرتج..واستيعباج لهالشي وخصوصا ان حياة الجامعه صعبه وخص اذا انتقلتي للسكن الجامعي
أنا يا الغاليه...هاي كانت اخر سنه لي بالجامعه...
جامعة الامارات...وابصراحه أحس كل ما تييهم فتره يصعبون الوضع..ويحطون قرارات شوي صعبه مثل المعدل..نسبته كل سنه تزداد...واللي يدرسون اساسي ياخذون مساق الانجليزي..واذا نجحتي في المستوى الاول والثاني ..أييج الثالث وهو الاصعب..اذا نجحتي مثلا بالكورس..لكن رسبتي بامتحان التوفل تعيدينه....وااه يا القهر..تنجين طول الكورس واخر شي ترسبين بالتوفل...والاغلبيه اييبون تقادير امتياز..بس عند التوفل يرسبون...بس ما عليج فيه بنات شطورات..ومستواهم اوكي..أو اقل من الاوكي لكن يعدون....وينجحون فيه..
أما جامعة الشارجه..ماعرف عنها شي بس اربيعتيه تدرس فيها..وبعد تقول مب سهله...يبالها يعني...
فانتي أهم شي تتخبرين عن التخصصات...
لكن في النهاية...وعشان المستقبل...أنصحج بجامعة الامارات..

والسمووحه من الجميع

[اخت اختي]

اختي أنا أقولج.. أحسن حل إنج اتصلين الإستخارة :)

[شوق القلوب]

الســــلام عليــــــــــكم...

عزيزتي.. لا تحتارين... و ان شاء الله اندلج على شي يريحج... :)

انا دارسة في جامعة الشارجه ، وجامعتنا الحمد الله الدراسه فيها حلوه ومب ندمانه عليها.. :)

الحياه الجامعيه بحد ذاتها شي يديد غييييييير عن المدارس.. فطبيعي انج اتحسين بالتغيير اول ما بتدخلين..

..

في شي أساسي لازم اتعرفينه عن جامعة الشارجه.. انها جامعه خاصه و لها مصاريفها... اما اذا كان عندج جواز الشارجه فبسهوله تقدرين اتقدمين على منحه دراسيه و منها ما بتدفعين شي.. :)

..

بس قولي شو التخصص اللي في بالج..؟؟

جامعه الشارجه فيها هالكليات :

- كلية الشريعة و الدراسات الاسلامية.
- كلية القانون.
- كلية الآداب و العلوم.
- كلية الاعلام.
- كلية ادارة الاعمال.
- كلية الهندسة.
- كلية العلوم الصحية .
- كلية الفنون الجميلة.
- كلية الطب البشري.
- كلية طب الاسنان.
- كلية الصيدلة.
- كلية الزراعه و البيئه.

..

و هذا هو موقع الجامعة ( http://www.sharjah.ac.ae/ )

..

وأي سؤال عن جامعة الشارجه انا حاضره... وأي سؤال عن جامعة الامارات.. كليوبترا حاضره

[عافك الخاطر]

وعلـيكم السلام
حيـاج اختي ، وهلا فيج
انا روحي شراتج مب عارفة وين اسير ؟ بس كلهم قالولي الشـارجـة أحسـن من الإمارات..

بس موضوعج نزل في وقته لان انا بعد كنت بستفسر عن جامعة الشارجة..
واسمحيلي بعد اذنج طبعاً اني اطرح شوية اسئلة على اختي شوق القلوب بما انها تدرس هناك :)

اخـتي : انا سالت عن المنحـة بالنسبة لكلية الطب البشـري وقالولي 84 بس قالوا يعني يعتمد على نسبة نجاح الدفعة وشي اولويـات مثل سالفة اذا كان جوازج من الشارجة .. وجي..
فـ ما اعرف بغيتج اتشورين علي بخصوص هالكلية ؟ و هل المنحة بتكون لسنوات معينة ..؟ والا شقايل ..؟
وبكون شـاكرة لج
السمـوحة ..
..

[شوق القلوب]

هلا بعافك الخاطر.. :)

..

انا ما عندي خلفيه كبيره عن المنح.. لاني كنت ادرس على حسابي عسب انه جوابي بوظبي..

بس بخبرج عن اللي اعرفه.. :)

- انه المنح اتكون اساساً للي عندهم جوازات الشارجه .. وفي نوعين من المنح.. منحه مممم ( ما اعرف شو يسمونها.. يمكن منحه جزئيه ) .. و منحه كامله... وأحسن لج المنحه الكامله ... لانها تشمل الدراسه و الكتب و هالامور كلها...
ومن شروطها على ما اذكر انه لازم معاش ولي الامر ما يتعدى الـ10 آلاف.. لكن في ناس طبعا يحصلونها بالواسطه... و بسهوله بعد.. او من ديوان الحاكم..

بس ان شــاء الله.. بسألج باجر عن منحة الطب كيف بتكون.. :)

انت قوليلي كل استفساراتج وبسألج عنها...

..

بس نصيــــــــــــــــــــــ حه من أختج..!!

