<font color='#000000'><p align=center><font color=#990000>اختيه المزيون راح الكثير ما بقى الا القليل
</font>
<font color=#990033>الجزء 50

</font>عنود تبتسم: الله ريلي يختي امال ايه
سلامه: ياحبيبي نطر العرج

وفي هل الوقت دخل سهيل

سهيل: اي عرج
سلامه: هلا سهيل
سهيل : اهلين زين يوم يالسه تونسينها
عنود: لا خلاني الرب منها ما تقصر
سلامه: افا عليكم اذا ما نفعت هلي بنفع منوه
سهيل: ما تقصرين بنت محمد
سلامه: لا ما بشروك بشواخي
سهيل متفائل: خير شو بلاها
عنود تبتسم وسلامه اتشوف سهيل: خلاص خاز العوق عنها وردت مثل اول واخس بعد
سهيل: والله الله يبشرد بالخير سلامي
سلامه: اوكي عيل انا بسير عنكم شي في الخاطر
عنود سهيل: تسلمين


طلعت سلامه من بيت سهيل وسارت صوب بيتهم ولقت منال يالسه تقرا كتاب وانتبهت لها منال...

منال: ابطيتي
سلامه: توه سهيل واصل البيت وطلعت
منال: اها زين
سلامه: وشواخي وين
منال: راقده ويا امايا
سلامه: ونويصر
منال: ويا ولد عمه وربعهم
سلامه: اوكي اذا تبين اي شي انا في حجرتي
منال: ان شاء الله


سارت سلامه صوب حجرتها ويلست ترتب الطاوله وتحط الاغراض في ملهن وفي نفس الوقت تشوف شو ناقصنها من ملابس وشنط وعطور وغيره واتفاجأت بصوت رنة اهمه وهيه مخصصتنها لسعيد ...ترددت وما شلته وبعدين رد واتصل مره ثانيه وردت عليه
سلامه:.......
سعيد: السلام عليكم
سلامه بصوت حزين وخفيف: وعليكم السلام والرحمه
سعيد: كيف الحال حبي
سلامه: طيبه
سعيد: افا يا سليم تزعلين علي الله ياخذني اذا زعلتج
سلامه بخوف: لا بسم الله عليك عدوينك ان شاء الله حرام ل اتدعي ع عمرك
سعيد: استغفر الله العظيم ...يعني يعني مب زعلانه
سلامه بمكر ودلع: لا زعلانه ونص
سعيد يتحنحن: ان زعلت ارضيك وكل عمري فداك والزعل مزعله يالغالي عليك لو تامر بروحي بتنقاد برضاك ولو تطلب عيوني في لحظه تجيك..
سلامه: ياعيني ع صوت ما شاء الله عليك
سعيد: يعني رضيتي
سلامه:......
سعيد: سلامه ما يهون عليه زعلج والله انج غاليه وانتي تدرين بغلاتج عندي صدقيني
سلامه: وانت غالي لا تنسى
سعيد: لو غالي ما بتزعلين عليه بهل السرعه انا ابا اونسج وخفف عليج صدقيني بس ندمت وطلعت بايخ
سلامه تضحك: فديتك انت احلا بايخ شفته
سعيد: تفدج العافيه الغاليه شو بعده الحلو زعلان
سلامه: للاسف هيه
سعيد: كيف اراضيج يعني حيرتيني
سلامه: تصرف ومشكلتك يا اخي ..باي

سكرت سلامه عن سعيد قبل لا تقوله فمان الله او شي فخاطرك ..سعيد ما استغرب من سلامه لانه يدري انه اتغلا عليه وقرر ينهي الزعل باسهل طريقه بس اجلها لباجر لان الوقت متاخر والخطه صعب اتنفذ..

سلامه رقدت بعد ما خلصت الترتيب كله ومنال يلست اتشوف التيلفزيون لين ما وصل ناصر البيت وهوه بعد يلس يسولف ع اخته وترخص وسار يرقد ...وفات هل اليوم بسرعه ...والايام تركض والدنيا ادور يحل النهار ويغطيه الليل وراشد ع حاله في بوظبي ويا على المهيري وباقي الربع وحتى لو فارق دبي وبحر جميرا اللي بشوفته تهدى اعصابه بعده يتردد عليه ويسير صوب كاسر الامواج ويوقف سيارته ويفكر بهل العالم وبمستقبله يا ترا لين متى بتم عزوبي...سهيل اللي بسني عرست وقريب بييب له ولد ولا بنت يونسونه في حياته وسلامه آآآآه يا سلامه راحت من ايدي خذاها سعيد ..اسميه الا حضيض وحتى لو فكرت اخط بنت عمي الثانيه ما بقدر اوفيها حقها وانا قلبي امتكته وحده ثانيه ......

وهذا حال راشد في سيراته ويياته وهمومه وافكار في بوظبي بعيد عن هله واصحابه ..وبالباجر العصر الساعه 5 بالضبط بتوقيت دبي ...سلامه يالسه ع المنامه ويا منال وشواخي تلعب ويا القطاوه في الحوش تتونس شوي وام سهيل ويا العنود...سمعن البنات صوت سياره ...

