<font color='#000000'><p align=center><font color=#990033>لجزء 39

</font>منال ويا رفيعه في الصاله

منال يالسه تشرب عصير واتشوف الكوب: رفوووووع
رفيعه: هلا
منال تبتسم: سلامه بتسير وبتخليني بعد 3 اشهور العرس
رفيعه: هذي الدنيا منال كلن يمشي في دربه(اطالع الباب).آآآآآه يالدنيا
منال تحاول تغير الموضوع وتفكرفي سالفه ثانيه: آآآآه يالدنيا وابويه عليج يالعييز ع منوه انتي طالعه عمي بو ظاعن اشب عنج ..كع كع كع

رفيعه: بالله عليج بتصكين لرقعج بهل الكتاب ع راسج ها اللي ناقصني وحده اتفلسف عليه
منال: سيري ولي
رفيعه اطلع لسانها: بولي اوكي بس تعالي تشكي ...(تقلد منال بطريقه اضحك)..رفوع سلامه بتعرس بتخليني بعد 3 شهور

منال: ههههههههه غربالله بليسج اوني عاد انا اللي ارمس جيه
رفيعه: هيه عيل شوه
منال: تهبين الا انتي

وفجأه سمعت صوت سياره وبعد ما وايقت منال من الدريشه شافت سياره ناصر....وتمت يالسه محلها وسمعت حد يصارخ ربعت اطالع اخوها ورفيعه خافت بعد وسارت وراها ....ويوم طلعت

ناصر: منال تعالي بسرعه
منال بخوف: هاه شو فيك شو مستويبك
ناصر: خلي عنج الرمسه وطلعي شنطتي من السياره
منال فتحت الباب وشلت الشنطه مثل ماآمر عليها اخوها وشافت ظهر واحد منوه هذا يا ترا

ناصر: مايد عطني ايدك
مايد: اخ ريلي تعورني
منال بخوف : بسم الله شو مستوي مايد شو بلاك ليش ريلك منتفخه جيه ومجبسه بعد
رفيعه اللي كانت واقفه عند الباب وتوايج وتقول في خاطرها: الله يستر
ناصر: قومي عني خليني اشله
مايد يتاوه ويلوي ع ولد عمه وهوه يشله
ناصر: ما شاء الله مثقلك
مايد ويضحك ع عمره ويبوس ناصر ع خده: حبيبي يا بابا
ناصر ينقع من الضحك ومنال ما قصرت ضحكت من الخاطر ودمعن عيونها
ناصر: غربالله بليسك تضحك عسواد ويهك

ودخل ناصر ووراه منال وشاله في ايدها عكازة مايد ...وساروا صوب الصاله اللي كانت يالسه في رفوع بس بعد ما دخلوا سارت الطابق الثاني توعي سلامه

رفيعه وبعد ما دخلت الحجره لان الباب كان مفتوح
رفيعه: سلامي قومي الساعه 11 ونص بسج خستي ياختي
سلامه: رفوع دخيل الله خليني ارقد حرام
رفيعه: قومي يالله اول مره اشوف عروس وترقد لين هل الوقت
سلامه ترفع راسه وتقمز بعينها: عروس بطرانه هههه
رفيعه: ما جذبتي الساع يالله قومي وعيني خير وتنشطي طاعي عيونج شقا غاديات اللي يشوفج يقول اندونسيه...
سلامه: ههههههههه بسم الله ع عنوني
رفيعه: يالله عن الدلع وقومي بسرعه
سلامه : اوكي

سارت رفوع وطلعت من الباب الثاني صوب امها وخالتها صوب المطابخ وسلامه قامت من الرقاد وسارت تبدل..ومنال وبعد ما طرشت ليندا تودي شنطت ناصر صوب حجرته يلست ويا اخوها وولد عمها

