<font color='#E77471'>الجزء الثالث
ظهر عمر من عند نورة وسار عقب ما ارتاح واتطمن على اهله ولقى هادف بعده موجود برا يتريا ... ابستم عمر ابتسامه هاديه لهادف .. وسار ويلس عنده
عمر: اسمحلي اخوي تراني والله كنت متدوده ومب عارف راسي من ريولي ومامداني اشكرك ...
هادف : لا افا عليك ياخوي هذا واجب .. وهالشي لو ما انا سويته كان غيري بيسويه ..
عمر : ماتقصر طال عمرك انشالله نرد لك اياها في الافراح ..
وتم هادف يخبر عمر السالفه وتعارفوا على بعض اكثر وخذ عمر رقم هادف عشان يشكره بالمعنى الصح عقب ما يظهرون من الي هم فيه ..
عمر: على العموم اشكرك مرة ثانيه واللحين سير ارتاح البيت ادري بك انك تعبان.. ما قصرت
هادف : العفو طال عمرك .. لكن بعده بتم هني يمكن تحتاي شي واللا مساعده ..
عمر : لا مشكور الغالي انا بروحي بسير مادام اني اتطمنت عليهم وماعليهم شر وترا باجر بييهم الصبح على حسب كلام الدكتور بيظهرون ..
هادف : على خير انشالله .. وان بغيت أي شي حاظرين ..
عمر : ما عليك قصور .. الله يحفظك ... طلع هادف وعقبه لحقه عمر وسار البيت...
بالباجر الصبح سار عمر المستشفى ولقى انه امه وخوانه الحمدلله بخير ونشوا من عقب تاثير المخدر .. دخل عمر على حجره امه ولقاها منسدحه يا ولوا عليها وحبها على راسها ..
ام عمر: فديتك ولديه شحالك ؟؟ ربك بخير .
عمر : انا بخير يعلج الخير الغاليه . الحمدلله على السلامه .. تستاهلون السلامه ؟؟
ام عمر : الله يسلمك من الشر ... ها شو الحال على خوانك انا الدكتور طمني عليهم بس بعدني اتروع الي يقول جي عسب يصبرني ..
عمر : لا امايه الحمدلله ما حد عليه شر .. والله اني متلوم اني خليتكم ويا هالدرويل الخديه ..
ام عمر : لافديتك ترا مقدر ومكتوب .. الحمدلله على كل حال .. توها نورة كانت معاي وتخبرني عن الريال هادف والله انه نشمي ماقصر ويانا ..
عمر : هيه ياامي لاقيته البارحه والله انه مخاوي شما..
ودخلت نورة عليهم الحجره..
نورة: هلا عمر شحالك ..
عمر : بخير يسرج حالي هاشو صحتج اليوم .؟؟
نورة : الحمدلله احسن بوايد .. ها شو كنتوا تقولون ؟؟
ام عمر: ماشي اخبره عن الريال الي البارحه ويانا .. عاد لازم نعزمه ذيج العزيمه السنعه من نظهر بالسلامه ..
عمر : اكيد امايه ما يبالها كلام ... انا بسير الحين صوب الدكتور عشان ايظهركم ..
وسار عمر صوب الدكتور ولقى هادف واقف ويا الدكتور يتخبرهم عن حالهم ..
عمر: مرحبا هادف شحالك ..
هادف : بخير ربي يعافيك ها شو صحة الاهل
عمر : بخير كلهم بعافيه .. ماشالله اشوفك هني والله انك راعيها وتعبناك ويانا ...
هادف : لا افا عليك لا تقول جي .. توني اتخبر الدكتور يقول ترومون اتظهرونهم بس فيصل الي بيبطي شوي
عمر : هيه ترا عشان الكسر عيل يوم انه جي بسير اخبر الاهل عشان انظهرهم ..
هادف : وانا بسير صوب الدرويل والبشكاره بشلهم وبلقاك برا عند الباركنات ...
عمر : ما تقصر اخوي .. وانا بسير صوب الاهل وبخطف صوب فيصل ..
سار هادف وخلص اجراءات الدريول والبشكاره عشان يظهرون .. وهو مستانس يحس انه يسوي شي من خاطره ..
عمر: ها امايه خلاص ؟؟
ام عمر: هيه ياللا .. لكن فيصل وينه ما اشوفه ..
عمر : فيصل بعده ما بيظهرونه الحين ..
ام عمر: ياويلي على ولديه شو بلاه ليكون في شي وداسين عني ..
نورة : لا امايه فديتج مافيه شي اللا شوي كسر في ايده عسب جي يباله وقت ويا الجبس ما بيبطي اللا هو اسبوع ..
ام عمر: لا لا لا اتودوني صوبه بشوفه .. ببرد فوادي ...
عمر: خلاص صار .. ياللا انسير له ..
دخلت ام عمر وهيه ملهوفه على ولدها .. تلوي عليه وتحبه ...
فيصل : أي أي أي امايه فديتج شوي شوي علي يديه تعورني ..
ام عمر: فديتك والله شي يعورك ؟؟
فيصل : ههههههههههه تراني اقولج يديه تعورني ..
ام عمر : ماعليك شر يا ولدي انشالله بتقوم بخير .. وانا بخطف عليك كل يوم لا تحاتي ..
فيصل : ماعليج قصور يا موزة بنت سعيد .. راعيتها ..
وتموا شوي يضحكون عشان يغيرون الجو ... وقطع كلامهم عمر
عمر: اوو انا نسيت الريال برا ويا الدريول والبشكاره حليله ..
ام عمر : ليش هو هني ؟؟
عمر : هيه من الصبح هني يالله لا نبطي على الريال فضيحه فيه ..
وظهروا عمر وام عمر ونورة وسعيد وهاجر وركبوا سيارتهم .. وقبل لا يتحركون ام عمر سالت نورة وينه الريال واشرت نورة على هادف ..
نزلت ام عمر صوبه هادف وعمر ..
هادف من شافها يايه جداه اتجدم صوبها لانه ما يباها تمشي وايد ...
ام عمر : مرحبا ولديه .. شحال وشحال هلك ...
هادف : بخير عموه تستاعلون السلامه ..
ام عمر : الله يسلمك ويحفظك من الشر ... ومشكور ما تقصر والله انك راعيها .. .
هادف : افا عليج امايه هذا الواجب ..

