مــؤامرة ..

**بريد ألكتروني** · 18-05-05 ||, 05:05 PM

صدقوني عنوان الموضوع دعــايه

.. لا تخــافــون

ساعات يوم اقعد واطالع التلفزيون اخطف على برامج تناقش قضايا معينه وساعات اطالع الاخبار وساعات افر على قنوات الفيديو كليــب ( مب من زود حبي للفيديو كليب . بس عشان اكون مطلع على جديد الساحه الفنيه

.. عذر اقبح من ذنب ) والعموووم ثقافتيه التلفزيونيه عاليه جدا

مره فكــرت بالاشياء اللي اشوفها في التلفزيون .. مثلا الاخبــار .. اذكر يوم توفى محمد الدره العالم كـله انفجر والانتفاضه بلغت الذروه .. لكن مع الايام قمنا نشوف في التلفون اخبار عن موت اكثر عن طــفل ( واستوى الموضوع عادي )

قبـل اذا كــنا نشوف فلــم وطلــع فيه مشهد قبله بين البطل والبطله يستوي ركيض عالتلفزيوون ونوقف جدامه عشان محد يشوف اللقطه

( حركات يهال ) اما الحينه قمنا نشوف ألعن عن هاللقطات وونحس انه شي روتيني في الافلام (واستوى الموضوع عادي )

احيـد اول ما طلــع فيديو كـليب عمر ذياب(حبيبي يا نور العين ) الكل قام يدعي على عمر ذياب ويذمه اما الحينه طلع اللي سوى اخس عن عمر ذياب ( لكن الموضوع استوى عادي )

ستار اكاديمي ذيج السنه الكل انتقد البرنامج لما فيه من اختلاط ولانه فكرة التصوير المباشر غلط اساسا .. هالسنه اشوف جماهير البرنامج زادو من صغار وكبار وشباب وبنات ( واستوى الموضوع عادي )

يا نــاس هل السالفه سالفة تعود وروتين وهذا يعني انه انحن عندنا قدره انه نتعود على كل شي شين وماشالله على هالقدره مسكته عندنا

ولا انه مجتمعنا العربي بشكل عام نزل للحضيض اخلاقيا

اخوكم
e-mail

**العيناويه** · 18-05-05 ||, 05:10 PM

اخويه بريد الكتروني ..
مجتمعنا هب الا توه نزل الى الحضيض هو نازل الى الحضيض ومخلص خلااااااااااااااااص ...
انا من اشد المعارضين لستار اكاديمي ...
بس الحينه هب السالفه الا سالفة ستار اكاديمي وخلصنا ...
حتى الكليبات الحينه الفساد والمنكر عيني عينك ... حد رمس لالالالا
رمسوا الخلق اول مره عن ستار اكاديمي ... واحتشروا ... وظهروا فضايحهم والي يستوي
لكن بعد محد رمس ... يمكن يكون عايبنهم ومستانسيتن عليه ...
اخويه ...
تعودنا على اشياء وايده تستوي جدامنا بس لا حياة لم تنادي ...
لو جتلنا عمارنا ما بيغيرون شي من الي يسوونه ...

والسمووووووووووحه منك
عيناويووو طويلة العمر

**عنود الريف** · 18-05-05 ||, 05:40 PM

مرحبا اخويه بريد الكتروني ..
اول شي العنوان .. انا برايي عنوانك في محله الصحيح ..

انا اقولك ليش ..
في كل شي قلته.. انا اعتقد ان هاي مؤامرة الاعلام الغربي او حتى العربي ضدنا نحن العرب .. حتى نضعف ونوصل للحضيض في كل شي .. في الانسانيه والاخلاقيه والخ...للاسف

هذا برايي ..
انا معاك ايام وفاه محمد الدرة انا كنت صف ثالث اعدادي ..
كان العالم كله محتشر ومتزلزل .. الثورة كانت في قمتها ..
وباقي العرب كانوا مسوين مظاهرات و زوبعه والخ ...
حتى نحن في المدرسه كل يوم الاذاعه تكون عن الثورة .. حتى صفنا سوا يوم خاص نتكلم فيه عن الثورة بس ..

واللي نشوفه في الافلام الحين .. خصوصا الافلام العربيه .. عندك افلام مصريه ولبنانيه .. على كيف كيفك .. ليش محد يودهم .. المشكله في الفن .. واذا سووا الفيلم .. ليش دولتنا ما كانت تمنع او الحين ما تمنع هالسوالف .. او حتى تعرض الفيلم بس تقطع اللقطات المخله بالآداب ..
"بعدين يا اخويه يوم انك تبا تغطي عاللقطه مب حركات يهال .. بالعكس هاي الحركات صحيحه100% صراحه ."

