<font color='#000000'><font face="tahoma, arial, helvetica, sans-serif" size=2> </font>
<div align=center><font face="tahoma, arial, helvetica, sans-serif" size=2>يوم اللقاء
الساعة تسع ونص عبدالله وعيسى يالسين فوق في الكوفي شوب عند الجامة يشوفون اللي رايح
واللي ياي ويتريون البنات يوصلن ,,,, عيسى فيه رقاد غصب يالس ويا عبدالله
عيسى : شفت قلت لك بعده الوقت لاحقين
عبدالله : يالغبي نحن لازم انكون واصلين قبلهم عسب نستقبلهم
عيسى : متفييج
عبدالله مستانس وحاس عمره بيطير من الفرحة لأن اول مرة بيشوف فيها شوق
عيسى : كيف بتعرفهم
عبدالله: اسكت انا الحين اتريا سيارة bm اطوف
عيسى : هذي ها سيارة bm اتبيين
عبدالله متلهف: وين؟؟ هيه والله ,,, ياويلي وصلوا
عيسى : ايه بلاك بلاك شوي شوي فضحتنا جدام الخلق
عبدالله : فتحوا الباب ... اتريا خلها تنزل واتأكد
عيسى: الحمدلله والشكر
اول مانزلوا من السيارة عبدالله قام وقال: عواس والله هي شوق وصلت
عيسى : والله حالة,, ابتلشنا,, مب شوق
تركب شوق السلم المتحرك وعبدالله من اول ماطاحت عيونه عليها ماخوزها بس بعده ماشاف ويهها
عبدالله حب انه يتأكد واتصل بشوق : الو
شوق: تونا دشينا
عبدالله : اوكي باي
عبدالله: عواس هي
عيسى : خلها اتصد هني
شوق لفت عسب اتسير هي وعاشة صوب الكوفي شوب
واول مالفت شافها عبدالله واتبل على جمالها ووقف وهو يطالعها
عبدالله وهو متخبل : عواس هاي هي شوق
عيسى : شت يخبلن عبادي
شوق يوم شافت عبدالله وقف عرفت انه هو ونطقت باسمه
شوق : عبدالله
عبدالله: شوق
واتأكدت شوق انه هو
عيسى : عبادي فضحتنا ايلس
وييلس عبدالله
عيسى: أي وحة فيهن شوق؟
عبدالله : هاي اللي عاليسار
شوق : عواش خلنا انسير من الصوب الثاني استحي ما اروم
عاشة : يلا انزين
عيسى : او لفوا
عبدالله : شت ليش؟
عيسى : شو يستحن؟ عبادي اتصل اتصل بها
عبدالله يتصل
شوق : الو
عبدالله : هاي انت
شوق : وي عبادي ماتوقعت انك بتطلع في ويهي
عبدالله : ليش لفيتوا؟
شوق : شو استحي
عبدالله : انزين بنيلس بنسولف
شوق : لا .. حلوة هاي ... مستحيل
عبدالله : انزين ما شفتج عدل
شوق : خلاص غيرت رايي بسير البيت
عبدالله : اتخسين ... من متى اترياج اتقولين غيرت رايي
شوق : والله استحي
عبدالله : انزين شورايج فيه
عيسى :ههههههههههه ماعندك سالفة
شوق : اصلا انا ما شفتك عدل على طول لفيت
عبدالله: فديتج شواقة والله اتخبلين ماتوقعتج بهالجمال
شوق ساكته
عبدالله: شواقة ترى بزعل اذا ماشفتج
شوق : والله ما اروم ايلس وياج
عبدالله :اوكي شي طاولات وايدة
شوق بعد اصرار من عبدالله : اوكي
عبدالله: يلاعواس يايات
عيسى: عبادي سو ترتيب ... ترى اللي وياها اتخبل بعد
عبدالله مايسويله سالفة: وصلوا
وتيلس شوق ويا عاشة على طاولة شوي قريبة من عبدالله وعيسى بس يعطونهم ظهرهم
عبدالله : اف شواقة ليش يلستي جي
عاشة : يرمسج
شوق : صخي ولا جنا سمعنا شي
عبدالله يوقوم ويسير صوب طاولتهم
عبدالله: ممكن ايلس ؟
شوق منزلة راسها
عاشة : تفضل
شوق تضرب عاشة واتقول بصوت واطي : شو تفضل
عبدالله: شكلها المدام ماتباني اوكي مب مشكلة انا ساير
