<font color='#000000'><p align=center>السلام عليكم ورحمة الله وبركاته
اليوم أخواني يايبتلكم قصة حمد بوعوانة المنصوري..
الوالد حميد بن حمد بن صالح بن ثامر بن سعيج بوعوانة المنصوري من محضر بوعوانة من محاضر ليوا التي ولد فيها عام 1925 وأسستها عايلته وسكنتها من سنيين طويلة ، وهي ألحين تسكنها أسرته وأسر كثيرة من أبناء عمه من آل بوعوانة من قبيلة المناصير المعروفة والعريقة في النسـب ..
نبتدي حكـــــــاية هذا الريــال وإن شاء الله رات تسترجعون ذكريات وتكتشفون أشيــاء وايده ماعرفتوها قبــل ..
يبتدي حكايته وهو يقــول :
نحن من آل ثامر وجدنا هو ثامر بن سعيد من آل بورحمة من قبيلة المناصير وأكثر ناس يخصونا من المناصير هم آل سالمين ، وجدنا ثامر ياب صالح وعبدالله وبريد وحميد وسعيد . ونحن نبزنا (لقبنا ) بوعوانة لأنه أهلنا هم أول من زرع في هذا اليو الذي كانت فيه شجرة نخيـل طويلة وتسمى عوانة ويوم زرعوه نخل صار محضر وسموه ع ذيك العوانة وزرعوه حتى صارت النخل فيه مائة نخلة وهي لبويه وإخوانه ، لأن الأول ماشي مكاين تسحب اتلماي مثل الحينه وكانوا يسقون بيدينهم بدلو وكانوا يزرعون كل سنة اربع أو خمس صروم ( الصرمة هي فسيلة النخلة ) وكانوا هلنا يحضرون بعوانةكل مقيض ، واتلمقيض ايينا من يبدا الحيا أول ماتظهر النييوم (النجوم) مثل نيم الثريا ونقيض على النخل ونتم شهر أربعة وخمسة وسات (السادس) لين مايحين الوسمي وهو وقت الأصفري وهو أول برد الشتاء ووقتها يسيرون هلنا لبوظبي ويكدون للعيشة لأننا ماكان عندنا حلال وايد ، وكانت حياتنا وسكنـا أكثر شي فبوظبي وكانوا هلنا يسيرون الغوص وأنا لحقت على الغوص ودشيت ويه أبويه سنتين مع قوم الحمراني وكنت مرافق لبويه واشتغلت تباب وكنا نلقط القماش الصغير ونبيعه وكانت هي حاصلتنا من الغوص .
كانت حياتنا وعيشت أهلنا عيشت بدو في بوشهم وحلهم وترحالهم وحياتهم كلها ومن نحن فروخ ونحن نعيش بين بوظبي وليوا وقضينا فيها طفولتنا وشبابنا، ويوم صرنا رجال استوت شركات البترول واشتغلنا فيها من الخمسينات من أول مايت الشركات وكان أول شغلي في مشهور التي سكنت فيها شركة أبيس الي صار اسمها أددنوك وأنا اشتغلت معاهم من سنة ستين إلى سنة واحد وسبعين في المسح البترولي والمسح الجيولوجي ومسحنا حدود أبوظبي لين دبي والعين وحدود عمان والسعودية وفي الغرب مناطق بترول خالية ، وكنا نشتغل في الينوب في أماكن سوينا فيها رقوق (منصات حفـر للبترول) من أم الزمول إلى بن مويزه، وبعد شهور انتقلنا إلى طريف وتميت فيها سنتين ثلاث وفي عام 1960 اشتغلت في أدكو في المسح الجيولوجي وكانوا يمدون وايرات (أسلاك) ويمغطونها ونمشي عليها وكنت مسؤول عن عشرين عامل من الصبح لين المسـا وكنا نزرع الدينمت في الرمل وبعد التفجيـر نصور الحفر وكان فيه واحد إنجليزي يصور وأنا معاه في غسيل الأفلام واشتغلت في سنة 1962 دريول (سايق) طلب ومسؤول على العمال أوديهم وأييبهم بالموتر (السيارة) وبعدين اشتغلت في النقل في السيارات الكبار سفري وكنا نسافر لطريف وكانت الدروب كلها رمول وتميـت في هالشغلة لين الاتحـاد سنة 1971 وبعدها اشتغلت مدة خمس سنوات في شركات حفر الرقوق(الآبار)، وفي أواخر السبعينات اشتغلت في ديوان سمو ممثل الحاكم في المنطقة الغربية الشيخ محمد بن بطي آل حامد واشتغلت مسؤول لجنة الأراضي وبعدها صرت مسؤول ومراقب قسم الزراعة وبعدها صرت عضو لجنة طلبات الأراضي الخـاصة بالمزارع والســكن ..
الجـــزء الأول
(كشف دلالات أسمــاء الأماكن وملامح حياة الماضـــي)
ونـة خفووق .. </p></font>
رد مع اقتباس
مواقع النشر (المفضلة)