سارت ام عمر وركبت السياره وتخبر نورة عن هادف وكيف لاقاها .. وتمت تشكر فيه طبعا عمر يمشي جدام وهادف وراه مع البشكاره والدريول ...
وصلوا البيت .. والكل نزل ... وام عمر وصت ولدها انه ما يخلي هادف يروح لازم يقرب ...
عقب ما الكل دخل البيت .. تم هادف وعمر برا
عمر : اقرب هادف وين ساير ؟
هادف : اسمحلي والله بس ماروم انشالله مرة ثانيه..
عمر : افا ما يصير ... الوالده حالفه علي انك لازم تقرب ..
هادف : اليايات اكثر انشالله بس انا من البارحه ظاهر من الدوام من غير ما اخذ اذن ولازم اسير ..
عمر : مادام جي السالفه ما نروم انقول شي .. مرخوص لكن حط في بالك انه لازم بنشوفك انشالله ..
هادف : على خير انشالله .. وداعه الله ..

عقب عناء هالرحله والحادث الكل سار حجرته ورقد لين وقت الغدا ...
نورة تمت تحمد ربها وصلت ركعتين شكر لربها انه ما صار لهم شي ..
بس ما يا شي في تفكيرها من صوب هادف غير انها حست ان الدنبا بخير وان في ناس بهالطيبه .. .

وقت الغدا الكل نش وتيمعوا كالعاده ماعدا هالمره فيصل لانه في المستشفى ..
ام عمر: فديتك يا فصول مرة من اتغدى واصلي العصر بسير صوبه ..
عمر: وين تبين الله يهداج انا مخبر ربعه اكيد بيسيرون صوبه وغير جي عيال عمومتيه بييون صوبكم ايسلمون عليكم ..
ام عمر: والله اني ما استحي من ربعه اللا هم شرات عيالي .. بس صدقت العرب اليوم بيون صوبنا ما يستوي ,, عيل تدري نورة تسير صوب اخوها وتشوفه شو يبا ..
ام عمر : امايه شو اقصد انا من الصبح ؟؟ تراني اقول ربعه هناك وين تبين نورة تضرب بالويه وتسير ؟؟
نورة : يالله انته بعد تراهم اللا اصغر عني وغير جي تراني متغشيه والاهم انه شي ستاره بيني وبينهم .. فيصل فديته بطالعه شو يبا وشو يبا من ملابس ما يستوي انا وامك ما انسير له ..
عمر : على هواكم بس ما اوصيج تراني بسير وياج وبيلس وياكم عقب بخليج بخلص سالفه السيارة وبرد لج عقب ..
نورة : على خير انشالله ..
سارت نورة صوب حجرتها بتقيل شوي .. وتوقف جدام المنظرة وتشوف ويهها الي فيه شوي تعوريات من الحادث وتحسس الجروح وتقول في خاطرها الحمدلله اني ما تشوهت وايد ولا صار بي شي ..
حاولت تخفي هالجروح بشوي من الكريمات مع شوي تعديلات ترد ويهها الصافي مثل ما كان .. طلعت نورة الي الكل يعرفها بجاملها بس مع شوي ارق وتعب في وييها ...
العصر .. نورة وعمر ساروا صوب فيصل الي ماكان حد عنده وشوي وترخص عمر بيخلص شغله وبيردلهم عقب ..
فيصل : نورة اقولج ازقري لي حد من الممرضين تراني ابا اسبح ما اروم اتم جي ...
نورة : والله انته بعد سالفه اصبر يومين وبيظهرونك وبنسبحك ..
فيصل : يعععع شو يومين .. انا جي مب طايق عمري بعدين وين تبين اتسبحيني انتي واللا امي ؟؟ ياللا ازقري لي حد منهم..
نورة : على هواك ..
سارت نورة وزقرت له ممرض عشان يسبحه .. وهم في الحمام طبعا سبحه ببطئ عشان ما يتعور ..
في هاللحظات نورة يالسه اترتب ملابس فيصل في الكبت .. وشوي اللي حد يدق الباب ويدخل ..
هادف : السلام عليكم ..
نورة وهيه منصدمه : وعليكم السلام .. مرحبا اتفضل اخوي ..
هادف : السموحه الشيخه ماكنت ادري انه فيصل هب هني ..
نورة : لا هو هني بس الممرض يسبحه الحين .. اقرب الحين بيظهر ..
سارت نورة الصوب الثاني من الغرفه اتييب الحلاوة .. وفي نفسها حست بخجل انها ما شكرته على الي سواه وياها هيه بالذات .. ابتسمت بهدوء بعد ما تذكرت كل هالمواقف .. نورة بطبعها عاقله وهاديه وحبوبه ..وهادف ما يقل عنها عقل وجمال وهيبه ..
ظهرت نورة ومعاها سله الحلاوة ..
نورة : اتفضل اخوي ..
هادف : مشكور اختي ما تقصرين .
نورة : لو في حد لازم يشكر اكيد بكون انا وهلي .. انته ما قصرت ويانا وبالذات انا لاني وايد كنت تعبانه .. مشكور ويعلنا نخدمك في الافراح انشالله ..
هادف وقتها حس بقلبه ينقبض لما تذكر حالتها كيف كانت وحس براحه اكثر انه هو الي ساعدها مب حد ثاني ... ابتسم لها هادف وكان يحاول انه عينه ما اتيي صوبها لكن غصب عنه ...