حاولي في هالشهرين تاخذين شهادة التوفل.. لانج بتختصرين على عمرج سنة دراسيه كامله... خاصه انه نظام الـ level صار يتعب و يضيع عالواحد سنوات هو بحاجه لها...

لانه الجامعه أول ما تدخلينها بتسويلج امتحان توفل.. واذا ما يبتي الدرجه المطلوبه بتنجبرين انج تاخذين كورسات انجليزي وبيوزعون الطلبه على حسب درجاتهم في امتحان التوفل على 4 مراحل.. level 1, 2 , 3, 4
عاد الواحد اهنه مايضمن بيكون في اي مرحله.. يعني اذا كنت في level 2 بتدرسين كورس كامل وفي نهاية الكورس بيسوولج امتحان.. اذا يبتي فوق الـ80 بينقلونج على 4 .. اما اذا يبتي فوق الـ 60 بينقلونج الى 3... ومن هنيه تبدا معاناة البنات..!!!

فاذا حاولتي تاخذين التوفل من معاهد معروفه بتريحين عمرج واااااايد... وصح.. اللي يدرس level ما يقدر ياخذ مساقات الجامعه...من جيه يضيع عليج الكورس ع الفاضي... وانت بس تدرسين انجليزي..

..


مب جني رمست وايد..!

[عافك الخاطر]

انا العام خذت كورس توفل بس بدون الامتحان ف بحاول ان شاء الله اخذه في هالشهرين ..
مشكـورة خيتو :)
بس خل النسبة تطلع ، وعقب بكمل استفساراتي ان شاء الله
ما قصرتي عزيزتي ..
..
.

[اشواق العين]

@@مرحبا الساااااااع مصرقعة @@


@الف مبروك على التخرجمن المدرسة وعقبال النسبةالعالية والتخرج الاكبر وهوالشهادة الجامعية @


**[[لو كنت مكانج دخلت جامعة الشارجة لان جامعة الامارات فيها المصايب والبلاوي ويقولون ان شهادة جامعة

الامارات غير معترف بها دولي [[ما دري من صحة هذا القول ]]**


!!احسن شيء صلي صلاة الاستخارة !!



**بالتوفيق ان شاء الله **


@@تحياتي اشواق العين @@

[شوق القلوب]

الســـلام عليــــــــــكم...

..

أول شي مبــــــــــــــرووووك لكل الناجحيــــــــــــــــــ ـن.. ^_^

..

عافك الخاطر.. عزيزتي.. اسمحيلي اتأخرت عليج...

كنت كله اتصل فيهم الظهر... ومحد يرد علي... وناااااااااااااااسيه انه صيفي ودوام الجامعه يخلص الساعه 2 و نص

..

المهم.. اليوم حصـــلتهم.. :)

يقولج... كليه الطب تقبل 80 وفوق...

القبول عادي..جنهم يسوولج مقابله .. ويشوفون... بس قالتلي.. اذا تبين تضمنيلج مقعد.. ادفعي 3000 درهم..

أما عن المنح.. قالت مب عدنا.. فانت اتصلي دائرة الكهرباء وماء الشارجه... وشوفوي شو بيقولولج... لانهم هم اللي يعطون منح... من غير فيه ديوان حاكم الشارجه بعد يعطي.. :)

وهذي كل السالفه..

رقم القبول و التسجيل في الجامعه هو : 06 - 5050755

..

في هاليومين انا يمكن اسير الجامعه.. فشوفي اذا عندج شي ثاني تبيني أسألج عنه ..:)

[نسيان]

مشكورين خواتي ع ردودكم ..بتخبرج اختيه كليوباترا بما انج اتمثلين جامعة الامارات
صج اللي يقولونه ان مهما تدرسين واتحلين فالاكسامس ما ينجح من الكلاس الواحد الا 3 بنات بس وانهم يبون يفتكون من البنات ويرسبونهم؟؟
انا هذا اللي سمعته وخوفني..
اتمنى اتردين عليه..
انا خاطريه ادخل كلية علوم_بيولوجيا خلويه وجزيئية احسبه حلو..
وياريت لو تخبريني بالتفصيل لوسمحت عن التعليم الاساسي فالجامعة واشوي عن القوانين الصعبه اللي عندكم..
انا بعد سجلت فمنحة فجامعة الشارجة(صيدلة) وللحين اترياهم ..والله ماعرف وين احط راسي
والسموحة منكم خواتي..
تحياتي مصرقعة

[نسيان]

سوري ما خبرتكم شلي صار انا مصرقعة (سابقا) وما رضى يدخلي فغيرت النك ل نسيان (حاليا)
والسموحة again ..

[جرح قلبي 2]

وعليكم السلام..
أختي.. انا مخلصة ثانوية عامة..
وقالولي جامعة الشارجة مب معترف فيها إلا على نطاق الشارجة..
بس جامعة الامارات شهادتها اقوى عنها..(أنا هذا اللي قالولي ياه)
بس جامعة الامارات قبلوني على الفصل الثاني..مع إنه نسبتي 82%
هذا بعد ظلم....:(