<font color='#000000'><p align=center><font color=#990033>الجزء 37
</font>وبعد ما طلع سعيد من ميلس منصور سار ويا اخوه البيت وكانت الساعه 2 تقريبا ورقدوا وبالاربعا ..اليوم اللي قررن فيه البنات يسيرن السوق ويا سلامه ...
سلامه: اف اخترب المخطط
حصه: الدريوليه وين ساروا
منال: بعد وين واحد ويا ابويه في العزبه والثاني سارت وياه عيوزنا
سلامه: وناصر محد
منال: شو رايكن بنهيانوه
حصه: ماظني يطيع
منال: انجرب بتصل له شو رايكن
سلامه: تبينه يتنيحس علينا
منال: بشوف
منال خذت التيلفون واتصلت بنهيان اللي كان في دربه ياي صوب دبي
منال: الو السلام عليك
نهيان: وعليكم السلام والرحمه حي الله ام كشه
منال ببروده: الله يحيك اخوي
نهيان: شخباركم
منال: تمامو اقول
نهيان: قولي
منال: انت وين الحين
نهيان: في الدرب ياي صوبكم
منال: هيه يا حيك نهيان
نهيان: بلاج اتلفين وادورين
منال: هيه تدري ان بالخميس ملجة سلامه(سلامه تخزها بعين)
نهيان: هيه مبروك تستاهل سليماتي وشو اليديد يعني
منال: طاعوا هذا اسمع نباك اتودينا السوق
نهيان: نعم نعم عيدي ما سمعت شوه
منال برقه: نباك اتودينا السوق شوبينج اخوي
نهيان بستهزاء: والله قولي والله بس انتي احلفي بعد شوه دريولكن انا
منال وبدت اتحن: نهيان حرام عليك
نهيان: الشرع ما حرم
منال: دخيلك ضروري لازم انسير اليوم يا اخي افهم
نهيان: نهي نهي ماشي قرن محلكن
سلامه وخذت السماعه من منال
سلامه: مرحبا نهيان
نهيان: مرحبتين الساع
سلامه: شحالك عساك بخير
نهيان: بخير الله يعافيج
سلامه: ودنا السوق
نهيان: شو تبن به السوق
سلامه: شغله لنا حايه بناخذها من السوق
نهيان: والدريوليه وين
سلامه: محد ولو ناصر في دبي ما بيقصر ويانا هاه شو قلت
نهيان: خلاص تم ان شاء الله بعد المغرب بوديكن
سلامه: اوكي تسلم
نهيان: ويسلم غاليج فمان الله
سلامه: فمان الكريم
وبعد ما بندت سلامه عن نهيان..قالت للبنات انه اقتنع وبيوديهن السوق بعد المغرب وارتاح بالهن
وبعد المغرب وبعد ماسار انهيان بيتهم سلم ع امه وارتاح شوي وصلى المغرب سار صوب بيت عمه ولقا البنات في الصاله ...وبعد ما سلم عليهن
نهيان: الا عمتي وين
سلامه: امايا في اللسيلي
نهيان: اب شو تسوي
منال: بعد شو تسوي سارت اتسلم ع عربها
نهيان: هيه بس ماظني تخبرتج يالملسونه
حصه: اوووه حرقوا ويها
منال عصبت: ويهي لوح
نهيان: هيه اشوفه غني عن التعريف
سلامه: لا والله بس احلفوا انتو نهيان شو اتريا يالله انسير
نهيان: قومن بسرعه
منال: اوكي بسير اييب عباتي
نهيان: وحد قالج انج بتسيرين ويانا الا انتي ماشي سيره
منال بستهزاء: لا والله احلف بس
حصه: حرام عليك بتاخرونا خلها فحالها
نهيان: انا في السياره واللي بتأخر بنسير عنها
سارن البنات يلبسن عبيهن ونهيان سار صوب سيارته وشغلها ..وبعد دقيقتين ين البنات وركبن حصه حذال اخوها منال وسلامه ورا .....وبعد ما طلعوا من البيت
نهيان: وين تبن
سلامه: ودنا البستان
نهيان: حبيبي القصيص والخيبه
سلامه: يالله عاد
نهيان: امرنا لله بس بشوفن شو بسويبكن
منال: شو بسوي يعني
نهيان: خليها مفاجأه
منال: يا ويلي ع اللي بيفاجأونا
نهيان يضحك بخبث:........
