فيصــل الزعابــــي

[الجنيه]

الصراحه الي يتصرف هالتصرف هو اللي نستحي منه ونعده فاضحنا بين الناس

قبل كل شي بني آدم نساي و جل من لا يسهو يعني مب عيب الواحد يخطأ ونحن من نكون عشان نحكم عليه من غلطه ؟؟!!!!
كل واحد لازم يسأل نفسه هالسؤال واذا لقى له جواب ساعتها يحق له يحاسب او يعلق على هالانسان ....

كلام الحق ما ينزعل منه لو تتلفتون حواليكم بتلاقون مئات الألوف من الشباب ( طبعا أقصد البنات والأولاد معا) ما يعرفون شي عن التاريخ غير اللي حفظوه أيام الدراسه وأول ما تخرجوا نسوا اللي درسوه خير شر ....
يمكن هو أخطأ بجواب لكن في غيره يخطون بالألوف ومحد يحاسبهم ....

الله يعينه ويسهل أموره ويهدي الجاهلين ....

حبوبه شكراً لطرحج الموضوع الصراحه استغربت أنه بعده في ناس تافهه وتفكيرها سطحي لدرجه أنهم يعيدون سالفه اعتبر أتى عليها الدهر وشرب

الله المستعان

[عاشقة دبي]

اهلاوية لابد .. تسلمييين عالمرور ..
والجنية .. العفو اختي .. وتسلمين على الكلام العجيب الي صدر منج .. والله صدقج في ناااس ما تعارف شي عن التاريخ غير اللي حفظوه أيام الدراسه وأول ما تخرجوا نسوا اللي درسوه .. وهذا الرئيس بوش يوم سألوه منوه هو الرئيس الهندي الحال ما عرف الجواب .. والله ما عرف .. بس الناس صخت وما ماقلت شي .. يعني ييتوا على هالمسكين الي غلط غلطه .. وحليله ستوى لبان في حلوج الناس .. الله يوفقه ياااااارب

[طيب القلب]

الله يشفيه ويعافيه ويوفجه في حياته ويرد مثل قبل واحسن علشان يفيد نفسه
واهله ومجتمعه وبلاده قولوا آمين ..ومشكورة يا عاشقة دبي على طرحج الموضوع

[عاشقة دبي]

اميييين اخوي طيب القلب .. وتسلم عالمشاركه الطيبه مثل قلبك الطيب

[عاشق الخيل]

في ناس متخلفه وين وصلوا الاخ فيصل الزعابي بنكتهم وضحكهم ماقدرت ضروفهم هذه مشكلة العرب يشوفون عيوب غيرهم.

[نبراس الليل]

شكرا على هذا الموضوع
..

الله يعينه ..ان الله مع الصابرين وان شاءالله الله بيعوضه بناس يقدرونه ويحترمونه
الله يوفقه في حياته واخرته ..
ليس باليد حيله الا الدعاء له

[الحساس]

انا مااسبه ولا حطيت عليه..

بس هب مقتنع بالقصه مول..

والشي الي صج يضحك..

انه يبا يختبر ذاكرته في من يربح المليون!! ههههههههه حلوة.. خلصت الطرق وراح لها الطريق لاختبار الذاكره يبين انه دكتور نفساني ويعرف يقيم عمره ..

انا لو اشوفه مااظن بحترمه... على جاسني منه وانا بغربتي من الخليجين ...

ودمتم..

[الجنيه]

السلام عليكم ورحمه الله وبركاته

اسمحولي عالمداخله هالمره

الحساس ... أنا ما بجذب عليك وبقول أني من البدايه ما ضحكت عليه
بس فتره بسيطه وقبل لا أعرف أي شي عن ظروف هلانسان ... بس صدقني
من عرفت قصته سواء اقتنعت بها ولا لا ما أحب أستهزء به أو أشوف حد يقلل
من احترامه .. اذا رب العالمين يغفر للي يخطأ خطاه من يكون بني آدم عشان
يحاسب ويعاقب انسان على غلطه مثل هاي ....!!!!!

