<font color='#000000'><p align=center><font color=#990033>الجزء 47

</font>سهيل: شيخه البنات شواخي ليش اتصيح
شيخه تصيح:........
سهيل يحط ايده ع راس شواخي: شواخي
شيخه ترفع راس وفي عيونها دموع تقطع القلب: تهيل ابا ابويه وين ابويه
سهيل يرفع راسه ويشوف السما: ابويه بيي يا شواخي اصبري
شواخي: لا بخت يقول باباتي موت تو يعني موت
سهيل انصدم باي حق الدريول يرمس بهل الرمسه: لا حبيبتي باباتج بيي لا تصيحين
شيخه مستغربه وعيونها ادمع: اندين بت تو يعني مات
سهيل وحس بلسانه انشل مره وحده: يعني يعني سار عند الله
شيخه: وانا بسيير ويا باباتي ليت ماوداني العدبه انا بعد احب الله وايد
سهيل يبتسم بحزن: والله بيحب اذا سويتي اللي يرضيه
شيخه: تيف ياني مافهمت
سهيل: يعني اطيعين ماماتج واللي اكبر عنج واتصلين وتقرين قرآن وايد وتحبيين ماماه ع راسها كل يوم
شيخه تضحك: اندين بعد باباتي بحب لاته كل يوم
سهيل وقلبه يتقط ع اخته شو بسوي بهل البنت يا هل وما تدري بعلوم الدنيا
شيخه: انديت تهيل ابا اتيل عند البوت بتريا باباتي
سهيل: شواخي شو قلت من شوي كيف نطيع ربنا يعني شو نسوي
شيخه: احب لات ماماتي وباباتي واسمع لمستهم واتيع الكباليه واصلي واقلا قرآن
سهيل: شاطره احين سمعيني لاني اباج اطيعيني
شيخه: اوكي يالله
سهيل : انا مب سهيل انا بابا سهيل اوكي شواخي قولي بابا سهيل واذا تبين اي شي قوليلي اوكي
شيخه: اوكي بابا سهيل (وتبتسم وتحب اخوها وتربع)
سهيل : وين تبين
شيخه: بتيل اند القتوه ما حتيت لها نميه
سهيل يبتسم من رمسه شواخي ورد لميلس الرياييل ومرن ثلاث ايام باصعب مما يكون ببأس حزن الم واسى ع الفقيد الشواخي الوحيده اللي نجت منها ولو انها تحس بالحزن وتيلس اتريا ابوها كل يوم عند الباب وما تفارجه الا اذا نامت ع الدجه اتريا واتريا يا ترى ابويه وينه ليش ما ايي ويوديني وياه العزبه والسوق انا احبه وايد وايد وبطيعه عشان الله يحبني وبطيع ماماتي ومنال ولو انها تهزبني واكيد سلامي حتا ليندا وبخش ما بضاربهم بس باباتي يرد بس وينه وينه وانا تعبت اترياه كل يوم وما ايي ليش ما اشتاقلي وانا اللي بموت من الشوق ليش ما حن لفراقى وانا اللي بموت لفارقه وينك يا ابويه وينك

شواخي اللي كانت تفكر بهل الكلمات طول الوقت وبعد ما مرن هل الايام الثلاثه والبيت يسوده الحزن بس كان فصيح لدرجه كبيره ما اتوقعونها ..شواخي بمرور كل يوم تسوء حالتها لا تآكل ولا تشرب نست كل شي يمكن كانت تهتم به كانت تفكر برمسه سهيل انه ابوها سار لربه بس متى بيرد ...كانت تيلس في حجرتها وتاخذ السياده من حجره امها سياده ابوها اللي اتشوفه يصلي عليها كل يوم وهوه اللي علمها كيف اتصلي وكيف يسجدون حاولت اطبق اللي تعلمته وهيه يالسه وقابضه جزء عما اللي يتعلومون عليه قراءة القرآن في المدرسه وتحاول تقرا ومن تسمع الآذان تصلي في اليوم الخامس من بعد موت بو سهيل .....مرت سلامه اتشوف حال شواخي استقربت لقت الباب ملايم وسمعت صوتها ترمس وحاولت اتصوخ رمستها واتشوف من طرف الباب كانت اتشوف اختها رافعه ايدها للسما

شواخي : يارب يرد باباتي انا احبه وايد يارب طول بعمل باباتي وماماتي وتهيل ونتول وتلامي يا رب مابا ماماتي تدعل عليه يارب منال ما اتالخ اليه ..يارب تخلي باباتي يحبني ويلد البيت واسير وياه العزبه ..

