<font color='#000000'><p align=center><font color=#990033>الجزء السابع عشر

</font>راشد بدا يلوم نفسه لانه بسببه تغيرة حياة سلامه كليا تحولت من البنت الفرفوشيه المرحه اللي تحب اتضحك الناس بسوالفها لانسانه بدت تنعزل شوي شوي عن العرب سلامه وهذا نحن مرت الاجازه ومحد حس بها بدا دوام الكليات والنشه من الفير والتعب وعثره البروجكتات وحشرة الاساتذه.....سلامه في هل السنه اللي هيه اخر سنه تحاول تدرس وتادي واجبتها اول باول وحصه بعد اللي كانت اتحاول كل جهدها واتخطى الصعوبات اللي تواجهها في اللغه منال وريم ماخذات حياتهن لعب في لعب بس بعد وقت الدرس درس .....سلامه وبعد سنتين من سالفه الخطوبه والظروف اللي مرت بها في حياتها بدت تنعزل عن ربعا كانت طول الوقت تدرس او تدخل احد هل المنتديات وتقرا المواضيع اللي فيهن حتى ربعها استغربوا من حالتها وحاولوا وياها وبدت تطلع وياهم في البريكات او وقت الغدى وباقي الوقت ع المنتدى ...كانت اشتوف مواضيع حلو فيها نوع من الاعتماد ع الذات وقررت اتشجل فيه وبالفعل ..كانت بدايه حلو لها بدت تبرز ذاتها بذاتها .....طلعت كل اللي عندها .....ونهيان بعد رد لكليته وما يرد دبي الا اخر الاسبوع وييلس في بيت عمه ..... ناصر ومايد ....واللي كملو ثلاث سنين في امريكا وهاي اخر سنه اللي هيه الرابعه ....

ناصر: شفت يا مايد كيف الوقت يطير
مايد: هيه والله احيد الا امس انا وانت نظارب ويا شامس وسعود في الصف ولا الاستاذ الدب هذا شوه اسمه نسيت
ناصر يضحك: هههههههههه بو شنب اسمه حسني
مايد: هيه هذا هوه الله يغربه صدق ابتلينا به بس الحمدلله يوم طفرنابه
ناصر: حليله يعله يسقى علينا
مايد: هيه والله وهاه ما بقالنا غير 6 شهور وبصير الفرحه 3 فرحات
ناصر: كيف بعد ثلاث فرحات
مايد: شوف احم احم ..الامارات بتتشرف برجوع مهندسيها المهندس مايد ولد ثاني الفلاسي وخويه نصور بن محمد الفلاسي....
ناصر: انزين ميود وهذا واحد
مايد: والثاني يا حبيبي ..شفا راشد من مرضه وهذا اكبر من فرحه التخرج والشهاده
ناصر: والثالث يا حبيب العين
مايد: الثلاث عاد تخرج حصووووووووه الدبه
ناصر: حرام عليك ولا تنسى سلامه
مايد : هيه شو شكلها السنه العرب كلها بتخرج
ناصر: بس تدري ابا ارد البلاد
مايد: وانا والله ودي اليوم قبل باجر تولهت ع جو العزب والبداير والدراجات
ناصر: وجو العين يا مايد ..وعمومتنا احمد وسالم تولهت عليهم وعلى الربع ع سلطان وحمد ولد خالتيه وظاعن
مايد: اقول قم قم سرينا صوب دار زايد
ناصر..وبدا يغني بوله وشوق..: الله يا دار زايد كيف محالها يا ناس حلوه وقلبي مغرم فيها كن القمر يوم يظهر من محياها في غايه الحسن يسلم كف بانيها
مايد: سلامي عليك كفك شوهل الصوت وشو هل الشوق يا ويلي فديت اللي اشتقدت لهم فديتهم وفديت ترابهم يااااويلي ويلاه
ناصر بستغراب: اول مره اشوفك جيه شو سالفتك انته هوه لايكون حاط عينك ع وحده من هنيه ولا من هناك
مايد منحرج: لا شوه هل الرمسه نصور
ناصر: اتحسب بعد اتفكر اتسويها واتعرس وتخليني بروحي
مايد: ومن قال انا وانت بنعرس في يوم واحد وهذا نذر علي
ناصر: شوه عرس مخبل بس تدري فكرك فنانه ......(وكانت ناصر قابض مخده صغيره ويفرها ع مايد )..قم بس قم تبانا ننهزب خلنا نرقد ورانا دوام من فير الله

