<font color='#000000'>السلام عليكم و الرحمة كيفكم ...شخباركم ...عساكم بخير
و الله هذي قصة يديدة ...... حبيت أحطلكم إياها ..أبغيكم تعرفون أنها هب منقولة من مكان ..... أوكيه ............ أول حلقتين و الباقي يأتي ....
إذا كانت بدايتها تشجع قولولي ... و إذا لا ... قولولي عسب ما أكملها ....
أوكيييييييييييييييييييييي ييييييييييييييييييييييييي يييييييييييييه <img src="http://oasis.bindubai.com/emoticons/wink.gif" border="0" valign="absmiddle" alt=':;):'> .. نبدا
_ _ _ _ _ _ _ _ _ _ _ _ _
شيصير بالدنيا .... لو ..
خولة .... بنت في الثانوية العامة .. باجي لها هاذي السنه ... و بتفتفك من الدراسة و بتتخلص من هم 12 سنة كراف و سيرة و يية ..تتدرس في وحدة من هالمدارس الحكومية ...و باقي لهم اسبوع و بيأجزون حق المذاكرة ... و خولة بنت محبوبة من كل البنات و اجتماعية تحب السوالف و تحب السيرات و الييات ..لكنها رغم انها مصروّعة و مصرقعة.. لكنها بنية متفوقة ...عندها في المدرسة شلة ربع دوم وياهم ( ليلى و نور و حمدة و موزة ) طبعا من غير البنات اللي تعرفهم في كل صف لأنه المعارف مهمة وقت الحاجة ...
_ _ _ _ _ _ _ _ المدرسة ... الفسحة ..._ _ _ _ _ _ _ _
خولة .. ونور .. و ليلى : مواز بنسير نشتري تبون شي و إلا بتون ويانا ؟..
موزة : لا فديتكم سيروا انتوا و نحن بنودي الكتب مال الكيمياء العملي ... اليوم اخر يوم يسلمونهم ..
نور: وييييييييه ..أنا ما يبته ..يا ويلي ما بتحطلي الدرجة ..
حمدة : افااااا عليج أنا اللي بخليها تترياج لين باجر ..
نور : شو بتسوين يالعبقرية ؟!...
حمدة : ما عليج انتي ..سيروا المقصف و هاتي لي وياج ايسكريم ...
ليلى : يا هالايسكريم .. يدرون انه ممنوع من الوزارة و بعد يبيعونه ...
حمدة : يدرون انه ممنوع و إلا ما عندج درهمين ..ها ؟!
ليلى : هب سالفة درهمين .. البيزات موجودة لكنه حق ايسكريم .. احنا نشتريه من عند بقاله الوريعة الخضراء 2 ايسكريم بدرهم
خوله :شو يسون بعد عشان يغطون تكاليف الصيانه .. عشان يصبوغون لج هالصف اللي انتي يالسة فيه ...
ليلى : بسج من الرمسة ..احنا في ارض الحكومة .. ما نقدر نقول شي خلينا ساكتين احسن ..
و في درب البنات للمقصف ...
نور: ها خوالي .. ما سجلتي قي المعهد ؟!
خولة : باجر سايرة اسجل ..تعرفين محسوبتج بقرة في الفيزياء ...
نور: يا مييييه هب بس انتي كلنا .. بس و الله هب منا من هالمدرسة المصرية اللي حاطينها ..بسبتها استوى الفكر مثل البقر ...
خولة : ما بتسجلين ويايه ؟!
نور : ياليت و الله لكن استاذ سلطون اخويه موجود و ايي لين البيت .. شعليه من المعاهد إلا قومي البسي و إلا شوفي حد يوصلج ..
خولة : برايج بدورلي وحدة اسير وياها اتلاقف وياها هناك ...
نور: وين بتسجلين ؟!
خولة : عند هشام البرنس بدقله اليوم بخليه يدبر لي حصص في المعهد ..تعرفين زحمة عندهم ..
نور : بتاخذين عند مدام أشواق ؟..
خولة : لا شو اشواق ما تفهّم وايد بدورلي ريال يقولون انهم اشطر خلينا نشوف شطارتهم ...
ليلى : شو تبون ؟! اليوم دوري اتشرى لكم ..
خولة : لبن و فلافل ...
نور : شو لبن و فلافل هاتيلها جلكسي و برتقال ..
خولة : جيه ؟! ابغي فلافل..
ليلى :خلصوني لاه ..
نور : اللي قلتلج عليه ..
خولة : نورووووه ؟؟!!
نور : نسيتي عقب الفسحة علينا كيمياء و نحن محتاجين انج تكونين واعيه ... عن ترقدين من عقب الفلافل و اللبن ..
خولة : تضحك...ههههه خسج الله يا نور ..
تي حمدة موزة وراهم ...
موزة : فاتج يا خولة ...يو يدورونج ..
خولة : منو يدورني ؟!
حمدة : هاي البنت اللي دوم تتمشين ويااها ..إيمان عبد الله ..
خولة : ايمان اللي في ثاني أدبي ...
حمدة : هيييه..
خوله :هاي ربيعتيه
موزة : ياية تسلم عليج هي و نوفي وياها
خولة : نوفي .. نوفوا بعد ليش ...
نور : جيه ما تدرين باجر اخر يوم بيداومون ...
خوله : لااااااه ... حرام ما بشوفهم مرة ثانية ... قوموا خلونا نلحق عليهم قبل لا يدق الجرس ...
و في دربهم 2 أدبي 4 ...
ايمان : خوااااالي ... خولة ..
خولة على طول تلف ورا : هلا ..
ايمان : خولة ...
خولة : ايمان كنت سايرة صفكم ..
