الي دارسي بكليات التقنيه

[الحساس]

:

:


:


:>

[ذنـيـنـي]

اخوي الحساس معلوماتك مش صحيحة

انا ادرس هذا التخصص الي هو E-commerce

و محد جبرني اني احط صورتي او رقم تيلفوني او حتى إيميلي

المطلوب منا هو انه نكتب بعض المعلومات عنا,

مثل الاسم و العمر و مب شرط تكون صحيحة >>> About me

و سبب اختياري لهذا التخصص

و مش شرط تكون المعلومات دقيقة, يعني كفاية اني احط اسمي الاول فقط بدون اسم ابوي او اسم العائلة


و عن الي حاطين صورهم, بروحهم حاطينها بدون ما حد يجبرهم على هالشيء

ثانيا هالشيء موجود في تخصصنا بس, يعني مش في كل الكليات

اتمنى انه تكون الفكرة وضحت

[الحساس]

يجوز شرا ما قلت يا نصور..

بس الشخص الي سالته اليوم يدرس It وخبرني دكتورهم قالهم لازم يحطون..

بالنسبه للمواقع اكثر المواقع من دارسي اختصاصك .. اي كوميرس.. والفيدو الي شفته عن وحده من البنات من وحده من نفس هالتخصص..

وانتوا ادرى بالي يصير بكليتكم... انا نقلتلكم الي شفته اليوم ببعض المواقع ..

[ذنـيـنـي]

اخوي الي يسوون جي هم الي ما يستحون او بالاحرى ما يستحن

لأنه الشباب ما فيها شي لو طلعت صورهم, لكن المشكلة اذا البنت حطت صورها في النت

يعني اغلب شباب كلاسنا حطوا صورهم >>> كل واحد حاط ايده على خده و متصور, ههههه اونهم رومانسيين خخخخخخخخخخخخخخخخ

بس انا ما حطيت صورتي >>> حاط صورة عبسي مال عدنان و لينا بس عسب ما يقولولي انه موقعك ما فيه صور

[الحساس]

الي مستغرب منه منه هو..

- ليش الاصرار ان يحطون صورهن؟؟؟؟ (اقصد من جهة المدرسين)
- واذا كانت بعض التخصصات هب لازم ليش البنت تحط صورها .. لا والادمر هو ان فيديو... وهب اي فيديو .. فيدوا مع اهلهن الجريم وهن يتسوقن!!!

مادري يسون دعايه للبلاد ولا ماادري..
- وحده ماحاطه صورها ولا اسمها ولا شي.. بس نك نيمها ماادري شو كان ( الورده الحمرا او الصفرا شي جي) بس الذكيه نست تمسح اسمها من بروجكتاتها والاسم كامل بعد!!! ياعيني ع الذكاء!!

[خسووفه]

الحساس

مافي أي مدرس يقدر يجبر الطالبه انها تحط صورها و معلوماتها الشخصيه حتى في ال It لأنه التقييم ما يكون على أساس صحة المعلومات يعني هب لازم نحط معلومات صحيحه و نحن درسنا في التقنيه وتخصص أنظمة معلومات و محد جبرنا على هذا الشي

[الحساس]

والله...

مممممم الواقع يقول جي .. بشوف هالي قالي هالخبريه من اي داهيه مظهرنها!!

على اي حال الله يهدي الي عندها موقع بتفاصيلها!

[أمطار]

. . .وعليكم السلام ورحمة الله وبركاته. . .

دكتور الواحات
. . .الحساس. . .


هذا الكلام لا يمكن أن يكون صحيح. . .!
وإذا حصل واجبرهم المدرس أنهم يحطون معلوماتهم الشخصية. . .
فـ المفروض يشتكون عليه . . .!

لأنه وبكل بساطة ((هذا شي مش من متطلبات المادة)). . .
ومجتمعنا يفرض الستر على بناته . . .
وهالشي مب خافي عنهم!!

أنا درست كورس E-Commerce . . .
وكان مطلوب علينا نصمم موقعين للمادة ،، الأول شخصي. . .
والثاني يكون عن شركة أو تجارة نختارها. . .

وبالعكس،، المدرس قالنا بعظمة لسانه. . .
أنتو مش مجبرين تحطون أي شي يدل على شخصيتكم. . .
وإذا تبون،، حطوا nick names لكم. . .

