العلاقة بين اسمك المستعار واسمك الحقيقي

[خسووفه]

خسووفه = هب غاويه

[الحساس]

حبيت اعقب على الموضوع بعد ماقريت ردود الاعضاء..

ماادري اذا كان هذا الموضوع مكرر اصلا او لا .. بس هب هذا المهم المهم هو... اسمعوا عاد المهم خلوكم منتبهين .. الي هب منتبه يسير يغسل ويه وايي.. ها غسلتوا خلاص ياهزين.. نبدا احين.. يالله ... لحظه... بسير بييب لي كوفي وبرد برب................ بااااك رديت .. الموهيييييييييم (على قولة ام خدود) انزين انا الحين نسيت السالفه الي بغيت اقولها اوهوووو شو شو شو .. هي تذكرت...

احب اشكر صاحب الموضوع الي فتح المجال للجميع بموضوعه هذا .. لاني تلمست (انتبهوا على الكلمه وايد فعاله والنتيجه فتاكه) تلمست ان كل من كتب وعلق علق من باطن (باطن من الداخل هب الباطن الي بعمان) قلبه .. اول مره احس من بدايه افتتاح الواحات اليديده ان الاعضاء ترد من قلبها هب بتصنع او غيره.. او يمكن لان الاعضاء كتبوا عن حقيقتهم وها الشي تفتقده باقي المواضيع الي فقط فيها ردود يمكن ويمكن لا ان تكون معبره عن ذات الانسان نفسه...

بعد في قلبي هذربه زايده بس انتوا لو تعطوني فرصه جان ظهرتها لكم كلها .. واتريا موافقتكم P:

[عفاريتووو]

السلام عليكم

عن نيك نيمي

امم ما كان فبالي اي نيك نيم يوم كنت ابا اشارك

وربيعتي اللي تسميني عفاريتووو كانت اون لاين

عاد ليش تسميني عفاريتووو مادري انا مب لهل درجة عفريته

قالتلي اشارك ب عفاريتووو

وشاركت فيه

وبس

[الدلووووعة]

انا عن نفسي
كنت انا واختيه يالسين كنت
اقوللها اني ابا اشترك في منتدى واحات بن دبي
وها اول منتدى اشترك فيه جان اقولها ابا نك اشارك فيه قالتلي
كذا نك من الالقاب اللي يزقروني اياها في البيت بس ماطعت
جان اقولها بشترك بنك الدلوعة اول شي بلا شك تمصخرت عليه
لنه ها النك هم راكب عليه مول بس انا عاندت فيها واشتركت فيه
وبس

والسموحة

[المزيوونه]

مشكوور اخوي ع الموضوع ..


ممم انا اصلا كنت مشاركه بنك ثاني .. وغيرته للمزيوونه عقب فتره بسيطه .. ماعرف ليش للمزيونه ..
انا احس المزيوونه لوحده هاااديه يعني هو ما يعبر عن شخصيتي كثر ما كانت ردودي تعبر ..
غيرته لنك نيم ثاني بس الجماعه اقترحوا عليه ارده للمزيونه << ركب عليه شكله هيهيهي ..
وهذي كل الحكاايه ..

الله حيه

[أحلى شي]

بسم الله الرحمن الرحيم

في البداية
حبيت اشكر كل المتواجدين معاي في الموضوع..

وأقدم اعتذاري للكل عن سبب التاخر في الرد على الموضوع..

يعني كان لازم اكون انا اول وحدة تذكر سبب تسميتها بهذا الاسم..

لني صاحبة الموضوع..يعني لازم ابدا بنفسي..
لكن الضروف حالت دون ذلك..

(ولد الحكومة)..
يشرفني ان يكون اول المشاركين معي..مرافق اداري..
شكرا على المرور..

( االحساس)..
هذا زمن ماتت فيه المشاعر والاحاسيس عند اغلب البشر..
فمن الرائع ان تمتلك صفة الحس..
وترى الموضوع موضوعك خذ راحتك فيه..
واعجبني رد الثاني..
لأن صدق المشاعر والاحاسيس هو ما نحتاجه في هذه الواحات..

( الجنية)..
من ردودج يبن انج وحده جنية..

(المتفيزره عالعرقوب)..
جدا غريب..
والأغرب من ذلك..
اني كنت فترة طويله اقراها..
المتفيزرة عالقروب!!!

( بنت الساحل)..
اسمج يعبر عن وطنيتج..
يعني اكيد يخصه في شخصيتج..

