<font color='#000000'><p align=center><font color=#990033>الجزء التاسع عشر
</font>سار معرسنا وحب راس امهاته وبعد ما سلموا الرياييل طلعوا .. وخلوا سهيل اروحه سلم ع العروس و...ام سهيل جربت له الدبله ويا طقم الماس .....ولبسها والبنات فرحانات .....
منال: اقول سلامه
سلامه: هاه
منال وذايبه محلها: شوفي هل اللقطه محلاها تجنن
حصه:هههه يا ويهج اص
منال: متى ياربي متى بكون مكانج عنوده
رفيعه: افا عليج بس احين اذا تبين
منال بحماس: والله والله شو بسويين
رفيعه: شو بسوي بيوزج راعي الدكان صدقيني بيستانس يوم بيلفى له سيلانيه حلوه مثلج
منال: عمج ام ريلج
رفيعه: سبي خالج يالبقره
ريم: بس انتي وياها ..شوفن امهاتنا شقا صاكات ع المعاريس
سلامه: هيه والله
منال: اقول انا بسحب امايه وبطلعها من الصاله
ريم: اوكي وانا بحد بقول لمايه ان ابويه يباها
رفيعه : وامكن موزه
سلامه: خليها علي شكلهم عمومتي مستعيلين ويبون يسرون العين
ريم : اوكي يالله ابتدينا
وكل وحده بدت في شغلها وطلعن الحرمات ...حصه طلعت قبلهن ويالسه في الصاله الثانيه اتريا خوياتها ....سهيل وعنود بروحهم
سهيل: مبروك
عنود بخجل وبتموت محلها: .....الله يبارك في حياتك ...ومبروك عليك
سهيل: الله يبارك فيج ...
وبعد فتره صمت مدتها 3 دقايق.....
سهيل: عنود
عنود وتقولفي خاطرها( فديت اللي يزقرني ويقولي عنود): لبيه
سهيل: اذا تحتاجين لاي شي ..هذا رقمي وتعرفينه انا ريلج وان شاء الله العرس بيكون بعد ردة الاهل من امريكا
عنود : ان شاء الله
سهيل: انا بتصلج بين فتره وفتره اذا هل الشي ما يحرجج واظني الا عمي ما عنده مانع
عنود: اللي اتشوفه الغالي
سهيل استانس ..مسرع وما صرت غالي يا سهيل فديتني والله ...:ع فكره..(صكت)
عنود مستغربه وبخجل: شوه..؟!!
سهيل: انتي احلا مما اتصورت والله يوفقنا ويرزقنا الذريه الصالحه
عنود وبدت تستحي اكثر واكثر: عيونك الحلوه..
سهيل اتخبل بس في هل الوقت تفاجأو بحد يفج الباب بقو : بووووووووووووو
سهيل وعنود :بسم الله الرحمن الرحيم
منال: حبايبي يالله بسكم
سهيل: شو تبين انتي
منال: بسك ولا ما تدري انكم كملتوا ساعه يلوس يالله يالله
سهيل يشوف الساعه: والله ...عيل اترخص منكم
عنود برقه: الله يحفظك
سهيل وبعد ما طلع من الصاله ووصل عند منال اللي كانت واقفه اتريا ...حاس اذنها شوي ....
سهيل: شيطانه
منال:طالعه عليك
سهيل: هههههههه ..(وطلع)
منال مستغربه: غريبه ما سبني ...اييييه العروس عيبج السالفه وانا يالسه اترياج
عنود: شو بلاج
دخلن البنات كلهن ....
ريم: عنود عنود قوليلي شو قالج
عنود: عيد ع اليهال
منال: الله يالدنيا استوينا يهال في نظرها
سلامه: عيب عليكن اتخبرنها شوفيها شقا ميته من المستحى
رفيعه: حليلج والله
حصه: هههههههههههه لا ما بتلقا احسن من ولد عمي
عنود وقفت: انا تعبانه بسير ابدل وبرقد
سلامه: ونحن بنسير البيت وانتو رفوه بتسرون ولا بتباتون
رفيعه: لا بنسري ابويه اروحه في البيت ...
