<font color='#000000'><p align=center><font color=#990033>الجزء العاشر

</font>مايد: ناصر يالله انسير مادري احس بان راشد فيه شي امبونه تعبان
ناصر: ما يندرا والله شو اللي ياه

طلع مايد ويا ناصر من الفندق وساروا صوب المستشفى ..... وللرسبشن لان في هل الوقت علي ماخذ مبايله وياه .....

وبعد ما استعلموا عن راشد ....واللي حجزوله غرفة299 الطابق الثالث ....وهوه ع تاثير البنج في هل الفتره ......
مايد وناصر شافوا علي واقف برع يتريا

مايد مرتبك : هاه علي شو اللي استوى
علي: راشد زاد عليه عوار الراس وتم يصارخ تلاحقته ويبته المستشفى
ناصر: والدكتور شو قال
علي: بينومونه عندهم اليوم وباجر بيسوله اشعه
مايد برتباك: وشله الفحوصات
ناصر: هد اعصابك وانا اخوك ان شاء الله ما فيه الا العافيه
مايد: الله يسمع منك ياربي
علي: سيروا الفندق وارتاحوا وراكم محاضرات من فير الله
مايد: لا ما عليك باجر الاحد ونحن فاضيين ....سير انت وارتاح وانا وناصر بنتم
ناصر يطالع علي بنظرة ثقه
علي: يالله برخصتكم وان شاء الله بلوفكم بعدين....تامرون ع شي
ناصر: تسلم
علي : فمان الله
ناصر ومايد: الله يحفظك ياربي

وعربنا اللي فالسعوديه واليوم هوه الاثنين بتوقت الشرق الاوسط والساعه 10 الضحى ...

ام ظاعن: بناتي لفن كل اغراضكن بنسير مكه بعد الغدا ان شاء الله
رفيعه: فالج طيب امايا
ام ظاعن: فالج ما يخيب بنيتي.

منال في الحجره تلف اغرضا وتحطهن في الشنطه...وسلامه منسدحه ع الشبريه (السرير)....
منال اطالع سلامه:حووووووووه ايه انتي بلاج صاخه
سلامه:................
منال: عطينا ويه شو مسوتلي طاف الحبيبه
رفيعه: منالوه شو هل الحشره
منال: ما تشوفين بنت خالتج المصون منسدحه وانا الف الشنط روحي
رفيعه وقعدت عدال سلامه: سلامه خير بلاج
سلامه: تعبانه
منال: شو هل الدلع وقومي يالله
رفيعه: منالوه اذيتينا تراج اذا متعايزه تلفين شنطج انا بلفها
منال: بتسويين خير والله
رفيعه: لا والله
منال: اقول اليلسه وياكن مضيعه للوقت اسير اشوف امايا احسن لي
رفيعه: فكه يالله فارجي
منال: انا ما لي بارض لج ومب متفيجه بس مردوده رفاعي
رفيعه:هههههههه

وبعد صمت مدته 10 دقايق.

رفيعه: سلامه شو اللي متعبنج بالله عليج وانتي في هل البلاد الفنانه
سلامه: مادري احس بنقزه فقلبي
رفيعه : بسم الله عليج
سلامه: خوفي حد استوابه شي
رفيعه: لا تستهمين كلهم بخير خالتيه توها مرمسه ابوج وحرمة عمج ثاني اتصلت فينا امس بعد شو اللي يخليج مضايجه ومستهمه
سلامه: خلاص انسى السالفه خليناانسير انشوف الحرمات اذا يبنا نفزعهن ع شي

وبعد ما طلعت سلامه ويا الاهل للحرم عشان يصلن الظهر... و العرب جهزوا كل اغراضهم وجهزوا الاحرام ...وبالنسبه لشبابنا طلعوا يحوطون شويه وابو ظاعن وياهم ...وبعد ما اذن الظهر وصلوا ....تغدوا ونزلوا كل الاغراض للباس اللي استاجروه

ظاعن والشباب كانوا في الباس ويا الوالد والحرمات كل العاده اخر الناس...

ظاعن وبعد ماشاف الحريم: الله يهديكن ياربي ليش ابطيتن
ام ظاعن: ويهديك ياربي
رفيعه: شو استوى ما فيها شي

ركبوا الكل في الباص...واحرموا من مكه صوب المدينه....بس الكل حس ان سرعه الباص غير طبيعيه وقطعوا نص الدرب في ساعتين...

رفيعه: ايييييه منصور هذا ليش يسرع جيه
منصور: ما تبن توصلن بسرعه
رفيعه: اكيد بس لهل الدرجه يطير بنا
منصور:...................
منال: لا شكله الباص فيه شي ....