نوف : يايين نسلم عليكم .. لأنه نحن ما بنشوفكم مرة ثانية ... الدموع في عينهم كلهم ...
خولة : اسموحولنا جان قصرنا وياكم ... تصيح ... و إلا غلطنا عليكم ..
ايمان و تصيح : ابدا و لا يت منكم قصيرة انتو اللي اسمحولنا ...
ايمان : خلونا نتصل فيكم و سمعونا صوتكم ...لو ثواني ...
خولة : و لا يهمكم ...
موزة : انتو بس ادعولنا ... لأنه نحن في حاجة دعاءكم ...
نوف : و لا يهمج ... أكيد ..
يدق الجرس ... تررررررررررررن ترررررررررن ....
موزة : اوووووووه ..كان ودي ايلس وياكم ...
خولة : هيييه و انا بعد ...
ايمان تلوي على خولة ... فمان الله ...
خوله اهنه ما قدرت تيود عمرها ...
خولة : مـ..ـع السلا مـ..ـة ..
يمشن الرباعي المرح و هم يودعون ربعهم اللي في ثاني ...و عند الصف يلقون نعوم ...ناعمة رفيقة الدرب في أول ثانوي الطالبة اللي نجحت وعقب سنتين رسوب وكان السبب في نجاحها هذا الرباعي اللي سوا كل شي عشان هالبنت تستمر في حياتها و الحين هي في ثالث أدبي ...ياية تودعهم ... لأنهم بعد بيأجزون ..
ناعمة : خولووووووووووه ..موازة ..لولو ..حمادينو ..حمدة ..
خولة : نعووم ... ليلي : ناعمة .. حمدة : هلا بنور جلفار ... موزة : تصيح .....
ناعمة : افاااااااا .. موزوه شو هالدموع ..هذا كله حقي ...
موزة : هب في يديه ..
ناعمه : فديت اللي يصيحون عشااااانهم بيفارجوني ..
كل الشله يصيحون ....
ناعمة : اوووووووه ..اووووه لالالالا ..شو ها كله ...
تيود ناعمة ايادي ربعها و تهوس عليهم بقو و تقول : اسمعوني أنا ما صحت لأني أعرف ان نحن ما بننقطع رغم سيرتي راس الخيمة لكني بحشركم في العين كل ويكا ند
بييكم و بييب اخواني و بنسوي زحمة ... و بعدين انتو ما تعبتوا ويايه كل هالتعب عشان ايلس في هالمدرسة صح ...
ناعمة : الحين عرفت ليش اتصيحون ... زايغين ارسب و ايلس اهنه .. اخسس فيكم يعني ...
خولة : لا و الله يا ناعمة .. تعرفين شقد نحن نعزج و نحبج .. انتي شراة عليوه اختيه و اقرب بعد ...
ناعمة : و الله عشتي يا خولووه .. طلعت اسوا يعني ...
موزة : نعووووووم شو هالرمسة ..و الله غالية ها ..عن هالكلام اللي ما يسوى ..
ناعمة : عيل لا تصيحوووووون .. بسرعة ... بسرعة ... اشوف كل وحدة تمسح دموعها ..اوووه ليلوه حاطه جحال ها ..مخالفة ...
ليلى تضحك ...و هي تصيح ...
ناعمة : علمي وين عندكم وقت انتو بعد ...تتجحلون
حمدة : نعوم .. من البارحة ...
ناعمة : هههاي سيروا سيروا عليكم ... كيما ...
ليلى : بعدج انتي ... كيما ... يسمونه كيمياء ...
ناعمة : عن الفلسفة الزايدة ... سيرن ..
يدخلن الصف يلقون الأبلة يالسة و حواليهها البنات ... يسولفون وهادين الشرح .. و كل وحدة ما خذتلها وحدة و تصيح ...و على ادراجهم هم الأربعة اللي ورا بعض ... أكياس و باقات ورود و أشياء وايد .. كلها من 2 أدبي و نعوم و ربعهم في أول ثانوي ..
حمدة : حليلهم ....حرام و الله حرام ... ليش يسوبنا جه ..
ليلى : لاتعليق ... دموعها مرة ثانية ...
خولة : الله يذكركن بالخير يا علكن يا ربي ....
موزة : يا ربي يا علكن الخير و الله ..
و هن مروحات ...و شالين أغراضهم في يديهم ...و عند مفرق الممر .. يوقفن .. يسلمن على بعضن و يتوايهن و عقب تفقرق خولة و ليلى و نور عن موزة و حمده ...
ليلى : منو وياه بتروحين اليوم ؟!
خولة : منو أنا ؟!...اخويه طارق بيمر عليه ...
نور : ليلى انا بوصلج اليوم ...
ليلى : ما دري بشوف خواتيه بيسيرون ويا ابلة ميمونة و الا ويا الدريول ..
نور : شعليج منهم ... تعالي و يانا أنا و اختيه هنوود محد ويانا ...
يوم يوصلن عند مواقف السيارات ... خولة يالله بنيات بسير جنه طروّق ياني ...
نور : وينه ؟! إلا انتي تبين تفارجينا بسرعة ..
خوله : حرام عليج .. هاذوه هناك .. الBM الحمرا المظلمة ..شفتيها ...
ليلى : اووووه موتر يديد .. لا اخر موديل بعد ..
خولة : ترومين انتي علينا ؟؟
ليلى : لا و الله ما نروم ...
نور :انزين جيه ما تسيرين له ...
خولة : جيه واقف بعيد .. خليه يقرب بسيرله ..
ليلى : هاذوه قرب ..
خولة : اوكيه بنات ..يالله فمان الله .. توايه ليلى و نور ..
نور: تيك كير .. سي يوه..
خولة : يو تو تيك كير ... (أونه ثقافة انجليزيه )
تركب خولة السيارة ....