سارت نورة الصوب الثاني من الغرفه وطلهت وفي ايدها كيس .. سارت صوب هادف وعطته اياه ...
نورة : اتفضل اخوي ... هذي لك انته .. وابتسمت له ..
هادف كل هذا مستغرب شو ها .. وخذه من ايدها وهيه بعدها واقفه اول ما شاف شو داخل الكيس ضحك بصوت مسموع ولا اراديا اللي هو شم الكيس كانه ما شم ريحه دخون واللا عطر من قبل تدرون ليش ؟؟
في هالكيس نورة شلت سفرة هادف الي كانت مغطيه بها راسها وقت الحادث وغسلتها وعطرتها ودخنتها .. وردتها له ...
نورة مب مستوعبه الي سواه هادف معقوله هالكثر الدخون عيبه ؟؟ والا شو بالضبط ؟..
هادف انتبه لعمره لكن بعد شو ...
هادف : ليش الله يهديج رديتها خليها انا مب ساءل عنها .... فدوة عن راسج ..
نورة بمستحى : تسلم اخوي بس هذي لك انته .. ومالي حايه بها .. خلها عندك بتستفيد منها اكثر مني ...
سارت نورة وخلته يالس روحه يفكر في كل الي استوا .. وهيه تفكر في الي هو سواه .. هادف كان وده ياخذ الكيس ويحظنه .. ويتنصخ من الدخون الي فيه ...
قطع كل هالتفكير صوت فيصل عقب ما ظهر متسبح ويا سلم على هادف وهو ما يعرف منو ها ...
فيصل : مرحبا اخوي اتفضل استريح ..
هادف : زاد فضلك والحمدلله على السلامه ..
فيصل : الله يسلمك انشالله ...
هادف عرف بعمره لفيصل ووايد ماشالله اندمجوا في السوالف كانهم ربع من زمان مع فارق العمر لانه هادف عمره (25) وشوي ودخل عمر واكتملت السوالف ومع ربع فيصل وانقضى اليوم ..

مضت الايام وظهر فيصل من المستفى وطول هالفتره هادف ما انقطع في اتصالاته مع عمر وفيصل يتخبر عن احوالهم بس ماكانوا يلتقون في بعض وايد بسبب ظروف الشغل ..

هادف يوم ورا يوم يتاكد انه هو يحب نورة .. حبها تغلل داخله من غير ما يدري اصلا هو اول ما شافها انبهر بها .. والي خلاه يحبها اكثر اهلها .. ناس ما عليهم قصور ... طيبتهم كل شي فيهم خلاه يحبها ..
في داخله خوف من انه نورة ما تكون تبادله هالشي ..
هادف في نفسه : ( ياربي لا لي ربيع اشكي له همي ولا حد يشور علي .. انا والله احبها فديت ياربي ذيج السفره الي لامست شعرها .. فديت ريحتها الي فيها ... اااااااه حرام اني ما ايي صوب السفره لين ما ايي اليوم الي تناظر فيه عيني نورة .. )
ومسك السفره وشمها .. وهو يهمس بهالكلمات .. حبها ورد حطها داخل الكيس .. ودخلها في الكبت عشان ما اتطير ريحتها ..
بالرغم من انه هادف شكله انسان جدي لكنه راعي سوالف وحساس واحاسيسه راقيه احترام الناس له خلا له هيبه .. وقلبه كبيييير ولو في يوم حب وعشق انسانه يخلص له لو بتفكيره ..
نورة كانت وايد اتفكر في هادف بس من ناحيه النخوة والشهامه ما فكرت في نظراته ولا أي شي ثاني لانها ما حطت في بالها أي شي من هالناحيه .. اعتبرت الموضوع عادي لانها مهما فكرت ما في شي تروم توصله من خلال تفكيرها ...

عقب الحادث بشهر ...
ام عمر : عمر .. ياولديه وين هاك الريال الي شسمه ... (وترص على عيونها تبا تذكره ) عوذ بالله من بليس شسمه ؟؟
عمر : هههههههههههههه بعدج رصي بعد على عمرج بتظهرين الاسم .. هيه هيه ياللا صح صح قولي ..
ام عمر : عنااللا تك .. ادري به انه ما خاز عنكم بعيد درمكي شراتكم بس ماذكر اسمه ..
ويدخل عليهم فيصل ..
فيصل : ها شعندج الظاهريه الا جنه مب عايبنج الدرمكي ..
ام عمر : حشا انته من وين ظهرت لي جي .. ما قلنا شي شبلاك بتاكلني ..
فيصل : فديييت امايه انا تعالي بحبج عخشمج فديته مااطوله .. شيوخي
ام عمر: هب هباك الرب .. بتدقنيه بعين غيران انته انه خشمك هب شراتي ... لكن خلها في فوادك ..
فيصل وعمر يضحكون على امهم .. ويرد عمر ويرمس
عمر: يالله يا امايه قطعيتنا نحن الحين كل هذا عشان تتخبرين عن الريال .. بقولج اسمه .. اسمه هادف الدرمكي ..
ام عمر: هيييييه صح ذكرته .. اللا وينه ما ايي صوبكم ولا شفتوه ..
عمر : ما تنلاقينا وياه من اسبوعين لكنه يتصل بنا ونتصل به بين فتره وفتره
ام عمر: عيل خلاص يوم انه باجر الخميس قوله غداه عندنا وان ما يا يمين الله لزعل عليه ..
فيصل : تراني اغار وماعندنا حريم يعازمن رياييل ..
ام عمر: قم انته قم من جدامي لا فرك بكرتون الكلينكس ..
نورة : خيبه خيبه شو صاير .. بلاها عيوزنا معصبه ..
ام عمر : لا بالله انتوا شي بلاكم اليوم حد يقولي عيوز وحد هب عايبنه اني ظاهريه واللا خشمي طويل شو سالفتكم والله لشل عمري وسير عند امي ابرك ..
عمر : ههههههههههههه وين تبين عند يدوه .. يلسي عايبتنا فديت برقعج انا ..
ام عمر : هيه جي اباك .. ياللا اتصلوا بالريال خله ايي ..
عمر : انشالله الغاليه ..
نورة فهمت انه قصدهم على هادف .. حست بفرحه انهم بيردون له جميله ولو كان بهالشي البسيط وحست براحه انه بيدخل بيتهم وبيكون وياهم ولو انها ما بتشوفه ... حست انها تبا تسوي كل شي مميز ذاك اليوم من غير ما تحط في بالها سبب محدد تتجاهل فرحتها وتتجاهل كل شي يعنيه لانها تعده شرات اخوها وهاالي مبين وياها ..
نش عمر عن هله وسار بيتصل في هادف ..