منال بستغراب : شو اللي استوى
ناصر: تخبري ميود
مايد يشوف ولد عمه بطرف عينه: ناوي تفشلنا ويا هل الراس
منال: شو مايد ؟ ليش ريلك مجبسه
مايد بمكر: طحت من الشبريه
منال تبا تضحك بس ما تقدر
ناصر: قص عليها ويا ذا الراس
مايد: خلاص حرمنا الله يسلمج ونحن في العين سرت صوب العوهه ويا واحد من الربع ودخلت علي شاحنه من درب ثاني وانا مادريت بعمري الا ريلي منكسره
منال واللي كانت تسمع مايد وهيه متفاجأه: يا ويلي ويالاه ما تشوف شر ان شاء الله والحمدلله ع السلامه
مايد: الشر ما اييج يا بنت العم ...وتسلمين والله
ناصر: احين شو اسويبك وين اوديك
مايد: لا والله شو بعد اتسويبي بتم يالس هنيه
ناصر بستهتار: لا والله يا حبيبي نسيت اليوم ملجه سلامه
مايد: افففف لا لا تقول نسيت اتصدق
ناصر: ما تنلام من هل التنكي اللي فراسك
منال: حرام عليك نصور وايد اتسبه
مايد: شفتي وانا صاكت عنه حليلي
ناصر: حلك حلوك دب من يوم انت صغير
مايد يضحك بستهتار: وخاطر هل الشنبات وهل اللحيه بصكت وانا ولد ريال
منال وقامت من محلها: الله يعينكم


وسارت منال صوب البنات في الطابق الثاني وناصر يلس ويا مايد وهوه محتار ما يعرف شو بيسوي به فاتصل لراشد وقاله عن مايد وعن حالته وام راشد اول ما سمعت الخير اختضت واستهمت ويت ويا ولدها نهيان وحصه يت وياهم بالمره تختصر الدرب والوقت ...وراشد اللي وده يروح اييب اخوه بس اليوم ملجه سلامه اليوم سلامه بتكون لغيره لسعيد بن حميد

سار نهيان ويا امه واخته وبعد ما وصلو بيت محمد سارت ام راشد صوب ولدها وحصه شافت اخوها وسارت صوب البنات ولقد سلامه ورفوع ومنال يسولفن ويضحكن

حصه: بوووووووو
الكل : بوين
حصه متغيضه: اخ يالخيانه الشله كلها هنيه
منال: لا ناقصنا الريم وحرمت اخويه عنود
حصه: ههه وكل وحده منهن في زرب وين بيين
الكل: ههههههههه
رفيعه: هوش
سلامه : شدراني في المخبل
حصه: اشوف يا سلام سلامي شو هل الحلاه اب اب خوزوا عنها
سلامه: عروس لازم
منال اطلع لسانها: ملجه مب عرس اوكيك
رفيعه: بسكن قومن صلاه الظهر

واذن الظهر والكل صلا الحرامات يلسن في الصاله وناصر ومايد ..ونهيان يلسوا في الميلس ويا بو سهيل وبعد ما حطوا الغدا ترخصت ام راشد ونهيان ..بس مايد وصا اخوه اييب له ثياب لانه ما يقدر يتحرك وبيبات هل اليومين في بيت عمه(هههههه يباها من الله)وبعدين يلسوا يتفاولون وبو سهيل وفي هل المرحله من العمر بدا يتعب وايد وما يقهر اليلسه وايد ..وسار صوب حجرته بع ما سلم ع الحرمات وسار يرقد ...وفات الوقت بسرعه وتقريبا ع حدود المغرب يا سالم واحمد وامهم موزه دبي وام راشد ردت صوب بيت نسيبها ويلست ويا الحرمات وبدوا يجهزون للملجه اللي كانت بس بين الاهل وما عزموا ناس وايدين ...سعيد اللي حالته حاله ومرتبش وفرحته ما تنوصف في عمره ما فرح قد هل اليوم .....وخذ اجازه من المستشفى .....وطلع شوي ويلس في الحوي ويا الاهل وهم فارشين المنامه ويلوس ..ويتقهويين معدا خالد ..اللي كان يحوط في الحاره وبالمره يشيك ع سيارته اللي كان تايرها امبنجر