خولة : السلام عليكم ...
طارق : و عليكم السلام .. هلا و الله..
خولة : مفرفش ..اشو عندك ...
طارق : ما شي .. ما قلت لج اجلوا امتحاناتنا اسبوع كامل ...
خوله : و الله ..ليش ..
طارق : شدراني بس يقولون وحدة من البنات مسوتلها مصيبة في الجامعة .. حارقة حجرة .. ما دري حمام .. مادري يقولون حريجة عودة ..
خولة : فقيرة البنية ...
طارق: خولوووه شرايج نشرد ...
خولة : وين بنسير ..
طارق : يعني ما عندج مانع .. بنسير بيت يدوه ... بنشرد عند علياء ...
خوله : بتشرد بي بتسير عند يدتك علياء ..أنا قلت بتوديني تغديني في مطعم عووود و راااقي ... جذي ها و تستوي كريم مثلا يعني .. يعني .. مثال ..
توديني قيصر و إلا .. إلا مدينه الصين ...كواليتي مثلا ..
طارق : طالعوا هاذي ..على اخر الشهر بتفلسني..خبرج يوم بشتغل ..لازم تفشلينا بعد انتي ...تعرفين بعدنا معتمدين على شيبتنا ..
خولة : انزين .. بيت يدوه ..بنسير عند يدوه ..
طارق : بعيد ..البيت اقرب ..
خولة : لاااااه ..الحين البيت اقرب ..
طارق : بخبرج قومي بنسير صدف ... مطعم ايراني ...
خولة : هاذي عزايمك يا صدف و بوفييه و إلا كافتيريا رجب على شاي كرك و براتا ...
طارق : انتي مب ويه حد يعزمج ...الناس غيروا الحينه ...ما قاموا يسيرون قيصر و هالأماكن ..
خولة : لااااه ..الحين ما قاموا يسيرون هالاماكن ...
طارق :تعرفين ان ابويه ما يرضي على سيراتنا هاذي .. كله ينازعنا..و لا حتى اخوج العود حميد ... خلينا في السليم ..
خولة : انزين ....
طارق : بنسير عند يدوه بنيلس عندها شوي عقب بنسنفر .. بنتغدى في مكان و بنرد البيت ..
خولة : طارق امييه بتحشرك عليه امتحانات و بترد عليك .. ما خليتها تذاكر و من هاذي السوالف ...
طارق : ما عليج منها ...
و يسيرون بيت يدتهم علياء ... و عند الباب ...
خولة : طارق ..هاذي سيايير عيال عمي محمد ...
طارق :هييه صح ..توني كنت ويا حمد ما خبرني انهم بيتغدون عند يدوه و انا دقيتلها و ما خبرتني ...
خولة : يمكن نست ...
طارق : خلينا ننزل و بنعرف السالفة عقب ...
يدخلون الصالة ...
طارق : يا أهل البيت .. وين العرب ...
اليدة : هلا و الله هلا ...اهنه تعالوا ..
خولة : في الصالة اللي داخل خلنا نسير لها ...
طارق : السلام عليج يدوه ..يحبها على راسها و بالمثل تسوي خولة ..
خولة : شحالج امييه علياء ..شخبارج ..علومج ..
اليدة : زينه .. الحمدلله انتي شو مسوية ..
خوله : الحمدلله يدوه ... منو اهنه ..
اليدة : عيال عمج محمد... حمد و راشد و سالم..
(حمد يدرس في نفس كلية طارق اخر سنه و راشد ثانويه عامة بس أدبي ..أما سالم فهو يشتغل و مالج على علياء أخت خولة و عرسهم عقب 6 شهور ..)
اليدة : تعال طارق عشان تتغدى .. فديتج خوله اماه .. ازجري على عمتج عويش ..
خولة : انشالله يدوه .. و تسير عشان تزجرها ...و تدخل عليها الحجرة ...
(عائشة ..مدرسة لغة عربية .. ادرس اول و ثاني و ثالث ابتدائي ..بس تعالوا شوفوها شجايل بالرغم من انها تشتغل تقول في عمر خولة و هن ويا بعض طايحة الرسميات اللي من بين العمات و عيال الأخو بس في حدود للإحترام ..عائشة من النوع اللي كله مطيحة في شبكة النت و عندها معارف وايد من ربع و أهل و ..كل شي )
خولة : مرحبا ... عواشينو ..
عائشة : هلا و الله .. توه ما نورت حجرتيه ..
خوله : ادري ادري احم احم ...
عائشة : شو اللي خلاج تتولهين عليي الحين .. ها يا بنت سيف ؟!؟!
خوله : هب أنا اللي متولهه ... طارق متوله بس هب عليج على غدا يدوه ...
عائشة : هههههاي ... هذا هو إذا يت السالفة للدح و الأكل .. ينسى العالم و تستوين أغلى البشر عنده ..
خولة : حليله اخويه ... على هالأكل لكنه و الله ما يبين فيه ..
خولة : عالعموم اسمحيلنا بتضطرين انج تسلفينا وحدة من هالمخاوير الغاوية اللي عندج عشان اتغدى ...و وحدة من هالوقايات البيض .. اللي ما خذتنهن من عند .. الزرعوني غاليري ...ابغي من اليداد الغاليات
عائشه : افا عليج بس انتي بنعطيج وحدة من هاذيلا امهات 15 درهم ..
تفتح عائشه الكبت حق خولة ..
عائشة : يالله خوالي طبي و تخيري ..
خولة : تسلمين حياتي ..ابغي هاذيج الوردية ...
عائشة : انزين بدلي ثيابج و تعالي الصالة الثانية بنتغدى ..
