بالرغم من إني كتبت في الموضوع من قبل لكني رجعت وحنيت لأيام الطفولة وذكرياتها الطاهرة ..
ذكروني الأعضاء بالشقاوة .. وبالكيك أبو نص .. وبشلة الربع .. والمغامرات في الماكن المهجورة .. كأننا كلنا كنا نعيش في نفس الحارة .. لكن اللي كان إننا كلنا كنا نحمل نفس القلوب البريئة والطاهرة ..
مرت علي ذكريات اللعب بالتيل .. وأذكر إني كنت وايد شاطرة فيها ودايما أكسب الأولاد لدرجة إنهم ما يحبون يلعبون معاي .. والموقف اللي ما أنساه إن كان واحد من ربعنا الأكبر عنا يلعب معانا بتيلة كبيرة ( كنز في ذيج الأيام ) وكل ما كسبناها أنا وأخوي يعطينا بدالها وحدة صغيرة .. وقمنا اتفقنا عليه .. ولما كسبناها المرة اللي بعدها .. نط عليه أخوي وعضه وانا أخذت التيلة الكبيرة وتركت ريولي تتسابق مع الريح لين ما وصلت البيت وخشيتها ضمن المجموعة في علبة حليب نيدو فاضية ..
اما كورة القدم فمن هذيك الأيام حبيتها لما كانوا دايما يخلوني في موقع الدفاع .. وأنا أصغر وحدة في الفريق وبالنسبة لي كل الأولاد جحافل بتدعسني .. لكنهم كلهم كانوا اخواني لأن النفوس بريئة .. لكن الحمد لله إن ما طار ويهي بشوتة تقصد الهدف ..

ذكريات تمر مثل الأطياف .. كأنه خيال أو حلم .. حياة كاملة أصبحت دقائق وثواني تصارع أحداث الحياة لتطفو على أمواج الخاطر فتخفف من قتامة الحاضر ببياض قد مرت عليه سنين من العمر ودهور من النسيان .. <img src="http://oasis.bindubai.com/emoticons/confused.gif" border="0" valign="absmiddle" alt='???'>