إن لم تستح فاصنع ما شئت

[عنود الريف]

{عطور}
بالأمس كنت أتابع إحدى قنوات الموسيقى
(( مثل ما يسميهن عبدالله بن خصيف .. قمر .. وقمر الخليج ))
عرضوا إعلان لعطر اسمه الأماكن (( من ربع أحباب .. مذهله.. الخ)) .. يكون رجل جالس بالقرب من مسبح .. فتتراءى له إمرأة بملابس السباحه وثم تقفز في المسبح .. الى آخر الإعلان ..
منذ متى ونحن تعرض علينا هذه الملابس ؟؟
اهذه دعاية لعطر ؟؟ باقي الاعلان لا مانع فيه .. ولكن بداية الاعلان هي المشكله .. كان بالامكان حذف بدايته او استبداله بمقطع آخر .. ولكن لا يهنئ لهم الا اذا عرضت اشياء تخدش الحياء ..

أنتظر تعليقكم على الموضوع ..
والسموحه

[العجيبة]

السلام عليكم ورحمة الله وبركاته ..


هــه .. ما قهـرنـي إلا الإعـلان اللـي في قناة دبـي

أونه شـو " مصر .. ابتسامة متنتسيش "

مصـر على عينـا وراسنـا وأهلهـا " ولو انه عندهم نصب " بس ناس طيبين وحبوبين وعسسسل
وبلادهم سياحية ومعـروفة .. اذا نبـا نعـرض لهـا إعـلان عشان السياح يقبلون عليها انحــط حـريم
متفصخات ومنسدحات ولا يلعبن كورة عند البحـر ؟؟! .. جيه مصـر !!!
عيـل لو يبـون يسـوون دعاية لـ تايـلنـد ولا بانكـوك ؟

والله بغيـت أتصل القنـاة عشـان هالاعـلان .. بس المشكـلة فيني خـلل .. ما أقدر أسويهـا !


خـلاص انعـدم الحياء .. وصارت مشاهد الاعلانات ولا شي دامنـا انشـوف مشاهد ومناظر أخس منها وين ما نسيـر ..

عنود الريف ..
ما شاء الله عليــج جريئة .. أهنئج على هالجـرأة
وسلمت يدينج .. وننتظر يديدج

السموحه

[بنت الشارقة]

السلام علييكم

فعلا كلامج الغاليه ..


فعلا دعايات مالها معني .. ويكون الموقف اكثر احراج يوم الاطفال يسئلون شو هذا

او شو يسووون فيه .. يعني الرياييل ما بيعرفون شو يردوون والحرييم بيقفطوون

ماله داعي مول يحطون الناس في هالمواقف المحرجه ..

الحيين قلّن المنتجاات تسووون دعاايه حق هالاشيااء!!!

تسلميين الغاليه على الموضوووع

[زمان أول]

الاعلام ....والواحد شو بقول عن الاعلام محد سلم منهم يدخلون المفاسد ع البيوت بدون اذن او سابق انذار

وقليل ما تجد منها القنوات الهادفه الي وضعت هدف لها ولكن الكثير منهم يضرون ما ينفعون ...

والاعلانات حدث ولاحرج ..... في اعلانات مايخصه يحطون المرأه ... نحن نخاف من القنوات الغربيه ونحسبلها الف حساب ولكن للاسف نشوف اخوانا العرب يطعنونا من ورى بسخافاتهم ودمار قنواتهم الله يعينا ....

الله يحمينا من شرهم .......

يزاج الله كل خير اختي عنود الريف ... موضوعج في غايه الاهميه .... ونتريا كل جديد من المواضيعج الهادفه والمفيده

والسموحه


اخوكم
عبدالله الكتبي





بالنسبه للاعلانات يستخدمون المراه لانها تجذب المشاهد ...

[ورديّـه]

صـاروا ما يستحـوون !

أو يمكن نحن هب Open-minded .. !!

بيني وبينج استوت عادي هالاعلانات من كثرتها

الله يرحــم .. !! زمان يوم كان التحكم يطيـح من ايدنا من الاحـراج

وشكرا ع الموضوع الشيخة ..

ماشالله متابعه الساحةانا انسى الاعلانات

[عنود الريف]

العجيبة
هلا الغاليه
الصراحه انا بعد شفت هالدعاية .. والصراحه سخافه .. دعاية مصر القبليه احلى بوااايد
مب الحين .. نصها مصاخه
صدقتي اذا دعاية مصر جذي عيل شو خلوا حق الدول الاوروبية

ترا اقولج اختي ان لم تستح فاصنع ما شئت .. فانعدمت الغيره والحياء عندنا نحن .. فقاموا يحطون هالدعايات ..
تسلمين الغاليه على مرورج وتهنئتج ولو اني توقعت مصير الموضوع هو الحذف ..