سلامه: شكله ناوي ع شر
وخطف ع المحطه ووقف السياره
نهيان: السياره ما فيها بترول يالله وحده منكن تدفع
منال: اخ عيب عيب عليك تطلب افلوس من البنات
نهيان: خواتي مب مشكله يالله طلعي اميه
حصه: خيبه قول خمسين اميه يالدب
نهيان: اص محد رمسج
سلامه: صدق بيذلنا اندوك صب باميه اترس التنكي
نهيان: هيه جيه اباج بنت محمد مطيعه
منال: صدق دب
نهيان: عن الرزه بليز
وبعد ما صب بترول للسياره ساروا صوب مركز البستان ونزلن البنات ووياهن ولد عمهن وتحوطن وشاف المحلات اللي فيهن ملابس جاهزه ويلست سلامه ادور لها فستان يناسبها وبعدما لفت ع كل المحلت اقتنعت بفستان عيبها بيج وعليه ورود عنابيه تطريز وع لمعه خفيفه...ونهيان اللي يلس محتشر عليهن ويحن استسلم وسار صوب ما قدونلزيترياهن هناك ....واتصل فيهن لان الساعه قربت من 9 المسا ...
نهيان: ايه اخرتنا يالله
سلامه: خلاص مخلصين انت وينك
نهيان: انا في مقدونالز بترياكن عن السياره اوكي
سلامه : تم
بندت عن نهيان
منال: شوه وينه
سلامه: بيتريانا عند المواقف
حصه: عيل بسرعه اذن بتفوتنا الصلاه
منال: صلاه العشا ما تفوت عيوني
سلامه: المهم امشن وخلنا نوصل لياكلنا
وبعد ما طلعن البنات من البستان وسارن صوب السياره لقن نهيان يترياهن في السياره...وركبن ومشى السياره
منال: اشم رحيه مب غريبه علي
حصه: ريحه اكل
منال: ماقدونالز يم يعت
نهيان: حشا مب اوادم جلاب بوليسيه
منال اطالعه بطرف عينها: عدل تشبيهك يا اخي
سلامه: هههههههه شو شكله يبا يعشينا ع حسابه
نهيان: ومنوه قال اصلا كل اللي في القرطاسه ليه
منال: مب زين بكنك بيعورك
نهيان: من عيونج الحاره
منال: انت شوف احسلي اصكت عنك
نهيان: احسنين
وعم السكوت في السياره وكل يفكر في دنياه منال اتفكر في اختها كيف يتكون حياتها بعد ما تعرس سلامه بتم روحها لا صدق او ونيس وبتحس بالاحساس اللي حست به حصه ..وحصه اللي كانت تفكر في الموقف اللي كانت هيه السبب فيه ...ونهيان اللي كان يشوف كل العالم جدتمه يتحرك وهوه واقف مكانه سلامه واللي انشغلت بترتيبات الملجه وويين بتعدل ومتى بتمر هل الفتره ع خير ..وبعد ما وصلوا البيت نزل وياهم انهيان والبنات دخلو الصاله ولقوا بو سهيل بروحه ويا شواخي يسولف عليها ...نهيان سار لعمه وسلم عليه ويلس حذاله وبالبنات سارن يصلن العشا ..ونزان
بو سهيل: شواخي الشيخه هاتي هل المخده اللي حذالج
شيخه وبعد ما يابت المخده وعطها ابوها وتحبه: هبيبي انته
بوسهيل: لا خليت منج ياربي
نهيان: ما نروم ع الحنان شواخي
بوسهيل يضحك بصعوبه: ودك اتحصل عروس مثلها
نهيان: ما يحتاي عمي هذيه جدامي شيخه البنات بنترياها لين ما تكبر
منال: قدت شيبه وما تباك
نهيان: شويبه مزيون شو تبى بعد
منال: لا سوري مب موافقين
حصه: ههههههههه خل عاد يموت ع ترابها
نهيان: تهبن الا انتن
بوسهيل: ما عليكن منه ظني الا حاط عينه ع وحده من المزايين
نهيان يضح بمكر: شو دراك اسميك يا عمي تلقطها وهيه طايره
سلامه: هب هباك الله بتاكل ابويه قول ما شاء الله عوذ بالله
نهيان: ما شاء الله حشا بتاكليني بعظامي
منال : بسكم حشره ابويه تعشيت
بوسهيل : لا اتريا امج
سلامه: يييه بتبطي العيوز بقوم بحط لكم العشا
بو سهيل: لا مابا
نهيان: وهل الاكل اللي ماخذنه منوه بياكله
منال: افا عليك انا موجوده
نهيان: هونا عمي ما تبا همبورجر ولا نقت
بوسهيل: لا مادنيه البمبرقر(الكل يضحك) وشوه هالثاني
نهيان: نيقتس
بوسهيل: بلاك اتحيس قبك ارمس عدل
نهيان: دياي يا عمي
بوسهيل: هيه لا ماروم توني شارب لي لبن بوش
منال: صحه ع قلبك الغالي
بو سهيل: تسلمين ..
