<font color='#000000'><span style='color:purple'>وصلوا البيت والكل رقد اما نورة وصلت البيت الساعة 2.30
و الصبح قاموا الساعة 11.30 و تمت نورة اتسولف و تمدح اختها و بنات عمها
و بعدين ساروا ذياب و بو ذياب المسيد اصلون الظهر اما البنات صلوا في البيت....
يوا قوم عمهم يتغدون معاهم و كان احمد موجود في الصالة يتريا ذياب اما الباقين كانوا في الميلس ، وشيخة نازلة بدون شيلة و شعرها مفتوح و كانت صابغتنه يعني حلوة اتبين و اول ما دخلت الصالة جافت احمد ، تم احمد اطالعها و يقول في خاطره ( هذي شيخة بكل هالجمال )استحت شيخة وويها إحمر و ركضت بسرعة برع ...
اتحجبت و دخلت مرة ثانية منزلة راسها وويها أحمر
شيخة : اشحالك احمد ؟
احمد : الحمدلله انت اشحالج ؟
شيخة : دام انك بخير انا بعد بخير
احمد استغرب من شيخة لانها اول مرة اتكلمه بنفس و بطريقة ثانية ، و من عادتها انها ما تعطي احمد ويه لكنها اتغيرت فجأة
شيخة : ليش قاعد بروحك؟
احمد : اتريا ذياب سار فوق و بعده ما رد
شيخة بدلع و نظرات غريبة : تتريا ذياب و لا تترياني ؟
احمد ما رد عليها و لا اهتم إلها ، و دخل ذياب و شيخة سارت الميلس اتسلم على عمها و قعدت معاهم اتسولف ...
( نورة ما كانت موجودة سارت بيت اهلها )
اما سعيد يفكر في حصة يبا يكلم ذياب و يقوله انه يحب اخته لكن اتردد و ما اتصل ... و قاعد يسمع :
و الله لحظة مانسيناك و الله حبك ضايقيني تحلا لي الدنيا بلقياك لي صار كفك في يديني ........
قررت حصة و فاطمة اسيرون المارينا لكن طبعا مع ام فاطمة ..
ساروا المارينا العصر و كان سعيد في المارينا فاتصل حق ذياب علشان إيي عنده .. وصل ذياب و تموا يتمشون و مروا من جدام محل nine west و حصة كانت داخل و عاقة الغشوة عن وييها فجافها سعيد و ما عرف شو يسوي فقال حق ذياب انه يوعان ويبا ياكل في الكوفي اللي يقابل هالمحل ..
طلب سعيد شيء ياكله و ذياب طلب كابشينو ...
كان سعيد قاعد بطريقة غريبة ، كان يجوف المحل اللي حصة فيه و يجوف ذياب بنفس الوقت و ما خلا ذياب يحس انه يطالع حد
ذياب : سعيد شلي شله
سعيد : شو جايفني جدامك شاعر و لا عيضة ؟
ذياب : و الله عيضة احسن عنك ... يالله شل خلنا نسمع صوتك
سعيد : احم احم شو تبا تسمع من برنامج ما يطلبه المشاهدون ؟ هاهاهاهاها
ذياب : يالله عاد جان بتشل شل و إلا اسكت
طلعت حصة من المحل و طبعا متغشية لكن سعيد عرفها و مرت من جدام الكوفي و سمعت حد يشل يوم لفت إلا سعيد و ذياب و انصدمت لان صوته كان رهيب يجنن ، طول ما هي ما شياعينها على سعيد ، اما ذياب فكان سرحان و ما انتبه حق حصة و فاطمة و مرت عمهم
وكان سعيد يشل : مالوم عيني تسهر عليك و احلمك في غمضت عيوني طبعك حلو ميت انا فيك واللي شراتك من يكوني.........
ذياب : سلمت..صوتك وايد حلو
سعيد : تسلم ..