ما يهم كيف هالانسان فكر يخبتر قدراته العقليه أو ذاكرته المهم نحن كبشر نتغاضى عن هلاشياء .. يعني نحن شو مستفيدين من التغشمر عليه ؟؟؟؟
هل باعتقادك بالتشهير به ونشر النكات أنكون غيرنا شي ؟؟؟؟

لا
وقبل كل شي حط نفسك بمكانه وجرب أتحس بشعوره صدقني
ما بتتحمل وزين منه الله هداه وسلك هالطريج...
الله يوفقه ويفج ضيقته


اختلاف الرأي لا يفسد للود قضيه ....

والسموحه

[الحساس]

اختي..

تعرفين لي انا كتبت كلامي الي فوق؟؟؟

على عذا المبدا انا امشي..

الله ثم الوطن ثم القائد...

هو اذا اساء لعمره انا مايهمني ولا بستفيد بشي..

لكن يوم حدر من يربح المليون كانت الناس ماتشوفه على اساس فيصل.. تشوفه على اساس اماراتي... يعني يوم حدر المسابقه كان يعرف ان الناس بيقولون هذا الاماراتي هب هذا فيصل..

انا مااقبل اي شخص ينزل من مستوى او يسئ لسمعتها..

اليوم قدمت امتحان.. سالني الدكتور انت من وين؟ قتله من الامارات من دبي.. قالي اووو انت معروفين ومشهورين بالتطور..

شوفي كيف الفكره الحلوه الي ماخذينها عنا..

كيف ارضى شخص اييي بسبب شي في باله هو الشخصي ويسئ لسمعت بلادي..

انتوا ماعشتوا بالغربه وانشاءالله ماتيربونها..
بس الي صار عنها الكل قام يحط على الاماراتين (من عرب او خليجين) يوم سمعوا بالسالفه ويلسوا يتمصخرون (وماراح اقول شو كانوا يقولون ) بس الاهم ان هم ماسو ولا قاول جي الا بعد ماشافوا شي هب طبيعي يطلع من انسان اماراتي

مب عيب الواحد يغلط ..

العيب ان مانعترف بالغلط..

والعيب بعد ان الواحد يغلط بشي تاااافه ... للعالم كله.. هب لي انا والا غيري بس

اذا هو جاوب جواب واحد غلط (من الاشاياء الي الواحد مالازم يغلطها) بقول مشيها.. بس هو بين للعالم بتكرار اخفاقه في طريقه الاجابات بعده اسئله ,, فالناس ماتتريا بس الاجابه يشوفون تصرف الانسان بعد!!

انا ماراح احط نفسي مكانه والله لا يجيرني بهالشي..

تسلمين يالجنيه لمناقشاتج الحلوة .. :)

[الحساس]

نسيت اقول شي...

انا هب مع التقشمر عليه او سبه .. لان منو ماكان مايستاهل حتى لو عدوا .. وهب من شيم الاسلام السب...

وماكتبته فوق عباره عن رائي.. تحت ضغط القهر الي جاسني بسبب حمله رايه اسم بلادي في المسابقه .. كانه يمثلني ..
ولا ارضاها لا منه ولا من غيره من الي ينزلون من سمعت الامارات..

ودمتم

[بنت الساحل]

الله يوفقه ان شاء الله في حياته ..

ويعافيه من علته ..

[عاشق الخيل]

الحساس بختصر كلامي وبقولك لاتخلي الناس يضحكون على كلامك.

وأحب أقولك كلمتين ما اعتقد انه يسيء للدوله ولا لشعبها.

كلام الاخ الحساس:
بس الي صار عنها الكل قام يحط على الاماراتين (من عرب او خليجين) يوم سمعوا بالسالفه ويلسوا يتمصخرون (وماراح اقول شو كانوا يقولون ) بس الاهم ان هم ماسو ولا قاول جي الا بعد ماشافوا شي هب طبيعي يطلع من انسان اماراتي.
قبل كنا نقول (( شو علينا من الناس وشو على الناس منا))

فيصل ليس بنبي لكي لايخطاومثل ماقلت الخط ليس عيب
(( ولاكن العيب ان تشوف الخطا وماتصلحه))


أخواني من تواضع لله فالله يرفعه درجه خلوا عنكم التكبر والاستهزاء على خلق الله .
وأسأل الله الهدايه للجميع وخاصة اهل الخليج والعرب في الدول الاخره الي تسخر من فيصل

[الحساس]

عاشق الخيل...

