<font color='#000000'><p align=center><font color=#990033>الجزء 29

</font>وبعد ما نشت منال والريم سارن صوب البنات ....منال كانت اتحس ولأول مره انها تسوي شي غصبن عنها والريم بدورها كانت محتاره يا ترى شو سبب الحزن اللي فيه منال واللي يحير يوم سمعت ان ظاعن خطبها المفروض تفرح وتخطط للعرس ...منال واول ما شفنها البنات

نوره: هلا منال
منال تبتسم: هلا نواري ...شحالج
نوره: يسرج الحال الغاليه وانتي شحالج
منال: طيبه
نوره: وينج من الصبح
منال: كنت راقده
رفيعه: بسج رقاد شوفي ويهج منتفخ
منال: شو اسوي تعبت ورقدت
سلامه: خلوها ترتاح
عنود توايق من الدريشه: ياربي تعالن شوفن
البنات سارن صوب الدريشه: شو
عنود: سهيل ايول يا ولي فديته
منال: هههههه فديت اخويه
سلامه: شو نهيان شغال اليوم الهرم ما يا يسلم علينا
منال: تعالي بتصل به ايي يسلم وعمومتي بعد مايوا يسلمون
حصه: هيه والله تولهت عليهم
سلامه: اوكي بتصل به

سلامه اللي كانت ماسكه مبايلها ويلست ع الغنفيه وبعيد عن البنات تبا تتصل في نهيان ايي يسلمن عليه ...ياترا نهيان ايول ومبايله وياه ..يمكن ليش لا ويمكن عند حد ثاني

سلامه : الو يا القاطع
راشد: الو
سلامه منصدمه وتبا تبند التيلفون ع ويه بس ماقدرت:..........
راشد وعرف انها سلامه: السلام عليكم
سلامه: وعليكم السلام والرحمه
راشد: شحالج ....سلامه
سلامه وبرتباك: بخير وين نهيان
راشد: ايول وتيلفونه عندي
سلامه: اوكي مع السلامه
راشد: لا تبندين اصبري
سلامه خايفه: شو شو تبا
راشد: اباج
سلامه: خير
راشد وطلع برع البيتوعند الباب عن الحشره: سلامه انتي ...
سلامه: ادخل في السالفه وبدون مقدمات
راشد: لين الحين زعلانه
سلامه وبرتباك: من شوه ازعل
راشد: من سالفه جديمه مابا اذكرج بها
سلامه بعصبيه: هه جديمه وما تبا تذكرني وانت الحين اذكرني يكون في علمك شي استوى من زمان وانتهى وخلاص انتهى كل شي تامر ع شي بعد مع السلامه(وتسكر السماعه في ويه واتحرطم)

منال اتشوف سلامه مرتبكه وسارت صوبها ويلست حذالها ...عنود والبنات اللي سمعن سلامه اتهد ع راشد بس ماعرفن منوه اللي تهد عليه .....

منال: اتصلتي في انهيان
سلامه: لا خلاص مابا
منال: ليش عطيني التيلفون وبتصل به
سلامه: اندوج(وقامت من محلها)

منال ردت تتصل في نهيان..وتفاجأت براشد يرد عليها واحين عرفت السبب اللي خلا سلامه ترتبك

راشد وتحسب سلامه اللي متصله: الو سلامه سمعيني
منال: انا منال مب سلامه
راشد: السموحه منج بنت عمي شحالج عساج بخير
منال بتعب وصيق: بخير وين نهيان
راشد: نهيان ويا الشباب ايولون
منال: اوكي وعمومتي احمد وسالم وينهم
راشد: بعد ايولون ويا الربع شي فخاطرج
منال: لا بس امبوني اباهم ايون صوب الباب اللي ورا نبا نسلم عليهم
راشد: هيه ان شاء الله بقولهم تامرين ع شي بعد
منال: لا تسلم
راشد: فمان الله
منال: الله يحفظك