خولة : اوكييييييك اوكيك .. ....تتلبس خولة هاذيج الكندورة المخورة و تغطي راسها بوقاية بيضا و تسير الصالة .. يوم تتدخل ..
خولة : السلام عليكم ... شحالكم عيال عمي
راشد : هلا و الله .. هلا و غلا ببنت سيف بن سعيد
خولة : هلا و الله بـ بوسنيدة .. شحالك و شحال الدراسة ..
راشد : بخير الحمدالله و انتي ..
خولة : تصدق تسلم عليك ...
سالم : احم احم نحن هنا ...نسيتونا
خولة : نساك الموت ..
سالم : عشتي .. شحالج و شحال عمي و خالوه و و ...
خولة : و هي تتطالعه بنص عين و تبتسم ... : يسلمون عليك ...
خوله ما عبرت حمد وايد لأنه مندمج ويا طارق و هي أساسا كانت ما تسطلفه وايد لأنه ما عرفته وايد يعني .. و لايلست وياه في يمعات من قبل .. بس هالمرة هو بدا
حمد : اوووه .. (اونه عاد انتبه لها ) خولة ... السلام عليج ..
خولة و بنبرة هب مثل اللي كلمت فيها راشد و سالم ..أكثر رزانه ..
خولة : و عليك السلام و الرحمه ..
تتدخل اليدة شالة السماط ( السفرة ) اللي يوم كانوا يفرشونها من نهاية الصالة لين اول الباب ..فتقوم خولة عشان تساعد يدتها .. وتتطلع ربة بيت اوكييه جدام عيال عمها ...و عمتها عائشة وياها ..كل وحدة من صوب تمسك السفرة و تفرشها..
اليدة : لو يدريبي يدكم الله يرحمه اني افرشلكم السماط جذه و اغديكم ودية وحدة ... جان غسل شراعيه ..
طارق : انزين امييه هذا كله ما سار بعيد ... كله في ابويه و توارثا عنه ..جان ما تدرين حميد ..
خولة : وابوييي ..لو دش علينا ابويه و إلا حميد ما عليه منكم هو من الباب و أنا من الدريشة ..
راشد: خخخخخخخخخ
خولة : تضحك ها ..ما عليه بيك يوم ...
راشد : لا الله لا يقول ...
ويلسون كلهم متيمعين على الغدا و يتغدون و من عقبها ايسلون و يشربون شاي و ياكلون فالة يدتهم ..و يسولفون و ...و....
خولة : عواشي .. تعالي ويايه باجر بنسير نسجل في المعهد ..مري عليه بيتنا ..
عائشة : اووووه باجر مواعدة منوّل بسير وياها ..دبي ..
خولة : اوكييه ترومين اليوم ؟!
عائشة : اوكييه .. 6 زين ..
خولة :لا شو 6 بعد انتي .. قولي 5:30
عائشة : انزين ايلسي عندنا و مرة وحدة بنسير ..
خولة : لا لا ابويه لازم يشوفني موجودة في البيت و بعدين تعالي أنا بسير اذاكرلي شوية الأمتحانات قريبة و الشهراللي عاطينا ما يكفي ..
عائشة: انزين بسويلج الو قبل لا اوصل ...
خوالي : اوكييه .. تم
يدخل طارق عرض : يالله خولووه قومي بنروح .. عن ننهزب أنا و انتي و نحصل هزبة حلوة ..
خولة : أوكييه .. باي عواشينو..
خولة : فمان الله يا عيال العم ...
راشد :وين سايرة ؟!
خولة : بسير أذاكر لي شوي ... انته بعد خل عنك و قم سير ذاكرلك شوي عن اليلسات اللي مالها فايدة نبغيك ترفع راس ابوك..
راشد : اوووهووو ..سلمي سلمي على سعيد فمان كريم .. بايووووه
يروحون طارق و خولة .. و يوصلون البيت .. تسلم خولة هي و طارق على ابوها و امها ... و تسير تبدل و تنزل عسب تيلس وياهم شوي ..
خولة : ابوييه ..
بو حميد : هلا ..
خولة :ابويه بسير ويا عمو عائشة المعهد عشان أسجل ..شو قلت ؟
بوحميد : شو بتسجلين من المواد ؟
خولة : بسجل فيزياء
بو حميد : هيييييه .... انزين برايج ...
خولة : مشكور ابويه ... بس
بوحميد : بس ..
خولة : بويه الله يهداك خلك فهيم و تفهم المعنى من كلامي ..
طارق : بويه الله يهداك يعني .. كيّش.. cash تبغي ..
بوحميد : هههه .. انشالله يا خولة .. بعد طلبات ثانية ..
خولة : لا .. سلامة راسك ..
تسير خولة عند اختها نجلاء ...
خولة : ها نجّول شو تسوين ؟!
نجلاء : شرايج انتي .. طبعا اذاكر ...
خولة : شعليج موعودة بـ لاب توب ...
نجلاء : اعوذ بالله من عيونج الحينه ما بنجح ...
خولة : مرة احينه أنا اللي برسبج ..بخبرج حطي راسج في هالكتاب ... يالله ..
_ _ _ _ _ _ _ _ _ _ _ _ ( العصر في المعهد ) _ _ _ _ _ _ _ _ _ _ _ _ _ _
العصر تسير خولة المعهد عشان تسجل و تدخل على هشام البرنس ...
خولة و عائشة : السلام عليكم ..
هشام : اهلن و عليكم السلام ..
خولة : شحالك .. عساك بخير ..
هشام : الحمدلله ..ازيكو؟!
خولة : ها شفتلي استاذ يدرسني ..دبرت لي حصص..
هشام بيرمس مثلنا اونه : افااااا عليكي .. ما تشيلي هم .. لقيتلك واحد أمّور ..حتتبسطي عليه .. عسولة اوي اوي .. لبناني كدة هووه اوكييه ..