شوق : لا عبادي ايلس
عبدالله يبتسم وييلس : شخباركن
عاشة : تمام والله انت اشحالك
عبدالله : تمام يعني انت عاشة
عاشة : هيه
عبدالله: شوق جيه صاخة ؟
عاشة : اونها مستحية
عبدالله : في التيلفون لسان هالطول والحين صخة... اوكي عالاقل شوفيني حطي عينج بعيني
شوق اتتم ساكته ومنزلة راسها
عبدالله : اوكي شوفي عواس يالس وراج
عاشة هذا ولد عمك يعني
عبدالله: هيه ..... الحين تلقينه يالس على نار يبا يعرف شو انقول
عاشة : حليله
عبدالله : يلا شو تطلبون؟
شوق : اصلا نحن بنسير الحين
عبدالله : لا دخيلج خلاص انا ساير بيلس عند عواس
ويقوم
شوق : يلا عواش خلنا انسير
عاشة : ليش تو الناس ما كلنا شي
شوق : عواش قومي
عاشة تقوم ويا شوق
عبدالله وعيسى بعد يقومون
عبدالله : وين
عاشة : هاي شوق
شوق تمشي وتمسك ايد عاشة
عبدالله وعيسى يمشون وراهم لين ما وصلوا برع المركز وركبوا السيارة
عبدالله ينزل راسه ويكلم شوق من الجامة
عبدالله: جي اتسوين فيني
شوق : عبادي والله اسمحلي ما اروم
عبدالله:أنا ما صدقت شفتج
شوق : انت شو قلت لي .. من بعيد لبعيد
عبدالله : يعني سايرين الحين
شوق اتشغل السيارة :هيه سايرين
عبدالله يرد ورا : يلا عيل
شوق تطالع عبدالله وهو يطالعها
شوق : باي
عبدالله : باي
ويتم عبدالله يطالعها لين ما ساروا
عيسى : يلا الغالي ليش واقف بعد... خلنا نحن بعد نجلب ويهنا
عبدالله: عواس شفتها
عيسى : هيه شفتها بس فكنا الحين خلنا انسير ابا اكمل رقادي
عبدالله : يلا
ويركبون السيارة ويسيرون
في سيارة شوق
عاشة: شواقة ما شاء الله عليه عبادي وايد حلو
شوق : فديته والله
عاشة : ليش ما كنت ترمسين
شوق : لا والله .. ليش ما تميت وياه بعد احسن
عاشة تستعبط : هيه والله صدق
شوق : بس بس انا اذا تميت اسمع نصايحج بضيع
عاشة تضحك
ويطرش عبدالله لشوق مسجات : اهو هذا اللي احبه اهو هذا اللي ابيه اهو هذا اللي قدرني وانا ما اقدر عليه
ياللي لمتوني تعالوا اخذوا عيني وانظروا ريحوني واستريحوا وانصفوني وانصفوه
قبل اشوفك كنت انا مرتاح سالي ويوم شفتك حالتي صعبة بدونك ... وغيره
ـــــــــــــــــــــــــ ـــــــــــــــــــــــــ
ـــــــــــــــــــــــــ ـــــ
تمر الايام وهم مايشوفون بعض
عبدالله : الو شوق
شوق : هلا عبادي
عبدالله : مشتاق لج
شوق : وانا اكثر
عبدالله : ابا اشوفج
شوق : لا انسى
عبدالله : شواقة والله مشتاق لج والله حرام عليج
شوق : انت ما تحس بالخطورة عبادي انت ريال وانا بنت
عبدالله : افففف بنسمع كلامج شو بنسوي بعد
شوق : ابا اتعرف على خواتك
عبدالله : دوم ارمس اختي عنود عنج خاطرها اتشوفج
شوق : والله؟؟ اوكي عيل عطني رقمها
ويعطيها الرقم
شوق : اوكي باي بسير اتصل بها
عبدالله : خيبة تو الناس
شوق : يلا بسك باي
عبدالله يضحك : باي
ـــــــــــــــــــــــــ ـــــــــــــــــــــــــ
ــــــــــــــــــــ
تتصل شوق بعنود اخت عبدالله
عنود : ألو
شوق : السلام عليج
عنود : عليكم السلام
شوق : اشحالج شخبارج شمسوية
عنود: والله تمام منو وياي؟
شوق: اتوقعي
عنود : والله ما اعرف .. اول مرة اسمع صوتج
شوق : وياج شوق المهيري
عنود : انت شوق ؟؟ شوق شوق !!!