(لبن مثلج)..
اسم يمتاز بالطفولة المشردة..
يعني تذكرت طفولتي ..
شكرا على المرور..
.
.
.
.
*** للحديث بقية***

[أحلى شي]

مرحبا من جديد..
.
.
.

(إنسان عادي)..
ردك يدل على انك متواضع في حياتك..
ومن تواضع لله رفعه..
اتوقع اسمك المستعار ينطبق على شخصيتك..

( أم خدود)..
شكرا على الصراحة..
واسعدني تواجدك..

(شمعة الجلاس)..
شكرا على التواجد..
ونورتي الموضوع بنورج يالشمعة..

(عنود الريف)..
شكرا عزيزتي على التواجد..

(دلوعة دبي)..
لكل شخص من اسمه نصيب..
يعني يمكن اخترتي هالاسم لنج في الواقع يمكن تكونين دلوعة!!

(الغالية)..
شكرا على المرور..

(سيدة الحب)..
شكرا على المرور..

(خسوفة)..
بصراحة..احترت كيف ارد على مشاركتج..
بس ما اعتقد ان اسمج ينطبق على شخصيتج..
شكرا على المشاركة..

(عفاريتوووو)..
شكرا على المرور..

(الدلوووعة)..
شكرا على المرور..
بس لفت انتباهي توقيعج...
توقعتج شرجاوية..
لن اصحاب السعادة هم الشرجاوييين..

( المزيوونه)..
شكرا على المشاركة..


وشكرا للجميع..

[أحلى شي]

أوه ..:crosseyed
نسيت اكتب عن نفسي..

أما انا فأشعر أن اسمي المستعار بلا معنى!!

وأحيانا أفكر اني اغيره..

بس اتراجع ما اعرف ليش..

في البداية ما كنت مختاره هالاسم..
بس الي اتذكره اني كل ما اسجل اشتراكي بأسم معين
يكون في حد مشارك بنفس الاسم فيرفض الكمبيوتر تسجيلي..
اتذكر اني كنت مختاره اسم( أعماق السكون)..
بس ما صار!!
وبعد اكثر من محاولة..
لاعت جبدي..
وقلت بكتب احلى شي..
بس ان اسمي المستعار ماله معنى ..
هذا اكيد ماله علاقة بشخصيتي..
وردودي في المواضيع اتوقع انها تعكس شخصيتي..
والدليل..
مشاركاتي القليلة في المنتدى..
وذلك الانني عندما اشعر ااني غير قادرة على
ترك بصمة لها اثر من خلال ردي على اي موضوع فإنني لا اشارك..
حتى لو كان الموضوع جميل!!

اتمنى انكم فهمتوا قصدي...

والسموحة على الإطالة؟؟

[ذنـيـنـي]

نيك نيمي ما يباله شي

عبارة عن اسمي مع شوية تعديلات


الله يسلمكم النيك نيم هذا مب انا الي حطيته

اخوي هو الي اختاره لي
بتقولون ليش اختار اسم نصووور

انا بقولكم ليش
لأني يوم ييت بسجل عصرت مخي عسب اطلع نيك نيم

ما طلع وياي شي, و خاصة انه لازم يكون النيك نيم بالعربي

المهم اخوي قال انا بختارلك اسم

قلتله اوكيه

قالي بس لا تقول ما ابغيه

قلت مب مشكلة
قالي اكيد

قلتله اكيد

قال ما بتحرج عليي >>> اخوي الصغير

قال غمض عينك و انا بكتب النيك نيم

و هذا الي طلع وياه ((( نصووور )))

مرات اقول شو هالنيك نيم البايخ بغيره او بسوي اشتراك يديد

و ما ادري ليش في اخر لحظة اغير رايي
يمكن لأني صرت معروف في الواحات بهذا النيك نيم




تحياتي

[الدلووووعة]

(الدلوووعة)..
شكرا على المرور..
بس لفت انتباهي توقيعج...
توقعتج شرجاوية..
لن اصحاب السعادة هم الشرجاوييين

كيف الشرجاوية هم اصحاب السعادة
مافهمت شو قصدج بس اذا قصدج انه اللقب اصحاب السعادة مال الشارجة
لا ها لقب الوحدة والشارجة لقبهم الملك
واذا قصدج اني من الشارجة فقولج لا هب من الشارجة( بس ببلادي الثانية عقب بوظبي الشارجة )
والسموحة