بسم الله الرحمن الرحيم ....






قبل كل شي استسمح منكم لاني ابطيت عليكم من زمان ما شاركت وياكم .. وان شاء الله موضوعي اليوم يكون هادف ومب ثجيل عليكم مع اني احس انه بعضكم بيمل وبعضكم ما بيعيبه الموضوع .. بس كلمة الحق لازم تنقال واذا انا غلطت في شي اتمنى انكم تساعدوني وتنبهوني .. موضوع اليوم عن المغازل

انا ما رح اكون داعية اسلامي او متعصب بيطيح فيكم و بيسمعكم مواعظ وعبر . كلكم ناس فاهمين ودارسين والا ماكنتم في هالمكان المحترم .. بس رح اخبركم عن بعض المواقف والاشياء اللي صادفتني في حياتي وبعض الاشياء اللي تتكرر عند الكثيرين منا ... ارد واقول انا مب احسن منكم انا اخوكم منكم وفيكم .. بس الصح صح والغلط غلط .. وكل واحد منا محتاي من اخوه ينبه في اغلاطه والحين اسمحولي عقب هالمقدمه ابدا موضوعي :



فلان الفلاني (وياكثرهم ) انسان محترم وولد ناس متربي احسن تربيه .. بس هالانسان يبى يواكب العصر .. وطبعا لابد من التلفون والسياره الزينه والحين وقت الانترنت .. ومن مظاهر مواكبت العصر يا فلان انه لازم تكون عندك صاحبه .. والا كيف تيلس فميلس كله شباب والكل يرمس عن ربيعته فلانه بنت فلان وانت يا فلان حليلك مثل الاطرش في الزفه تيلس ساكت ماتعرف في شو يرمسون .. خلوني اخبركم قصه فلان الحين

فلان كان مثل ما خبرتكم شاب محترم من ناس محترمين ومتربي عدل .. خلص الثانويه وياب معدل محترم رشحه انه يدش مجال راقي في الدراسه .. المهم في الفتره الي كان فيها فلان توه مخلص الدراسه وبيبدا مشوار الدراسه الجامعيه يعني احينه استوى ريال .. اتغير عليه الحال من عقب ماكان كله يالس في البيت وماعنده مجال يظهر مني والا مني .. الحين صار تحت ريله سياره وعنده كل سبل الرفاهيه الي يتمناها الشاب .. المهم فلان كان عنده صديق وهالصديق كان مثل ماخبرتكم سوالفه كلها في البنات تعرفت على فلانه وواعدت فلانه وفلانه قالتلي جي .. وشوي شوي قال لربيعنا فلان شو رايك اعرفك على بنت .. بختصر الموضوع .. افلان اتعرف على البنت (ف) مسكين قبل كان ما يخصه في البنات بالمره وحظه طاح على ف الي ماشي من سوالف المغازل والوصاخه ماتعرفها .. المهم عطته شوي من الخبره وتسهره طول الليل مع انه قبل كان ما يتعدى الساعه 10 واشكره بعد فتره قالتله ابى اشوفك وهو مب مصدق والحمد لله انه ماكان يعرف شي .. المهم عقب طلع وياها بس ما سوى وياها شي مع انها كانت بايعه عمرها .. اخر شي هي لانها بنت شوارع اتلقطلها كل يوم واحد طبعا ودرته مع انه كان مصدر بطايق



صاحبنا فلان عقب فتره حس بالوحده .. والي زاد الطين بله يوم ييلس ويا الشباب و يخوضون في سوالف البنات ولو يا بيسولف وياه يكرر نفس السالفه عن (ف) قال لازم اييب شي يديد الربع ملو من هالسالفه .. وساعده انه دخل الجامعه .. الجامعه الي تنشء الجيل الصالح .. اختلط بالشباب وطبعا مثل ماتعرفون فيهم الزين ومنهم الشين .. ومن هالفئه الشينه شاب الله يهديه دل صاحبنا فلان على طريق اسمه الانترنت .. ودله على شي اسمه الشات .... فلان استانس من هالشي مع انه قبل كان بس يسمع عن شي اسمه انترنت بس الحين صار هالشي بين ايده وشاف حلاته وانت يالس حاط ريل على ريل تدخل على موقع فيه شباب وبنات ومن كل الاماكن.. والله التطور وصل حتى في المغازل بدل ما تسير تلعوز عمرك في السناتر والا تصك خط من مدينه لمدينه ثانيه ويمكن تتعرف على بنت وممكن لا وممكن تعرض عمرك للخطر .. الانترنت اسهل واحلى .. وتقدر اتالف اشياء ماعليه عقب ماتيب راس البنت يصير خير ..