حصة ماتحب سعيد لكنها تمت اتفكر فيه .. و اتقول في نفسها "مستحيل احب سعيد مستحيل ماحب حد غير احمد "
حصة ما تقدر تنسى احمد اللي طول الوقت في بالها ( احمد شخصيته وايد حلوه و هو من بونه وسيم و طويل و عيونه تذوب الواحد لكنه عمره ما فكر يحب بنت و لا مرة فكر يغازل بنت )
واليوم الثاني الصبح حصة و ذياب مع بعض في الصالة
حصة : شو ذياب ما بنسافر السنة ؟
ذياب : و الله ما دري .. بسال ابوي اليوم
حصة : تدري ذياب خاطرية اسافر العالم كله
دخل بو ذياب و نورة ويلسوا وياهم
ذياب : ابوي ما بنسافر هالاجازة ؟
بوذياب : و الله انا كنت مخطط انسافر مصر
حصة : الله مصر ، يعني بنسافر
ذياب : هي بتسافرون ....، وانت يا نورة شو رايج بتسيرين مصر ؟
نورة : و الله عادي عندي بسير ، و هذي مصر الكل يمدحها
بوذياب : و متى تبون اقص التذاكر
نورة : الاسبوع الياي عسب نتجهز
بوذياب : ها حصة الاسبوع الياي زين؟
حصة : هي زين
( واتدور خطة في بال نورة ما تبا حصة اتسافر وياهم و تبا اتخرب عليهم السفرة )
يوم الاحد قرر بوذياب يسير يقطع تذاكر بس ما قال حق حد ... و نورة على بالها بسير يوم السبت .. المهم مرت الايام وهذا يوم الجمعة و نورة تبا أي فرصة علشان اتنفذ خطتها ، و اختارت وقت المغرب لان محد يكون في البيت غير حصة و شيخة ونورة
و المغرب نورة يالسة في الصالة و هي اتجوف تيلفزيون قطع عليها صوت التيلفون فردت عليه و كانت فاطمة متصلة تبا اتكلم حصة
نورة : ها فطوم اترييني بسير ازقر حصة
فاطمة : ok
سارت نورة عند السلم : حصة ......... حصة حبيبتي تعالي بسرعة تيلفون .. يالله تعالي فطيم تباج ضروري..
سمعت حصة خالتها تزقرها فنزلت بسرعة تركض و فجأة وهيه تركض اتزحلقت ريلها و طاحت على ايدها و ظهرها....... وطبعا حصة الحين متألمه و ما تقدر تقوم ..
نورة : حصة فديتج شو صارلج ..؟؟
ودخل ذياب البيت فجاف حصة طايحة و ركض عندها و شلها و قعدها على الكرسي
نورة ما تعرف شو اتسوي فراحت و قالت حق فاطمة ان حصة مشغولة
ذياب: نورة شو صار حق حصة وكيف طاحت ؟
نورة : ما دري حصة الله يهديها كانت تركض على السلم فطاحت
لمح ذياب ان على السلم زيت فقال : و هذا الزيت منو حاطنه على السلم ؟
( كانت نورة هيه اللي حاطة الزيت حق حصة )
نورة : مادري مش انا ، انا توني اجوفا
ذياب : شو ، الزيت مايي هني إلا بسبب ( ذياب ما يحب نورة يكرها )
نورة : اسمع ذياب قلتلك انا ما حطيت شيء تفهم و لا لا ، يمكن الخدامة
حصة : ذياب ما اقدر احرك ايدي
ذياب : ما تقدرين .. حاولي مرة ثانية
حصة : ما اقدر اتعورني وايد
راح ذياب فوق و ياب شيلة وعباة حصة و لبستهم وو داها المستشفى
واتصل ذياب حق ابوه و قاله شو استوى ،
و في المستشفى جبسوا ايد حصة لانها مكسورة و رجعوا البيت
و يوم دخلت حصة البيت حصلت ابوها ، لوى عليها بالقوة و عطاها باقة ورد
بوذياب : سلامات حصة و ما جوفين شر
حصة : الله يسلمك و الشر ما ييك ابوي
نورة : سلامات حبيبتي
حصة : الله يسلمج
سارت حصة حجرتها و هيه داخله جافت شيخة
شيخة : هلا ، شو فيها ايدج ؟ ( اونها ما تعرف )
حصة : ماشي انكسرت
شيخة : محد قالج تركضين على السلم
دخلت حصة حجرتها و هيه تفكر و تقول ليش شيخة جذي تعاملني ما جني اختها ، ليش تكرهني انا شو سويت و تمت اتصيح
و دخل ذياب عليها بعد ما دق الباب
ذياب جاف حصة تصيح راح و قعد عدالها
ذياب : حصوه حبيبتي ليش اتصيحين ؟
حصة : مافيني شيء
ذياب ك حصوه انا اعرف ليش اتصيحين ، علشان شيخة صح ؟
حصة : كيف عرفت ؟
ذياب : سمعت كل شيء
حصة :...............