الشباب يبتسمون ويسوون عمارهم ولا لهم خص في السالفه

منال: رفوع ان ما كان ع التيربو ماكون منالوه
رفيعه بندهاش : شووووووووه ظاعن حاطينه ع التيربو
ظاعن: هيه غيرت من سرعه السياره وحطيته ع التيربوا نبا نوصل بسرعه
رفيعه بخوف: غربالله بليسك شوي شوي عنبوه نحن ارواح ... شووووه ناوي تقضي علينا حضرتك شوف شوف شقا ينقز ياميه

ام ظاعن: خف السرعه يا بوي مب مستعيلين ان شاء الله بنوصل قبل المغرب ولا ع آذان العشا .....
ظاعن: ان شاء الله

ومضى الوقت في الباص اللي يقرا قرآن واللي راقد من التعب واللي يسولف...

منصور وماسك مايكرفون الباص: الو الو
سلامه برقه: ههههههه
منصور: الو الو وياكم المذيع منصور المنصوري من مضمار سويحان للهجن وهذا الشوط للزمول

حمده متغيضه: منصووووور نحن يايين نعتمر ا ذا فيك خير قولنا دعاء بدال لا تلعب
منصور بستهتار: يا مايا ما فيها شي ......(ورد يكمل) عنا الحين بنت صوغان في المركز الاول والروايع في الثاني لا لا تخطت يااااااااسلام ع الروايع خطف عن بنت صوغان ياحافظ عليج يا الرووووايع يا حافظ يااااااسلام وخطت وخطت ووصلت لخط النهايه ...ومبروووووووك للسيد منصور المنصوري لفوز بكرته الروايع في المرتبه الاولى

منال وبصوت عالي: هههههههههه
والكل وراها يضحك ...
رفيعه: اسمممممميك عليك سوالف يا الصرصور
سلامه: رفوع مب حلوه لا تقوليله صرصور
رفيعه: لا يختي متعود الريال ما عليج منه
سلامه: اس يو لايك
ووصلوا لمكه الساعة 5 العصر وبعد ما نزلوا لفندق الابراج اللي حجزوا فيه وحطوا اغراضهم ساروا صوب الحرم وطافوا ع بيت الله وسعوا بين الصفا والمروا ورتاحوا شوي ....وردوا للفندق .....عشان يرتاحون ويردون عند صلاه المغرب .....وفي دبي الساعه 7 و عشر دقايق المغرب حصه واخوها نهيان وامهم ام راشد ...طلعوا من البيت ودبي في هل الوقت فمهرجان الصيف.....

حصه في السياره: نهيان ودنا القريه
نهيان: هذي من اولها وتتشرطين
حصه بخقه: انا ما تشرطت انزين
ام راشد: لا اله الا الله محمد رسول الله ...الله يهديج ياربي
نهيان من الخاطر: آآآآآآآآآآآآمين يارب وتعرسين وافتك منج
حصه: طايحه ع جبدك ياالدب احين شوه بتودينا ولا لا
نهيان: الشور شور الغاليه هاه اميه وين تبينا انسير
ام راشد: ودنا قرية التراث فيها هذاك الزي الفنان
حصه بحماس: اششششششششكر فنج ياويلي فديتج انا
نهيان: اخخخخخ منج يالمكاره

وبعد ما وصلوا لقرية التراث في منطقة الشندقه في دبي....
حصه: خخخخخيبه يا الزحمه العالم كله هنيه
ام راشد: هب هباج الله قولي ما شاء الله بتاكلينهم
حصه: ما شاء الله
نهيان : ظني الا اليوم عندهم يوله
حصه بتموت من الفرح: والله ...ياااسلام لا عيل ما ينلامون العرب شوه نهيان بتيول وياهم
نهيان: ظني شوفي ورا كرسيج اذا الرشاش موجود
حصه وبعد ما طالعت: هيه هاذوه
ام راشد: الله يهديك شو تبابه خله يولي
نهيان: خلينا شوي بنرفه عن نفسنا

وبعد ما نزلوا وتحوطوا في القريه وفي جناح قرى الدول العربيه ووصلوا عند جناح الامارات وشافو العجب هذيج اليوله الفنانه ...ودخل نهيان من بينهم وما قصر قطعهم كلهم بيوالته الفنانه فعلا كان ايول بطريقه فنانه وحركاته خفيفه وحصه متخبله وهيه تسمع ميحد يغني ( يا قابض راس المعزه بعزة نفس سلمك ربي من حسود وبلاسي يا نادر بين الخلايق فريد الجنس يا صقر نادر من سلالة بني ياسي يا غارس احلا واغلا واعلا غرس غرس الحظاره ومجد ماله اقياسي دراك عروس زينوها بليلة عرس لبستها استبرق وياقوت والماسي .......)
وع حدود الساعه 10 بتوقيت دبي ردوا للبيت وفي هل الوقت الساعه 9 بتوقيت السعوديه ...اذن العشا والربع كانوا في الحرم .....وصلوا في الصحن ....وبعد ما خلصوا ردوا للفندق وظاعن سار صوب الابراج ويابلهم العشا وتعشوا وارتاحلو بعد هل الدرب الطويل من المدينه لين مكه .......وبختلاف اوقات شروق وغروب الشمس ....الساعه 9 صباحا بتوقيت امريكا الموعد المحدد للاشعه ......وقبل الموعد بعشر دقايق....

يتبع</p></font>