عائشة تضحك و خولة وياها : هييه بس على الله يطلع مثل ماتقول و افهم ...
هشام : ما تخافيش ..بس اتصل بيه و اخد منه مواعيد الكلاسات ... دقيقة ..
يتصل هشام حق الإستاذ ... جدام البنات و يرمسه ..
هشام : الوووه .. الوووه ..ايوة ايوة أ مون ازيك اخبارك اييه ..عامل اييه .. اقوللك في وحدة جديدة حتدخل كلاسك ..قولي عايزها تجيك امتى ؟!
استنى بس كدة اكتب المواعيد ... ثلاثاء و خميس و حد ..ايوه .. بس الساعة كام يعني ؟!؟! .. 6:30 .. خلاص حبيبي .. يالله بايباي .. سلملي على خالد .. هه متنساش ..باااي ..
هشام : اهو ياختي دبرتلك حصص ..مع استاذ ايمن ..
هشام : اخص عليه نسيت اشربك حاجة انتي و اللي معاك ..أنا اسف تاخدي اييه ؟؟
خولة : لا لا خيرك سابق مشكور ... الحينه بروح بييك باجر الثلاثاء باخذ الدرس .. الكلاس على قولتك .. ما عيبني .. ابقى اجيك اخد القهوة و أخانئك ها يالله .. سلام ... هات الوصل ..
هشام : اتفضلي .. سلام ..
في السيارة ..
عائشة : ماشالله ما خذين عليج ...
خولة : هب مني .. صار لي سنتين اسير لهم .. مصبحة و مسية عندهم ...
عائشة : جيه ماتفهمين منها ..
خولة : الله ياخذها فقرتني .. ترا بويه محد بيفقره غير مدرسة الفيزياء على كثر ما اسير هالمعاهد ...
عائشة : هههههه .. حليله والله سيف ..وين بسيرين عشان تذاكرين بتيينا و إلا بتسيرين عند حد من خالاتج ..
خولة : لا عندكم و لا عند خالاتي ... ان يلست وياج ما بذاكر و لا بييب نسبة ...ما دري بشوفلي حد من عمومتي جان بقبلني كلاجئة سياسية ..دراسية ..
و في البيت ....
خولة ترمس شما بنت عمها محمد عالتيلفون ..
شما : خولوه رمسي أمج خليها تخليج تيين عندنا ..أيام الإمتحانات ..
خولة : تخبلتي يا بنت محمد لا و خرفتي بعد.. لو امييه رضت ابويه ما بيرضى ..
شما :رمسي خالوه خليها هي ترمس عميه و اعرف إن عموه بعده سحرها موجود .. كلمتين و تلقين ابوج موافق ..
خولة: شموو و الله فكرة على الله ترضى هي الأول .. تعرفين امييه مزاجيه .. لازم تكون رايقه و فايقة..اوووه هاذي يت الصالة تضحك ..
شما : عيل هاذي احسن توقيت تكلمينها سيري خبريها و ردي عليي .. بااااااي
تبند خولة التيلفون عن شما و تسير عند امها ..
خولة : اماه فديتج تعرفين الإمتحانات قربت و خواتي السنة كلهم مرتبشين .. عليوه بتعرس و تبغي تتطلع و تتدخل و تسير و تي ..و و نجلاء بتخلص امتحانات و تبغي تتهنى بإجازتها على طلعات و دخلات و تلفزيونات و فيديوات ..
ام حميد : انزين ...
خولة : فأقولج خليني اسير بيت حد من عمومتي.. عمي محمد منها أذاكر و منها تساعدني وحدة من بناتهم .. تعرفين نصهم بيسافرون قبل لا نخلص .. بتم شمووه ويانا أنا و راشد و حمد لأنه عندها امتحانات الجامعة و عندها كورس صيفي فما بتسافر السنه لا هيه و لا أنا و لا راشد و بالمرة نقدم حق الجامعة ونشوف شو قاصرنا من اوراق و الخ.. أما سالم بيسير ويا خالوه و مرايم و عميه .. فما بيكون حد هناك ..شرايج ..
ام حميد : و الله مادري لازم اشاور ابوج ..
خولة : انزين امييه خبريه وردي عليي خبريني شو بيقول ..
أم حميد : يصير خير انشالله ..
خولة فخاطرها : أنا هاذي يصير خير ما ادانيها عندي يعني لا ..هب موافقين و إلا يعني اجلي السالفة ..
خولة : اماه رمسيه الليلة ...دخيلج ما تم وقت عالإمتحانات ..
ام حميد : بخبرج ان وافق هاذا معناته ما بتسافرين السنه ...بتيلسين عند شما ...
خولة : برايه امييه .. المهم النسبة ..
اللي يقول الحين هي تحاتي النسبة ..طموحها تييب بس نسبة زينة .. تعرف اذا سارت عند شمووه بتسير و بترد وياها و تعرف انه عواشي ما بتقصر وياها ..بتوديها و بتييبها ...
يتبع >>>>
ثاني يوم سارت خولة المدرسة ..و يلست ويا البنات و درسوا و خلصوا المنهج و بدوا يراجعون ...
ليلى : ها خوالي سرتي المعهد ...
خولة : هييه سجلت .. ببدا اليوم 12 ساعة خذت ...
موزة : اطالعي المدرسة ما فيها ربشة ابدا من غير أول و ثاني ما تسوى شي ..
حمدة : صدقج ..ما تسوى شي دونهم ...
دخلت الأخصائية عليهم ...ابله الهام ...
ابلة الهام : السلام عليكم بنيات .. شحالكن ..
كل البنات : و عليكم السلام بخير الله يسلمج ...