ذياب : حصوه ما عليج منها هذا كلا من نورة هيه خلتها جذي ، حصوه انا معاج لا تفكرين اني بستغنى عنج في يوم مثل ما سوت شيخة لا يا حصة انا احبج ، ولا تمين اتصيحين انا عندج اذا كنت تبين شيء تعالي حجرتي و صدقيني ما بردج ، و اذا كان شي في خاطرج قولي علشان ترتاحين ... المهم انت ارقدي الساعة الحين 12 و انا بعد بسير ارقد
حصة ارتاحت من كلام ذياب
اما نورة من الصوب الثاني مع بو ذياب في الحجرة
نورة : ها غانم حبيبي متى بنسافر ؟
بوذياب : ما بنسافر من دون حصة
نورة : ليش يعني خلنا انسافر و حصة بعدين تيي مع ذياب
بوذياب : لا يا نورة انا اتهمني صحة حصة و هب مسافر لين ما يفتحون الجبس عن ايدها يعني بعد شهر
نورة : نتريا شهر كامل ، يعني نهاية شهر سبعة بنسافر
بو ذياب : هي
نورة عصبت وايد
و اليوم الثاني يت فاطمة و احمد عسب يسلمون على حصة و يطمنون عليها
فاطمة : سلامات غناتي
حصة : الله يسلمج
احمد : ما تجوفين شر حصة
حصة مستحية و منزله راسها : الشر ما ييك
نزلت شيخة و لقت احمد و فاطمة و سلمت على فاطمة و سارت صوب احمد
شيخة ( مسويه عمرها مستحية ) : هلا احمد
احمد : اهلين
شيخة : اشحالك ؟
احمد : بخير الحمدلله انت اشحالج ؟
شيخة : والله انا تمام ...إلا اقول ما بتسافرون السنة ؟
احمد : لا انا عندي دورة في فرنسا و لازم اسير و ترى هذي اول مرة و ما بفوتها ....
شيخة : اها .. نحن بنسافر مصر
احمد : ان شاء الله تستانسين
شيخة : ان شاء الله
لاحظت حصة تصرف شيخة و انصدمت لان اول مرة اجوف شيخة اتكلم احمد
حس احمد ان شيء يجذبه لشيخة و حس انه يرتاح إلها و يوم يجوفها يستانس .......... سبحان مغير الاحوال
و مرت الايام و كثرت الزيارات لبيت بو ذياب و كثرت السوالف من بين احمد و شيخة و قامت شيخة تروح بيت عمها بس علشان احمد..
و قرب موعد سفر احمد
مرت شيخة من جدام حجرة حصة و كان الباب مفتوح فسمعت حصة تتكلم في التيلفون ، دخلت عليها
شيخة : حصوه وين الابتوب مالج ؟
حصة : لحظة اشوي فاطمة ، ها شو تبين شيخة ؟
شيخة : حشا انت ما تشبعين من فاطمة؟ المهم الابتوب مالج وينه ؟ يالله بسرعة هب فاضتلج
حصة : في الكبت خذيه
شيخة : نعم اخر زمن انا خدامتج قومي هاتيه
حصة : بس انا اتكلم في التيلفون الحين
شيخة : جب بسرعة قومي هاتيه و بعدين جنه مكالماتج مهمة الحين مالت ...