شوق : هيه ليش مستغربة .. خذت رقمج من عبادي توني مرمستنه
عنود : يامرحبا والله اشحالج
شوق : والله تمام
عنود : والله ما توقعت
شوق : خبرني عبادي عنج
عنود : وانا بعد دوم يرمسني عنج
شوق : والله ما شي بس حبيت اسلم عليج واتعرف
عنود : والله يشرفني هالشي وانا بعد حبيت اتعرف عليج
ويتمون يسولفون وكل يوم يرمسون بعض لين ما استووا ربع
ـــــــــــــــــــــــــ ـــــــــــــــــــــــــ
ـــــــــــــــــــــــــ ـ
في يوم من الايام
شوق تتصل بعنود
عنود : هلا شواقة
شوق : اقول عنودوه انا وعواش بني بيتكم اليوم
عنود: والله !!! ياسلااااام والله وناسة ..... بس تعرفين وين بيتنا؟؟
شوق : لا والله انت قولي لي
وتخبرها عنود
شوق : يلا يايين باي
عنود : باي
ـــــــــــــــــــــــــ ـــــــــــــــــــــــــ
ـــــــــــــــــــــــــ
شوق وعاشة يوصلون ويدقون الباب وتفتح الشغالة الباب
عنود : هلا والله هلا
يسلمون على بعض وهاي اول مرة يشوفون بعض فيها
عنود : انت شوق يعني
ويسولفون
عبدالله ياي من برع
يدخل الصالة وينصدم بوجود شوق
ام عبدالله: عبادي وين داش بنات هني
عبدالله: ها.... ما كنت اعرف ( ويسير غرفته)
يتصل عبدالله بعيسى
عيسى : هلا ولد العم
عبدالله: عواس شواقة في بيتنا مب مصدق
عيسى : كيف عرفت بيتكم
عبدالله: أكيد عنودوه خبرتها يلا باي ويبند
عيسى معصب: صدق مايستحي يصك التيلفون في ويهي
ـــــــــــــــــــــــــ ـــــــــــــــــــــــــ
ـــــــــــــــــــــــــ ـــ
عبدالله ينزل من غرفته ويزقر عنود من ورا الباب
عنود: ها ياية
عبدالله يكلم عنود بصوت واطي: عنودو شوق كيف عرفت بيتنا ومتى يت ويتم يسألها
عنود : اففففف عقب بخبرك ( وماتعطيه ويه)
ام عبدالله : يلا عيل انا سايرة ايلسوا سولفوا
عنود : امي وين سايرة ؟؟
ام عبدالله : عند ام حصة ..ساعة وبرد ( وتطلع)
عنود: اف شواقة عبادي يالس يسألني عنج كيف ومتى وماادري شو
شوق : حرام والله ما كنت اباه يعرف
عاشة : عادي .. زين يوم عرف
شوق : وينه هو الحين
عنود : فوق
شوق : بنتصل به ( وتتصل)
عبدالله: هلا بالحب
شوق تضحك : اشحالك
عبدالله : شواقة كيف عرفتي البت ومن متى انت هني
شوق : اهو عرفت وييت وخلاص
عبدالله : زين يوم ييتي .. امي وينها
شوق : توها طلعت... يلا عبادي ببند عنك سايرين نحن
عبدالله : لاااااا تون الناس
شوق : هههههه انت اشلك يالس وياي انت
وتبند شوق عن عبدالله وتسلم على عنود وتتطلع هي وعاشة
ـــــــــــــــــــــــــ ـــــــــــــــــــــــــ
ــــــــــــــــــــــــ
في السيارة
شوق: فديته عبادي شفتيه يخبل وهو متغتر
عاشة : ليش ما كان متغتر يوم كنا في الفردان ؟؟
شوق : كيفه انت اشلج شي راجع له
عاشة : ويييي ما يكشخ لج
شوق : مايخصج
ـــــــــــــــــــــــــ ـــــــــــــــــــــــــ
ـــــــــــــــــــــــ
في بيت عبدالله
عبدالله وعنود وعليا اخته الصغيرة يالسين
ام عبدالله تدخل : السلام عليكم
يردون السلام
ام عبدالله: وين البنات؟؟
عنود : روحوا
ام عبدالله: ما تعشوا؟؟
عنود : لا ما يبون
ام عبدالله: ما شاء الله عليهن جمال واخلاق
عنود تطالع عبدالله: هيه ما شاء الله
ام عبدالله : عبادي شرايك فيهن مب انت شفتهن
عبدالله : انا بصراحة عيبتني هاي اللي كانت يالسة هني
ام عبدالله: كلهن حلوات
عنود: ليش تبينها حق عبادي
ام عبدالله : ليش لا
عليا : وي ما يستاهلها
ام عبدالله : ليش ولدي شو ناقصنه
عبدالله: امي متى بعرس
ام عبدالله : شالسالفة الظاهر ان البنت خبلت بك
ويضحكون
وتيلس ام عبدالله تسأل عن البنت
ـــــــــــــــــــــــــ ـــــــــــــــــــــــــ
ـــــــــــــــــــــــــ ــ
وتمر الايام
عبدالله يكشخ عسب يسير هو وامه واخته يخطبون شوق حقه
عبدالله : يلا امي ما خلصتوا ؟
ام عبدالله : يلا ابوي سرنا
ـــــــــــــــــــــــــ ـــــــــــــــــــــــــ
ـــــــــــــــــــــــــ ـــ
في بيت قوم شوق
ام علي: شواقة امي دخنتي الميلس
شوق هيه
ام علي : يلا يايين الناس
شوق اتسير غرفتها
ويوصلون ويدقون الجرس ويفتح اخوها علي الباب
ويسير عبدالله ميلس الرياييل والحريم في ميلس الحريم طبعا
ويتفقون على كل شي ويحددون موعد الملجة</font></div><!-- / message -->
</font>
رد مع اقتباس
مواقع النشر (المفضلة)