منال: اها سلمي عليه وع المناصير وحمده تولهنا عليهم
رفيعه: سلامن يبلغ ان شاء الله
وبعد ما سارت عنود ترقد...والريم سارت غرفتها وبدلت وبسرعه بسرعه صوب الكمبيوتر....سلامع ومنال رد البيت بسيارتهن ويا ام سهيل وابو سهيل وسهيل وشواخي...ظاعن وامه ورفوع ردوا العين وخذوا اغراضهم قبل لا يسيرون صوب بيت العروس ...وكلن توكل وسار لبيته ...سلامه فعلا كانت اتحس بالتعب بس ما تقدر اتخلى عن النت والمنتدى بالاخص بدت اتعلق فيه يوم عن يوم .......وهذي الايام اطوف بسرعه ما يتوقها الانسان ..بدى الكورس الاول ينتهي وراشد ....بدا يشفا من مرضه وما بقى الا القليل ....اما مايد فكان احساسه يتحول لحب لمنال يكبر يوم عن يوم .... نهيان في كل ويك اند ايي صوب عمه في دبي ويبات عندهم لين الجمعه وبالنسبه لسهيل والعنود بدوا يتعلقون في بعض اكثر واكثر ....سلامه والريم ع حالتهن مثل ما هن ع الكمبيوتر ولا يفارجنه الا اذا بيرقدن ....اليوم الخميس بعد المغرب نهيان وسلامه وحصه ومنال في الصاله يسولفون ونهيان ما شا ءالله عليه راعي سوالف وفرفوشي
نهيان: ام كشه هاتي الرموت كونترول
منال اتصد صوبه وبنظره حقد: انت يا الدب عن الغلط
حصه:ههههه يالله اسمعي رمسه اخويه
منال : ما بعطيك
سلامه : منالوه ما فينا للحشره عطيه
نهيان: شو تقصدين يالدوده
سلامه: افا عليك يا نهيان منال الحشره مب انته ...وبعدين شو هل اللقب اليديد الدوده غيره يا اخي
نهيان : اوريدي دوده شوفي شكلج انتي شوه ما تاكلين
حصه: موووووول
نهيان مستغرب: ليش؟
سلامه: بس جيه
نهيان: خبله انا اذا ما كلت شي اتشوفيني اتحرقص محلي من اليوع
الكل يضحك : هههه
نهيان ايسير صوب منال واير الرموت كونترول من ايدها: اسمعي رمسه اللي اكبر عنج ...صدق ام كشه
منال تغيظت: رده رده يالله بسرعه
نهيان: ماشي يعني ما شي
حصه: خلك منها بدل اشوف شو في القنوات
منال بحزن: حرام والله عليك ابا اشوف الفرسان الحلقه الاخيره
نهيان: موتي ماشي
سلامه: نهيان انا بعد ابا اشوف الحلقه
نهيان بتردد: اندوج فكينا(رد الركوت كونترول لمنال).....