مايد مع انه ويا ناصر روح بالروح خاف يقوله عن احساسه وهوه في نفس الوقت ماكان متأكد من مشاعره معقوله احب بنت عمي بس لاني شفتها صدفه تحوط بلا شيله مع اني شفتها اكثر من مره ... مشاعري عاديه من صوبها....شو هل القلب اللي تفسيراته عشوائيه وقال في خاطره متى بس ياربي افتك من هل الحاله علي ونتخرج انا وناصر بقت لنا هل السنه ...ان شاء الله يفوت الوقت بسرعه وارد لبلادي وابني مستقبلي .....ارد واعيش بين احبابي ويا امي اللي من بعد موت ابويه مالها حد غير عيالها وراشد اللي باع شبابه بين الدراسه والشغل ...وهذا هوه في المستشفى بين رحمة الله ...الله يشفيك ياخوي ويخليك لنا ياللي ربيتنا بعد ابونا الله يرحمه ولزمت عليه الدراسه في امريكا ودخلت نهيان كلية الشرطه ....آه يا راشد كيف الزمن غيرك ...احيدك يوم كنت في الكليه العسكريه واو ل سنه لك كنت انسان فوضوي ....وشيطان وعديم المسؤوليه وموت المرحوم غيرك يا خوي عسى الله يشفيك ويعطيك الصحه وترد لبلادك سالم ونفرح فيك ...وبدا طيف راشد يحوم جدامه و منال في نفس الوقت ومن كثره التفكير رقد ولا حس بعمره ....

في دبي ...واليوم الخميس بعد مافات شهر من بدايه الدوام وفي الويك اند رن مبايل سلامه وكان حذالها ع الطواله والبنت راقده ماصدقت الاجازه تي وترتاح من نشه الفير ...سمعت صوت الرنه وسحبت التيلفون ...

سلامه وبكسل والنعاس بياكل عيونها: الو
رفيعه : السلام عليكم ..
سلامه: وعليكم السلام والرحمه
رفيعه : كيف الحال
سلامه: والله بخير
رفيعه: شوه بعدج راقده
سلامه: لازم اجازه وابا ارتاح
رفيعه معصبه: لاااااااامره ما تلامين انتي لاحقتلي الريم تسهرن لين الفير وتصبحن في الكليه وايام الاجازات ترقدن لين اذان العصر وفليل تسهرن ع النت انتي وياها شو هل الروتين الماصخ
سلامه: اصدقين ان الحياه جيه اريح
رفيعه: اي راحه ارحمي عمرج
سلامه: ردينا المهم شو تبين متصله من الفير
رفيعه: لا سلامج بس بقولج نحن احين بنطلع من العين ويايين صوبكم بنقيل عندكم وبنقصر الدوب وياكم
سلامه: هلا فيكم لين ما توصولن خير بس تعالي حجرتي ووعيني (تثاوب)انا برقد الحين اوكي حبي
رفيعه: قووومي يالله وسويلنا فواله بعد بسج بتخيسين
سلامه: انزين حشره انتي بقوم يالله برايج

وبعد ما سكرت رفيعه عن سلامه ...نشت وسارت اتجهز وقالت لمها ان حالتها بتيهم بس طلعت اخر من يعلم لان ام سهيل تدري من امس ....

سلامه: شله شو مستوي عندكم يمعه
ام سهيل: حشا ما تبين العرب اتوالف
سلامه: لا ما قلنا شي فديتج بس غريبه شو عندكم .....
منال: تو الناس صح صح يا حلو اليوم ملجة اخوج
سلامه تحط ايدها ع راسها ...: اللله انسيت اتصدقين ياسلام .....
منال: يامدام قومي...ع المطبخ
سلامه: ليش ....؟
منال: ظني الا رفوع رمسج سيري سويلها سبرنج رول
سلامه: قولي لـــ ليندا..اتسويه
منال: لا والله مستوتلي هيزه مول ما تنشين الا مجابله هل الكمبيوتر والانترنيت
ام سهيل: يا بنيتي مب حاله هذي لا نشوفج ولا نقعد وياج
سلامه: يا امايا تراني وياكم الا في البيت
منال: انتي ما تستحين شوفي حال ابويه اللي ما تسر مستهم منج يالدبه لا نشوفج وين السلامه اللي كانت تضحك الكل بكلمه وحد بس ....اخ يا سلامه غيرج الزمن غيرج
سلامه وبدت تحس بالضيج وبتعب: بسير حجرتي

وبعد ما سارت سلامه صوب حجرتها منال واللي كانت اتحس بالذنب من زلة السانها ......وراحت صوبها ودخلت الحجره وشافتها يالسه ع سريرها ودمعه تنزل من عينها ع خدها .....منال حست بالذب اكثر واكثر ....ليش سوت في اختها جيه هيه تدري انها تعبانه ونفسيتها يوم عن يوم تدهور...