حصه: شو رمستي انهيان
منال: هيه بيون بعد شوي

عنود: ظنكم تعشوا ولا
ريم: بعدهم مب الحين اشوفينهم مرتبشن
رفيعه: حظهم والله ربشه
نوره توايج من الدريشه وترمس رفيعه: هذا اللي واقف حذال الخيمه خويه سعيد ...وخالد اللي ويا نهيان ايولون
رفيعه: هيه ما شاء الله عليهم
حصه: ما شاء الله ...تصدقين انصدمت يوم عرفت ان سعيد دكتور
رفيعه مستغربه: والله ما اصدق
نوره: لا صدقي دكتور ويعالج الاهل
عنود: زين والله


في هل الوقت رن تيلفون سلامه والرقم رقم نهيان بس ما حبت اترد ...عطت منال التيلفون..ورمست نهيان وقالهم انه عند الباب الصغير او الخلفي ..هوه وعمه احمد وسالم وسارت سلامه وحصه ووياهم منال يسلمن...البنات فرحن لشوفة عمومتهن بس الغريب اللي لاحظوه منال هاديه وصاكته ونهيان اللي كل شوي يسبها ام كشه والدبه بس كانت كووول ولا ترد عليه

نهيان: بنت عمي بلاج غريبه انتي مريضه
منال تبتسم: ماشي سلامتك
احمد: بنت اخويه اذا تعبانه قولي بوديج المستشفى
سلامه: يا عمي مافيها شي ارهاق
حصه بدلع وتمثل: اخ راسي يعورني (وتساند ع الباب)
سالم:هههههه مجذبج يالصوص علينا هل الحركات
حصه: وربك بعد ادلع ..بشوف شو بتسوون
نهيان يغلط حصه: ادلع
سلامه: هههههه بسك عاد
منال: عمي احمد ليش ما تباتون عنا اليوم والصباح رباح
احمد: كم منال عنا الا وحده وفالج طيب بنت محمد
منال: فالك ما يخيب
نهيان: طاعوا هاي وانا ما تبوني
سلامه: افا عليك ومنوه بيلعب وبانا كيرم ويصرق الحبوب
حصه: ههههههه حليلك
سالم: خير ان شاء الله بنبات عنكم وبنخلي السهره صباحي بس الحين خلنا انسير صوب الرياييل والربع بروحهم
سلامه: اوكي


وبعد ما ساروا الشباب صوب الرياييل ودخلن البنات عند الحرمات وفي هل الوقت ...حطوا العشا .....وتعشا الكل ..ولعد العشا تفاولوا بخيته خت محمد ترخصت وسارت صوب بيتها..وام راشد اتصل بها راشد عشان يروحون البيت ...وبعد نص ساعه ....اليازيه وبنتها سارن ويا بو سعيد وخالد وسعيد تم ويا سهيل يسولفون هم والربع في الميلس ...وام حمد بعد سارت البيت هيه وبناتها وعفرا ....ام ظاعن ترخصت قبلهم لان وراهم درب العين وبعد عزمت الحرمات ع خطوبه ولدها .....الكل روح لبته سلامه ومنال وحصه تم روحهن في الصاله بعد ما دخلت ام سهيل ترقد وامهن موزه بعد سارت ترتاح ...وبو سهيل بعد ماساروا الرياييل ..سار يرقد والشباب بعدهم يلوس يدقون سوالف..

حصه: هذيلا متى بيون كملت 11 ونص
سلامه: الشباب وياهم وتبينهم يسيرون
حصه: ونحن مالنا حق نبا نسولف ويا عمومتي
منال بلا نفس :اصبري
حصه: طاعوا هاي شو ه السلطه اللي حلت بنا
سلامه: عيوز اتحرطم بتصكتين ولا
حصه: عمج العيوز
سلامه: سبي عادي
حصه: هه بوايج من الباب بشوفهم هنيه ولا لا

سارت حصه صوب الدريشه اللي حذال الباب وهيه توايج وترمس البنات : ماشوف حد غير سهيل ونهيان وعمومتي
سلامه: اكيد
حصه: اكيدين محد ساروا
منال: بيون روحهم اصبرن
سلامه: دامنهم ساروا بطلع لهم وبنيلس برع
حصه: هيه الجو روعه
سلامه: اوكي الصوص سيري صوب ليندا وخليها تيب لنا الزوليه بنفرش المنامه وبنيلس