منال: ههههههههه بعده الفلم اصلا
نهيان متغيض: يالله ياربي يا سيدي يا معبودي اتكونين يالسه في الحوي وتيج القطوه وتلصق في كشجج
منال بكل بروده: هههه الود ودها اصلا هل القطوه ا ن شاء الله تشوه ويهك واحلم عاد باللي تاخذك يا الدب
حصه: فديت اخوي شوفي محلاه طالع ع المرحوم زين وجمال ويويل بعد شو اكثر من جيه
منال: طاعوا شو تقول
نهيان: شوه ما تصدقين اوكي ...اقول هل الاستيريو شغال
سلامه: هيه
نهيان وقف: عيل اصبرن ولا اقول برايه .....تعالن ويايه
حصه: وين بتودينا
نهيان: انتي قومي وبس يالله بسرعه قومن براويكن شي
منال بفضول: يالله انا بيي
وطلعن البنات كلهن ويلسن ع الدري برع وفي هل الوقت ام سهيل عند هيره يا رتهم وبو سهيل وشواخي في العزبه وسهيل عند الربع..سار انهيان صوب سياره شغلها ووقفها حذال الباب فتح باب السياره والبنات مستغربات هذا شو يسوي ...المهم سحب المسجبه من تحت الكرسي وحط شريط عيضه .....وشغل المسجل وطول عليه وكانت غنيه اهمه ...وبدا ايول جدام بنات عمه وخته وهن منبهرات بيوالته .....ونهيان اللي كان يفتخر بهل الموهبه ويوقف جدامهن وايبس ويغني( اهمه لو كذب اني ما همه غلاي ايجول في قلبه ودمه يبان الحب في نظره عيونه يقول الصدق ولا ولد عمه ) والبنات يصفقن
منال: عاش عاش ايوه يبسه اسرع اسرع ياسلام ...
سلامه : تضحك وتقول استخف الريال
حصه: فديت اخويه انا شوفن محلا يوالته بدخنه بشبه عن الحساد
منال: ما عليج وانا بييب لج الشبه
في هل الوقت ونهيان بعده ايول وصوت المسجل ينسمع في الحاره دخل سهيل بسيارته وتفاجأ بالموقف اللي يصير جدامه وكان يرمس عنود وهوه بعده في السياره
سهيل: هههههههه
عنود: هاه حبيبي ع شوه تضحك
سهيل: تعالي شوفي المخبل نهيان ايول ومسوي حشره في البيت
عنود منبهره: والله زين ...خله ايول في عرسنا
سهيل: افا ليج وانا حبيبج اعرف احسن عنه
عنود: بنشوف
سهيل: اوكي برايج الحين بتصلج بعدي حبي
عنود: اوكي الغالي فمان الله
سهيل: الله يحفظج
وبعد ما سكر عن العنود .....نزل من السياره وفي ايده العصا والبنات خايفات نهيان ما يدري بسهيل انه وراه ....سهيل ايي ويوقف حذال ولد عمه وايبس وياه وبهل اللقطه زال الخوف وبدن يصفقن مره ثانيه والشباب ما قصروا في اليواله اللي يستعرض حركاته واللي ايبس ....بس منال سارت صوب السياره ويلست ع السيت من دون لا يلاحظها اي حد وبندت المسجل ...وفي هل الوقت سمعت المأذن يقول(الله اكبر الله اكبر لا اله الا الله محمد رسول الله )
سهيل: خيبه اذن قم بسرعه
نهيان: بنتوضا
سهيل: توضا في المسيد ...
وركب سهيل ويا نهيان في سيارته وساروا يصلون والبنات بالمثل وبعد الصلاه رد بو سهيل للبيت وام سهيل وشواخي بعد ما سارت اتقول اتحط لها عيش وروبه ودهن وطماط تعشت ورقدت ...وبعد ما اجتمعوا الاهل كلهم غرفوا العشا واتعشوا ويلسوا يسولفون عن بيت سهيل اللي ينبنى وما بقا شي غير الصبغ والاثاث والديكور ...واتصلو باهلهم اللي في امريكا واتخبروا ع احوالهم ......والحمدلله الكل كان بخير وسهاله وبعد ما رمست ام سهيل ام راشد ...
ام سهيل: عيل برايج يا وخيتي مانروم انطول عليكم في مان الله
ام راشد: الله يحفظج ياربي وهالله هالله في العيال
ام سهيل : لا توصيني ع عيالي يا ام راشد
ام راشد: تسلمين والله ...والله يحفظج
يتبع</p></font>
رد مع اقتباس
مواقع النشر (المفضلة)