بوسهيل وقام من محله...
بوسهيل: اترخص منكم عيالي بسير ارقد
الكل: مرخوص
سلامه: تصبح على خير
بوسهيل: وانتي من اهل الخير
وبعد ما ساربو سهيل يرقد اتصلت ام سهيل وقالت انها بتبات عن هلها اللي في اللسيلي وبعدين تعشوا الشباب من عشاهم اللي يابوه من ماقدونالز وطلع انهيان وسار صوب ربعه في الميلس وسعيد هل المره وبعد اللي استواله في ميلس منصورقرر انه ما يسير صوب الربع و ييلس في البيت ويا هله
في بيت بو سعيد وبعد ما تعشوا
بوسعيد: بو عسكور
سعيد: لبيه ابويه
بوسعيد: لبيت في بيت الله ان شاء الله
سعيد: وياك الغالي امر
بوسعيد: ان شاء الله الملجه مثل ما اتفقنا ويا الرياييل بالخميس
سعيد: ان شاء الله
نوره: بتسكن ويانا
ام سعيد: وليش لا البيت ما شاء الله وسيع وعود
سعيد: لا ببني ارضي اللي في جميرا وبسكنها
بوسعيد: ما يواحيلك ياولدي
ام سعيد وبدت تعصب: اشوه ماشي ولدي ما يسكن بعيد عني
سعيد: يمي الا جميرا مب من بعدها
خالد: ياخوي خذ قسمنا اللي فيه 3 حجر وثلاث حمامات وصاله ..وانا بتحول ع القسم الثاني
سعيد: مادري والله خير لين هذاك اليوم
ام سعيد: تسكن عني بعيد ماشي تسمعني
سعيد: خلاص امرنا لله بعدل هل القسم لنا خلاص
سعيد اللي بدى يندم ع اللي قاله ويلسته بالبيت قام من محله وسار صوب حجرته ولحقه خالد وقاله انا بيسير صوب الربع اذا بيسير وياه بس رفض وسار عنه خالد ونوره اللي سارت تتابع الفلم وبالنسبه ...خطفت الايام بسرعه وناصر ومايد بعد مايلسوا في العين 4 ايام ردوا دبي والعنود وسهيل كل يوم يتصلون في هلهم في الامارات والحين هم في ماليزيا وبالنسبه للريم ع حالها ممنوعه من الطلعه..ورفيعه اللي من درت بملجه سلامه وهيه محتشره تبا تسير صوبهم وبالثلاثاء سارت لبنات خالتها هيه ووياها امها واكيد اللي يايبنهم ظاعن ...منال وفي هل اليوم ما نزلت اتسلم ع خالتها وبنت خالتها لان الانسان اللي حبته وكان بيفرق بينها وبين بنت خالتها من دون لا يحس وبعد ما طلع نزلت وسلمت ع ليهم ويلست وياهم ....ومر الوقت بسرعه لان السوالف تصرق الوقت والانسان مايدري بعمره...وبالاربعا الصبح وبعد السهر نشت رفيعه وراسها يعورها وسارت توعي سلامه ومنال
يتبع</p>
</p></font>
رد مع اقتباس
مواقع النشر (المفضلة)