ابله الهام :يالله الله يوقفكن انشالله .. بنات كلكن دفعتن حق حفلة التخرج ؟!؟!..
البنات : هييه نعم دفعنا و عطينا البيزات حق ابله حمدة ..
ابله الهام : ها انزين يالله .. فمان الله
خولة : بتسيرون الحفلة ..
نور: أكيد ان ما سافرنا ...
ليلى : سمعت بيسونها في مسرح المدرسة.
خولة : لاااه ..أنا انشالله بسويها في مكان كشخة جذي ها ...بس عاد على الله النسبة تساعد .. كلكن تعالن ..هب اعزمكن و تعطوني الخامس ..
موزة : ما عاش اللي يعطيج بو خماس ..يا خولة يا بنت سيف بن سعيد ...
خولة : احم احم طروني ..امدحوني .. أشكر فنج يا موزة ...
و في وقت الردة ... يمشن كلهم ويا بعض لين الباب و خولة تخبرهن عن الخطة اللي بتسويها عشان تسير بيت عمها محمد ..
ليلى : ثرج هب هينة ..
خولة : شفتي شقايل ..
نور : أنا اول ما تعرفت على هالبنية .. عرفت انه وراها شي
خولة : لااااااه ...
يروحن البنات كل وحدة بيتها و في بيت خولة ..
ام حميد : خولوه بخبرج رمست ابوج .. و رضى بس تحملي ما تسوين زين في الإمتحانات .. تراه بيغسلني وياج ..
خولة : والله .. مشكورة يا الغالية .. أنا قلت مفعول أمييه السحري بعده موجود ..تسلمين .. تنش خولة و تسير ادق حق شما ..
اتصال بين عيال العم
شما : هلا و الله ببنت سيف .. شحالج ؟!؟!
خولة : بخير الحمدالله .. شحالج يا بنت العم انشالله بخير ..
شما : بخير عساج بخير ...
خولة : شما .. تراني اتفقت ويا ابويه و خبرته .. قصدي أمي خبرته حرام الجذب .. و وافق ..
شما : والله .. أشكر فنج يا خالوه ..قلت لج السحر بعده موجود ..
خولة : شمووووه اسمينا بنستانس ...
شما : صدقج غاب القط العب يا فار . لو هي السالفة على رشود ... هاذا بكلمتين ينقص عليه ..لكن حمد شقايل بتطوف عليه السالفة ؟!
خولة : خلينا بنفكر فيه بعدين ... الحين خبريني ... اشو استوى في المسلسل و رجاءا بالتفصيل الممل ... تعرفين كابتين عليه هب مخليني حتى امر من جدام التلفزيون ..
و ترمس شما و تخبر خولة عن اللي استوى في المسلسل و عن كل الأحداث تفصولة تفصولة .. مشهد مشهد بالحوار اللي فيه ..
خولة : وعقب؟!
شما : يتبع ...
خولة : غربالله القناة ...
خولة : شموووه فديتج ببند عنج الحين و عقب بدقلج بسير المعهد عندي كلاس الحين ...
شما : اوكيه حبيبتي ..يالله باااي سلمي على العايلة الكريمة ...
خولة : اوكيييه .. و انتي بعد .. سلااااااااااام ...
طارق : منوه ؟!
خولة : شماني بنت عميه ...
طارق : منو بيوديج المعهد ...
خولة : الدريول ... بقوم البس عشان الحق عالكلاس ..
* * * * * *
تمر الأيام و يأتي اخر يوم في المدارس ويا دور توديع أصدقاء الدراسة و رفقاء الدرب و الحبايب ... كانت الشلة ميودة عمرها لين اخر اليوم و عند المرواح وقفن كلهن
عند المفرق مال الممر ...تمن يطالعن بعض ..
موزة : أكره هاذي اللحظات ...
حمده :أنا أكثر ....
خولة : يالله بنيات اسمحن لي أنا بسير ... خلوني اسلم عليكن قبل لا اسوي مهرجان و عرس و عزيمةوكل شي..
ليلى و نور واقفات بعيد و يترين ... طبعا هن الهنتين ماكانن يشاكن من البعد .. عيال عم ..مطمنات بيشوفن بعض .. بس الباقي بيصيحن ..
موزة : فديتج خوله اذكريني لا تنسيني ... اصبرن بعطيكن شي ..
تفتح موزة شنطتها و اطلع كيس صغير فيه 4 صناديق صغار ... فيهن ميداليات محفور على كل وحدة اسم موزة و اسم المهدى إليها ....
خوله : ما بنساج مولية ..نساج الموت يا الغالية.. انتي اتذكريني ... و اعرفي اني اول ما اخلص بدق لج ..
ليلى : احم احم ..
خولة : بدق لكن كلكن ..
نور : تسلمين موازي ...
يقررن كلهم انه اليوم يمشن ويا بعض .. و يوصلن كل وحدة قراب سيارتها ..أول وحدة كانت ليلى تروح .. ياينها اخوها عسب ياخذها ..
تسلم البنيات عليها و يودعنها ....
ليلى : اشوفكن على خير ... الله يوفقكم .. و ترفعون الراس ..
البنات : و انتي بعد ... فمان الله ..
و عقبها روحت موزة و بعدها نور و تليها حمدة و اخرهم خولة ...اللي قالت حق طارق يتأخر عليها شوي .. عشان تكون اخر وحدة يوشوفونها و عشان ما تصيح .. ومر الأسبوع الأول من عقب المدرسة و قضته خولة كله دراسة و مذاكرة و يا اليوم اللي بيسافرون فيه اهلها كلهم ما عداها هي و سعيد اخوها ..(سعيد طالب في سنه رابعة جامعة .. يدرس شريعة و قانون ( محاماة ).و يتدرب..)..