عطت حصة الابتوب حق شيخة و كانت متضايقة وايد من تصرفها
حصة : هلا فاطمة ، سوري اذا تاخرت عليج
فاطمة: لا غناتي ما عليه ،( حست فطمة ان حصة متضايقة ) المهم انا بخليج الحين
حصة : اوكي باي
واليوم الثلاثاء بسافر احمد ، و قبل ما يسافر راح بيت عمه علشان يسلم عليهم
دخل احمد الصالة و كانت حصة اطالع تيلفزيون
احمد : هلا بالزين هلا ( احمد اتغير و صار كل ما يجوف بنت تعجبة يغازلها ، احمد صار شخص ثاني )
حصة مستغربة من تصرف احمد : اهلين
احمد : اشحالج بنت عمي حصوه ؟
حصة : الحمدلله بخير انت اشحالك ؟
احمد : تمام ,,,,,,,,,,,
احمد : عيل وين الاهل ؟
حصة : الحين بسير ازقر ابوي وذياب ......... سارت حصة فوق علشان تزقرهم يسلمون على لحمد و اول ما عرفت شيخة ان احمد تحت نزلت على طول من دون ما تغير ملابسها ، كانت لابسة قميص نوم ايده قصيره
دخلت شيخة الصالة : هلا احمد اشحالك ؟
احمد: الحمدلله و انت اشحال الحلوين ؟
شيخة : دامك بخير انا باحسن حال
احمد : انا اليوم بسافر الساعة 11 الفليل
شيخة : احمد انا بتوله عليك وايد لا تتأخر عليه
احمد : و انا بعد بتوله عليج يا حبيبتي
شيخة : صدق
و دخل ذياب و بو ذياب الصالة و سلموا على احمد
بوذياب : ها شيخوه وين عيل نورة ؟
شيخة : ما دري في حجرتها اظن مشغولة
بوذياب : انزين سيري قولي حق الخدامة اتسوي عصير
شيخة : ان شاء الله ابوي
و سارت شيخة اتقول حق الخدامة
و بعد ربع نصف ساعة طلع احمد من عندهم و سار البيت يقعد من اهله
اما سعيد يتصل على ذياب لكن محد يرد عليه فقرر انه يتصل على البيت لانه يبا ذياب ضروري
رن تيلفون البيت و ردت شيخة على التيلفون
شيخة : مرحبا
سعيد : مرحبتين ، ذياب موجود
شيخة : و منو يباه ؟
سعيد : سعيد
شيخة : سعيد ذياب مشغول الحين
سعيد : بس انا اباه ضروري
شيخة : انزين انت تعراف رقم مبايله اتصل فيه و فكني من حشرتك
و هني ذياب دخل الصالة و سمع شيخة تتكلم في التيلفون مع واحد ، شيخة يوم جافت ذياب سكرت التيلفون في ويه سعيد
ذياب : منو متصل ؟
شيخة : مادري واحد مغلط
سار ذياب صوب التيلفون وجاف الكاشف و حصل رقم سعيد و إلتفت صوب مها
ذياب : شو الكلام اللي قلتيه حق الولد ؟
شيخة : ماقلت شيء انزين
ذياب : عن الجذب انا سمعت كل شيء انزين ، و من الغيض عطى شيخة كف على ويها وشيخة راحت حجرتها بسرعة و هيه تصيح
دخلت نورة الصالة و جافت ذياب
نورة : شو اللي صار؟
ذياب : اسالي شيخة و جوفي جان بتقولج
نورة : شيخة ما تسوي شيء غلط انزين
قال ذياب حق نورة اللي صار و نورة ما اهتمت
ان شاء الله يعجبكم و اسمحولي على التقصير
و ترى الاحداث الياية فنانة و ان شاء تعجبكم</span></font>
رد مع اقتباس
مواقع النشر (المفضلة)