اخينا فلان بدا مشواره على النت .. بعد شوي ما سده يدخل من الجامعه ومن المقاهي .. اصر على هله يوصلوله النت في البيت .. لعرض شوه الدراسه .. انزين . شوي شوي صارن دلال مب دلة الشاي يخلصهن فلان وهو يالس في غرفته .. ما ييلس وياهله .. صارت امه تحسب المرات الي تشوفه فيهن .. والحبيب يالس في غرفته .. خلونا ندخل غرفة فلان نشوفه شو يالس يسوي

فلان رد من الجامعه .. طبعا اذا شاف امه يالسه في الصاله سلم عليها وركض على غرفته واذا ما شافها مب ناشد عنها .. دخل غرفته فر الكتب والملفات .. ماشي صلاه ماشي تسميه بالرحمن .. ركب الوايرات شغل الانترنت .. اوهو السيرفر بطي شو هالحاله .. مايدري انه الله يالس يصعب عليه المعصيه .. عنااااد بيدش موقع الشات ... دش الموقع باسم ........... سولف شوي على العام ضحكم شوي .. الحين شغل التقردين .. فتح اللسته شافله كم اسم عيبته هذي اسمها... دش وياها فسوالف وضحك ونفس الوقت يدش على ثلاث اربع .. عل وعسى وحده منهم تضبط ... بعد شوي فلانه والله اسولبج وايد عيبني ... الثانيه والله انا حاس بالوحده ومتضايق وابى حد يرمسني ... والثالثه .. بعد الضحك والله فخاطري اتمين وياي دوم وابا ارمسج في التلفون اترد عليه انا مارمس شباب يرد عليها والله انا عادي عندي ارمسج في اي مكان انتي تبينه والي يرضيج يرضيني تبيني هنيه في الشات والا مسنجر والا في التلفون اي شي يريحج بس انا خلاص احس انج فاهمتني وووو شوي شوي اييب راس وحده منهن

شوي شوي صاحبنا صار حريف .. صار يعرف البنت شو من الرمسه تعيبها .. صار يتفنن في الكلام العسل والي اييب راس شارون مب بس راس بنيه مسكينه قلبها ضعيف واتصدق الريال ..



في البدايه فلان كان يصدق ويا البنات ويقولهن اسمه الصدق وعمره الصدقي .. عقب شوي شاف الحال ما يصرف البنات يعرفن بعض وكل وحده بتقول حق ربيعتها انا اعرف فلان و بيخترب الترتيب .. شوي شوي يبدا يلوت على البنات وهن يلوتن عليه والدنيا لواته ... يوم عنده رنج ويوم عنده بي ام ويوم عنده بورش .. وكل يوم شي

فلان صار يوم ييلس عند الشباب صارو يبونه يسكت عن البنات .. رمست فلان وتعرفت على فلانه وهذي بنت شيوخ وهي عندها السياره الفلانيه وهذي يابتلي الهديه الفلانيه .. وبعد شوي سكتو سكتو شباب ربيعتي متصله بحطه على السبيكر ... الوو هلا حياتي عمري حبيبتي شوي وبتصل فيج والله في المستشفى موصل اخوي الصغير .. بند عنها والشباب ناقعين من الضحك بعد شوي اتصلت الثانيه الو هلا حبيبتي عمري شوي داش محل جواتي ابى اقيس البنطلون بخص محلق وبتصل فيج .. والهبله تحبه اتصدقه اي شي يقوله هذا فلان صادق خلاص حبته



خواني وخواتي .. فلان عايش بعده وبعده مستمر على الي هو عليه .. ادعوله بالهدايه .. وترا مكثرهم فلان

