اموووره .... هلابج اختي واشكرج على اهتمامج وقراءتج للموضوع .. وانا امنيتي انه كل واحد يقرا الموضوع ياخذ منه الشي المفيد ويحاول ينشره .. لانه نحن في النهايه خوان وهل بلاد وحده والمصلحه مصلحت الكل ومحد له غناه عن الثاني ويامرحبابج مره ثانيه



فتاه جامعيه .... اشكرج يالمثقفه عاد انتي جامعيه لازم تتحفينا بآراءج ومقترحاتج الطيبه .. واتمنى من الاداره انهم ياخذون برايج والي اتمناه اكثر انه ما يتكرر هالموضوع لاي بنت في هالمنتدى واي مكان .. والي حاشمه عمرها بتم حشيمه غصب عن هاللوث .. بعدين بيني وبينج الي عادي عنده سوالف المغازل ما يفرق بين بنت نظيفه وبين الوصخه .. صار هالشي عادي يعتبر اي بنت تستخدم الانترنت صايعه .. واي بنت تسير السوق صايعه لازم يرقمها .. بس مانقول غير الله يهديهم و يصلح حالهم



ميامي 44 ..... حاضرين ياخويه ونحن دومنا ويابعض نتناقش في المواضيع الطيبه ونتمنى انه نشوف هالمظاهر السلبيه تقل من مجتمعاتنا ويامرحبابك يالغالي



أمرين ...... صادقه بس بعدهم الشباب المتربين والحشيمين مكثرهم بس مالهم طاري لانهم حافظين عمارهم عن هالرمسه ..... ويامرحبابج واسعدتني مشاركتج



لماح .... اتعرف الله يسامح حكومتنا الي خلت جامعاتنا كلها بالانجليزي ساعه يالس ادور الشده في الكيبورد عشان احطها على اسمك مالقيتها هههههههه .... الشكر لك والي محلي الموضوع ياخويه هو طلتكم الحلوه ومشاركاتكم الي تشرح النفس ... وياكبر اجرها عند الله ياخويه يوم نتواعن على الخير ونطرح مثل هالمواضيع وغيرها ونكررها دوم وذكر انه الكرى تنفع المؤمنين ... محد منا مافيه عيوب واخطاء بس شو فايدة الاخ اذا مانصح اخوه .... لك جزيل الشكر على كلامك الحلو يمكن ماستاهله بس تسلم واتمنى التواصل يدوم بينا في الي يرضي الله .. ويامرحبا الساع



الحاضر الغايب ............ الصراحه كلامك طيب وردك اسعدني ... وانا وياك في اللي قلته الي يسوي هالحركات انسان عديم الاخلاق .. بس ياخويه انا مابا ارد الغلط على الزمن واقول التطور والانترنت والفضائيات واردد الي يقولنه المطاوعه هذي الي خربت عيالنا وخلت الكل يمشي في هالدوامات الصعبه .. لا انا وياك الي يبى يخترب يخترب بكيفه محد ضربه على ايده .. المشكله انه عيال ناس والله اتشوف اهاليهم مربينهم احسن تربيه واهاليهم ما يفارقون المسيد وهم ماشيين على هالدرب ولكن رفقة السوء الي ماتقول انك تقدر تعيش بدون ماتخالطهم في المدارس في الحواري في النوادي في المولات فكل مكان موجودين .. صح انت بكيفك ترابع الي تشوفه زين ومحترم .. بس منو منا معصوم عن الخطأ .. والشيطان يبدي وياك حبه حبه .. انت رمس بنت بس لمجرد الصداقه .. راسلها بس ايميلات شوي شوي يقولك كلمها في التلفون مب لازم ترمس شي مب زين بس كلمها .. وايرك شوي شوي عقب يوسوسلك ماتبى تشوف هالانسانه الطيبه .. شوي تطلب صورتها شوي تطلب انك تشوفها من بعيد ويا اهلها شوي تبى تيلس وياك عشان تكلمها شوي شوي تحلى اللعبه .. صح التمسك بالدين يوقفك قبل ماتبدا هالمشوار .. ولكن نحن نقول للي مشو في هالدرب لا تقنطو من رحمة الله .. وتقدرون تقولون لا نحن ما بنواصل .. وانتو فيكم الخير ... مب معناته انحطكم في اللبلاك لست .. لا انتم خوانا وخواتنا .. والي يلحق على عمره نحن بنوقف وياه والي بيستمر نحن ما بنتوقف عن نصحه وارشاده .... اسمحلي على الاطاله ياخويه بس اتمنى انه نفيد بعضنا ونتعلم من بعضنا ونفيد بلادنا واهلنا ويامرحبابك في اي وقت