منال يالسه اتجلب في القنوات: ........
سلامه: منال قومي ويايه
منال: سمحيلي مالي نفس
سلامه : ع راحتج

طلعت سلامه وسارت صوب خوها وولد عمها وعمومتها وكانت مطلعه قصتها وبدون ما تنتبه وقبل لا توصل عندهم شافت سعيد وقاف وياهم وتلاحقت عمرها وردت قبل ليشوفها اي حد وحدرت داخل

منال: ليش رديتي
سلامه: اف شو هل الحاله
منال: بلاج
سلامه: سعيد وياهم وانا طلعت
منال: وعسى ما شافج
سلامه: مادري لا ماظني


وبعد ما ردت حصه هزبتها سلامه ..وفي الواقع سعيد لمح سلامه طالعه بس اجهال ..ولا حب يلفت نظر الشباب وهوه يطالعها ..وبعد ما حس انه طول في اليلسه ترخص من الشباب وسار صوب بيتهم ورد ولقا الكل راقد..ودخل يرقد ..بس اللي غث نومه الرمسه اللي سمعها من انهيان ان راشد كان خاطل بنت عمه بس ماذكر منوه هيه ...وتمت الدنيا اتلف به والافكار تحوم فوق راسه وهذا خلاه يقرر مصيره ....وبعد ما اصبح الكل واليوم الجمعه ....وبالسبت تبدا امتحانات الثانويه العامه وفي نفس الوقت امتحانات البنات والكل شاد حليله ويبون هل اليومين يفوتن ع خير ....سهيل اللي بدا يجز لبيته وبعد والريم اللي اجلوا الملجه والعرس لين ماتتخرج وبعد ما خلصوا الامتحانات ...وبدوا اجازة الصيف...سلامه اللي كانت تعاون اخوها في ترتيب البيت ....

سهيل وبعد ما صلا المغرب رد البيت لانه بيسير ويا سلامه السوق وهذي حالتهم من اسبوع ...منال اللي بعدها ع حالها لا ترمس حد وصاكته واذا بترمس بتقول كلمه اوكلمتين.......

سهيل: يالله سلامه نسير
سلامه: اصبر
سهيل: اوكي اترياج في السياره
سلامه وبعد ماطلع سهيل: منال
منال تقرا المجله: هلا سلامه
سلامه قومي ويانا
منال بضيق: مالي بارض والله
سلامه : عشان خاطري قومي
منال:........
سلامه: لين متى بتمين جيه
منال: اوكي انزين بروح وياكم
سلامه فرحانه: والله
منال تضحك: لا اقص عليج انا يالله بسير اييب عباتي
سلامه: اوكي بسرعه قبل لاتي شواخي وتلصق فينا
منال : اوكي

سلامه سارت صوب اخوها في السياره وقالت له ان منال بتسير وياهم وهوه اللي فرح لخته لان شاف ان حالها تغير من شهر وهيه لاتسولف ولا تلعوزه مثل ما كانت..ساروا السوق وتشروا اللي يبون من اثاث وفرش وزينه واكسسوارات للبيت ..وبعد ما اثثوا البيت وخلصوا وهذا ما بقا عن عرس سهيل غير اسبوعين والكل مرتبش العروس في حاله والبنات في حاله ....سلامه ومنال ..سارن السوق ويا حصه والريم وتشرن كل اللي يبه ويابن فساتينهن من عند المصمم وحجزن عند مشكبار والعروس اللي مرتبشه ويا البروفات ويا الكوافيره والمصمم...سلامه كانت اتسير وياها كل يوم هيه والريم اما منال فكانت كاره الدنيا ..وماتبا تيلس ويا حد او تسولف وياه فظلت القعده في البيت ..وطبعا في هل الاسبوع بالذات وبالثلاثا ناصر ومايد بيردون البلاد وبيودعون امريكا للابد ....فراق من الخاطر ...

يتبع</p></font>