ام سعيد: فديت المعرس محلاه
سعيد: عيونج الحلوه لا خليت منج شيخه الحرمات
نوره: يا عيني يا عيني يا يزوي ومدحوج
سعيد يهد ع اخته: شوه يزوي ليش لا تكون كانت تلعب وياج في الحاره
نوره: يا بوي امي وادلعها حرام
ام سعيد: عسى الله لا يحرمني منكم وشوف عيالكم وعيال عيالكم
سعيد يبتسم: ا ن شاء الله عيل بو سعيد وينه
نوره: بعده في العزبه اليوم بيي من وقت وبعد المغرب بيسير صوب العرب
سعيد: زين وخالد
نوره: يحوط هنيه وبيرد
ام سعيد:زين يا ولدي ما تبا اتقهوى
سعيد: مشكورخ الغاليه بسير ارتاح قبل ليأذن
ام سعيد: ارتاح يا بعد عمري
وقام سعيد دخل البيت ونوره يلست تحرتق محلها
نوره: يا ربي يا من ابتلا شله ادلعوني سعدني وانا لا
ام سعيد: وانتي بعد اندلعج
نوره اتبزا: لا لا انتوا ما ادلعوني كله خالد وسعيد
ام سعيد: يا امي غلاتكم وحده لا خليت منج
نوره تلوي ع امها: ادري فديتج ياربي شي فخاطرج بسير اتعدل
ام سعيد: سيري بنتي يعلني افرح فييج
نوره : ان شاء الله

وبعد ما قامت نوره بتدخل البيت اذن المغرب وقامت ام سعيد اتصلي وسعيد اللي سار صوب المسيد وتلاقى ويا خالد هناك وواحد من الربع وبعد ما صلوا وصل بو سعيد من العزبه واتسبح وبعد ما ارتاحلو شوي والساعه قريب الثمان

ام سعيد: يا سعيد يا سعيد
سعيد يصارخ وهوه في حجرته: يا لبيه يا امايا
ام سعيد: تعال بدخنك
سعيد: ياي ياي ..

وبعد ما تغتر سعيد واتعطر بدهن عود ووقف جدام المرايه دقيقه يشوف نفسه سار صوب امه
ام سعيد محتشره ولابسه عباتها: يا ولتي ماتت الضو وانا الا ازقرك
سعيد: سمحيلي كنت اتختر

ودخنت سعيد ويا بو سعيد وادخن وخالد بعد ما خلص سار الصاله وشم ريحه العود وتخبل الا اسولي ضو حيه

خالد: شو هل الضو ميته وين ميري
سعيد : ابطينا يا خوي العرب يتريونا
خالد: ادري انك معرس ومستعيل وانا ابا اكشخ شوه اخوا المعرس وشو دراج يمكن اكون المعرس المرتقب
ام سعيد: ان شاء الله وافرح فيكم يميع ان شاء الله

وفي هل الوقت يابت ميري الضو وادخن خالد وطلعت نوره وادخنت

نوره: يا حبيبي شو هل الزين شو هل الزين حافظ ع المعرس
سعيد يتحنحن: احم احم شو رايج اخطف الطير ولا
نوره اطالعه من فوق لين تحت: لا الصراحه مزيون وحيلو وتموت
خالد: وابويه عليج انا يالله قوموا يالله هبابنا نوصل .....

وطلعوا هل حميد من بيتهم سعيد ويا خالد في سيارة سعيد وبو سعيد وام سعيد ونوره في سياره وساروا صوب بيت العروس وفي هل الوقت منال ورفوع وحصه يا لسات يتعدلن في حجره منال وريم تحوط مره صوب حجره سلامه ومره صوب حجره منال وشواخي اللي محتشره وتبا حد يسحيها

شيخه: آآآآآآآآآ منو بيتحيني
منال تحط ايشدوا: سيري خلي ليندا اتسحيج
شيخه مبوزه: دبه كله ليندا تو انا بنت البتكاله
ريم ورفوع يبحلقن في شويخ: من قال
منال اطالعها بطرف عينها : اقولج سيري
شيخه عصبت وسارت صوب سلامه وكان الباب مفتوح ..وراعيه الصالون يالسه اتسرح شعرها بعد ما حطتلها مكياج..سارت شيخه صوب سلامه...