سلامه كانت تسمع حرف حرف واتصيح اختها وهيه ما تعرف ان ابوها توفى تفتقده لهل الدرجه لا تاكل الا بالغصب ولا تلعب مثل قبل حتى منال ما تغايضها شو اسوي ياترا بتسوء حالتها او انها بتستحمل اللي ما قدرنا نستحمه صعب انك تفارق انسان غالي ع قلبك

سلامه سارت صوب منال اللي كانت يالسه في حجرتها وتقرا قرآن عن روح ابوها وناصر اللي بدى يكون جدي من اليوم قرر انه يكون قد المسؤوليه ويعاون سهيل لان سهيل انسان مزوج وقريب بيكون عنده ياهل وبيكون عايله وهوه مب ملزوم يجهد نفسه وينفق ويعتني بعايلتين ولازم هوه يعاونه في كل شي ...وام سهيل ع حالتها تحاول اتقون قويه ..بو سهيل راح ولو الحزن والدموع ترد الغالي بس للاسف هذا قدر ومكتوب له والله يرحمه

وعنود ع حالها ما تقدر اتحرك وهيه فخاطرها تيلس ويا امها مريم وويا منال وسلامه وتحاول تغير جو البيت بي ما باليد حيله وهيه ممنوعه نهائيا من الحركه ....سهيل يحاول يرضي الكل يداري ع حرمته وع اخواته وامه ...

مرن اسبوعين وجو البيت ع حاله....وفي هل اليوم وع آخر الاسبوع يا نهيان من العين وقيل في بيته وبالعصر سار ويا اخته حصوه صوب بنات عمه لانه تعود يلوفهم وهذا شي اساسي في حياته ...وبعد ما وصلوا بيت محمد الفلاسي ودخلوا وما لقوا حد في الصاله

نهيان: وين العرب حووووه يا ناس
حصه بصوت وتهمس لخوها: اوش يا اخي مب زين
نهيان يشوف الصوص بطرف عينه ويغمزلها يصاصرها: انا ياي اسوي رفريش للبيت وانتي تبين تخربين علينا صكتي احسن
حصه: ما تنرام ويا ذا الوجه
نهيان: الاخت ماخذه الجنسيه السعوديه وانا مادري
حصه: وشو ايوه باخذه غصبن عن ذا الوجه يا وجهك
نهيان يمسك ويهه ويكلم شواخي: وش به وجهي مزينه يق الطير من السما ما اخرب مزيون
حصه ترمسه بطرف خشمها: مداح نفسه يباله رفسه..تعال نسينا هل البيت وينهم مالهم حس

نهيان يلس ع الكرسي ولقا جدامه القهوه والجاهي: اقول سيري نقريهم وانا بتفاول
حصه: اوكي

سارت حصه صوب حجرة سلامه وما لقتها ومنال بعد ما كانت موجوده سارت صوب حجرة ام سهيل وبعد ما لقتها وخطفت ع حجره شواخي ولقت شواخي طايحه وحذالها ام سهيل شواخي كانت تعبانه يمكن عوقها مب جسمي بس الظاهر نفسيتها تعبت وامها تحاول تهديها ...

حصه بعد ما دخلت وسلمت ع ام سهيل ويلست حذالها ع الشبريه وشواخي طايحه وما تحس بالدنيا

حصه: شواخي الحلوه شو اخبارها تعالي وين القطاو ما شفتهن
ام سهيل : اي قطاو الله يخليج البنت مول تعبانه حالها ما يسر بالمره مادري شو اسويبها
حصه: وديتوها الدختر
ام سهيل: عوقها ما يعرفوله الدخاتر بنتي راحت يا حصه مادري شو اسويبها
حصه: وخبرتي سهيل ولا ناصر
ام سهيل : ما رامولها يا بنيتي
حصه تحس بالحزن ع حال شواخي طلعت من الحجره وسارت صوب الصاله

نهيان: هاه وينهم هل الدار
حصه: والله ظني البنات عند حرمه اخوهن وامي مريم ويا شواخي في الحجره
نهيان: خير شو بلاهم
حصه: شيخوه تعبانه مول نفسيتها تعبت حليلها يا هل
نهيان: الله يرحمك يا عمي كانت متعلقه فيه وايد
حصه: الله يرحمه وصدقت بس شو نسوي محد راملها
نهيان يمشي صوب حجره شواخي ووراه حصه: ما عليج عندي الحل
حصه: بنشوف يا بو الحلول

دخل نهيان وسلم ع حرمه عمه

نهيان: عمتي اذا بترخصيني بودي شواخي للمطوع
ام سهيل: يزاك الله الف خير يا ولدي بس ما بتروم لها
نهيان: ما عليج منها بوديها

<font color=#990000>see you<img src="/ubbc/smileys/0011.gif" align=absmiddle border=0></font></p></font>