وفوق هذا كله،، كل المواقع اللي سوينا لها Publish كانت ضمن نطاق الـ Intranet الخاص بـ WAN كليات التقنية. . .
يعني اللي يستخدمون الـ Internet العادي مستحيل يوصلون لهالمعلومات. . .
وإذا تبا بحطي لك الـ link حق موقعي الشخصي. . .
وأضمن لك أنه ما راح يفتح. . .


عفوا ً. . .
بس اللي ناشرين غسيلهم ،، أكيد كان بإرادتهم . . .
وما أظنيه وحده تخاف على عمرها وسمعتها بتنشر صورها وكل معلوماتها. . .!

والسموحة. . .
دمعة العين

[الغاليه]

انا مب في الكليه ,,, بس مرت عليه هالتجربة السنه اللي طافت والدكتـــــــــور قالنا لازم اتحطن صوركن داخل الCV .. عشان يكون شغل صح مثل مايقوول..

لين احينــــــــــه مانسيت ,, وهو من احسن الدكاتره اللي مروا عليه.. ويوم قلناله مابنحط صورنا على اساس انه امريكي عربي .. واكيد بيقدر عاداتنا .. قال تحطون صوركم يعني اتحطوون .. ويوم قلتله انا مابحــــــــــط .. قالي بتحطين غصبا عنج وزعل عليه من خااااااااااطره وحسيتبه انجرح لانه حس اني مب واثقه فيه,, وكان دوومه ايي صوبي ويشيك عليه شوو سويت وشوو ماسويت ويمدحني ,, لكن عقب ماقلتله جي ,, ذلني ذل.. شهر تم زعلان ولا يصد صوبي ويشووف شغل كل اللي عدالي ويمر عليه ويسويلي طاف لووول ويوم ارمسه يطالع الصوب الثاني ههههه ,, بس صدق افخاطري كنت اقوول مايسوى على الصورة كل هالانتقام وجان تبا بصفلك عشرصور ولا هالمذله ... لاني صدق كل كلاس عنده تترقرق عينااااي بالدموووع من معاملته ليه وكانت حرب أعصاب,, الين مافرجها الله وعادت الامور الى مجاريها الطبيعيه ورد مثل قبل واحسن.. وحطينا صورنا وسوينالها دليت عقب التسليم ..

يعني االلي اتقوله صح وويعتمد على مزاج الدكتور ..

[الجديدة]

السلام عليكم و رحمة الله و بركاته
الأخ الحساس بغيت أعرف من وين لك هالمعلومات و اللنك اللي خلاك تشوف المواقع الخاصة بالطالبات و الطلاب في الكليات
الشيء الثاني الكلام اللي تتكلم فيه خطأ X خطأ لأننا تعاملنا مع المدرسين و ماأجبرونا على إنا نضع صورنا و أسمائنا في المواقع خاصة طلاب It اللي خصيتهم في الموضوع
و أنا مع الأخت دمعة العين في كل اللي كتبته لأنه صحيح كلامها و هذا اللي يحدث في الكليات بشكل عام.
أرجو التأكد من المعلومات قبل نشرها بهذا الفظاعة.
و السموحة.
الجديدة

[الحساس]

اختيه الجديده..

ممكن اعرف وين الفضاعه ؟؟ شفتيني جرحت حد ولا تهجمت على حد؟؟ اتمنى نقرين الي اكتبه الف مره بعدين لو سمحتي عقبي تمام...

ثاني شي.. انا عندي المواقع في الهيستروي تبغين اطرش لج موقع واحد على الخاص؟؟؟

ثالث شي الي خبرني ان الدكتور اجبرهم ان يحطون صورهم بنت في اخر سنه بتقنيه دبي للبنات.. ان كنتي تعرفين حد في تقنيه البنات واخر سنه ويدرسن It ارجوا انج تراجعينهم عسبب تتاكدين .. والا لاتين تكتبين ان موضوعي فظيع ومادري شو..

يالس احذركم وخوفي على سمعة البنات والاخت يالسه تتهجم!!شايفتني يالس افضح ولا شي.. خبريني ..

والله حاله هالعالم

[الحساس]

هاي الصفحه الرئيسيه من موقع يحتوي على بعض اسماء المواقع لطلاب وطالبات كليات التقنيه بالامارات..
وهم طلاب الي تخرجوا اظن السنه الي طافت او الي قبلها..

وماكتبت اسم الموقع حفاظا على خصوصيه المواقع !!

[العجيبة]

الحساس ابا اشوف شي من هالمواقع ..

