ع البال والله ما نسيناك

[وهج الخاطر]

<font color='#000000'><p align=center><font color=#990033>لجزء 36

</font>ونرد لمايد اللي تلاقا ويا خويه ناصر اللي تم يتحرطم ومحتشر عليه وليش اتاخرت بياذن علينا المغرب في الدرب ....وخذوا خط العين ووصلوا بعد الاذان بربع ساعه ..ساروا يصلون وحطوا ثيابهم في بيت يدهم وبعد ما سلموا ع امهم موزه ساروا صوب عمهم احمد اللي كان في العين مول ....يالس ويا الربع في الكفيه ومن عاده شبابنا احمد ومايد وناصروهو شباب ما عليهم حركات ولا مغازلجيه وما يحبون هل الحركات اللي مالها داعي ..وفضلوا ييلسون شوي ويا الربع لين آذن العشا ويسيرون يتعشون في اي مطعم ويا الربع وبالمره يسهرون ....ناصر بشر عمه ان سلامه انخطبت وفرح من خاطره ...وخبروا امهم موزه ....وسالم اللي تلاقى وياهم في المقهى ....


في دبي حصه ردت بيتهم لان امها بروحها بعد ما ردت من العزبه وسلامه يلست ويا منال وامها وابوها في الصاله وبعد ما تعشوا اتصلوا في سهيل ...وسلموا عليه وع العنود ...اللي من درت ان سلامه انخطبت والملجه بتكون بالخميس احتشرت ..

عنود ترمس سلامه : عن العيله وتريونا انرد
سلامه: شو اسوي هل المعرس مستعيلين ومب بيدي
عنود: اوهوه شو يعني ما بتصبرون
سلامه: خلاص قرروا يكون بالخميس
عنود ترمس سهيل: شوفهم بينقعون فينا خيانه
سهيل: يا حبيبتي الا ملجه يعني العرس ما بيفوتج
عنود: بس
سهيل: لا بس ولا شي بندي يالله وخلينا انسير البحيره
سلامه: هههههههه عنود برايج يالله ما نروم ع اللي بيسيرون البحريه
منال فزت من محلها: يا ويل حالي ع المانيا قوليلهم يصبرون بسير وياهم
سهيل ياخذ السماعه من العنود ويرمس سلامه: سلامي قولي للعنز عن الرزه المرتزه
سلامه : ان شاء الله يالله مع السلامه

وبعد ما بندت سلامه ....

سلامه: يقولج يا العنز عن الرزه
منال: لا والله دوم يسبني الله يسامحه
بو سهيل: اخوج ويسولف وياج
منال: سوالف طل رمسته ما تسر الخاطر
ام سهيل: انا بقوم ارقد
بو سهيل: وانا بعد من اصبحت مارقدت
سلامه ومنال: تصبحون على خير
ام سهيل وبو سهيل: وانتن من اهل الخير
منال: شواخي قومي يالله رقاد
شواخي: مابا بتوف هل البلم
منال: لا والله احلفي بس انتي
شواخي: اف حتله اتكتي يالاند
سلامه: ههههههههه
منال: علموا وكبر راسج يالمعفوصه ولا عنز وانتي اضحكي اخ بس لو اضربج بالسود لين ما تخيسين
سلامه: لا حرام
منال: مانروم نضربها لا يهد شيبتها علينا كله ولا امه
سلامه اروم اخوزها شوفي وتعلمي كيف اتسوين كونترول للمعافيص قصدي الفروخ
منال: يالله يالساحره
سلامه : شواخي حبيبي تعالي حذالي
شواخي قامت من محلها ويلست حذال سلامه وهيه اطالع التيلفزيون: حبيبي ما تبين اسيرين العزبه
شواخي: هيه ابا الوح
سلامه: اذا ما نشيتي من وقت الساعه خمس باباتي بيروح وبيخلي شواخي راقده
شواخي: لا ابا اتير اند البوس
سلامه: اوكي والبوش يترين شواخي
شواخي: تو اتوي ابا اكب بوس
سلامه: ان شاء الله بتركبين البوش كلهن سيري رقدي عشان تنشين من وقت
شواخي قامت من محلها: اندين بلوح