عمر: السلام عليك يالقاطع ..
هادف : هلااااااااا وعليك السلام مرحبا والله
عمر : شحالك عساك بخير ؟
هادف: بخير يسرك حالي انته شحالك وشحال عربانك ..
عمر: بخير يسرك الحال ولا يضرك ..
هادف : دوم انشالله السموحه منك عاد والله مب بيدي ياخوي تعرف شغل المركز ليل نهار زحمه السموحه منك والله ادري من صوبي القصور ..
عمر: لا مسموح طال عمرك اللا تولهنا عليك .. وقلت عاد باجر اتيي صوبنا غداك عندنا .. واقولك من الحين تراها العيوز موصتني .. وان ما يييت بتسوي ذبحه في بيتنا ..
هادف : خيبه خيبه خيبه لا انشالله لا ذبحه ولا شي هههههههه ماتهون علينا ام عمر الغاليه تزعل ..
عمر : احم احم .. لاحظ انك يالس تتغزل في عيوزي ..
هادف : ههههههههههههههه الله يخليلك اياها تراها امي انا بعد شو بلاك انته جي طماع . وسير قول لها اني باجر ياينكم انشالله وما بردكم في عزيمتكم اصلا لو انته ما اتصلت بي جان انا عفدت عليكم من غير ما حد يقوللي ..
عمر : حياك الله في أي وقت .. ونترياك انشالله باجر ..
هادف : الله يحيك .. خلاص انشالله باجر لقانا ..

سكر عمر عن هادف وسار داخل البيت .. وقال لهله انه هادف بييهم على الغدا ..
ام عمر : يا حياه الله .. ياللا امي نورة قومي طالعي الميلس مرتبه واللا لا .. هذا فصول ويا ربعه مبهدلين لي المكان مب جنه ميلس عرب ..
نوره : والله لو هو هني مادري شو بيسوي بج اللحين .. هههههههههههههههه خلاص انا بشوف الميلس وبخطف على الطباخ اخبره انه باجر بيتغدنا عندنا الريال عسب ما يفشلنا جدامه ..
ام عمر : لا لا لا مرة مسامحه من تعديل الطباخ انا بروحي بسوي له الغدا .. عيب هذا خاطر عندنا وماندري بها الطباخ ترا الا احيانا يخورها ..
نورة وهيه تنغز امها بضحك : يالله يالله شو هالمعزة كلها حق هادف .. مااشوفج اهتميتي بحد هالكثر .. ها امايه شو السالفه ليكون حاطه عينج عليه من عقب المرحوم؟؟
ام عمر وهيه مبققه عيونها : عنا اللاتج .. امف عليج والله ياني اروغج بقب اللحين اشوفج قمتي انتي تخورينها ماالوم فصول وانا اقول عليج العاقله.. فديتج هذا شرات ولديه مابيي اخر عمري احط عيني عليه ولا على 10 غيره من عقب ابوج الغالي ما حد يحل محله ..
نورة : فدييييييييتج امايه والله اسولف عليج عاد ما خليتي شي ما قلتيه ..
السموحه منج الغاليه ..بس ابا اغيظ بج شوي عشان عقبها تضحكين ..
ام عمر : انزين مسموحه بنتي ادري بج .. هب شرات هالرغدي فصول بس بعد فديته ..
وتنش نورة عن امها وهيه تضحك وشوي تبعد وتسير صوب الممر واللا وهيه تزاعج ..
نورة : امااااااااااااااااااااااي ه ..
ام عمر : ها خير شو صاار ؟؟
نورة : فدييييت برقعج انا ..
ام عمر وهيه تتحرطم: هذيل شو بلاههم اليوم على برقعي .. شو سالفتهم ؟؟ اللا شكله عايبنهم ..
وسمعها ولدها سعيد وهو يلعب بلاي ستيشن ..
سعيد : لا امايه انا بقولج ليش .. تراه منحاس شوي اليوم مادري بلاه ..
ام عمر: هييييه وانا اقول شو بلاني اليوم محوله ما اشوف عدل ..
ويضحك سعيد على امه ... ويتفداها في خاطره ...