شيخه مبوزه وفي عينها دمعتين: تلامي
سلامه: هاه حبيبي شو تبين
شخيه: توفي تعلي كته محد ايتحيني
سلامه وبحنان: فديتج خلاص فالج طيب انا بسحييج
شيخه استانست وسارت صوب حجره منال فتحت الباب وشافت منال وطلعت لسانها ...: لا لا لا لا لا لا تلامي بتحيني
رفيعه: ولخيبه عروس خليها ترتاح تعالي انا بسحيج
شيخه: مابا
رفيعه: حبيبي انتي تعالي ما تبيت تسيرين وتلعبين
شيخه وبعد تردد: اندين

سارت شيخه ويلست جدام رفوع ومشطت شعرها ومنا لوالبنات بعد ما خلصن سارن يطقسن ع الحرمات في الصاله وبعدين ردن لسلامه بعد ما خلصت منها راعيه الصالون وراحت ...وسعيد وابوه واخوه ويا عيال محمد الفلاسي وعيال ثاني بستثناء راشد....وبنص معارفهم والشباب وبعد ما سلموا قربوا بالرياييل صوب الفواله وقهووهم ويابولهم العصير ... في هل الوقت دخل عليهم راشد سعيد اتفاجأ من ييته متأخر وفي نفس الوقت ماكان حاط في خاطره من سالفته هذيج المره في ميلس منصور...وبعد ما سلم راشد ع عمومته وعيالهم وع الرياييل....سار راشد صوب سعيد يسلم عليه

راشد وبصعوبه ما اتوقعونها: مبروووك يا المعرس
سعيد يبتسم ابتسامه خفيفه: الله يبارك في حياتك وعقبالك ان شاء الله
راشد: القمر واحد وماغيره قمر
سعيد حس ان راشد ينغزه بالرمسه صكت عنه وراشد سار يقعد حذال عمه ويسولف وياه سعيد اللي تم متغيض من رمسه راشد وفي نفس الوقت قال (مب مهم انا يوم خطبت البنت محد قالي انها مغصوبه عليه ..وامبونها مخطوبه لك يا راشد وانت اللي ضيعتها من ايدك وبعد شوه يايي اتنغزني بكلامك بعد ما ظيعت القمر خلاص فاتك اللي فاتك ولا تحسد غيرك ع موتته اليمعه وخلاص ليش احرق اعصابي انا معرس ولازم الضحكه ما تفارق ويهي....وبعد ما اذن العشا وترخصوا وساروا صوب المسيد وصلوا والحرمات بالمثل ...وبعد الصلاه وبعد ماردوا يلسوا شويه يسولفون والحرمات يسولفن والبنات وسلامه ونوره ورفوع الريم ومنال والصوص يسولفن ويضحكن ....ام سهيل سارت صوبهن وقالت لسلامه تنزل والباقيات يتمن محلهن

منال: امايا حرام والله ابا انزل
ام سهيل : ماشي يلسي ويا خواتج
حصه: امايا وانا بعد ابا انزل ما فيها شي الحرمات مب غرب
ام سهيل : ولو مب غرب صكن الدعنه
سلامه تبا تقنع امها: امايا فديتج وخاطري تخليهن
ام سهيل ماقدرت تكسر خاطر بنتها: انزين تنزلن وتيلسن في الصاله الثانيه
الكل: اوكي


نزلت سلامه ويا البنات ...صوب الصاله لين ما يتعشن الحرمات والرياييل في هل الوقت كانوا يتعشون سلامه اللي كانت لين الحين ما تحس بعمرها عروس مجرد احاس عابر وعادي ...وكانت طبيعيه وااااااايد..

وبعد العشا ام سهيل يت صوب البنات وقالت لسلامه تي وراها ..وسارت سلامه ويا امها وسلت ع الحرمات والكل انبهر بجمالها كل العاده كانت بيضا وعيونها سود ومسرحه شعرها وفستانها له حلاه خاصه بييج وعليه تطريز بالعنابي وشكلها كان رهييييب... ولبستها ام سعيد الطق والساعه والدبله وبعد ما يلست شوي والحرمات بدن يترخصن


يتبع</p>


&nbsp;</p></font>