سارت شيخه ترقد عشان اتنش لان موتها البوش وتحب اتسير ويا ابوها ومن يوم هيه صغيره متعوده

منال مبققه عيونها في سلامه: هب هباج الله يالساحره شو مسويه بالبنت
سلامه: وصفه من وصفات الساحرات بس سريه
منال: اونه لا واللي ضحكني يوم اتقول بكب بوس ...حشا بتركب البوش كلهن اتقول ناقه ولا بعير .....
سلامه: ياهل شو تبينها
منال: لا عفريته الحوار يطفر منها يوم يشوفها ويا كشتها
سلامه : بس عاد حرام عليج ياهل
منال: ما قول غير الله يعينك يا سعود ع العيال اللي بتيبهم بيتبطرون وبيخيسون من الدلع
سلامه: كيفي بعدين احترمي الريال شوي اسمه سعيد مب سعود شوه يلعب وياج في سكيك الحاره
منال : هذا وما ملجتي تحايزين عنه جيه الله يعين يوم بتاخذينه مادريبكن انتن كل ما تنخطب وحده فيكن اختقت علينا لا تطنزين ع خطيبي ومادري شوه واحترمي الريال صدق تبطرتن
سلامه: اوكي بنشوف شو بتسوين يوم بتنخطبين
منال: حرمنا يامي مابعرس بيلس هنيه وبجابل المعفوصه ام قرنين
سلامه: كيفج انا بسير وبرقد
منال: سيري انا بطالع الفلم وبعدين برقد
سلامه: تصبحين على خير
منال: وانتي من اهل الخير

وبعد مارقدوا وبالباجر وما بقى ع الملجه غير اسبوع بالضبط سعيد اللي نش من وقت لان دوامه المسا عزر ع امه اتسير وياه سوق الذهب وياخذون الدبله وطقم الماس

نوره: ورفجه تودوني وياكم طلعوني
سعيد: ماشي بتخلين البيت بروحه
نوره: شوه لكون حرس البيت وانا مادري ودوني
ام سعيد: يا ولدي خلها اتسير ويانا
سعيد: لا يعني لا صكي الدعنه
نوره: حرام والله حرام خلود هنيه
سعيد: توا الناس حبيبتي خويلد من فير الله مجابل هل الشركه
نوره: انزين وبتخلوني بروحي مب زين
ام سعيد: لا تسوولنا حشره ومحنه خلها اتسير
سعيد: امرنا لله يالله بسرعه وان اتاخرتي بنروح عنج خمس ثواني وبس
نوره: حشا يا العيله ثانيه وبس بييب عباتي وشيلتي والشنطه

سعيد وامه ركبوا السياره وتريوا نوره وبعد ما ركبت ساروا صوب السوق وتموا يتحوطون في كل المحلات بس للاسف سعيد ما يقتنع باي شي ....وهوه ما شاء الله عليه ذويق ويحب يختار كل شي بحرص ويكون مناسب

ام سعيد: شو رايك بهل الدبله غاويه
سعيد: لا لا ما تناسب مب حلوه
نوره: يااخي عيزنا من الصبح ونحن نفتر في السوق بيأذن علينا وحظرك ما اخترت
سعيد: حد قالج تيين
نوره: اووووووهوووووووه كيفك يا خي بيذلنا ع الييه
سعيد: اقول تعالن بنسير صوب داماس هناك بلقا اللي اباه
ام سعيد: اف لابج
سعيد: لو الدبله بمليون بشتريها وترخص ع سلامه
نوره: يا حبيبي يا حبيبي ما نروم ع الحب
سعيد: جب لا صنج طراق يطيرج سرلنكا
ام سعيد : امش انت وياها

ساروا صوب داماس وسعيد اللي تم يدقق في كل دبله ويشوف شو الاحلا منهن في الاخير لقا ثنتين اقتنع فيهن بس احتار شو يختار منهن ....