من صوب ثاني .. هادف مستانس انه باجر بيسير عند هل عمر الي صدق حبهم من خاطره وحب طيبه قلوبهم وكرمهم ... وفوق هذا كله غناته هناك ... وهو متلهف انه ايي اليوم الثاني بفارغ الصبر ...
هادف يكلم نفسه ..
هادف : ( ياربي شو البس باجر أي سفره البس .. ؟؟ ممممممم البس البيضا ؟؟ لا لا ما اباها .. بلبس السفره الي كانت في يوم على راس غناتي .. )
وظهرها والريحه بعدها في السفره وحتى لو اختفت منها هادف بقلبه حفظ هالريحه ويشمها دوم مع نصخه ..
رد هادف وكمل : ( لا لا هذي ما بلبسها اللحين .. يوم غايته بلبسها .. ) ابتسم هادف ابتسامه كلها حب ورضا ..

يا اليوم الثاني ونورة تدخن الميلس وتعطره وام عمر تزهب الغدا وتشوف البشاكير وهم يعدلون الفواله .. ومحتشره ما خلت حد ما امرت عليه ..
شوي ووصل هادف واستقبله عمر وفيصل وسعيد ..
اول مادخل هادف الميلس تنصخ بعمق لانه شم نفس ريحه الدخون الي في السفره .. ارتاحت نفسه وايد وحس بالراحه وحس بالحب يتغلغل اعماقه .. هذي نفسها انفاس حبيبتي الي انا اباها ..

يلسوا الشباب وتموا يسولفون ويضحكون وزادت علاقتهم اكثر من قبل ..
وشوي الا تدخل عليهم ام عمر عشان تسلم على هادف ... ووراها البشاكير بيحطون الغدا .

ام عمر : السلام عليك الغالي ..
هادف نش بيسلم عليها ..
هادف : عليج السلام .. وقامت ام عمر وقربت من هادف وخاشمته ..
هادف استحى انها هيه الي بدت بهالشي .. وضحك على عمره
فيصل : اووووب العيوز هب هينه شعندج اتوايهيين الريال .. هههههههههههه فلختيه ..
والكل يضحك على فيصل وامه وهادف مب قابض عمره من الضحك ..
ام عمر : والله ينك انته يبالك هالعصا تلعب على ظهرك لعب .. شعندك ولديه وانا حره فيه وانه اخير عنك بعد ..
فيصل : ول ول ول ما يسوى عليج هالخشم ..
وينش فيصل وحب خشم امه ..
فيصل : ها ما يسدج حبيتج على خشمج الخشم الشيوخي .. هههههههههههه
ام عمر : ياللوتي انته .. حشيمه حق الريال واللا اني بعرف اداويك ..
ويلست شوي عندهم وخذت علوم هادف واخباره وهو تم يسولف وياها وحبها وايد وحب سوالفها ...
رتبوا السفره .. وحطوا الغدا .. قاموا الشباب يتغدون .. وكل شي كان فوق المستوى الحمدلله ..
عقب الغدا والفواله .. اترخص هادف منهم انه بيسير ...
ام عمر : وين الله يهداك توه اللا الوقت ..
هادف : ماتقصرين امايه بس وراي دوام في الليل ما يصير ..
ام عمر : يالله يالله ما تنلام يوم انك خاويت هالخراط فصول بتخرط علي شراته وبتتحراني عيوز مخرفه اليوم الخميس .
عمر وهو يضحك على امه : امايه بلاج كلتي الريال .. حليله عنده دوام تراه يشتغل في الجوازات وتعرفين انه مافي لا خميس ولا يمعه ..
هادف : هيه والله امايه وما عاش الي يخرط عليج .. بس هذا دوامي والله وانشالله بييكم دوم وما بنقطع عنكم ..
ام عمر : هيه... اسمحلي يا ولديه بس عاد شو دراني بهالسوالف انا .. الله يوفجك انشالله وحياك الله في أي وقت . وسلم على هلك وعربانك كلهم .. وخبر امك اتيي صوبنا .. في فوادي اتعرف عليها .
هادف : انشالله ما يهمج .. ياللا وداعه الله
عمر +فيصل + ام عمر : الله يحفظك ..

وطول الوقت ام عمر تتمدح في هادف وتسولف ويا عيالها عنه ..
ونورة ما تبدي أي اهتمام لكنها كشخصيه معجبه باخلاقه واسلوبه في التعامل ..
نورة يمكن في داخلها تكابر أي احساس يتعدى الاعجاب به كشخصيه بس والله يعلم لين وين بيوصلها احساسها هذا ..

هادف وايد مستانس على علاقته بهل عمر وكيف انهم ناس طيبين وايد حبهم وكلم هله عنهم وطلعت يدت هادف تعرف ابو عمر بس من بعييييد يعني علاقه شوي بعيده مجرد اهل وجماعه ..
الجزء الخامس
الجزء الخامس

عقب 3 ايام من زياره هادف لهل عمر .... فكر هادف انه يسوي الي هو في خاطره .. صدق حب نورة وحب اهلها وحس انهم صدق الناس الي يتشرف بنسبهم .. وفوق هذا قلبه عاشق نورة ...
اهل هادف عرفوا هالناس بس بعدهم ما تشاوفوا ...
هادف : تحيدين قوم المرحوم حمد سالم الدرمكي الي خبرتج عنهم ذاك اليوم ؟؟
ام هادف : هيه شبلاهم رب ماشر بعد ..
هادف : لا ماشر امايه الحمدلله .. بس بغيت اخطب من عندهم ..
ام هادف : وانته شعرفك في البينه انا الي هيه امك بعدني ما شفتها احيدك ماتبا وحده منه والدرب ..
هادف : لا امايه اول الشي الناس ماعليهم كلامك يشهد الله انهم يحبوني شرات ولدهم وغير جي انا شايف البنيه يوم الحادث تدرين كنت وياهم تراني ..
ام هادف: هييه جي السالفه ثرك متوثق من الي تباها ..
هادف : لا لا لا امايه شو تحيديني راعي هالسوالف .. والله انه ماشفتها الي في المستشفى بعدين قلبي ارتاح لهم .. وغير جي تراها يدوه عفرا تعرف هل ابوهم .. يعني نتعارف ..
ام هادف : خلاص انشالله عاد انته البجر ماروم اردك يوم انها في خاطرك ..
هادف: فديتج امايه .. ادري بج ماتقصرين .. انزين اتصل بخوها واقوله اني اباها ويشاور هله وان ردوا علينا بالموافقه اخليج اتسيرين لهم .. ؟؟
ام هادف :والله ان كان جي شورك توكل على االله وان ردوا عليك انشالله بنسير لهم انا ويدتك ..
هادف وهو متشقق : انشالله امايه ..
ونش هادف وهو مب سايعتنه الفرحه .. اتصل بعمر