الحين ببدا وياكم بناقش هالقضيه .. شو لي يدفع الشباب لهلاشياء .. انا برمس عن الاشياء الي احسها والي اتوقعها ... اول شي برمس عن البنات .. انا اعرف وايد قصص صارن ويا بنات .. طاحن في شباك فلان وشلتة والسبب .. البنت محتكر عليها عايشه في بيئه صح مب غلط بس محتكر عليها مدرسه بيت غرفتها بس حتى سوق حتى اماكن ماتظهر .. اخوانها يعاملونها بقسوه انتي يالدبه انتي منو يباج يالدرام يالخسفه .. هالبنت تنتقل من عالم المدرسه للكليه او الجامعه .. اتشوف البنات دشن هالانترنت .. تيلس وياهن ... محكوم عليها تشوفهن دامها في الكليه يعني وين تسير فوق السطح .. ربيعاتها .. شوي شوي بدت تدخل الانترنت شوي مواقع شاتينج .. البنت بعدها حشيمه ومب راعية سوالف وصخه .. شوي شوي دش عليها فلان يبدا وياها .. بتاخذ الرقم من اول شي مستحيييييييييييييل .. يبدا حبه حبه .. سوالف ضحك . يدخل الاهل .. يدخل مشاكله العاطفيه يكسر قلب البنت .. البنت باجر اتدش اتلاقي فلان موجود اونه يترياها وهو حاطله الف بنت في اللسته ماعليه منها .. وينج انتي والله انتي تميت افكر فيج امس .. البنت انا الي اخوي يقولي الدبه الدرام الخسفه في واحد يترياني واعجبته عيبه اسلوبي شوي شوي تميل صوبه .. و هلم جرا



خواني خواتي .. عيب علينا والله عيب ... صارن بنات الناس لعبة فيدين هالوصخ ... بدش فكذا موضوع .. مره كنت ساير الحلاق .. الحلاق سوالف انا وياه دوم مزح وسوالف .. مره كنت اتحلق قالي ارباب يريد شوف شي .. قلتله هلا شو عندك ... ياب تلفون (حلاق عنده تلفون اكشخ من تلفون ) فتح الرسايل طلعلي فيديو بنت مواطنه تتفصخ واقولها بنت مواطنه تتفصخ مصوره اشكره ... قلب انقبض يا ناس .. هالبنت من ويها حلوه وبنت ناس صار الكل يهتك عرضها ويشوف الي تسويه .. حتى الهندي ... وين الله منكم طبعا بدون ماتقولون مسكت التلفون وتميت امسح منه اي شي مب زين .. وكلمته كلمتين

بس فذمتكم .. هالهندي لو صارله موقف ويابنت مواطنه وكانت عنده فرصه انه يسويبها شي بيتردد .. بيقول بنات الامارات كلهن شرات الي شفتها .... السمجه الوصخه تخرب على باقي السمج

بعضكم يضحك على هالكلام وبعضكم قلبه يعوره ... بس صدقوني ياما رمسو في هالمواضيع والكلام اييب شي .. اتوقع لو بنت عاقله تقرا موضوعي وكانت على وشك انها اتطيح في شباك فلان وشلتة بتنتبه لعمرها .. وحتى لو طاحت ومشت وحتى لو شي شاب مر في هالشي ومكثرهم الفرصه قدامه ..توب واستغفر ربك .. وبتلاقى ربك يستقبل بالرضى والتوبه ..حالنا بيتغير .. الهموم الي نعاني منها المشاكل الضيج الي كل شاب تلقاه عنده الف هم وهم شايلنه والسبب بعدنا عن ربنا .. محد يقول انا احسن عن غيري .. غيري يواعد كل يوم بنت وغيري يسوي اشياء اكثر واكثر وانا بس ارمس في التلفون انا بس اتعرف في الانترنت ... انا بس ارمس ويا البنات كخواتي واستفيد منهن .. شرات وحده اتقولي مره انا كنت ادش الشات عشان انصح الشباب ومره عيبني كلام واحد من الشباب وحبيته .... تتوقعون بليس بيخليها تسوي الخير .. ماجتمع رجل وامره الا كان الشيطان ثالثهما ... لاتقولين هذا جهاز بمجرد ما ببند بينتهي كل شي .. لا يوم بتنبدين بيبدا عقلج يشتغل و بليس يعاونه ..