منال: منوه اللي ياي هل الوقت وموقف سيارته برع
سلامه: مادري يمكن حد يايب شي ولا بطاقه عرس
منال: يمكن

وتفاجأن بلبناني يدق الباب وحذاله باقة ورد جوري كانت تشكيلتها ع شكل قلب

سلامه: منال احين منوه بيسير له
منال: مادري اكيه ليندا

وتأشر منال ع ليندا واتقولها تسير اتشوف الريال وسارت

اللبناني: هاي
ليندا تبتسم:.......
اللبناني: هذا لمدام سلامه
ليندا: اوه مدام سلامه (خذت الباقه)..ثانكس
اللبناني : يو ويل كم

سار وركب سيارته وليندا سارت صوب سلامه ومنال اتشوف الباقه

منال: ياااي اجنن الا رووعه
سلامه: اصبري بنشوفها لمنوه
منال: يارب اتكون لي
سلامه: من منوه ان شاء الله
ليندا: مدام سلامه هذا حق انتي
سلامه: انا
ليندا: ييس فوريو
سلامه: اوكي سيري شوفي شيخه
ليندا: اوكي
منال : من قدج اقول من منوه
سلامه: مادري بس شكلها كيوت وراعيها ذوقيق
منال: غريبه منوه اللي بيطرش لج باقه
سلامه: مادري

سمعت سلامه صوت مسج صوتي..واتصلت ع 123 وكان المسج من سعيد وهوه يقول..مشكلتك انك قلب حساس تشره وتتغلا وتزعل..مشكلتي مولع بك بلا قياس وان ما سألت اشتاق واسال ...(وان شاء الله تعيبج الباقه)

سلامه تبتسم بفرح وع خدودها علامات الخجل ومنال اطالعها اترياها اتقولها شي ...

منال: حوه من منوه المسج
سلامه مبهته: سعيد
منال: والله شو فيه
سلامه بخجل: عن الرزه بس عرفت انه هوه راعي البطاقه..وايه فديت خشمه
منال تضحك: ههههههههه هاااااااي اتفداه الحرمه هههه (واتسوي عمرها معصبه)منقود عن البدو اخت سلامه
سلامه: لا والله ريلي وع كيفي لو اتفداه من اليوم لين باجر لا خلاني الرب منه
منال: الله يخليلج اياه
سلامه: يارب ويخليلج غاليج منال
منال تبتسم وقلبها ماكلنه الهم: ان شاء الله

سلامه يلست اتشوف الباقه واتشم الورد لان رحيته جنان ومنال ردت اتفكر في غاليها منوه غاليها ظاعن اللي خسرته وهيه ما كانت تملكه ولا ابوها اللي راح ..

ومن الصوب الثاني مايد اللي كان في جميرا وتحديدا شاطئ جميرا ويلس يتامل البحر وهوه سرحان بتفكيره ويحاول يتخذ قرار..نهائي يا ترا هذا الوقت المناسب عشان اخطب فيه منال ...بس كيف ارمس ناصر ولا امايا او اصبر شوي بس انا صبرت وايد وايد وايد ....وانا ما اتحمل اتكون لواحد غيري واتكرر ماساة راشد...انا لازم ارمس ناصر واشوفه

اتصل مايد لناصر وقاله انه يترياه عند بحر جميرا ولازم ايي والسالفه ضروريه..

ناصر وبعد ما اتصل فيه مايد طار صوب البحر وهوه خايف شو السالفه الضروريه اللي بيقولها له مايد

وبعد ما وصل ووقف سيارته ونزل لخوه ...وسلم عليه ويلس حذاله

مايد: الله يا ناصر محلا البحر
ناصر: حلو بس حلاتة تسحبك للغدر
مايد: هيه والله صدقت يا نويصر بس احلا شي انه يستقبل همومك
ناصر: عقهن بحر
مايد: هههههه وانت الصادق
ناصر يحط ايده ع جتف مايد ويشوفه: هاه مايد شو السالفه الضروريه
مايد: منال
ناصر: وانت يايبني اتقولي منال
مايد: ناصر صدقني انا ما اقدر اتحمل اكثر من جيه وانت ادرى بحالي
ناصر: .........
مايد: يا ناصر ارحم انسان روحه متعلقه بايدك
ناصر: كيف يعني
مايد: ارجوك كلمها وخاطري
ناصر: لا تنسى يا مايد ان ابويه ما صار له شهرين من توفى ومب حلوه ارمسها بهل الموضوع وبهل الوقت
مايد: ناصر السالفه مافيها خطبه او عرس انا ابا اضمنها مابا حد يخطفها من ايدي وجدام عيوني اخاف ماساة راشد اتكرر وانا مابيدي شي ..
ناصر: صدقني مقدرك يا اخي وان شاء الله اذا قدرت بقولها
مايد يشوف ناصر وفي عيونه برق اسى وخوف: ان شاء الله
ناصر: اوكي بقولها وما يصير خاطرك الا طيب
مايد يبتسم ويرد يجبل صوب البحر ويسكت وناصر بالمثل ويلسوا ع هل الحال لربع ساعه وقده الاذان بيأذن المغرب ركب كل واحد منهم سيارتع وساروا يصلون ووبعد المغرب وفي بيت بو سعيد بالذات رد خالد من المسيد وبو سعيد من العزبه ويلس حذال ام سعيد ....اللي كانت يالسه في الصاله ويا بنتها نوره.....

انتظروا التكمله

</p></font>