هادف : الو السلام عليك ..
عمر : وعليك السلام هلا والله ومرحبا شحالك
هادف : بخير يسرك حالي شحال اهلك
عمر: بخير يسرك الحال ولا يضرك .. .
ودخلوا في سوالف الشباب شوي .. وكل واحد ياخذ اخبار الثاني ..
ودخل هادف عقبها في الموضوع
هادف : اقول عمر .. انا ياينك في طلب
عمر: افا عليك انته بس امر .. في شو اقدر اخدمك ..
هادف: مايامر عليك عدو .. ماتقصر.. انا طالب القرب منكم ..
عمر انصدم ما توقع انه يكون هذا طلبه .. تلعثم عمر في الكلام وماعرف في شو المفروض يرد عليه ..
عمر: والله فاجاتني الصراحه ماتوقت انه يكون هذا طلبك .. وانته ريال والنعم فيك والنا الشرف انك تكون نسيبنا ..
هادف : ماتقصر يا عمر وانا مابلقى ناس شراتكم.. بس ياخوي حسيت متردد لو في شي في خاطرك قوله ..
عمر: ها ؟ لا طال عمرك بس انا ماتوقعت هالشي منك .. وغير جي لازم اشاور الوالده واشاور اختي بعد ..
هادف : اكيد طال عمرك شي مافي شك .. تشاوروا ورد علي وانا حاظر في أي وقت اني اييب اهلي ..
عمر: على خير انشالله
عمر تم مهموم ومب عارف بشو يرد على الريال .. صدق هادف انسان ما يتعوض .. وماحد كثره ممكن يخاف على اخته ..
عمر في خاطره : ( انا ليش مصدع راسي ؟؟ بخبر امي ونورة ونشوف شورهم يمكن نورة الله يهديها وتوافق ..)

دخل عمر البيت وخذ امه على صوب ورمسها ....
ام عمر : ها خير ياولديه شو فيك
عمر: خير امايه .. بس بغيت اخبرج شي معرس متقدم حق نورة ..
ام عمر : لاحول الله والله اني في خاطري فرحه لكني صاكه على عمري .. انته تعرف راي نورة في هالموضوع ..
عمر : امي اعرف لكن هالمره غير .. الي يا طلبها هادف الدرمكي .. امايه تعرفين شو يعني هادف .. والله انه ما يتعوض وخساره لو نورة رفضت
ام عمر : سبحان الله هالانسان دوم تمنيته لها .. والله ياني فرحانه به .. وياليته من نصيبها .. ماعليك انا بقنعها وانشالله ربك يفرجها وتوافق ..
عمر : انزين امايه .. مب المفروض اخبر هادف عن نورة ؟؟
ام عمر : لا يا عمر اصبر خلنا انشاورها ربك يمكن ما ترضى وعقبها نفشل عمارنا ليش ؟؟ وان الله هداها ووافقت ترانا بنخبره.. وان هو ولد عرب وصدق يباها ما شي بيرده عن شوره
عمر : صدقتي .. خلاص قومي وشاوري بنتج ..

نشت ام عمر وهيه كلها فرح . مب مستوعبه الي يصير وبالذات انه هادف اللي صدق حبته شرات عيالها ..

ام عمر ما بنتها نورة..
ام عمر : نورة امايه .. اسمعيني ودخيلج تكبرين عقلج وتفهمين ..
نورة : امايه عرفت شو تبين انتي ما ترمسين بهالطريقه وياي اللا يوم حد ايي يخطبني صح ؟؟
ام عمر : هيه خطبوج من اخوج عمر ..
نورة : طبعاا رديتوا عليهم لانكم تعرفون رايي ..
ام عمر : لا ما ردينا .. نورة اسمعي انتي بتدخلين 20 خلاص شو ناقصنج عشان ما تعرسين ؟؟ انتي لين متى بتكونين جي
نورة وبدت الدموع تنزل من عيونها : امايه فديتج اتعرفين رايي ليش جي تضغطون علي ..
ام عمر : يابنتي افهميني ؟؟ هالمره غير والله يانه قلبي منشرح لها السالفه . نورة ياج ريال ولا أي بنت تحلم به .. ياج ريال والله يسوى كل الي يوج وخطبوج وان خسرتيه انتي الي بتندمين ..
نورة وهيه مستغربه من كلام امها .. .
نورة : امايه شو تقولين تدريين انه ماهمني شي .. ولو منو كان
ام عمر : لا .. اللي ياج . هادف .. تعرفين شو هادف ..
نورة وهيه مبطله حلجها .. اخر انسان اتوقعته يتطلبها هادف .. دارت الدنيا بها ..هادف الانسان الرقيق الطيب .. هادف الي ساعدها وحماها من عيون الناس رغم تعبها .. هادف الي نورة اعجبت بشخصيته ..
نورة في داخلها متاكده انه كلام امها صح وانه هادف ما يتعوض وهيه بتخسر لو رفضته لكن ما تقدر ماتقدر ..
بدت نورة اتصيح بحرقه .. بالم .. شي تباه وصل لين عندها لكن شي اقوى يردها للخلف ويبعدها عنه ..
ام عمر : اهدي يا بنتي .. خلاص لو ما تبين مب مشكله بس لاتحرقين اعصابج هالكثر انتي فكري والي تبينه بيصير شو بقول بعد .. لاحول ولا قوة
نورة : لا لا امايه ما ابا افكر .. ردوا عليه قولوا له نورة ما تروم تعرس .. ولا تبا تعرس . دخيلج
ام عمر : لا حول الله .. خلاص يابنتي .. الي فيه الخير بيصير انشالله
..
ظهرت ام عمر عن نورة وخلتها في همها غارقه ..
نورة وهيه تصيح ..: ( انا ماعطيت نفسي مجال اني احبك يا هادف .. لكن اتفاجأ انك انسان انا اتمناه .. ويتني لين عندي .. لكن الغلط من صوبي انا اني ما اقدر اوافق .. ااااه ياويل حالي .. مااتهنيت باول انسان انجذب له .. او حتى تمنيته في احلامي بس لان الواقع هو الي يبعدني عنك .. )
استسلمت نورة ورقدت وهيه ماتدري عن عمرها من كثر صياحها وتعبها ..