بنت الشارقة
تسلمين الغاليه على مرورج ..
والله الواحد يستحي من مشاهدة هالدعايات
وسبب هالدعايات هي الحرب الفكريه مثل ما تطرقنا لها قبل ..
شاكرة لج تواجدج

البدوي
صحيح يا اخويه ..
كثير من الاعلانات تستخدم المراة من دون غرض
وانا اشوف قنواتنا استوت اخس عن القنوات الغربية
شو الفرق بينهم الحين ؟
يمكن تلقى فرق واحد والا اثنين بس ..
تسلم على مرورك اخي الكريم ..


شيطونه وردية
اختي لو هم صدق يستحوون جان ما عرضوا هالاعلانات ..
ثانيا .. نحن نكون open - minded في المكان اللي مفروض نكون فيه open minded
ما نكون open minded في كل شي ..
من الله عيل الجيل اليديد جذي ظاهر؟؟
والدنيا بعدها بخير ..
واللي يستحي مب بس الجهاز بيطيح من ايديه الا بيتدارك وبيغير القناة

واختي انا متابعه لاني كنت اتابع مسلسل .. ولاني اتواجد فترة طويلة في الصاله مع العايلة
فعشان جذي انا شفت الدعايات والا انا ما كانت تهمني ..
تسلمين الغاليه على مرورج

والسموووحه من الجمييع

[عافك الخاطر]

الـسلام عليـكم ..

الإعـلام الوسيـلة الوحيدة اللي تخـلي " بعض الناس " يحصلون اللي يبونه ، و يحققون التأثير اللي يحلمون فيه على الأمة الإسـلامية .. وقنواتنـا خير دليـل، أولاً انصدمنا بكـثرة قنـوات الأغــاني ، واحتجينا شوي و عقب سكتنا ( أو بالأحرى سكتونا ..!) ، وطلعلنا عقب ستار بطيخ وتلفزيون الواقع ، مروراً بـ البرامج التافهة ،والفيديوكليبات الماصخة ،وكله كوم وهالقنوات اليديدة اللي تظهر كل شهـر كوم ثاني (جنهم يفتحون دكان مب قناة ) .. وجاان زيين منها فايــدة . وألحيـن يا دور الدعايات ..
الواحد شو يقـول غيـر الله المستعـان ..
سمـعت مرة في احدى القنـوات ، إن بعض الدول تستخـدم الإعلام كوسيلة لصرف انتباه الشعـب عن حقـوقه و عن قضاياه السياسية ، عشان يصير المواطن شغـله الشـاغل كله هو شو يديد نانسي عجرم والا شو آخر برنامج "سخيف" نزل على القناة الفلانية .. عشان يصنعون منا أجيال ما تعرف حتى شو قاعد يصير حولها من مؤامرات و قتل و تشريد ،والدليل ،اسألي أي شاب ( إلا من رحم ربي ) شو رايك باللي يستـوي في العراق..؟ بيتم مبهت ومب عارف يرد ..؟! ليش ؟ والله لأنه مب فايج يعور راسه ويتابع الأخبار ، و بيقـولج على طول " لا تدخلينا في السياسة واللي يرحم والديج " ليش من متـى صارت حقوقنا وقضايانا حكر على السياسين ليش احنا مب عايشين على هذي الأرض .. مب اسمنا امة اسلامية وحدة ..؟!

جني طلعت عن الموضوع

بـس كلـمة لازم تعرفها كل مؤسسة إعلامية ..
إن الإعـــلام أمـــانة ، اذا محد حاسبــك على خيانتها اليــوم ، باجر رب العالمين بيحاسبك
..
.
وشكـراً اختي على موضوعج الهادف..
موفقة ..

[لبن مثلج]

لج مني كل التقدير على موضوعج القيم ....

ملاحظاتج في محلها .. واصبحت القنوات كلها .. الا مارحم ربي .. المجد والفجر .... قمه في الانحطاط والدمار ... والنتافس مستمر في هالمجال بين المحطات العربيه ولاسلاميه

وانا عن نفسي ماقمت اشوف التلفزيون من اساسه ...... الا في المناسبات

لاني احس البرامج والاعلانات مالها قيمه ..

والمعذرة

[عنود الريف]

عافك الخاطر
اختي الغاليه ..
نعم كثرت قنوات الاغاني والفيديو كليبات
وكل هالاشيا موول ما منها فايده
والكل اصلا يعرف هالشي
اما عن اللي سمعتيه فانا معاهم في هالشي ومعاج
يحاولون يصرفون فكر المسلم عن امور دينه وامور ارضه ..
حتى مشكله الارهاب اللي في الدول العربي وخصوصا في السعوديه ..
حد مهتم لها ؟ حد يرمس فيها ؟ ما تسمعين الناس ترمس عنها ..
خلاص مثل ما قلتي الكل مهتم بجديد نانسي وشو لابسة اليسا وغيره ..
تسلمين الغاليه على مرورج ..