اضحك الناس بكلامي.. على الاقل رسمت الابتسامه عليهم.. ما نكدت عيشتهم بتصرفات غير مسؤوله!!
بس هب هذا المهم..

بس يا خوي اختصارك مايسدني..
ناقشني وقولي الي بقلبك ... هذا الي راح ينورني هب الاختصارت..

[الغاليه]

دوومني اتحاشى القصص اللي يطلعونها على هالريال .. واي شي عنه .. وااايد اتأثرت ابقصته

ماقوول اني ماضحكت عليه .. بس احيد يوم ضحكت كان قلبي يعورني عليه

امبين عالريال يوووم كان ايجاوب انه شاارد او شي فيه مب طبيعي ..

والقصه اللي طرحتوها سمعت عنها والكل كان يرمس عنها عقب البرنامج ابفتره ..

كلام اوجهه للحساس ..

منوو ماتهمه مصلحة ابلاده يالحساس ؟ ! .. وشي فرق بين اللي يشوه سمعة ابلاده بقصد

وبين اللي يشوها من غير قصد .. الزعابي اكيييد انه مايلسووه عكرسي المليوون الا عقب

ماكان احسن المرشحين اللي كانوا معاه .. واكيد بعد انه جاوب على سؤال السرعه .. يعني له ايجابيات

فليش كل هالتحامل والضحك على انسان مانعرف شوو اللي استواله بالضبط ..

وبعد اضني يالحساس لو كنت عليه مدير .. بتسوي نفس ماسووله .. بتظهره من الشغل .. لانك قلت مابتحترمه ...

بدال ماتسانده وتخفف عليه .. اتكوون انت مثل اللي ضحكوا عليه ابقسوة ..

احترامك لبلادك واهتمامك ابسمعتها بتخليك توقف ويا ولد ابلادك حتى لو الكل استهزئبه ..

بتخليه يوقف على ريوله جدام العالم من اول ويديد وبتساعده يبني ثقته ابنفسه بعد من اول ويديد..

الزعابي غلط وزل .. وله ظروفه اللي تعذره ..
والله يكون في عونه وين ماكان ..
ومب راعي المليوون ولا شلته هم اللي بيقيموون الشعووب الناس ...

[الحساس]

في البدايه اشكرج يالغاليه على النقاش الطيب..

كوني مااحترم انسان هب معناته اني اظلمه.. هب من طبعي اظلم الناس.. وبالتالي ان كنت مدير مثل ماتفضلتي ماراح اروغه (رغم اني ماسمعت بها الشي الا منج) ,,

ماعرف ليش شبهتيني كالناس الي ضحكت عليه .. هل تفكيرج ان الي مايصدق قصته يعتبر من الي ضحك عليه واستهزاء به..

بكل بساطه.. هذا الانسان بسببه رمست الناس وهاجت على ((الانسان الاماراتي )) هب على فيصل .. وبالتالي كوني اماراتي فانا مقصود من هالرمسه من الناس.. وان كان في استهزاء من قبل الناس عليه والي بنظهر العالم (الاماراتي) فكانهم استهزؤا فيني..

على فكره.. ماقد سالتي نفسج ليش مديره ظهره من الشغل... ادري بسبب السالفه بس اقصد تحت تاثير منو؟؟ هل من السلطات العليا ولا لا؟؟ هب هاي السلطه نفسها سلطه اماراتيه !! يعني ناس ذو مسؤوليه ويعرفون الاثر الي سببه فيصل وبالتالي تحت ضغط معين فصلوه (( هذا ان كان فصلوه على رمستج))

انا انسان واقعي اعيش حياتي بلحظتها .. ان شفت انسان امارتي رفع اسم بلادي مااتهايز اني اسانده وادعمه بالي اروم عليه.. ان كان شخص مريض احاول اخفف عنه (للعلم انا هب مقتنع بمرض فيصل كما ذكر.. لانها حجه اطلقوها تلقائيا لتبرير الي صار.. هاي وجهه نظري .. وهالسالفه مابصدقها الا ان شفت فيصل بعيوني ورمسته ).. وان كان شخص اساء للبلاد.. ونادر ماشفت احد بهالوضع فمااظن راح يكون له عندي اي احترام او اهتمام..


وبس...

ودمتم