سارت ام عمر صوب ولدها عمر عشان اتخبره برد نورة .. ام عمر كلها خيبه امل .. وعمر خبر فيصل وهم الاثنين خايفين من رد نورة وما يبون يردون هادف ..
عمر + فيصل : بشري امايه ..
ام عمر وهيه تتنهد : كالعاده يا ولدي ما اعرف شو اسوي بها ... البنت قلبها محروق وتصيح من هالحال الي هيه فيها ..
فيصل : لا حول الله هذي لي متى بتم جي ؟؟ حرام الي هيه تسويه ..
عمر : والله ما اعرف شو اقول للريال .. هادف متأمل خير لكن للاسف ..
فيصل : ياخي كلمها انته يمكن اتييب راسها
ام عمر : لا لا مرة ماحد ايي صوبها .. بروحها بتموت من الصايح خلوها ..
خلاص انته رد على الريال ما شي نصيب شو نسوي ..

مرت على هالسالفه حوالي 3 ايام وعمر ما رد على هادف .. نورة تحاول انها تتصرف عادي جدام هلها لكن في داخلها حزن ما تروم تنساه ..
كان عمر على امل انها اتيي من نفسها وتقول انها موافقه وغيرت رايها لانه هالمره نورة اتاثرت بسالفه الخطبه .. لكن ماشي امل
فقرر عمر انه يتصل بهادف ويرد عليه ...

هادف على احر الجمر كان عنده امل انه بيوافقون عليه بدرجه ماتتخيلونها لدرحه انه كان يخطط في راسه كل شي للعرس وحياته وكل شي .. لانه ما كان على باله انه في أي شي ممكن يخرب عليهم ..
هادف وهو منسدح في حجرته .. رن تيلفونه ..
هادف فز قلبه من شاف انه عمر متصل الحلج منطر نصين .. مب مصدق
هادف : هلا والله ومرحبا ملايين
عمر: مرحبتين والله شحالك
هادف : بخير الله يعافيك .. ها ياخوي بشرني تراني ارقبك من متى
عمر : مادري شقولك يا هادف بس مالك نصيب عندنا ..
هادف صخ من الصدمه ما رام يتحرك اتيبس مكانه ..
عمر : هادف اسمحلي والله بس ما اعرف شو اقولك الرضيعه مب موافقه تقول انها ما تبا تعرس الحين بعدها ولانها تفكر تكمل دراستها ..
هادف : خلاص خلاص عمر ..انا كنت متامل خير .. لكن بعدني اقولك يا عمر انا راضي انها تدرس وتسوي الي تباه
عمر : ياريت ترضى يا خوي لكن هيه رافضه المبدأ من الاساس يعني ما شي امل من صوبها
تسكرت الابواب في ويه هادف .. ما توقع هالشي من نورة ..
عمر : اسمحلي ياهادف والله اني ماودي اخسرك لا انا ولا هلي بعد بس كل شي نصيب في هالدنيا
هادف : بخيبه امل .. ونعم بالله .. ماعليه ياعمر .. ماصار اللا الخير .. وبنظل اهل وربع واخوان ماشي يغير علينا رغم اني كنت طامع في نسبكم
عمر : والله ونحن اكثر .. لكن هاللي استوا .. الله كريم الي الله كاتبنه بيصير انشالله
هادف : على خير انشالله
سكر عمر عن هادف وهو زعلان على الي استوا ما كان وده انه تكون هذي هيه الاحداث .. لكن ارتاح انه عرف انه هادف عاقل يعني ما بين من كلامه انه بيقطع العلاقه معاهم

اما هادف متيبس مكانه .. مب مصدق تفكيره يودي واييب .. معقوله يكون هذا تفكير نورة وسببها للرفض ؟؟ لا لا انا ما اتوقع
معقوله اهلها الي رافصين ..؟ بعد لا اهلها ما شي اطيب عنهم ما اظن يكونون هم السبب. ؟؟
ليش ياربي ؟ اللهم لا اعتراض على حكمك لكن طلبتك ياربي .. لاتحرمني من هالانسانه .. احبها احبها احبها ..
من نظرتها قلبي انشرح لها .. كيف الحين ابعد عنها . هادف صار كتله من الاحزان اتحطم لكنه بعده حط امله بالله ..
وقرر انه ما يخبر امه لانه بيحس نفسه وايد صغير ..