علياء : يالله خوالي .. فمان الله هلله هلله فعمرج ..
خولة : مع السلامة ... و انتي بعد تحملي على عمرج لا تسيرين أماكن كشخة بدوني .. انزين .. بخبرج قري في الشقة و لا تطلعين ..اوكييه ..
علياء : انشالله عموه ...
بو حميد : ذاكري عدل يا خوله ..أنا ما خليتج تسيرين بيت عمج حق الهياته انتي و شما ... مخلنج اتسيرين لأني أعرف انه سعيد هب فاضلج .. و كله هايت .. و ادري انه لو بغيتي شي ما بتقصر شما وياج ...
سعيد : الله يهديك ابويه ..الحين أنا كله هايت ...يالله شو اسوي هاذي ضريبة النجاح ... شو اسوي اذا محاضراتي لين الساعة 10 فليل ..
طارق : لااااااااه ابويه عليك انته بس .. اخويه مجتهد ..فيه جامعة محاضراتها لين 10
ام حميد : اتحملوا على عماركم ما ابغي اسير و ارد و اشوف مصايب ...
خولة : لا توصين حريص...انشالله بنرفع الراس ...
حميد : لو انه ابويه يباني و ياه جان ما هديتكم ...
خولة و سعيد : لااا دخيلك ...
حميد : هاااااه .. اللي يقول ميّلس على قلوبكم ...
سعيد : لا أنا اقول يعني سير ويا بويه بيحتاجلك .. و بعدين ما في داعي تتعب عمرك ويانا ..
حميد : اتحسبت بعد ...
سعيد : لا تتحسب و لا شيات ..
حميد :شو؟!
سعيد :سلامتك..
و يسافرون عايلة بو حميد و عايلة بو محمد و يتمون البقية مثل ما كانوا يخططون ... و تسير خوالي بيت عمها محمد .. طبعا كانت شما اول المرحبين و راشد وياها بس حمد ما كانت تشوفه هناك إلا نادرا ...و بمرور الايام و باقي عالإمتحانات 5 أيام و عالغدا ... راشد و شما و خولة ..
شما : خوالي كلي بلاج حالفة عالأكل .. و لا تستحين من راشد ؟!
خولة : صار لي حول الشهر عندكم و تقولين لي استحي .. و من منوه من رشود .. رشود مثل اخويه الصغير ...
راشد : اشوى .. الحمدلله قلتي الصغير ... بلاج ؟!؟!
خولة : احاتي الإمتحانات .. تعرفون الفترة هاذي ما اتحمل فيها شي ...
شما : فترة و تعدي ...
راشد : استوي مثلي كوووول ...
خولة : شعليك ..أدبي ..لو علمي جان قلبك فبطنك ...
هاذيج الحزة .. يرن التيلفون و تنش شما ترد عليه ...
راشد : خولة عطيني الأجار ...
خولة : ماشي عالسماط اجار ...
راشد : بلاها هاذي الشلقا ما يابته ... و لا يابت الغاف بعد
راشد : مالا .. مالاااااااااااااااااااا .. مالووووووووه .. و صمخ جلاب ...
راشد : بسير اييب الأجار .. مسودة الويه جنه يبالها كلمتين .. بتحصلهن ..
خولة : خف عليها لا تشرد ...
راشد : تشرد ..
خولة :أصلا محد مشرد البشاكير من بيتكم غيرك ....يسير راشد المطبخ عشان اييب الاجار و يتناشبله مع البشكارة شوي .. لأنها أصبحت من هواياته ...
تيلس خولة على السماط بروحها ... فجأة يدخل ولد عمها حمد ...
حمد : السلام عليكم ...
خولة : عليكم السلام و الرحمة .. هلا .. ما تبى غدا ..
حمد : شو مسويين ؟!...
خولة : صالونة سمج ... هامور و في دياي جان تبا ..
حمد : يالله بغير و برد لكم ...
خولة : اغرفلك ؟!
حمد : يبتسم ... لو سمحتي ...
خولة : اسمح ..و ليش وما اسمح ...
حمد : شموووو وين ..
شما : وراك ؟!.. خير
حمد : وينج ؟
شما : ارمس امييه دقت تسأل عنكم .. و عن عيال عمييه ..
حمد : هييييه ...
يدخل هاذيج الساعة راشد و هو معصب و مفول و حالته حاله : الله يغربلج انتي و هازبند مالج ...
خولة : بلااااك؟؟
راشد: انازعها من اهنه لأنها مايابت الأجار تييني من هالصوب و تقولي هازبند مالي ..الله ياخذج وياه ...و الله ..
حمد : رشود كم مرة قايلك لا تتناشب وياها ...
راشد يطالعه بنص عين: .. بخبرك ما تبغي غدا ...
حمد : خوله .. سعيد ما بيي يتغدى ويانا ..
خولة : ما دقلي اليوم و انا عيزت و أنا أدقله يا غالق تيلفونه يا ما يرد ...
حمد : ما دريبه قال بيي .. هب من عادته إنه يتأخر... يرن مبايل حمد ... يطلع اللي داقله سعيد ..
حمد : سعووود .. وينك .. بتستوي هنتين و نص و أنا الصراحة ما تعودت اتغدى ويا صلاة العصر ..
سعيد : عسى ما تغديتوا ... أنا عند اللفه .. ياينكم ..
حمد : لا تبطي و إلا تراني ...
سعيد : لا لا لا ... دخلت .. يالله باااي ..
حمد : باااي ..
حمد : هاذوه يا ي... بيدخل الحينه ..
شما : خولة بلاج ؟!... خولووووه ...
خولة : ما ادري ..راسي داير ..
