<font color='#000000'><p align=center><font color=#990033>لجزء 46
</font>جين: مدام لوك (وتاشر ع منال)
حصه تشوف منال وهي تراقب حالها قامت ويلست حذالها وحطت ايدها ع شعر منال: منال
منال:.....
حصه فضلت انها تصكت لانها تدري بحال منال وبعد شوي وع الساعه 8 وصل الريوق جنت فتحت الباب وخذته من الممرضه ..وحطته ع الطاوله وقربته صوب منال اللي كانت منسدحه وحصه تحاول ترفع السرير وتصلب منال
حصه: منال
منال:........
حصه في تقول في خاطرها ...يا ربي شو اسوي ماقدر اغصبها واقولها كلي ماقدر اقولها انسي وابوها اللي متوفي يارب يعدن هل الايام ع خير يارب افرج عليهن مثل ما فرجت عليه ابويه مات والحمدلله عايشه والله عوضني بهلي واخواني ......
في هل الوقت وصل مايد واللي كان واقف عند الباب ويدقه..سارت جنت تفتح الباب
جنت: مدام هسه مستر مايد
حصه ومن درت انه مايد سارت له عند الباب: ييت في وقتك ياخوي ماعرف شو اسوي
مايد بخوف: شو شو استوى خير منال فيها شي
حصه: لا بس حالتها ما تسر يااخوي من نشت وهيه صاكته واتصيح ولا ترد عليه
مايد : ما عليج انتي احدري ولبسيها شيلتها عشان ادخل
حصه: اوكي
دخلت حصه صوب منال ولبستها شيلتها وزقرت مايد اللي يلس ع الكرسي اللي حذال شبريه منال وهوه يشوف الاكل ...وفي خاطره ينكنت بس وين ماله نفس وقلبه ضايج ع حاله اهله ......
مايد: منال اسمعيني
منال ع حالها وصاكته ولا ترد:.........
مايد يشوف الدريشه: في يوم كنت وانا بو 10 سنيين ساير ويا ابويه المزرعه الله يرحمه ...وكنت ياهل مايعرف اي شي ...تدرين كنت اموت فبويه احب السيره وياه وين ما سار صوب المزرعه ولاصوب ربعه ولا حتى صوب المسيد وكان ينبهني ع كل شي كان يقول يا ولدي هذي الدنيا ان ما تحديتها ماتقدر اتعيش فيها هذي الدنيا دواره ومصايبها كبيره هذي الدنيا عيشها مب ع حسابك ولا ع حساب غيرك عيش وفرح اللي وياك كان يقول الله يرحمه وقبل لا يتوفي بيوم يا مايد هالله هالله في هلك في اخوانك وفي اختك ورضا والديك خلك ريال ينشد الظهر فيه قرم .....تدرين يوم مات شو استوا بي
منال لفت براسها و تشوف مايد وكان يبتسم بحزن ..و منال كانت تقوله شو استوا وهيه ما تقدر تنطق باي كلمه...
مايد: يوم دريت انه توفى وكنت اشوفه ع فراشه جدامي مايتحرك بلا روح وويه مزرق حست ان روحي انقبضت ماادري شو يعني مات كيف يموت الانسان ماكنت اعرف انه راح بس اللي عرفته ان ابويه ويايه لو ما اشوفه لو ما اتبعه وين سار و من وين يا ابويه هذوه هنيه اتشوفينه ابويه فقلبي ما مات ابويه ولو ان روحه انتقلت لرب العالمين بعده عايش في قلبي واذكر رمسته لين الحين
منال تسمع رمسة مايد ومستغربه وتقول يمكن هذا يقول حيه لان ابوه تفى من زمان وانا ابويه اللي راح عني ولا ودعته
وقطع تفكيرها صوت حصه
حصه: يالله منال شربي هل الحليبه واستهدي بالله واطلبيله الرحمه
منال: مابا
مايد: لا لازم تشربين ولا شويه
منال : ابا اسير البيت ابا امايا واخواتي
مايد: اشربي اول ولا ماشي سيره
حصه: عشان خاطري منال اشربي ع الاقل هل الحليب وكلي السندويج
منال: كيف اكل وابويه متوفي
انصدم الكل وحصه اللي بدت تعصب
حصه: اسمعي اذا انتي خسرتي ابوج انا اللي خسرت اكثر عنج ابويه مات وخلاني ولحقه ابويه الثاني عشت والله حارمني من احت اتونس وياها اخويه اللي بحسبه ابويه ظربه السرطان انتهت الحياه جدامي يلست اصيح واقول انحكم عليه بالاعدام لا يا منال هذا وانا عايشه ولو هل القلب ما يستحمل عشت حشان اخواني وامي عشان اهلي اللي عوضوني عن اللي فقده للاسف طلعتي ضعيفه ضعيفه (وطلعت من الحجره)
ومايد اللي ماقدر يصكتن اخته بس في نفس الوقت هل الكلام بيفيد منال ...منال من سمعت حصه قررت انها اتحدى ..شربت كوب الحليب ومايد فرح من شافها اتعاند ....وقالت لجنيت اتحط كل اغراضها في الشنطه
مايد : وين تبين
منال: هلي يتريوني
مايد: وهم يتريونج يالله بسير باخذ الرخصه من الدكتور وبيي
طلع مايد ولقا حصه وطالعها بطرف عينه وسار بس فرح لرمستها ..وبعد ما طلعت منال من المستشفى وردت البيت ويا حصه ومايد حدرت الصاله وهيه متروسه من الحريم اللي يايات يعزن وسارت تيلس حذال امها تواسيها وحصه يلست حذال منال ...مايد رد صوب ميلس الرياييل ويلس ويا اخوانه ....
الشيخه اللي كانت راقده في حجره ابوها وما تدري بالدنيا لانها تمت سهرانه نشت وسمعت اصوات غريبه في البيت طلعت صوب الصاله وتفاجأت بالحرمات اللي في الصاله وحست بجوا البيت غريب شو السالفه يا ترا ليش هل الحرمات كلهن هنيه ..سلامه شو بلاها ليش ويها محمر وعيونها منتفخات امايا ليش حالها جيه ومنال والغريبه انها صاكته ومن عوايدها اذا شافتني ادخل ع الحرمات اتهد عليه اتسويلي محظر ...
شواخي سارت ويلست حذال سلامه
شواخي : تو متوي
سلامه واتشوف اختها بنظره شفقه: ماشي حبيبتي
شواخي اتحس بجو البيت غريب وتذكرت شي : اوه انا بتيل اند البوس ويا باباتي (وربعت صوب الدريول)
وبعد شوي اتصل بخش
بخش: الوه يريد ماما مريم
سلامه: قول شو تبا
بخش: هذا بنيه تيخه سوي قرقر حق انا يريد سير عزبه
سلامه: لا توديها
بخش يصارخ: ماما هذا بنيه يصرب انا ويا مكشه
سلامه: خلا ص انا بيي بشلها
بخش: سرعه ماما
بنت سلامه عن الدريول واتصلت في سهيل وثالت له ان شواخي تبا اتسير العزبه وما تعرف كيف بتصرف وياها طلع من الميلس وسار صوب المطابخ ولقاها يالسه ع الكرسي واتصيح
يتبع</p></font>
رد مع اقتباس
مواقع النشر (المفضلة)