لبن مثلج
يا هلا الغاليه ..
تقديرج اعتبره فخر لي ..
صح شو من القنوات اللي لين الحين ما وصلت الحضيض .. الشارجه والفجر والمجد واقرا .. عاد ما ادري منو يشوفها ؟؟حتى قناة السعوديه اللي ما كانت تحط اغاني قامت تحط .... شو تم ؟؟
الله يرحمنا برحمته ..
تسلمين الغاليه على المرور ..
والسموووحه

[عنود الريف]

شبه بشارة ..
ولكن اعتبرها بدايه
اليوم اشوف دعاية عطر الاماكن في دبي
شفتهم قاطعين المقطع اللي تكون الحرمه فيه بثياب السباحه ..
الحمدلله ..
والسمووحه

[ديج الفريج]

اختي في الله

وأنا أسوق سيارتي اليوم
لفتتني دعاية موبايل
تصف الدعايه نقاوة الكيمرا في الدعايه
والصوره اللي تليها على عمود الاناره صورة ورده في شاشة الموبايل
ابصراحه استغربت
قلت اشمعنى ؟؟
وين العنصر النسائي هالمره
لو يحطون صور أطفال .. شو أجمل من اليهال في هالكون
لكن المرأة استوت سلعه " بلاش " مب بعد ارخيصه
الله يستر علينا وعلى الجميع
اللهم آمييييين

[عنود الريف]

مرحبا اخويه ديج الفريج
هم يعرفون ان ما في احسن من اليهال ... بس بالنسبة للدعايات يشوفون الحرمة تجذب اكثر
فيلقون زباين لسلعتهم الرخيصة
فالله كريم يا اخويه ..
وان شاء الله اعلامنا ينش من رقاده في فترة البيات الشتوي والصيفي ..
شاكرة لك مرورك اخويه
والسمووحه

[دقني بنقع]

يالله ....... بقولكم امس شو استوى ..

انا وزوجي كنا سايرين السوق ..واحنا فالدرب حطينا على اذاعه من الاذاعات لبناني يقدم البرنامج .. يتصلوون بنات الامارات ودول الخليج يهدون اغاني ويقولون حق المذيع اهديك احلى بوووسه يا الغالي ..ويرد عليها المذيع وانا بعد يا حبيبتي ..

يالله انصدمت قالي زوجي حبك عفريت وعصب وقالي والله اشتكي عليهم

[من بعد غربة]

مساء الخير ,,,

موضوع خطير جداً ...وخصوصاً لأنه يختص في التسويق ,,, فالتسويق أهم من السلعة نفسها ,, في وايد سلع ما تكون بالمستوى اللي يظهرة الإعلان ,,بس أغلب التجار فاهمين إنه السر في [frame="1 70"]التسويق[/frame]


مثال على ذلك ,,طبيعة شغلي تعتمد على التسويق للخدمات اللي تقدمها الجهة اللي اشتغل فيها ,, ومنها زيارات للشركات وغيرها ,,,طبعا أنا احدد الموعد ,, والوقت ,, مع الشركات لكن في كثير من الاوقات اطرش بعض زملاء العمل (ذكور) خصوصاً إذا كانت الشركة تعبانه ومب معروفة أو في مكان ماشيء مواقف (الحمدلله محد منهم يدش الواحات) ..فأول ما يشوفونهم يسألونهم عني ,,, كوني ابنية وأنا اللي كلمتم,,وحددت كل شيء ...حتى بعد فترة وإذا زاروا جهة عملي ,,,يسألون عني ,,, اونهم يحبون يشكروني . لكن أنا متأكدة 90% منهم ,,,يايين بس يشوفون منو اللي كلمتهم..

بنظري إستغلال المرأة كسلعة في أغلب الإعلانات ..إذا مب كلها ... فهو أكثر من ملاحظ وعلى كل القنوات ...واللي نحنا العرب في الفترة الحالية نمشي عليه بقوة ..

في إعلان لعطر ... HUGO اظني ,, وايد بايخ,,, فيه ريال راقد ..منسدح على السرير والحرمة تتحرش فيه ...!!

وفي إعلان ثاني مال معطر مال الجسم ... دكتورة ما رامت تقاول عطر المريض ومن كثر مب هيه متخربطة ...حطت السماعة على صدرها بدال صدرة ... !! الله يستر ..



تسلمين الغالية على الموضوع,,,

[عنود الريف]

لي عودة ان شاء الله للتعقيب