شما : ..طلعتي في الحر .. أزمة ؟!؟!..
خولة : .....
راشد : خووولووووه .. بخبرج لا تموتين ...
شما : رشوووود ..شو تموت انته بعد ..
حمد واقف هب عارف شو يسوي ..و شما زايغة .. راشد موقف حذال اخوه ... زين منه شال عمره ..
شما : حمد اركض حجرتيه و هات الجهاز ... أزمة ربو .. عند الشبرية بتلقاه ...
خولة يغما عليها ...
شما : حموووود أركض ....خولوووه خلج واعية ..
شما : رشود هات ماي .. ماي بسرعة ..
راشد : انزين .. انزين ..
حمد على الدري يركض حجرة شما و يدور الجهاز مال خولة ...يلقاه و يوديه ...ويوم نزل يلست شما تركب فيه طبعا عقب ما نششت خولة و قومتها بعد ما كثرت الطراقات و رششت المياه على ويها ..و هي تركبه كسرت جزء منه من الزيغة ... ساعتها يدخل سعيد ..
سعيد : السلام عليكـــ .... شو مستوي ... خولوووه بلاج ؟!؟!
شما : مادري .. أزمة ربو . تعال ركب الجهاز بسرعة ..
سعيد : في جزء منه خربان ...
راشد : ما بغى يخترب إلا الحينه ... سووا شي ..
شما : حمد ... حمد .. وينك ..
حمد واقف وراهم مب قادر يقرب منهم خايف يستوي شي حق خولة .. مب قادر يقترب لأنها بدون وقاية و ما يبغي يحطها في موقف محرج ..
شما : حمد في وحدة من هالسدات في حجرتيه بتحصل الدوا اللي شراة مال امييه .. سر اركض هاته ..
حمد: وين ... اي سدة اي مكان ...
شما :صوب الباب ....
خولة : خلاص ..أنـ..ـا ..بخـ..ـير ..
يربع حمد حجرة شما و يدور في السدات و ينبش ... و يطالع .. ما لقى ..بجى له سدتين ما فتحهن ....فتح الأولى نبشها ما لقى فيها شي .. طاحت من هاذي السدة صور ...صور شما اخته لابسة فستان و مسوية تسريحة و كاشخة ... حذالها .. حذالها ..خولة شاف صورتها .. تجنن ما كان يتوقعها جذه ..جميلة ..ملجة سالم على عليا اختها..انطبعت صورتها فباله .. فجأة افتكر انها تحت و بحاجة للدوا فتح اخر سدة و لقا فيها الدوا نزل يركض ..
حمد : شما يودي ... خذي ..
شما : خولة ..اخذي الدوا ...
خولة : اقولكم انا بخير ..بخير ..
سعيد : اخذي الدوا ...بخبرج قومي بوديج المستشفى ..أنا بسير اشغل السيارة و انتوا هاتوها ..
راشد : اوكييه ...شمو وين عبيكن بييبهن لكم ..
شما :فوق ورا باب حجرتيه ..
سعيد يطلع من صوب ... و راشد من صوب ما يتم غير شما و خولة و حمد ..
شما : ليش ما تاخذين الدوا ...
نزل راشد و على الدري سمعهم ....
خولة : انا بخير أزمة و عدت .. و المستشفى ما له داعي من الأساس ...
حمد يفتن على بنت عمه خولة : خولووووه اقولج اخذي الدوا ..و بسج لا تكابرين ما فينا يستوي عليج شي ...و المستشفى بتسيرينه ..
تنصدم خولة من رمسة حمد .. هب متوقعة .. فاجأها .. حمد اللي ما كانت تسمع منه شي غير السلام عليكم .. ذاكرتي .. وين شما .. حطوا غدا ..تمت ساكته ... ضايقها اسلوبه ..و راشد ما صدق اللي تسمعه أذنه طول حياته حمد كان جاف في معاملته مع بنات عمه اللي فسروا تصرفاته على اساس انها تكبر ..و غرور ..
أما حمد .. فهو هب مستوعب اللي سواه .. هب عارف شو اللي خلاه يتصرف جذه و تكون ردة فعله جذيه .. اكتشف لحظتها خوفه عليها ..تم واقف مسمهر..سرحااااان ..و ضايع ..دخل سعيد: يالله تعالوا ...
خولة نشت من مكانها : سعيد انا بخير برقدلي شوي .. و بستوي زينة و سيرة المستشفى مالها داعي و قلنا أزمة و عدت عشان أنا اطلعت خاري في الرطوبة ..
شما : خولة هالمرة ما كانت مثل المرات القبلية لازم تسيرين ...
سعيد : خولة فديتج .. قومي خلينا نسير .. و الله احسن لج ..
خولة : لا استهدوا بالله و ايلسوا اتغدوا ... و اذا كنت تعبانة وايد بخبرك ..
سعيد :.. لا حول و لا قوة .. بتسيرين ..
خولة : سعيد .. فديتك .. و تتطالعه بنظرة طفولية ما يقاومها
سعيد : مثل ما تبين ...
تنش خوله عسب تثبتلهم انها بخير و تغرف حق سعيد و حمد .. و هم واقفين يطالعونها ..
خولة : هذا لك يا حمد .. دياي .. سمج .. أكيد سمج .. و هذا صحنك ..سعيد خذه .. وتقوم ..
شما : طول حياتج عنيدة ...
تسير خوله حجرة شما و تطيح على الشبريه عسب ترتاح ... و تفكر في رد فعل حمد .. اللي كانت غريبة .. و اللي زعلت منها .. بس ما حبت تبين زعلها منه بأنها غرفتله غداه ... أما تحت عالسماط ...
يتبع >>>></font>
رد مع اقتباس
مواقع النشر (المفضلة)