قلب دبي ..... هلابك ياخويه وسرتني مشاركتك وردك ... انا اقولك شرات ماقلت لخويه الحاضر الغايب .. الي يسوي هالحركات والي انا طريتهم مب من كوكب ثاني .. هم عيال بلادنا ويبقون عيال الامارات .. ونحن بنوقف وياهم ونعطيهم النصايح هذا واجبنا .. وكل نفس بما كسبت رهينه .. الي علينا انه نرشدهم نخبرهم شو تالية هالشي الي يسوونه .. البنت شرات ما قلت تعرف انه نهايه هاللعبه مب حب ولا زواج ... وتسمع عن المشاكل الي تصير ويا البنات الي يمشن هالدرب .. بس المسكينه تقول لا انا بجرب وبكون حذره .. وبعدين سعوود حبيبي والا حمود والا عبود والا رشود غير عن هالشباب الوصخين ... ترا انا يوم بكون وصخ والعب عليج ما بقولج تعالي شوفيني شو اسوي من وراج .. اكيد بكلمج باسلوب وبمكر الثعالب وبخدعج شوي شوي .. ولكن اذا فيوم من الايام قلب دبي والا الحاضر الغايب والا دين البدو والا اي واحد ثاني نزل موضوع شرات هالموضوع و قرته بنت كانت بتمشي في هالدرب وانتبهت لعمرها شو تتوقع الاجر من الله .... اشكرك ياخويه مره ثانيه وتسلم على ردك الطيب



الذئب الازرق .. اشكرك على مرورك واهتمامك .. بس ياخويه اول شي انا ريال ثاني شي اتمنى انك تقرا الموضوع برواقه مب وانت مستعيل وتعرف شو المغزى منه .. ثالث شي .. يعني الامارات عندك شرات الهند وشرات امريكيا ؟؟؟؟؟



ام خدود ... اشكرج على ردج وانا فخاطري وايد كلام بس الله يعلم بحالي اني احاول قد ماقدر ادش واستانس بردودكم واحاول اني اتناقش وياكم .. بس بعد بعطيج شوي من وقتي وان شاء الله اقدر في المرات القادمه اكمل وياج ..



شوفي ياختي الفاضله .. نحن هنيه ومثل ما قلت فموضوعي نحن مب مطاوعه يايين نقولكم هذا حرام وابتعدو عنه .. ولكن انا حالي حالكم شاب واعيش في هالمجتمع . وبدون تكبر وغرور لي مواقف في هالدنيا وفي كذا مكان صارن قدام عيوني وسمعت عنهم .. فانا ما ارضى اني اشوف نفسي في مثل هالمواقف ونفس الوقت ماحب اشوف وحده والا واحد من عيال بلادي والا لو كان مسلم انه يتعرضلهن .. اختي انا شرات ما قلتلج شاب .. واعندي قلب وابى حبيبه وابى انسان يكون وياي وقت ضيقي والظروف تحكم اني اكلم بنات سواء في الدراسه العمل المستشفى البنك اي مكان بتسيرينه البنت موجوده فيه .. ولكن يوم انا ايي اتعرف على بنت .. وما بسوي وياها الحرام لا مجرد انها تكون انسانه غاليه ونسمع بعض كلام زين ومحترم .. انزين هالبنت بعد كم سنه يوم بتزوج .. هل برضابها انها تكون زوجتي .. واذا رضيت ما بتم اشك انها مثل ماكلمتني ماكلمت غيري واذا صار هل اكيد اهلها بيرضون .. ثاني شي الكلام الحلو والاشياء الحلوه الي بنتلكم فيها والا ما بنبالغ فيها وما بنتكلم في الحرام منو كان اولى اقولها لبنت ما تربطني فيها اي علاقه شرعيه والا لبنت تكون حليلتي وزوجتي واعرف انه اي كلمه قلتها وطلعت مني تستاهلها هالبنت؟؟

بالنسبه للدوافع الي تجبر البنات والشباب على المغازل انا قلت شي منها في الموضوع وفي ردودي على المشاركين .. الضغوط الي تصيب البنت من اهلها هذي من اهم الاسباب .. البنت ماتلقى اي انسان يسمعى و يكون قريب منها غير هالذيب اللعين .. والي هو باسلوبه الي خلاص احترف فيه يسمعها كلام يخليها تفقد صوابها .. الله يحفظنا وياكم ياختي من كل شر واسمحيلي على الاطاله ويامرحبابج



الغاليه . انا اشكرج جزيل الشكر ومابرد على الكلام الي قلتيه لانج يبتي اشياء واقعيه وكفيتي فيها .. ولكن انا الي ابغي اقولج اياه والثاني والثالث .. صدقيني صدقيني صدقيني اقل القليل بيكون عندج صديقه او زميله في الصف تسوي هالشي وهي شرات ماقلتي تشوفه صح .. وماباج اتسيريلها باجر اتقوليها هذا حرام وهذا بيوديج النار .. ولكن فكري باسلوب وطريقه كيف انج توضيحيلها بطريقه مب مباشره انه هذا نهايته مب صح .. اشكرج مره ثانيه والله يجمعنا وياكم على الخير دوم