منال: سلامه...انا انا آسفه
سلامه تمسح دمعتها وتبتسم ابتسامه حزن: ليش منال ع شوه تتاسفين
منال وبعد ما شافت اختها تضحك بالغصب انهارت كليا وبدت اتصيح ولوت ع ختها : سلامه والله انا خايفه عليج...انا احبج انتي ختي اللي مالي غيرها شويخ صغيره ماقدر اتفاهم وياها
سلامه: منال بس لا تصيحين.....
منال: سلامه حرام لا تعذبينا بيدج عذبتي الكل امايا ما تشوفج وابويه اللي كل ما تخبر عنج انقول له راقد حتى سهيل استغرب من حالج
سلامه: منال ادري اني مقصره وايد بس شو اسوي هذا حالي
منال تمسح دموعها: اوكي خلاص ....ماشي صياح اليوم ملجه سهيلوه
سلامه بفرح: صح ولازم انكون حلوين ولا شو يا منال
منال: لا لا تبين الخلق اتشوفنا وعيونا منتفخات يالله قومي رفوع وخالتي وظاعن بيونا...(كانت اتقول ظاعن بكل خجل)
سلامه: احم احم ظاعن هيه زين يوم بيي وياهم من 3 اشهور ما شتهم
منال بدت تنحرج وتبا اتغير السالفه: المهم شو بتلبسين ......
سلامه: بلبس الفستان اللي فصلته
منال: انتي تدرين انج دبه فستاني مو حلو شو اسوي
سلامه: محد قالج ما تسمعين الرمسه
منال: هذي المشكله بس الذهبي الصراحه يناسبج وايد
سلامه: وفستانج فنان شوفيه السماوي حلو وخفيف...
منال: اوكي ...بنشوف الريم وورفوع شو مفصلات
سلامه: بنشوف

في حدود هل الوقت والساعه عشر ونص وصلت عفرا بنت بطي وعيالها ابو ظاعن تعذر لانه تعبان وعنده شغل في المزرعه.....وشواخي يوم درت ان خالتها يت ربعت صوب خواتها .....

شيخه تفتح الباب بقو: كالتي يت
منال: شووووووووه
شيخه تبا تغايض ختها: منااااااااالوه داعن يا داعن يا
منال نتغيضه وفخاطرها تضحك : شوووه يا مسودة الويه اصبري اصبري بظربج.....
سلامه تضحك ع خواتها ومنال تربع ورا شواخي واللي الله يهديها ما خلت مكان ما ركضت فيه ونزلت من الدري وتمت تربع ومنال وراها واتحلف لها وترمس بصوت عالي ما عليه يالسباله ...بس الحبيبه انصدمت بالخاله ورفوع وظاعن قاعدين في الصاله وانحرجت وكانت حاطه شيلتها ع جتفها وردت تعدلها .....لانها ما تبى تحسسهم انها انحرجت ....

منال: السلام عليكم

الكل وقف ورد السلام ...: وعليكم السلام والرحمه ...

منال توايه خالتها : شحالج خالتي
ام ظاعن: يسرج الحال يا بنتي وشحالج انتي
منال: بخير الله يسلمج ...قربوا
وردت اتوايه رفوع ...وبعد ما وايهتهم......سارت صوب المطبخ ولقت امها هناك ...

منال: ام المعرس ...يا حلاة هل الكلمه ..شو تسوين؟
ام سهيل: هههههههه اشوف الطباخ شو طابخ من الغديات ....
منال: الله يهديج بس سيري يطبخ اللي بيطبخه ...خالتي عفرا وعيالها في الصاله
ام سهيل: ما عليه يا بنيتي
منال: زين وانا بسوي العصير وبييبه
ام سهيل زين ما تسوين

منال شافت ليندا في المطبخ .: ليندا شوفي سلامه قوليلها خالوه يت
ليندا: اوكي مدام .....

سارت ليندا صوب سلامه وشافت قاعده اتجحل عيونها وحصه يالسه تقرا مجله.....

ليندا: مدام ماما عفرا ايجي
سلامه : اوكي بيي الحين..بس منال وين
ليندا: مدام منال داخل مطبخ سوي عصير
حصه مستغربه ومبهته: شوووه
سلامه مستغربه: الله الله شو اتسوي عصير لا ههههههه وطيحتها يا ظاعن
حصه: منوه ظاعن وشو يخصه بالسالفه
سلامه: كل شي في وقته حلو يالصوص
حصه بتكدر وملل: انزين بس تعالي ولد خالتج تحت وانا ابا اسلم ع الحرمات
سلامه: ما فيها شي تعالي هوه مب من النوع اللي يطالع
واجحلت سلامه واتعطرت بعطرها المفضل..اسكادا...طلعت وخطفت ع المطبخ التحضيري ووياها حصه وشافن العجب منال يالسه اتسوي عصير كوكتيل ...
سلامه مستغربه : شو كوكتيل
منال: هيه احين بخلصه ...
سلامه : انزين بس لمنوه
منال: بعد لمنوه لضيوفنا ...
سلامه وتخز منال بعين: هيه سويه عدل لان ناس بيشربونه
حصه: انتن شو سالفتكن
منال: اقول جلبن بويهوكن انتي وياهيا
سلامه: فاضيه بسير اسلم ع العرب احسن لي ...


وسارن سلامه وحصه وسلمن ع العرب ويلست حذال امهن وبعد شوي شافت منال يايبه العصير ....ومتفندقه فيه وشكله لذيذ


يتبع</p></font>