روت لي جدتي روتينها اليومي قبل عصر الخير والطفره ..
فقالت ..
الاول يا علي"" من يأذن الفجر .. اقوم واوقظ يدّك للصلاة .. ونستعد ونتمسح ..
واذا كان عندنا ريوق انزهبه .. واذا ماكان عندنا ترى يا ولدي شربة الماي اتسد ..
ويروح يدّك .. يكد ورى هوشه .. وبوشه .. ولان المرعى كان بعيد كان هو اللي يسيّر الهوش والبوش ويمرّحها ..
لأني حرمه .. ولا ابعد عن البيت .. واتقوول ..
ياعلي .. بعد ما يسرّح يدّك الهوش .. والبوش كنت انا اروح الزريبه .. وانظف مكان الهوش والبوش .. ويكون يدّك لين الظهر في المرعى .. يوكل الدواب من الحشيش ويحميهن من السرقه ( الصرقه ) ..
واذا مايا يلقاني مزهبه له الغدا .. والغدا ياولدي ماكان متوفر دوم .. اذا هل البحر ..
جادوا وجاد البحر عليهم .. برزق ايسدهم ويزيد تراهم ايبيعونه..
ولا بعض الايام مانحصل غدا .. ونحن صح كان عندنا م الحلال الكثير لكن الزمن ياولدي .. حــرّم علينا العبث والتبذيـــر .. وكنا انخاف من اليوم الاسود
ومن ايام(( الفاقه)) يلّي العرب هدّو من البلاد بسبتها .. واللي سافر البحرين والكويت يشتغل عند الهوامير ولا اي واحد من اصحاب ( السراديل ) ..
وكله بسبب الفاقه .. يا اولدي ..
زمان الاول كنا نرعى ونخم تحت الهوش..وغير مشاكل العيال ..
والذي كان يصلب عودنا ( شربة ماي ) ولا شاي وخبز .. هوب شرواكو هالايام
طايحين في ( الكلوولوكس )
<span style='color:Red'>تقصد الكورن فليكس</span> .. عرفت يا ولدي .. وكانو هل البحر هم الاغنى والارهى .. لكن راعي البحر يحسد ولد البر على مجابل الحرمه كــــل يوم .. !!!
وبعد العصر كانن الحريم يجتمعن وكل حرمه امبرزه دلة القهوه والاخرى امبرزه الحلوى ..
والثانيه امسويه قرص وزايد عن عيالها وغداهم .. ونجتمع .. مب شرواكو الحين كله امنازع واهواش والرمسه بالتلفووون .. تسمع يا اولدي ..
واذا ما اذن المغرب وحان وقت الصلاة .. ونسمع المنادي من فوق النقا يصيح الله واكبر ....
اتزهبت كل حرمه وردت بيتها .. وتيلس اتزهب العشا ..
والذي مايزيد عن ( خبز وشاي ) ولا طماط وخبز ..
ونرقد حيث ان السهر كان تعب علينا نحن هل المكده اما انتو فما وراكو شي سهرتو لين الصبح ..
واذا ماقال الله واكبر .. قلتو ورديتو ( حي على النوم ) ..
( غاليه بنت محمد المنصوري )
بتصرف يسير في شرح بعض الكلمات من ولد ولدها ..
<img src="http://oasis.bindubai.com/emoticons/withstupid.gif" border="0" valign="absmiddle" alt=':with:'>
<span style='color:Green'>هيه يازمان اول كان الواحد فيهم ايقوّم صلبه وايقوم نهاره والمكده بشربة ماي.. وكانت الحرمه من الصبح تحت الهوش اما اليوم فالحريم موعد استيقاظهن الساعه 12.5 ظهرا والنووم باخر الليل والاكل وزهاب الغدا على الطباخ .. والياهل ما يتريق غير كورن فليكس ولا يرقد الا وطالب من المطعم زمان جميل تمنيت ان اعيشه بمرارته الا انه كان مترابطا لابعد الحدود وباوثق الصلاة .. هنيئا لهم ذاك الزمان .. ونحن احفادهم يجب ان نكون مثلهم</span>
اعذروني في تصرفي ببعض مصطلحات العيوز فلابد من ذالك .. والتصرف كان يسير فالمعذره.. اخواني ..
رد مع اقتباس
مواقع النشر (المفضلة)