اما عند الفيديو كليبات ... فكلها تغيرت الحين ونادرا ما تلقى فيديو كليب ما فيه رقص او شي عيب ..
^^^^ الا عن اسم المطرب احيده عمرو دياب .. مب عمر ذياب

.. والا هذا بلغتنا الاماراتيه

...^^^^
اما عن ستار اكادمي فانا ما بجذب ... انا كنت اتابعه دووم . من السنه اللي طافت .. لين هالسنه .. بس مب 24 ساعه .. الحمدلله ما عندي هاي القناة.. بس كنت اشوف الحفله والحلقات اليوميه اللي يحطونها في الــ LBC .. اعرف اني اشوف شي ما يفيدني .. بس كانت تعيبني حصصهم .. سواء التمثيل او الرقص او الرياضه .. في اشياء ننتقدها .. اكيد الاختلاط من هالنوع ممنوع.. لان احيانا يختلي اثنين مع بعض ..
بس بعد كنت اشوفه .. اعرف انه غلط بس بعد اتابعه ...
على العموم ..
السمووحه من الجميع على الاطاله ..

**الحساس** · 19-05-05 ||, 03:54 AM

السلام عليكم ورحمة الله..

اذا السالفه مؤامره .. هي مؤامره من زمان .. وها الشي خاصين منه..

الاساليب كثيره!! والياي اكثر..

الانسان يجتهد ويهذب نفسه واهله وااذا كل شخص تعامل بهالاسلوب يمكن يتصلح مابقى من المجتمع..

لكن ولنكن واقعين خط الفساد ينتشر بين الناس اسرع من الخط المستقيم..

وهذا كله راح يكون لين يوم لا يعلمه الا الرحمن ..

علينا بالدعاء بالفرج لكرب هالامه!!

**العجيبة** · 19-05-05 ||, 11:12 AM

في كل مكان بنحصل الزين والشين

الحيـن نحن ننتقد التلفزيون اونه تغير وما تغيـر .. وفيه قنوات وبرامـج مب زينـه

أصـلا قبـل كم سنة قليل اللي عنـدهم النايلسات .. الأغلبية عنـدهم عـربسات بـو 20 قناة

وما شفنا اعتراضات كثر ما شفناها بعـد ما انتشـر النايلسات .. يعني يوم ان الواحد ما يبا يشوف المناكر يرد على العشرين قناة ويريح نفسه .. مع انه المناكر مب في كل القنوات .. في قنوات اكثر من انها مفيدة حتى التعليمية يمكن 7 أو 8 قنوات .. بس محد يلتفت لهن .. الكل التفت لقنوات الفيديو كليب والافلام واللبنانية ! واخر شي العيب ع التلفزيون كله ..

علـى سـالفة محـمـد الدره .. الله يـرحمــه .. موته هـز العالم العربـي والاسلامي ذاك الوقت .. بس الحيـن يمـوتـون وايـد أطفـال وبأساليب أقسى من موت الدره لكـن صـار الوضـع غيـر .. اهتمامات الناس ما صارت مثل ما هي .. المدارس ما صارت تهتم بهالاحداث .. الاهتمام في المؤتمرات والحفلات والمعارض بعيد عن أحداث العالم العربي والاسلامي !

الفيـديـو كليـب .. في عنـدك المخـرجة نهلة الفهـد .. تبدع في اخراج الفيديو كليب وتحافظ قبل كل شي ع العادات والتقاليد .. والدليل واضح في الكليبات اللي أخـرجتهــن .. يعنـي لو كل المخـرجيـن يفكـرون في العيب مثل ما سـوت نهلة بتكون قنوات الفيديو كليب أوكـي ..
إخـوانا العـرب وايـد فاصخيـن الحيــا وهـم اللي ينشـرون الاشياء الفاضحه اللي بدت تنتشر عند بعض الخليجين .. الله يهديهم بس ..

ويبقــى المشـاهـد هـو سيـد نفســه .. يخـتــار ما يـريــد ويُعـرض عما لا يعجبه

وشكـرا أخـوي ايميل ..

**أمواج** · 21-05-05 ||, 01:17 PM

والله انك داهيه يـــــ ــــ ــــــا e-mail

No comonts

**طيب القلب** · 21-05-05 ||, 01:39 PM

e-mail

كنا قبل نخاف من الدش والقنوات الخارجية لكن الحين الله يستر ويحفظنا من بعض قنواتنا المحلية
واتفق وياك اخوي ان كثرة تعود الناس على مشاهد معينة حتى لو كانت مسيئة ومخلة ولكن تكرارها
تصبح مع مرور الوقت شي عادي وللاسف هذا هو الخطر اللي يهددنا كمجتمعات محافظة ..
لك خالص التقدير يا بريد يا الكتروني