سعيد: امايا شو رايج شو الاحلا هاي ولا ام قلوب
ام سعيد: مادريبك عروسك وانت حر خذا اللي تباه
سعيد: وهذا انا ابا رايج وتقوليلي حر
ام سعيد: كيفك
سعيد خلاص باخذ هل الدبله والطقم الحلزوني اللي ع الواجهه وساعه شوبارد
نوره: بل هذا كله الا ملجه خير لين الزهاب
سعيد: تستاهل الغاليه
نوره: وانا ما استاهل حرام عليك ان الكل يابلي هديه نجاح الا انت
سعيد : اتذل الحبيبه...انتي باخذلج هل التعليقه ام قلوب
نوره: حلوه زوينه مقبول فيها
سعيد: وتشكين في ذوقي
نوره: ابد ما صدقت تاخذلي شي ..بعد اشك
ام سعيد محتشره: يالله يا بوي خلصنا اذن علينا ابوك واخوك بيون البيت وما بيلقونا منوه بيغديهم
سعيد: خلاص خلصنا


سعيد بعد ما قال للبايع ايلف كل شي في علبه ودفع بالمستر كارد وتقريبا خسر فوق 55 الف وهوه يشرى

وبعد ما خلصوا ساروا البيت وصلن الحرمات وتغدوا وبعد الغدا طلع سعيد من البيت وسار صوب المستشفى ..وفي الدرب اتصل به سهيل من المانيا سلم عليه وبارك له .....وبالنسبه لراشد اللي من سمع بخطوبه سلامه وملجتها تغير حاله كان قبل لا يعرف يسير صوب ميلس منصور وييلس وياهم هوه ومايد وناصر وسعيد وخالد بس في هل الفتره محد شافه وحتى البيت ما كان يرد له الا نص الليل يحوط ع البحر كل يوم ويرد وع هل الحال وكمل له اسبوع لاحظوا الربع انه قاطعنهم واتصل في منصور وقاله اييهم الميلس بس رفض وبعد ما حاول وياه واقنعه منصور قرر يروح ولو انه ماله نفس ومب متبرض لهم ....وفعلا التقا ويا ربعه في الميلس وشاف سعيد موجود وخالد وياه ...راشد اللي من شاف ولد حميد بدا الحقد يتحرك في داخله ووده لو يكفخه طراق او يتخلص منه بس حاول يحشم عمره لانه عند الربع وما يبا يتمشكل وياهم راشد وبعد ما تقرب من سعيد وهوه واقف وقف له سعيد ..ومد ايده بس راشد ما مدها ...فضل يسلم عليه من دون حب خشوم ولا مد ايد

راشد: شحالك سعيد
سعيد مستغرب: بخير الله يعافيك وانت شحالك وشحال الاهل
راشد بتكبر: انا بخير وسهاله والاهل انت ادرى بهم ع فكره مبروك
سعيد وما عيبه اسلوب راشد : الله يبارك فيك

سار راشد ويلس حذال منصور وحمدان ويلس وياهم وسعيد اللي تم مبهت وما يعرف شو قصد راشد من كلامه انته ادري بالاهل يا ترى شو سالفته ويت ع باله سلامه واذكر ان راشد كان خاطبنها بس هوه اللي فسخ الخطبه يا ترى هذا اللي مضيجبه ....بس هذا قدر ونصيب ...حاول ان ينسى السالفه بس ما قدر حس ان راشد بدا يكرهه وهوه مهما يكون ما يحب اي حد يحط في خاطره منه ..ولو ابعد الناس له وقرر انه ينسى مل شي ويلخلي الواقع يمشي في دربه

يتبع</p>


&nbsp;</p></font>