الســـلام عليــــكم...

عزيزتي الشـــوق.. لج كل شكـــري على هذا الموضوع..


بالفعــــل.. شي مؤلم انج تسمعين من الصغاريه كـــلام يستحي الكبير منه ! والمشكله انهم يقولولنه بكل بســـاطه ( هذا اذا كانوا في سن مابين الـ3 -6 سنوات ) ، اما اللي في عمر المدارس فاتلاقينهم يقولونها بكل ثقه وهم على درايه انه هالكلام ينرفز من يسمعه ، اما اذا وصلوا لسن الوعي و الادراك لمعاني هالالفاظ.. فهم للاسف في انحطاط اخلاقي.

ذاك اليوم كنا في زياره لوحده من ربع الوالده ، وكانت عندها بنت صغيرونه توها يا دووب اتجمع جمله على بعضها ، قالت كلمه وخلت الموجودين يضحكون - وانا امبهته ما اعرف شو السالفه لاني ما عرف شو معناة اللي قالته - والام تمت تضحك و اتسكتها..!! واحنا رادين في السياره، قلت للوالده شو قالت الصغيرونه.. ؟؟

اليهال يتأثرون كثيرا بمن حولهم ، والمؤسف انه في أسر عادي عندهم يتناقلون هالالفاظ مابينهم ومنها يطلع الياهل يردد هالكلام بكل بساطه. وفي منهم يلقطونه من أي حد.. اصدقاء ، تلفزيون ، او حتى في الاماكن اللي يتجمع فيها عدد من الاطفال. وفي اسر تنهر عيالهم من هالالفاظ لكن مب بصوره جديه ! وفي منهم من يعلم الصغاريه و خاصه من هم توهم يتعلمون الكلام في لفظ بعض المفردات على سبيل الضحك !

ولو بعدنا شوي عن الصغاريه ، ويينا حق الكبار اللي هم على ادراك ووعي بحسن الكلام وسيئه ، واللي يصرون على استهلاك هالانواع الرديئه من المفردات في حياتهم.. حقيقه نشعر بالاسى عليهم و على من حولهم. واللي تناسوا قول الرسول او بما معناه ( قل خيرًا أو اصمت ) . وفي الفتره الاخيره لاحظت انتشار كلام يخجل منه المرء ينطقه هالفئه من الشباب بكل سلاسه ويعتبر انه جريء وما جرئته الا وقاحه وقلة أدب.

ولكــن-في المقابل - في أسر أحسنت تربية أبنائها على طيب الكلام. فما تسمعين من حديثهم الا كل احترام و انتقاء في الكلمات - و ان كانوا صغار السن - وهالابناء وين ما كانوا ولو في اسوأ المجتمعات يبقى لسانهم نظيف ومترفع عن هالالفاظ..

يارب اتخلي عيالنا منهم.. :)