[ذنـيـنـي]

يوم المدرس حطلي درجات على الموقع

حط في باله عدة نقاط

اولا
overall look

ثانيا
استخدام script

ثالثا
لازم يكون عندي صفحة عن الـe-commerce و صفحة تتكلم عني بشكل عام

رابعا
يشوف اذا استخدمنا برامج اخرى بالضافة الى دريم وييفر

مثل فلاش, فوتو شوب, و سويتش


حتى في المقابلة ما يسال عن المعلومات الي موجودة

يعني لو ما احط اسمي, بعد ماله حق يقولي شي
او ينقصني درجات

[أمطار]

. . .السلام عليكم. . .

دكتورنا
. . .الحساس. . .

ماله داعي العصبية الزايدة،، وغاليتي الجديدة هدّي أعصابج حبيبتي. . .
الغالية ما كان قصدها تتهجّم عليك سيدي. . .

بس فعلا ً اللي كتبته رفع الضغط حبتين. . .
لأنك جمعت،، وأظنيه معظم اللي عقـّبوا عليك من ضمن طلاب الـ IT ودارسين كورس E-Commerce . . .
ولا حد منهم كان مجبر أنه يحط صورته أو رقم تيلفونه أو حتى إيميله. . .!

وأنا عن نفسي أقدر أثبت لك أنه ولا وحدة من بنات كلاسي حطت صورتها أو رقم تيلفونها أو حتى إيميلها الصجي. . .!
((مع أننا كنا ضامنين أنه محد يقدر يحدرهم من الـ Internet بس لأنه الأولاد في الكليات الثانية يقدرون يشوفون مواقعنا اللي في Intranet كليات التقنية))

ومثل ما ذكر الأخ نصووور في رده ((ما كنا مجبرين نكتب حقائق عن حالنا)) . . .
فما بالك بالصور وأرقام التيلفون والإيميلات. . .!

بس يا دكتورنا بغيت أوضح لك بعض الحقائق واللي يمكن تخفف وتهدّي الوضع شوية. . .
الموقع اللي أنته لقيته خاص بطلاب وطالبات تخصص الـ E-Commerce مش طلاب الـ IT بشكل عام . . .
ومع أننا درسنا كورس E-Commerce إلا أن الموقع مخصص لطلاب التخصص. . .

وعن أنهم يثبتون أنه الموقع من عمل الطلاب/ الطالبات أنفسهم. . .
فـ فيه مليون طريقة يقدرون يتأكدون أنه هالشغل من عمل الطالب نفسه أو أنه مهفوف. . .!
وأرد وأقول،، الأساتذة ما يقدرون يجبرون الطلاب على نشر غسيلهم على الملأ في الـ Internet. . .

وإذا على سالفة الـ CV اللي طرتها الأخت الغالية. . .
ترا فيه Portfolio خاص لكل طالب وطالبة يقدرون يحطون فيه الـ CV وكل معلوماتهم مع شغلهم كله و their Projects also . . .

وها الـ Portfolio محد يقدر يفتحه غير الطالب أو الطالبة نفسها مع الـ Staff والمدرسين الخاصين فيهم فقط. . .!

يعني ماله داعي ينشرون معلوماتهم وبروجكتاتهم في مواقعهم الشخصية. . .
وأنا ما أعرف عن طلاب التخصص وشو المتطلبات من قِبل اساتذتهم ،، بس هذا مش من ضمن أنظمة الكلية وخصوصا ً تخصص الـ IT . . .


هالموقع اللي تتكلم عنه من ضمن مواقع الـ HCT بس ما اعرف صراحة شو الحكمة فيه أنهم يعرضونه على الـ Internet . . .
دام أن باقي مواقع الطلاب على Intranet خاص بكليات التقنية. . .!

دكتورنا وحبايبي البقية. . .
هالموقع تعليمي بحت وخاص بتخصص الـ E-Commerce . . .
وعن أصحاب النفوس الدنيئة،، تراهم يطلعون الفضايح من تحت الأرض. . .

وأنا ويا دكتورنا،،
يعني هالطلاب المتخرجين ع الأقل لازم بعد التخرج يحذفون معلوماتهم الخاصة من هالموقع. . .!
وتسلم يالدكتور على هالموضوع وعلى هالتحذير. . .

شاكرة لك غيرتك على عيال وبنات ديرتك. . .
والله يوفقنا جميعا ً لما يحبه ويرضاه تعالى. . .

والسموحة من الجميع. . .
دمعة العين