هادف في نفسه عزيمه كبيره .. رفض نورة له صح انه حطمه لكن هو اقوى من رفضها له .. لازم يعرف سببها .. لانه يحبها من قلبه وما يبا يخسرها .. وقرر انه يوصللها لو على قص رقبته .. وحط وعد بينه وبين نفسه انه يوصللها واللا هو مب قد هالحب وانه انسان ضعيف .. وهو مايحب انه يشوف نفسه بهالصورة ..

نورة كل ليله في صراع مع نفسها .. حبت هالانسان بس ماتروم تاخذه هذي فكرتها .. هلها هم الوحيدين الي يعرفون السبب ..
بالذات يوم عرفت نورة انهم ردوا على هادف زادت النار في صدرها .. وكل ليله تتعذب وتصيح .. نورة بدت تحس بهادف .. حست انه صدق يباها .. بدت احداث اترد اتعيد نفسها وتذكر يوم كانوا في مركز الجوازات الحادث المستشفى كل شي مر على ذهنها مثل الشريط وانتبهت لنظراته واسلوبه بس هيه فهمت هالشي متاخر ..
غفت عين نورة .. وعلى الساعه 2 في الليل .. رن تيلفونها ..
نشت نورة هيه زايغه .. اتشوف الرقم .. وتقول في خاطرها
نورة ( هذا رقم غريب . شو اسوي ارد واللا لا؟؟ ياربي اخاف هالرغدي فصول مستوي به شي ومتصل .. تمت ترمس عمرها لين ما ردت على اخر شي .. )
نورة وهيه صوتها متغير من الصياح : الوو..
(.....) : السلام عليج
نورة وهيه زايغه : منو معاي ؟؟
(......) : قبل كل شي توعديني انج تسمعيني وماتسكرين لين ما اخلص كلامي ..
نورة بدت تعصب : اخوي قول شوعندك ومافي داعي اتطول في الكلام ..
(.....) : نورة ...
نورة اهني بطلت عيونها من قال اسمها .. فز قلبها وحست انه هذا هادف .. هو ما غيره
سكتت نورة وقامت عينها اتدمع ما قدرت اترد عليه
هادف : نورة .. انا هادف وادري انج عرفتيني .. قبل كل شي اسمحي لي اني اتصلت بج ... ادري انج ممكن تكرهيني من هالحركه .. لكن انا قلبي محروق قلبي شاب ضوو وانتي بعيد عني .. ورفضج قطعني مثل السجاجيين ليش يا نورة ليش ؟
نورة ساكته قام صوتها في الصياح يعلا ويعلا .. ماقدرت تكتم في داخلها اكثر من جي ..
هادف : نورة ليش اتصيحين هالكثر اتصالي بج ضيق بج .. والله العظيم يا نورة اني ما اسوي شي يضرج .. امي اتصلت بامج ورمستها وامج ردت عليها نفس الشي بالرفض مع اني ما كنت ابا حد يعرف .. وخذت امي رقمج عشان تتصل بج واترمسج لكن انا خذت الرقم من غير ما حد يدري .. لاني انا ابا اكلمج ابا اسمع رايج انتي .. مهما كان الي سويته غلط لكن ما دام هالشي هو الي بيجمعني فيج انا راضي به لو على موتي
.. نورة كل هذا صاخه اتصيح اتفاجأت بكلامه امها ما قالت لها شي عن هالسالفه ..
حاولت نورة تمسك عمرها شوي ..
نورة : هادف انا رفضتك عشان شي خاص فيني .. ارجوك لا تفهمني غلط لكن غصب عني ..
هادف وبدا يتفاعل مع الموضوع : شو الي غصب عنج قولي .. نورة لا تذبحيني بسكاتج ارمسي .. قولي شو الي في خاطرج تدرين شي انا احبج لو تقدرين هالكلمه ما بتسكتين . اذا انتي ما تحبيني ارمسي .. ما بنسحب بهدوء
نورة مستغربه من اسلوب هادف وياها ... وانصدمت اكثر من جرأته اول انسان يطوف عليها بهالاسلوب ...
نورة وهيه تشهق وتصيح : انته مب فاهم شي بس لاتظلمني بكلامك .. ماحد حاس فيني ولا حد بيحس
هادف وهو معصب : شو ما حد يحس فيج انتي رمستي اصلا عشان انا ما احس فيج .. نورة استهدي بالله وقولي ..
نورة زادت في صياحها وتعبها .. هادف حس انه وايد قسى عليها غصب عنه من فرط حبه لها .. وماتحمل فكره الرفض من صوبها
هادف حاول يهدي نفسه : نورة انا آسف على اسلوبي بس والله من القهر الي فيني .. نورة دخيلج ارمسي .. اهدي وارتاحي وارمسي وصدقيني من عقبها ما بأذيج بشي بس قولي لي اسبابج .
نورة : مااقدر مااقدر خلاص هادف ارجوك خلني في حالي .. (وتمت تصيح نورة وتحس انه نفسها بينقطع )
هادف خاف وحس انه ضغط عليها لكن مب بيده ما يبا يخسرها ..
هادف : خلاص نورة انا اسف والله اسف انتي اهدي وارتاحي .. الله يخليج ما ابا ضميري يانبني .. ارقدي خلاص ما ابا شي ..
نورة : بيي يووم وبتعرف كل شي ويمكن تعذرني شي يمنعني من اني اعيش حالي حال هالبنات ..
نورة استمرت في صياحها لين ماهادف سكر التلفون ما قدر يتحمل يسمعها وهيه تصيح لانه يتقطع في داخله .. ومب مستعوب في كلامها تم الخوف في قلبه .. مايعرف معنى لكلام نورة ..

ياترى شو تتوقعون يكون في نورة ؟؟؟

وشو رده فعل هادف من بعد كلام نورة هذا ؟؟ هل بيرد يكلمها واللا لاء ؟؟</font>