،،

{ 20 }


بعـمر العشرين امتزجت كل الأعـــمار .. أو يمكن مزجناها احنـا غصب !

طيـش .. تفكّـر .. غـرور .. تواضع .. و كل صفة تحضن الثانية مرة و تصفعها مراات !

أحياناً نجلس على كرسي القاضي .. و مرة المظلوم .. و أحياناً الظالم

،،

في أحد أيـامي "العشرينية" أفز من النوم كالعادة بسبب المنبه الغبي !

و كالعادة أمـارس طقوس عنادي مع نفسي .. أسكره و أرجع أنام

"طيب طيب ..... خلاااااص خمس دقايق و أصحـا بعدها .."

أغمض عيوني .. ياااه أخيراً شفت شي حلو في المنام .. أبقى مبتسمه

لحد ما أفز مرة ثانية و أكتشف اني نمت لمدة ثلاثين دقيقة !!

أسرع بترتيب الأفكار و الملابس و .. و ... يوووه ما بقى وقت

أنادي السايق .. "يالله بســـرعة تأخرت .. ويـــــــــنه ؟!؟!؟!"

"السايق ماهو فيه !!" ... "ايـــــش ؟!؟!؟!"

"طيب خلاص أنا عندي اختبار و لازم أروح الحين"

"طيب كيف ؟؟ و انتي ما تملكين رخصة القيادة يا "فالحة" ؟!"

"ها .. مممم مدري .. بس ماهيب مشكله "

أركب السيارة بسرعة .. يا الله هذا اللي لازم أبقى دايسه عليه

و هذا ما أجي ناحيته إلا اذا أبي أوقّف السيارة .. طيب طيب .. مو وقته

يا الله بسم الله ..... أبدأ كأني في ملاهي .. أتجاوز و أسرع

في نصف الطريق .. شي أبيض طار قدامي .. !!!!!!!!!!!!!!!

نزلت من السيارة بسرعة .. من ذا !! حمــــد !!

"قتلتله ....... قتلت حمد !!"

من هول الحادثة قعدت في الشارع

راسي على رجولي .. و أتمتم ...... قتلته ....... قتلته

حسيت بأحد يلمس كتفي ..

"لو سمحتي اختي ..... ايش الموضوع ؟! موقفة العالم و تبكين في الشارع !"

اتلفت ... وينه .. ؟! أشوف يمين يسار .. أكتشف اني أتخيل كالعادة

كان شكلي مرّة غبي .. و انحرجت كثيــــــر !! :(

كثير يدخل الخيال في واقعي و أتعامل معه .. لكن المرة ذي كان غريب

كان قــــــــوي !! .. طيب ليه حمد بالذات ! مــدري ؟!


كان طعم الحيرة مـرّ ... والله مــــرّ !!


،،


{ 30 }


أحس انها أحلى أيـام حياتي .. عرفت أتعامل مع أغلب الأشياء بالشكل اللي أحبه

مدري اذا هو صحيح أو خـطأ .. لكن على الأقل عرفت أرسم طريق ثابت !

،،

و في أحد تأملات "الثلاثينية" قاعدة في حديقة المنزل

أبتسم لأنه معـي .......... زوجي

و أبتسم لأنه يضم يدها بحب و حنان ......... بنتنا

يا الله كم أحبــــــهم !

التفت لي من بعيد .. ابتسم لي براحة ..

رديت عليه الابتسامة بخوف ! مدري ليه

أشر لي انه بيطلع يلاعب البنت برى شـوي ..

تمتمت له و أنا أهـز راسي بشــــويييش ..." طيب" !

دخلت أعمل قهوة .. سكبتها على يدي بالخطأ

حرقتني حيـــــــل .. و حرقت شي في داخلي .. !

طلعت بسرعة أتفقدهم .. أشوف قدام الباب غباااار !

ايش الموضوع ؟! ناس متجمعه ... حادث سيارة ؟!

أمشي بأبـطأ خطواتي و أثقلها ....

مفجوعة ...... موجوعة

اشوفهم قدامي و الدم لبسهم ! اقعد على ركبتي

أتوسل لهم يقومون :( .. أترجاهم يسمّعوني همسهم لآخر لحظة !

اهمس لهم .. اشفقوا علي ! لا تخلوني .. خذوني معكم !

حادث سيارة .. أفقد فيها الأغلى على قلبيـ

فتحت عيوني ..... أشوفه قدامي ... مــــــن !!!!!!؟؟؟! حــ ـمـــد !

"تذكري لما قتلتيني قبل سنين .. ما اقتصيت منك وقتها ! لكن الحين أخذت حقي منك"

صـرخت ....... قمـت ...... كنت في غيبوبه ! و قمت منها وحيدة


كـان طعم الفقد مـرّ ......... والله مـــــــرّ !!


،،

{ 40 }


أربعينية متعبة ... قضيتها في محاولة نسيان ..

و بدأ صفحة جديدة مع عالمي و بعيدة عن الخياااااااااال

ببساطه .. ما للنسيان طعم .. لأني ما وجدته !

،،


{ 50 ... 60 .... !! }


تمر سنين حياتنا .. نكتشف اننا ناس بســطااااااء

اهتماماتنا ما تتعدى محيطنا .. نصرخ .. نفرح .. نحزن .. نبقى مساكييين

ما سوينا في العالم شي .. نتبهدل بظروف الحياة و بأنفسنا

عشان بس ................... نعيــش !

الانسان ماهو انسان اذا ما شقى .. و ان ما شقينا ما عرفنا للراحة طعم أو لون

لما وصلت المرحلة الخمسينية و الستينية .. اكتشفت ان ماهي ذي

الحياة اللي كنت أتمناها ! "طيب بدري" توك تكتشفي !

،،

وصلت الستين .... كان المرض ينهش بجسمي و ياكله أكل

حالتي صعبة مرّة .. و أكثر الأطباء يقولي اني ما راح أعيش

أكثر من شهرين الا اذا الله قدّر غير ذلك

في البداية ... كل الأحباب و الأصحاب يزوروني بحب ..شغف .. خوف

لكن مع مرور الوقت و طول المرض و اعتيادهم على الوضع

صاروا يجون .. تأدية واجب لا أكثر .. وقلييييل اللي بعده خايف

ماهو ذا اللي أحزني .. اللي أحزني فعلاً .. اني شفت أجزائي تتخلى عني

أعضائي تبي تتشبث بالحياة من دوني !

ياااااااه .. حتى انتـم !

أنانية مني ان قلت لهم موتوا معـي .. خلهم يستمتعون بالحياة من دوني

لكن على الأقل ما يبينون لي في وقت وجعي !

رجعت لطعم حيرة العشرينية المــرّ .. و اكتشفت

اني عشت كل حياتي ..... بس عشان أعيش !!!!

تنهدت بعــمق .. ناظرت حديقة المنزل من نافذتي على اليمين

شفته قاعد هناااك و يضحك علي بسخرية !!

يا الله يا حمــد ! بعدك ... بعدك تقتص مني .. ما كفااك !

مديت له يدي .. أودعه .. يحسب اني اطلبه ينقذني و ابتسم بخبث

آخر ما لامسني .. دمعة .. حضنت وجنتي حيــــــــــــــــــل !

ساعدتني أغمض عيوني .. و كان آخر من خذلني ..

رووووحي !! لما هي بعد ودعتني


كان طعم العــجز مـرّ ...... والله والله والله مــــــرّ !!!


،،
،